Kar Shivaa kumə lə Davitə
16
War sa taŋanti Davitə pi tsa mə ghən hum pi tsa va ki na, mbaʼ Shiva ntsaa ghəra sləni va kaa Mefibushet səəkiy ta kumə li. Lə kwantəmcahi bakə, lə shiy tə hum shi niy nza na: Peŋ bələku bələku bakə, mbaʼ gatuw bələku, sa tati məndi tə reziŋ tsa ghuli ghuli tsa, mbaʼ ya fəə təhə həghəli bələku, mbaʼ tay kwa pəhər kutiŋ. 2 Ma kə mazə kaa ngəci sa nay na lə shi va na: «Ta wa dza gha lə shivaa?» Kə. Ma kə ntsa va na: «Nza mbəzli kiy ghyi tsa mazə dza mə kwantəmcahi niy nə ya, ma kar peŋ lə ya fəhi na, nza ka sawji mazə zəmə shi, tay na, nza mbəzliy dzaa dalishi va dza dzar mbə gamba sa tsava,» kə. 3 Ma kə mazə diɓa na: «Kuma na Mefibushet jijiy Sawul ntsa gha dikə tsa na ci shəki?» kə. «Mbə məlmə Zheruzalem nziyiy na. “Nanay, ta zhanavəra mazə tsa jijira dza ka Izərayel” kə,» kə Shiba. 4 Ma kə mazə kaa Shiba ki na: «Ya nima shi Mefibushetiy, kaa ngəŋa ndaŋashee,» kə. Ma kə Shiba na: «A vanaɗa tsəfəkura kwa kuma gha mazə ndə sləkəra, ya humɓay, mənɗa tə gha wuzə hur,» kə.Shimey ti kuma slini kaa Davitə
5 Ma sa tsəhiy mazə Davitə geʼi lə məlmə Bahurim ki na, mbaʼ tsahuti ndə səvəriy mbə məlmə va, Shimey, kə məndi kaa slən tsa ci, zəghu Gera niy nza na, takə tsa kutiŋ tsa niy nza sa ci lə Sawul. Dza na ka ti kuma slini kaa Davitə. 6 Ya tsəgha niy nza mbəzli ɗaŋ, mbaʼ ka sawji mbə dza tar kwa zleɓi lə tar kwa bəzəmə Davitə ki na, war ə ghəciy pəʼu kar Davitə lə ka sləni ci lə hərezli. 7 War ə ghəciy tanci kuma slini, ma kə na: «Mbala, mbala sa gəmgəm tsa tsa, ndə bəku mbəzli tsa. 8 Əə wa Kwa sləkəpə shi mbəzli kiy ghyi tsa Sawul tə gha, sa bakwantishi gha, mbaʼ gha mbərəhu mazə tsa ci. Ava Kwa sləkəpə ɓanavə mazə kaa zəghu gha Abəsaluŋ. Nanay, mbə sa ngəraʼu nza gha na na gha, sa nza nay, ndə bəku mbəzli nza gha,» kə. 9 Ma kə Avishay tsa nza mbəghiy vaa Seruya kaa mazə na: «Tawa zlayi məndi kiri tsa kərəta kuma ci tsaa ti kuma slini kaa ngəŋa tay mazə ndə sləkəra? Zlara ee dzaa slanti ghən ti,» kə. 10 Ma kə Davitə kaa ngəci na: «A kuma ghuy mbə kumee ghuy ndərazhi Seruya ni tay? Sa tira ntsa tsa kuma sliniy, nda Kwa sləkəpə nə na: “mbala tsərə Davitə,” kə kaa ngəciaa? A ntsaa dza ni: “Tawa məni gha tsəghaa?” kə kaa ngəci sanaa?» kə. 11 Ma kə Davitə kaa kar Avishay lə mbəzliy ghəranci sləni gwanashi ki na: «Nay gha zəghuee yakee ka ɗi pəəslira kiy, tərə na war ntsa ghəci ntsa mbə takə tsa Beŋzhameŋ na. Kwa sləkəpə kə gəzanci tira kuma slini vay, zlayim a ghəci tsərəɗa. 12 Nda nza hur tsa Kwa sləkəpə zhanta tə ya sa ka na nata kuma kənee, mbaʼ mbaranti kuma slini ci va ka təfə miyaa?» kə.
13 Ka nuw kwal tsa shi kar Davitə lə mbəzli ci na, war ə Shimey dzar vəgha hum pi tsa va vəgha shi kuraku. War kuma slini ci va ghəciy ti, ka pəʼushi lə hərezli, ka ngərə hiɗiy dzəkən shi. 14 Dzəghwa kar mazə lə mbəzli ci va gwanashi mbaʼ ghəshi tsəhəshi miy həl Zhurdeŋ ki, kup ghəshi tashi, dza ghəshi ka dəkəva.
Hushay tsəhiy va Abəsaluŋ
15 Dzəghwa ki, mbaʼ kar Abəsaluŋ lə ka Izərayel ɗaŋ dzashiy dzəmbə məlmə Zheruzalem. Kwasəbəshi niy nza Ahitufel kuraku. 16 Ma sa tsəhiy Hushay ndə ka Arki tsaa canci kuma va kaa Davitə vəgha Abəsaluŋ ki na, dza na ka gəzanci kuma zlaŋ zlaŋ: «Bitə kə piy tsa mazə, bitə kə piy tsa mazə,» kə. 17 Ma kə Abəsaluŋ kaa ngəci na: «Tsəgha kəray nziy tsa ghuy va wəzə tsa lə madigaŋa na? Tawa dzaŋa ma gha kwasəbə madigaŋaa?» kə. 18 Ma kə Hushay kaa ngəci na: «Yən mbə nuw ciw. Na neyiy, dza kwa bəla ntsa təravə Kwa sləkəpə ghəshi lə mbəzli mbə hulfə ka Izərayel gwanashi ta məni mazə nzee. Kwasəbə gha dzee nza. 19 Talay, a ndə nza gha, gha sa dzee tsa ta ghəranci sləniaa? Zəghu madigara tsa va gha sa? Njasa niy ghəree va sləni kaa dəŋay, tsəgha dzee ta ghəraŋa sləni kuraku,» kə.
Kumaa dzəkən kar Abəsaluŋ lə miʼi Davitə
20 Liy hum ki, ma kə Abəsaluŋ kaa Ahitufel na: «Nighətim kuma dza ghummə ta məni kwa jipə ghuy,» kə. 21 Ma kə Ahitufel kaa ngəci na: «Mbala ta həni lə miʼi dəŋa va tar bəla zlashi na kiy ghyi ta ndəghu ghyi tsa ci. Sa ka gha mənti tsəghay, ta sənay dza ka Izərayel gwanashi, a gha sawahu dəŋa təruŋ, kə ghəshi. Ghalaɓay, ta kumavə bərci dza mbəzli kwasəbə gha gwanashi,» kə. 22 Dza məndi ki mbaʼ məndi lanati cikə gamtaʼwal kaa Abəsaluŋ mə bela tə ghən ciki tsa mazə, mbaʼ Abəsaluŋ hənəhu həni mbəɓa lə miʼi diy, kwa kuma ka Izərayel gwanashi.
23 Ghala vəghu tsa va, mbaʼ kə Ahitufel ɓəkə zəzə kumay, njasa nza na Hiyala gəzəkə kuma dəʼu ghən tsa nza ka məndiy nighəti. Njasa niy zləɓa Davitə va kuma canci Ahitufeliy, tsəgha niy zləɓa Abəsaluŋ kuraku.