Abəsaluŋ pəla kwal tsaa məniy ka mazə ka Izərayel
15
Liy hum shi va ki na, dza Abəsaluŋ mbaʼ pəlavə muwta gəduw ci, mbaʼ gədewesli, mbaʼ mbəzli cifəmətsəkə ta kəsli bali kwa kuma muwta gəduw ci va. 2 Pəətə mekishi ka naa səvəriy, mbaʼ dzaa gariy, kwa kwal tsaa dzəmbə məlmə. Nay ma na ndəə dza va mazə ta har ndəə dzəti nguviy, garə ka naa garəti, ka ɗuw və: «Mbə nama məlmə səəkə ghaa?» kə. Gəzanakə ma ntsa va: «Mbə takə tsa tsaʼ tsa nzee mbə hulfə ka Izərayel,» kiy, 3 avanta kuma ka naa gəzanci: «Nata kuma dza gha na ta har ndəə dzəti nguvə ti gha sanay, kuma wuzə, lə kwal tsa nzə nuwti gha, ə na na nza na kiy ndə tiɓa dzaa fa kuma gha na kwa dəgha mazuw,» ka naa ni. 4 Ma kəə ni diɓa na: «A isə, mbala yən niy nza naa ndə sla nguvə tsa tə hiɗi ni nzay, vəya niy dza mbəzliy ɗi sla nguvə tə hiɗi ni gwanashiy səəkə ta sla nguvəshi nza, kee dzay mbaʼee slanantishi nguvə lə kwal,» kəə ni. 5 Mbaʼ kə ndə kəətəghəvay ta tsəfəku kwa kuma ciy, ka naa dza baŋ kəsəvə tə dəvə ci, mbaʼ hutəməvə. 6 War tsəgha niy məni Abəsaluŋ lə ka Izərayeləə niy dza va mazə ta har mbəzli dzəti nguvə gwanashi. Mbə məni kuma ci va tsəgha na ki na, war ə ghəciy ngəɗi ka Izərayel dzəti vəgha ci.7 Liy hum piya faɗə ki, ma kə Abəsaluŋ kaa mazə na: «Ndara kwal ee dzaa dzəmbə məlmə Hebruŋ ta mananta kumaa niy gəzanakee məni kaa Kwa sləkəpə. 8 Sa nza na ghala vəghu tsaa niy nzee va mbə məlmə Geshur tə hiɗi Shiriy, ee niy gəzanakə yən ndə sləni tsa gha: “Mbaʼ pə gha dzaa zhinəghəraa zhimbə məlmə Zheruzalemiy, ta dza dzee ta tsəfəku kwa kuma gha,” pən niy ni kaa ngəta,» kə. 9 «Mbala lə zərkə,» kə mazə kaa ngəci. Mbaʼ Abəsaluŋ dzay dzəmbə məlmə Hebruŋ ki. 10 Dza na mbaʼ ghughunashi mbəzli dzar mbə takəhi ka Izərayel gwanashi. Ma kə ghəshi dzaa ni na: «Sa ka ghuy favə gaka viy təlimiy, nza ghuy gəzə zlaŋ zlaŋ: “A Abəsaluŋ zhəghiy ka mazə ka Izərayel mbə məlmə Hebruŋ,” pə ghuy dzaa ni,» kə ghəshi dzaa ni. 11 Mbəzli diwiy diwiy bakə niy harvə Abəsaluŋ mbə məlmə Zheruzalem ta dza ghəshi kwasəbə. Mbəzli vay, ə niy pəhay ghəshi gwaʼa tsəgha, niy zəzəti nahuti kuma ghəshi mbə nefer shiw. Niy sənata kuma pəhəti na ghəshiw.
12 Ma ghəci mbə slasla shiy kaa Hiyala ki na, dza na mbaʼ ghunay ndəə dzəmbə məlmə Gilu, ta har Ahitufel ndə ka Gilu, ntsaa ci kuma kaa mazə Davitə. Ghalaɓa tsəgha ki na, war mbə mətsəhəva mbəzli tə səəbə ci, tsəgha kuma pəhəti na va məni nzə kuma bərci diɓa.
Mazə Davitə Huy səvəri mbə məlmə Zheruzalem va Abəsaluŋ
13 Dzəghwa mbaʼ ndə səəkəə gəzanci kaa Davitə: «A ka Izərayel zhəghanavə nefer shi kaa Abəsaluŋ,» kə. 14 Sa favə Davitə tsəgha ki, ma kə kaa ka sləni ci niy nza na li shi mbə məlmə Zheruzalem gwanashi na: «Ə pə ghummə hummə, ka dza Abəsaluŋ zlammuw, ta bakwantəmmə dza na. Diva ghummə kala tsəghay, sənzənva dza naa səəkəə kəsammə, mbaʼ pəslambə mbə ghummə, ka bəku mbəzli mbə məlmə gwanashi,» kə. 15 Ma kə mbəzliy ghəranci sləni kaa mazə na: «Ya a kuma ɗi gha məni gha mazə tsaa sləkəŋiyiy, kwasəbə gha nza ghiy,» kə ghəshi. 16 Dza mazə ki, ka səvəriy mbə Zheruzalem lə səɗa, ghəshi lə mbəzli kiy ghyi tsa ci gwanashi. Mbaʼ zlashi kwataka miʼi ci niy nza vəgha bəla məŋ, ta ndəghu pi tsa kiy ghyi tsa ci. 17 Ghala vəghu tsa səvəri mazə va mbə Zheruzalem lə mbəzli kwasəbə gwanashi ki na, mbaʼ ghəshi garəshi geʼi lə kwa kərni ciki. 18 Dza ka sləni ci gwanashi ka dzar kwa kuma ci, mbaʼ ka sawjiy ndəghu gwanashi: Ka kəretə lə ka Peletə, mbaʼ ka sawji diwiy diwiy kwaŋ ni va niy nza kwasəbə mbə məlmə Gatə gwanashi. War ə ghəshiy dzar kwa kuma mazə Davitə. 19 Ma kə mazə kaa Itay dikə tsa ka sawji ka Gatə ki na: «Tawa nuwŋiy gha lə ghataa? Wəzəɓa zhəghətəvaŋa gha na, a gha dza ta nziyŋa kwasəbə yəwun mazə. Sa nza nay, ndə səəkə səəkə nza gha tikə, əə hukəvaŋa gha səəkə tə hiɗi gha ya gha. 20 Mbəra mbəra gha səəkəə dzəvəghee kiy, tawa dzee zhiniy mbahəhuŋa war ghula ta dadaŋərə kwasəbee kiyaa? Sanay, sənay ya nda kwama dzee ta dzaw. Pəməvə mbəzliy səəkə kwasəbə gha a gha zhəghətəvaŋa li shiy dzəmbə məlmə. Nza Kwa sləkəpə məntəŋa wəzə hur, mbaʼ nziyta lə gha ya hum,» kə. 21 Ma kə Itay kaa mazə na: «Ava Kwa sləkəpə tiɓa ka favə, tiɓa gha ka favə gha mazə ndə sləkəra. Dzəghwa tə pi tsa dza gha ta nza gha mazə ndə sləkəra, ya ta məti na, ya ta nza tə ghumə nay, tiɓa dzee nza yən ndə sləni tsa gha kuraku,» kə. 22 Ma kə Davitə kaa ngəci na: «Njana nza na tsəghay, lar mbadzam,» kə. Dza Itay ndə ka Gatə ka dzar lə ka sawji ci mbaʼ mbəzli kiy ghyi tsa shi gwanashi kwa kuma mazə ki. 23 Ghala vəghu tsaa dzar mbəzli va kwa kuma maziy, war ə niy wahə mbəzli tə hiɗi Izərayel tərəŋu gwanashi. Dza kar mazə lə mbəzli kwasəbə va mbaʼ ghəshi taŋəshi dzəvəri tə hel Sedəruŋ, mbaʼ ghəshi ɓəvə kwal tsaa dzəti gamba. 24 Kar Saduk lə Abiyatar ka ta Hiyalay, kwasəbəshi niy nza ghəshi kuraku, ghəshi lə mbəzli mbə takə tsa Levi gwanashi. Mbəzli mbə takə tsa Levi va niy ɓə na sərndəkə sla kiri tsa Hiyala, mbaʼ ghəshi səəkəə fiy. Dza Abiyatar, ka sla sla shiy kaa Hiyala paʼa ghala vəghu tsa kərəshi mbəzli lə səvərishi mbə məlmə gwanashi. 25 Liy hum ki, ma kə mazə kaa Saduk na: «Zhinəghə sərndəkə tsa Hyalaa dzəmbə məlmə. Mbaʼ kə Kwa sləkəpə ɗi mənɗa wuzə huriy, ta zhinikəra dza na, mbaʼ zhiniy ndara nighə sərndəkə tsa va lə pi tsa nza na va mbə. 26 Ma mbaʼ kə ni: “Ka ɗi kuma ghee ghulaw,” kiy, nza ghənzə mənti njasa ɗi na lə ya,» kə. 27 Zhini ma kə mazə kaa Saduk diɓa na: «A gha nata kumaa məniva ɓay? Ə pə ghaa zhəghəvaa zhimbə məlmə a ghuy dzaa nziyŋuy guŋəŋuy, ghuy lə zəghu gha Ahimas, mbaʼ kar Abiyatar lə zəghu ci Zhunataŋ. Kwasəbə ghuy na ndərazhi ghuy va bakə ni. 28 Ta na tsee ghəniy, dzar mbə gamba va dzee nziyra njasaa dzar vəgha həl zhurdeŋ, ka ndəghə paʼ va vəghu tsa dza ghuy ɓəkəra nuwur tsa kumaaa məniva,» kə. 29 Dza kar Saduk lə Abiyatar mbaʼ ghəshi zhinəghə sərndəkə tsa Hiyala vaa zhimbə məlmə Zheruzalem, mbaʼ ghəshi nziyshi mbəɓa.
Davitə ghunay Hushay ta nighə kuma məni Abəsaluŋ
30 Dza Davitə ki, ka dzəmə vəgha hum pi tsa har məndi vaa hum pi Ulivə lə səɗa. War ə ghəciy wahə, mbaʼ pəlambə shiy mbə kuma ci. Mbəzliy niy dzəmə kwasəbə gwanashi kuraku na, war ə ghəshiy wahə, lə shiy mbə kuma shi. 31 Mbaʼ məndi səəkəə gəzanci kaa Davitə: «Kwasəbə mbəzliy pəhəti kuma gəmgəm na va ghəshi lə Abəsaluŋ na Ahitufel, ntsaa ciŋa kuma va,» kə məndi kaa ngəci. Sa favə Davitə kuma va ki, ma kə zlaŋ zlaŋ na: «A Kwa sləkəpə, əə cəʼuŋee a gha zhəghanti kuma dza Ahitufel ci kaa Abəsaluŋ ka kuma kwa zleɓi na,» kə. 32 Ma sa tsəhiy Davitə mə ghən hum pi tsa va, geʼi lə pi tsa ka məndi vaa tsəfəku kwa kuma Hiyala ki na, mbaʼ nay Hushay ndə ka Arəkə, madigay tsaa canci kuma mbə səəkə ta kumə li, sliku sliku kubaŋ tsa kən ghən ci, mbaʼ kurbi mbə ghən ci. 33 Ma kə Davitə kaa ngəci na: «Ka nura gha ma, Shiy tiɓa gha dzaa kəətitəra li shiw. 34 Wəzəɓa dza ghaa zhighəvaa zhimbə məlmə na, nza gha dzaa gəzanci kaa Abəsaluŋ: “Kaa ngəŋa dzee ta ghəra sləni mazə. Kwataŋay, kaa dəŋa niy ghəree sləni. Nanay, kaa ngəŋa dzee ta ghəra sləni,” pə gha. Ghalaɓay ta kəətitəra dza gha sa dza ghaa ci kuma ghənghən lə na dza Ahitufel canci. 35 Zhini diɓay, kwasəbə gha dza kar Saduk lə Abiyatar, ka ta Hyalaa nza. Ya nama kuma dza ghaa favə kiy ghyi tsa maziy, nza gha səəkəə zhananavəshi. 36 Kwasəbəshi na ndərazhi shi va bakə ni, kar Ahimas tsa Saduk ghəshi lə Zhunataŋ tsa Abiyatar. Ghəshi pə ghuy dzaa ghuni ta zhinira kuma dza ghuy favə gwanata,» kə. 37 Dzəghwa Hushay madigay tsaa canci kuma kaa Davitə ka zhay zhimə məlmə Zheruzalem ki. Tsəhə na na, gurəm lə Abəsaluŋ ghəci mbə dzəmbə məlmə va kuraku.