2 Samuwel 14

Abəsaluŋ zhəghəkəvay dzəmbə məlmə Zheruzalem

Dzəghwa mbaʼ Zhəwabə zəghu Seruya fəti ghən, mbə zəzə na mazə dzəkən zəghu ci Abəsaluŋ, kə. 2 Dza na mbaʼ ghunay ndə ta pəlanakə maliy sənata kuma mbə məlmə Tekuwa. Ma kə kaa mali va sa səəkəta na na: «Mbala məntəvaŋa njasa mətiy ndə va gha, mbaʼ gha pakən kubeŋer ka məndiy təhuni mbəri li shi, kala vərə ma in gha. War nja mali mətiy ndə və, mbaʼ hita mbə təhuni ci ghala mbəradzəta pə gha dzaa məntəvaŋa. 3 Sa ka gha dzay, mbaʼ gha dzaa kəsay mazə, nza gha gəzanci kuma dzee naa gəzaŋa,» kə kaa ngəta. Dza na mbaʼ gəzanta kuma kaa mali va njasa dza na ta gəzə kaa mazə. 4 Dza mali ka Tekuwa va ki, mbaʼ dzaa kəsay mazə. Kə tsəfəku tsəfəkuta kwa kuma ci, gaʼ kuma nzə mbə hiɗi, ma kə kaa ngəci na: «Titihu kəətitəra mazə,» kə. 5 «A shiy mənishia?» kə mazə kaa ngəta. Ma kə na: «A zara mətiy, mali mbəri nzee. 6 Bakə niy nza ndərazhi vəya yən kwa sləni gha. Dza ghəshi mbaʼ ghəshi həərərshi tə gamba, sa niy kama ndə tiɓa ta təhəshi na, mbaʼ tsahwuti paslanti tsahuti. 7 Sa dza mbəzli mbə takə tsa shiy, mbaʼ ghəshi ɓasakənvashi kənee yən kwa sləni gha. “Kəsavəŋiy tsaa pəəsliti zəmbəghiy va a ghiy pəəsliti ta wa shi zəmbəghiy ti. Sa ka ghiy pəəslitiy, ka dza naa kumavə zəmə ghyiw,” kə ghəshi. Mbaʼ kə ghəshi mənti tsəgha kiy, ɗekəɗekə dza ghəshiy zanti nee kumaa niy tərə juw na gar fiy ghən tseyee gəzliŋ ti. Ta zanti slən tsa zara dza ghəshi tsəgha, ka dza ntsa kwa miy dəgha ciy tərə ghulaw,» kə. 8 Sa fanti mazə kuma va ki, ma kə kaa ngəta na: «Mbalaa jighyi, ta gəzanshi dzee kaa mbəzli nza ghəshi dza ta nighəə dzəkən kuma gha va,» kə. 9 Ma kə Mali va kaa ngəci na: «Ya fəti nay mazə ndə sləkəray, kənee lə mbəzli kiy ghyi tsee kə dzaa nza. Əntaa ghənzə nza ya kən gha, ya kən mazə tsa məni gha ma,» kə. 10 Ma kə mazə kaa ngəta na: «Ntsaa dzaa zhiniy gəzəŋa kumaa dzəkən kuma vay, nza gha pəməkəra tikə, ka dza naa zhiniy gagaŋaw,» kə.

11 Ma kə mali va kaa ngəci diɓa na: «Əə cəʼuŋee a gha hamiyambə slən tsa Hiyala gha Kwa sləkəpə dzəmbə kuma na mazə. Ghalaɓay, ka dza ntsaa ɗi wa shi kwa taŋa zəghwee va mətiy mbay pəəsli tsaa tərə va ta mətsahay ngəraʼu tsa kənee tsaw,» kə. Ma kə mazə kaa ngəta na: «Ava Kwa sləkəpə tiɓa ka favə, ya səəti kutiŋiy, ka ndəŋwata ndə mbə ghən tsa zəghu ghaw,» kə. 12 Ma kə mali va diɓa na: «Ndara kwal yən kwa sləni gha ee ɗuwti nahuti kuma va gha diɓa diaa mazə ndə sləkəra,» kə. «Ca ɗuw,» kə mazə. 13 Ma kə ki na: «Ya sa nza na tsəgha kiy maziy, tawa məni gha shiy nja shi va kaa mbəzli Hiyala kiyaa? Səvəri mbə kuma gəzəkə gha na sana kiy, a gha ɓanavə fəti kaa ghən tsa gha, sa nza na, mbaʼ gha tahanti Abəsaluŋ, kala ɓanavə kwal gha ta zhəghəkəvay ghəci. 14 Njasa ka yam vaa shəfəʼushi sa ka məndiy shəkatishi tə hiɗi kala zhini məndiy watsəvəshiy, tsəgha dza ghummə ta zammə tə hiɗi, ka zhikəmmə ghummə ghulaw. A na Abəsaluŋ kiy, kutita na kuma zəzəti Hyalaa dzəkən, ghənghən lə na gha zəzə kuma. Ntsa tahanti məndi kərakiy, ka ɗi na ghəciy nziyiy kərakə liw. 15 Sa nay gha tsa yən səəkəra ta gəzaŋa kuma gəzəkee na sanay maziy, əə dzantəra mbəzli heree lə gəzə kuma. Ma pən mbə zəzə kumee ki na: “Wəzəɓa dzee na ta gəzanci kuma kaa mazə nda nza naa zləɓavə kuma dzee gəzanci yən kwa sləni ci,” pən. 16 Njasa zləɓavə gha va zləghukəvəriɗa yən kwa sləni gha mbə dəvə ntsaa niy ɗi vaa zantəra mbə hulfə mbəzli Hiyala ghummə lə zəghu yay, tsəgha dza ghaa zləɓavə kuma səəkee na ta gəzəŋa mazə. 17 Ta na navay maziy, avanta kumaa niy zəzətee: “Ya njaaɓay ta dəpəti nefer mbəzli dza kuma dza gha gha mazə tsaa sləkəraa gəzəkə, sa nza nay, nja ndə kwal tsa Hiyala nza gha, a gha sənata təhəvəri na wəzə na kuma lə na gəmgəm na” niy nə ya. Ava ghənzə na kumaa ɓəkəra va gha mazə, nza Hiyala gha Kwa sləkəpə nziyta lə gha,» kə mali va.

18 Ma kə mazə kaa mali va ki na: «Avee dzaa ɗuw kuma va ghay, əntaa gha mbə kuma ma,» kə. «ɗuw kuma gha mazə tsaa sləkəra,» kə. 19 Ma kə mazə ki na: «Zhəwabə mbə kuma gha na sa?» kə. Ma kə mali va na: «Ava gha tiɓa ka favə mazə ndə sləkəra, ndə tiɓaa dzəghway kən kuma gəzəkə gha gwanataw. Njasa gəzə gha vay Zhəwabə ndə sləni tsa gha ghunara na. Ghəci gəzara na kuma dzee səəkə ta gəzə gwanata yən kwa sləni gha. 20 Ta mbəə zhəghanti kumaa dzaa məniva mənti na tsəgha. Ta na na gha kiy ntsee dikə tsay, gwaʼ gwaʼa sənashi gha shiy məniva tə hiɗi. A gha sənata kuma nja ndə kwal Hiyala,» kə.

21 Liy hum ki na, mbaʼ mazə gəzanci kaa Zhəwabə: «Ee zləɓavə məni kuma ɗi gha va, mbala a gha dzaa pəməkə zəghuee Abəsaluŋ tikə,» kə. 22 Sa gəzəkə Davitə tsəgha ki na, dza Zhəwabə tsəfəku tsəfəkuy, gaʼ kuma ci mbə hiɗi, ka mananci usa. Ma kə na: «Ndatsiy, ee sənay a ghaa ɗi kumee yən ndə sləni tsa gha mazə ndə sləkəra. Sa nza nay, a gha zləɓavə məni kuma ɗee,» kə.

23 Liy hum ki na, mbaʼ Zhəwabə satiy, ka dzay dzəmbə məlmə Geshum, mbaʼ dzaa pəməkə Abəsaluŋ dzəmbə məlmə Zheruzalem. 24 Ma kə mazə na: «Mbala ghəciy dzakə ghyi tsa ci, ka səəkə ghəciy dzəghwa kumee ma,» kə. Dza Abəsaluŋ ki ka dzay dzakə ghyi tsa ci, kala dza maa dzəghwa kuma mazə.

Kar Davitə lə zəghu ci Abəsaluŋ sləkashi

25 Tə hiɗi ka Izərayel gwanashiy, niy nza ndə tiɓa ka təɓə nja Abəsaluŋuw, war ghəci niy gəzə məndi. Ghava na tə shiɗəshiɗə ci paʼa mbə ghən ciy niy nza huvə tiw. 26 Njasa səəkə piya niy sla na shiti mbə ghən ci, va sa ka ghəshiy nza shəndəkəshi. Sa ka məndiy bərkəti shəndəkə tsa shiti va lə kiluw tsaa niy fiy mazə ta bərkə shiyiy, kiluw bakə niy nza ghəshi. 27 Mahəkanə niy yavə Abəsaluŋ ndərazhiy zhər, mbaʼ zha kutiŋ, Tamar, kə məndi kaa slən tsa nzə. Zha ka təɓə təruŋ niy nza na.

28 Piya bakə niy mənti Abəsaluŋ mbə məlmə Zheruzalem kala səəkə ma ghəciy nza kwa kuma mazə. 29 Dza na tə nahuti vici mbaʼ ghunay ndə ta Haranci Zhəwabə, ta ghuni va mazə, kala zləɓa ma səəkə Zhəwabə dzakə ghyi tsa ci. Mbaʼ zhiniy ghunay ndə kwa baka səɗa, kala zləɓa səəkə ghəci diɓa. 30 Ma kə kaa mbəzliy ghəranci sləni ki na: «A ghuy sənata za Zhəwabə va zati na urzhə ti vəgha zee ɓay, mbalam ndətim ghu ti,» kə kaa ngəshi. Dza mbəzli va mbaʼ ghəshi dzaa mənti njasa gəzanakəshi na va. 31 Dza zhəwabə ki mbaʼ dzaa kəsay Abəsaluŋ kiy ghyi tsa ci, ma kə kaa ngəci na: «A shiy mənishi ndantəra ka sləni gha zeyaa?» kə kaa ngəci. 32 Ma kə Abəsaluŋ kaa ngəci na: «Yən ghunashi na ta ndi nzə, sa nza na mbaʼee ghunashi mbəzli ta harəŋa, ta ghuniŋa va mazə kala səəkə gha. Avanta kumaa niy ɗee gha dzaa gəzancira kaa mazə: “Tawa mawee səəkəra mbə məlmə Geshur kiyaa? Wəzəɓaa niy nziyree mbəɓa na. Əə ɗee gha ndara kwal tsaa dzəghwa kuma gha gha mazə nana. Mbaʼ kə fəti vəyay, mbaʼ gha pəəslitəra,” kə Abəsaluŋ, niy ɗee gha dzaa gəzanci,» kə Abəsaluŋ kaa Zhəwabə. 33 Dza Zhəwabə ki, mbaʼ dzaa zhananavə kuma gəzəkə Abəsaluŋ va kaa mazə. Dza mazə mbaʼ ghunashi mbəzli ta har Abəsaluŋ. Sa tsəhiy na na tsəfəku tsəfəkuy, gaʼ kuma ci mbə hiɗi kwa kuma mazə. Dza mazə mbaʼ hutəməvə.