Amənuŋ zəghu Davitə zləghuhu həni lə Tamar zhadiy
13
Liy hum kiy, Avanta kumaa mənita: A zəghu niy nza va Davitə, Abəsaluŋ, kə məndi kaa slən tsa ci, mbaʼ zhambəghiy niy nza tiɓa, ka təɓə ghənzə tərəŋu, Tamar kə məndi kaa slən tsa nzə. Dzəghwa mbaʼ tsahuti zədəshi niy nza tiɓa, Amənuŋ, kə məndi kaa slən tsa tsava, mbaʼ mawuti Tamar va ki. 2 War ə ɗi tsa ɗiti na va zhadiy vaa gagay mbə nəfə ci, paʼa ka təriy gurapiy va tsava ɗi. Ya gar ɗuw həni ghəci və na, caslakə ghəci niy nata kuma va. Zha vay, niy sənay zalə naw. 3 A madigay Amənuŋ tsa va niy nza tiɓa, Yunadab, kə məndi kaa slən tsa ci, tərəŋuy ghəci niy tsəhuliy. Zəghu Shimeya zədiy Davitə niy nza na. 4 Ma kə kaa Amənuŋ tə nahuti vici na: «Ana zəghu mazə, njasa nza shiy tiɓa ka səəŋa naŋee mbə kuma gha njasa səəkə vici. Nza ghaa gəzara kumaa səəŋa va ta na?» kə. Ma kə Amənuŋ kaa ngəci na: «Wa əə mawtee Tamar zhambəghiy zədirə Abəsaluŋ,» kə. 5 Ma kə Yunadab kaa ngəci na: «A pə gha məntiy: mbala həniŋa tə pi həni tsa gha, nza gha məntəvaŋa njasa nza gha gurapəŋa. Sa ka dəŋa səəkə ta nighəŋay, nza gha gəzanci: “Əə cəʼuŋee a gha ɓanavə kwal kaa zhadirə Tamar a ghənzə səəkəə tatəra shi zəmə. Tikə ɗee ghənzəə tarashi kwa mətsee, ka natee njasa tashi na. Nza ghənzə ndarashi dəʼu ghən tsa nzə ta zəməshee” pə gha dzaa ni kaa ngəci,» kə.6 Dza Amənuŋ ki, mbaʼ dzaa həniy, mbaʼ məntəvay njasa nza na gurapiy. Dza mazə mbaʼ tsəhiy ta nighə. Ma kə Amənuŋ kaa ngəci ki na: «Əə cəʼuŋee a gha ɓanavə kwal kaa zhadirə Tamar a ghənzə səəkəə tatəra gatuw bakə kwa mətsee, nza ghənzə ndara dəʼu ghən tsa nzə nzee zəmə,» kə. 7 Sa gəzanakə na tsəgha ki na, dza Davitə mbaʼ ghunay ndə a ghəci dzaa kəsata Tamar mbə ciki tsa nzə, nza ghəci gəzanta dza ta tanci shi zəmə kaa zədəta Amənuŋ kiy ghyi tsa ci. 8 Dza Tamar ki, mbaʼ dzaa kəsay zədəta Amənuŋ məhəni mbə ciki tsa ci. Dza na hwaɗə hwaɗivə ghupə, mbaʼ kuɓəti, mbaʼ ghəniti, taʼ tati gatuw kwa mətsə ci. 9 Dza na mbaʼ ɓəvə imbə ɗafa, hələɓə hələɓəvə, mbaʼ fəniy ta zəmə ghəci, kala zləɓa ma zəmə ghəci. Ma kə na: «Gəzanshim kaa mbəzli gwanashi a ghəshi dzəvərishi,» kə. Mbaʼ məndi gəzanshi kaa mbəzli, cəkeʼ ghəshi səvərishi. 10 Ma kə kaa Tamar ki na: «Ɓəra shi zəmə vaa səmbəə dzəvəvəgha pi həni tsee ee zəməshi,» kə.
Dza zha va ki mbaʼ ɓəvə gatuw tsa tati na va, mbaʼ dzəmbəta liy dzəmbə ciki tsa zədəta tsa va. 11 Ma ghənzə mbə ɓanci ta zəmə ghəci na, baŋ ghəci kəsəti. Ma kə kaa ngəta na: «Ndi a ghum həni zhadi,» kə. 12 «Aw Zədiw, ka zləghu həni gha lə ya ma. Kar məndiy məni gəla niva shiy mbə hulfə ka Izərayeluw. Ka pəʼu niva shi gəmgəm ni gha ma. 13 Sa ka ghum mənti niva shiy kiy, kwama dzee dza va haʼu tsaa dzaa nza kən yaa? Ya gha kiy, ntsa gəmgəm tsa dza məndiy fiyŋa mbə ka Izərayel. Wəzəɓa ɗuwəra gha na ta ɓəra ka mali gha va mazə. Ka dza naa ni aw kə kaa ngəŋaw,» kə. 14 Ma Amənuŋ na ci ki na, kala ɗi fa na zha va va kuma ghəci. Dza na mbaʼ kəsəvə lə bərci, mbaʼ zləghuvə həni li.
15 Liy hum sa hənəhu na həni li ki na, kala ɗi kuma nzə ghəci ya juw. Taŋ ɗi tsaa niy ɗiti na va ghəci zhiniy ndərəti. «Sati mbala tiɓa,» kə kaa ngəta. 16 Ma kə zha va na: «Nava tiɓaw, mbaʼ pə gha tahantəra tsəghay, a gha zhiniy mənti naa guranti kuma jikir na, taŋ kaa na məntəra gha na sənzənva,» kə. Kala ɗi ma fa na nzə va kuma ghəci. 17 Dza na daʼ haray ntsaa ghəranci sləni. Ma kə kaa ngəci na: «Mbahəghə zha na dzəvəri kiy ghyi tsee, a gha kalayra dəghee,» kə. 18 Dza ntsa va mbaʼ mbahəkəvəri zha va, mbaʼ kalay dəgha.
Lə kubaŋ kiyasə, sa ka ghyehi mazə nza kən ghən shi, ghəshi ghula ta sənay zal niy nza Tamar kən ghən tsa nzə. 19 Dza na mbaʼ slakwanti kubaŋ zha mazə tsa nzə va, ngər, ngərambə pəsər mbə ghən nzə, bəm faghwa dividiver kwa ghən nzə, ka dzata, kala ngumə lala. 20 Sa nata zəmbəghəta Abəsaluŋ tsəgha na, dza na ka ɗuw kuma və. Ma kə na: «Əə zləghuhu zədəŋa Amənuŋ həni lə gha shəkəna zhamə na? guŋəŋa pə gha nziyŋa, zədəŋa na. Ka səŋa kuma va ma,» kə. Dzəghwa Tamar ki, mbaʼ nziyta kiy ghyi tsa Abəsaluŋ zəmbəghəta, nja maliy səəkə ta zal. 21 Ma sa favə mazə Davitə kuma va gwanata na, mbaʼ nəfə tsa ci satiy təruŋ. [Ya tsəgha nzə ki na, kala gəzanci ma kuma ghəci kaa Amənuŋ sa nza na kwa taŋa zəghu ci ghəci niy nza, zhini təruŋ ghəci niy ɗi.ª] 22 Ma na Abəsaluŋ na ci kiy, niy gəzə kuma na ya kwa kwal kaa Amənuŋuw, aa niy fati ghəra ti. Sa niy zləghuhu na va həni lə Tamar zhambəghiy.
Abəsaluŋ pəhəti kuma ta pəəsli Amənuŋ
23 Piya bakə liy hum shi va ki na, mbaʼ ka təɗi səəbə tə təŋkesli tsəhəshi tə nahuti vici ta təɗi səbə tə teŋkesli Abəsaluŋ tə pi tsa har məndi vaa Baal-Hashur, vəgha məlmə Efrayim. Dzəghwa Abəsaluŋ mbaʼ harashi ndərazhi mazə gwanashi ta makwaghwa sləni va. 24 Dza na mbaʼ dzaa kəsay mazə Davitə. Ma kə kaa ngəci na: «Mbə təɗi səbə nza məndi tə teŋkeslee, va tsəgha səəkee ta harŋa ghuy lə ka sləni gha ta makwaghwa. Titihu zləɓavə səəkə ta mbə ghaa fati bama tə ya yən ndə sləni tsa gha,» kə. 25 Ma kə mazə kaa ngəci na: «Aw zəghu yaw, yaŋ pə gha, ka dza ghiy tsəhəŋiy gwanaŋiyəw. Shəndəkəta dza kuma kaʼuŋiy nza kən gha tsəgha,» kə. War ə Abəsaluŋ mbaɗə ta dza ghəci na, kala zləɓa ma ghəci. Kwataka miy sa təfanati na gwaʼa tsəgha. 26 Ma kə Abəsaluŋ kaa ngəci ki na: «Njana zləɓa ma gha dzay, gəzanci kaa zədirə Amənuŋ talatala nza ghəci tsəhiy,» kə. «Tawa ɗi gha ghəciy tsəhaa?» kə mazə. 27 War ə Abəsaluŋ mbaɗə ki. Dza mazə mbaʼ ɓanavə kwal kaa Amənuŋ ta dza ta makwaghwa va ghəshi lə nihuti ngwardiy gwanashi.
[Dzəghwa Abəsaluŋ ki, mbaʼ tati shiy təruŋ ta makwaghwa va njasa ka mazə ta shiy ta Makwaghwa.ª] 28 Dza na mbaʼ gəzanshi kuma kaa ka sləni ci ta məni ghəshi. Ma kə kaa ngəshi na: «Fə tə ghuy ghən wəzə ta Amənuŋ. Sa ka na ghyamtəvay va tay, ka vəshi ghəciy, war sa dzee ni “Dəʼum Amənuŋ,” pəniy, nza ghuy pəəsli. Əntaa her ghuy dza va pəəsli ci ma. Ta ɓəhu kuma tiɓa dzee mbə dəvee. Jihəkəvaŋuy tə ghuy, mbaʼ ghuy garənuy kwa zhər kwa zhər,» kə kaa ngəshi. 29 Dzəghwa ka sləni va mbaʼ ghəshi mənti njasa gəzanakəshi Abəsaluŋ va, mbaʼ ghəshi paslanti Amənuŋ. War sa nata niy tərə ndərazhi mazə gwanashi kuma va tsəgha na, mbərəkə ghəshi zlashi zəmə shiy, ya wa ndə na, war ka dzəmə kwantəmca ci nja gəduwª na ka huy.
30 Ghəshi ghulashi mbə kwal na, mbaʼ məndi səəkəə gəzanci kaa Davitə: «A Abəsaluŋ bakwanti ndərazhi gha gwanashi, tərə ndə tə ghumə mbə shi ya kutiŋəw,» kə məndi kaa ngəci. 31 Sa favə mazə tsəgha na, mbaʼ satiy slikuvəri kubeŋer ci, tim həniy dzar tə hiɗi. Dza ka sləni ci gwanashi mbaʼ ghəshi slakwanti ni shi kubeŋer, mbaʼ ghəshi gagarəshi tiɓa vəgha. 32 War ghəshi tsəgha ki, Ma kə Yunadab zəghu Shimeya zəmbəghiy Davitə na: «A mazə ndə sləkəra, əntaa gha ni gwanashi bakwanti məndi ndərazhi gha pə gha ma. Kwataka Amənuŋ na saa mətiy. Tə kuma gəzəkə Abəsaluŋiy, ghala fəca zləghuhu Amənuŋ va həni lə Tamar zhambəghiy niy pəhəti na kuma va. 33 Əntaa gha ni gwanashi bəkushi ndərazhi gha pə gha ki ma mazə ndə sləkəra ma. Amənuŋ kutiy na saa mətiy. 34 A na Abəsaluŋ na ciy, aa huy,» kə.
Sa nə ntsa fiy məndi ta nighə pi tsa kwa kwal tsaa səəkə, tsaʼ kə na, mbaʼ nashi mbəzli ɗaŋ mbə səəkə liy hum ci dza kwa bəla nza kəlaŋ va. [Dza na mbaʼ dzaa gəzanci kaa mazə. Ma kə na: «Ee nashi mbəzli mbə səəkə liy humee, dza kwa bəla nza kəlaŋ va,» kə.ª] 35 Ma kə Yunadab kaa mazə ki na: «Ndərazhi gha na shi va mbə səəkə mazə. Njasa gəzəkəŋee va yən ndə sləni tsa gha mənita kuma va gwanata,» kə. 36 War sa kəɗanti na gəzə kuma va tsəgha ki na, mbaʼ ndərazhi mazə tsəhəshi. Gidigidi ghəshi məshi mbə wahə təruŋ. Dzəghwa kar mazə lə ka sləni ci ka wahə təruŋ təruŋ kuraku.
37-38 Sa huy Abəsaluŋ ki na, mbaʼ dzaa nziyiy kiy ghyi tsa Talmay zəghu Amihur mazə ka Geshur. Piya mahəkanə ghəci mənti kiyɓa. Ghala vəghu tsa va ki na, war mbə wahə mbəri tsa zəghu ci Amənuŋ niy nza mazə Davitə na ci ki. 39 Dza nəfə tsa ci ki, mbaʼ dəpiy sahə, mbaʼ nəfə tsa ci zlay satiy dzəkən Abəsaluŋ.