2 Samuwel 12

Hiyala ghunay Natan ta ɓanci fəti kaa Davitə

Liy hum kuma va ki na, dza Kwa sləkəpə mbaʼ ghunay Natan ndə gəzə kuma nzə va Davitə. Dza Natan ki mbaʼ dzaa kəsay, ma kə kaa ngəci na: «A nihuti məzli niy nza tiɓa bakə mbə nahuti məlmə. Ndə shiy tsahuti, ndə ndərma tsahuti. 2 Ndə shiy tsa vay, ɗaŋ niy nza teŋkesli və, tsəgha slay. 3 Ndə ndərma tsa va na ci kiy, niy nza nihuti shiy və dzəghwakən ʼugə kutiŋ sa niy pavə na, ta kəli sa ciw. Ghəci niy zəmanta na shiy. Kwasəbə ndərazhi ntsa va niy kəli ʼugə va kiy ghyi tsa ci. Shi zəmə kutiŋ ni niy zəmə ghəshi li, ka saʼwa kutiŋ na li. Mbə hur ci ka naa hi. Nja zha ci niy nza na. 4 Tə nahuti viciy, mbaʼ ndə məlmə səəkiy va ndə shiy tsa va. dza na mbərəkə zlay kəsə dəmbəkə mbə ni ci va dəbeker ta həni kaa ndə məlmə tsa ci va. Mbaʼ dzaa kəsəhu ugə ndə ndərma tsa va va, mbaʼ hənəniy kaa ndə məlmə tsa ci va,» kə.

5 Sa favə Davitə kuma va tsəgha na, mbaʼ nəfə tsa ci satiy tərəŋu dzəkən ntsa va. A kə kaa Natan na: «Ava kwa sləkəpə tiɓa ka favə, ntsaa mənti gəla shi tsəgha ni vay gar pəəsli na. 6 Njana nza na tsəgha ghəci mənti shiy, kala zhanci hur tsa ci ta ntsa vay, dəmbəkə faɗə dza naa kəsəkə ta wa ugə kəsəhu na va,» kə. 7 Ma kə Natan kaa ngəci ki na: «Gha na ntsa va. Avanta kuma gəzəkə Kwa sləkəpə, Hiyala ka Izərayel, ma kiy: “Yən shəkambə na in dzəghwa mbə ghən gha ta pəərəŋa ka mazə ka Izərayel, zhini yən mbəlantəŋa mbə dəvə Sawul. 8 Dzee mbaʼee fambə mbəzli kwa miy dəgha Sawul ntsa gha dikə tsa mbə dəvə gha, mbaʼee ndaŋa miʼi ci, zhini mbaʼee ndaŋa sləkə hulfə ka Izərayel lə hulfə ka Zhuwda diɓa. Daw pə gha niy nashi shi va kwa mətsə ghay, ta ɓəŋa nihuti shiy niy dzee diɓa. 9 Tawa ndərəti gha kumee yən Kwa sləkəpə, mbaʼ gha mənti shiy təɓara ma kiya? Sa dza ghay, mbaʼ gha paslanti Uri ndə ka Hit. Gha pəhəti na kuma ta mbə ka Amun paslanti. Sa pəəsliti ghəshiy, mbaʼ gha ɓəhu mali ci ka mali gha. 10 Njana mənti gha tsəgha, mbaʼ gha ndərətəɗa, ɓəʼ gha ɓəhu mali Uri ndə ka Hit ta nza ghənzə ka mali ghay, war mbə bəku mbəzli kiy ghyi tsa gha dza məndiy nza ya paʼ humɓa” kə Kwa sləkəpə,» kə. 11 Ma kə Natan diɓa na: «Ma kə Kwa sləkəpə diɓay: “Ta ɓəkə ngəraʼu dzee dzəkən gha, səvəri kiy ghyi tsa gha dza ngəraʼu tsa va ta tsahu. Ta ɓəvə miʼi gha dzee kwa mətsə gha, ta ɓanavəshi kaa manəŋa. Ka na dzay ka həni li shi mbə ghuyama vici. 12 Na na ghay, tə mbə mənti gha na gha va kuma. Na nee nee kiy, Kwa kuma ka Izərayel gwanashi dzee ta məni kuma va, mbə ghuyama vici,” Kə Kwa sləkəpə,» kə Natan.

13 Sa favə Davitə kuma va ki, ma kə kaa Natan na: «Ee mənti kuma jikir na kaa Kwa sləkəpə,» kə. Ma kə Natan kaa ngəci na: «Ghənzə tsəghay, a Kwa sləkəpə pəlataŋa kuma gha jikir na kuraku. Ka məti gha ghulaw. 14 Ə na na nza nay, njana nza na təruŋ gha mənti jikir kaa Kwa sləkəpə, sa ɓanavəshi gha va kwal kaa ka mbəzə nzə ta sawa, lə kuma mənti gha vay, ta mətiy dza zəghu yakə mali va va sana» kə. 15 Sa gəzanti Natan kuma va kaa Davitə ki na, ka dzay jighyi.

Zəghu yakə Batəsheba va kaa Davitə mətiy

Dzəghwa Kwa sləkəpə ki, mbaʼ sləviy zəghu yanakə Batəsheba mali Uri tsaa mətiy va kaa Davitə lə zəlghu. 16 Dza Davitə ka cəʼu Kwa sləkəpə ta mbə ghənzəə mbəlanti zəghu va. Tapə ghəci miy mbə məni sumay. Sa ka naa dzay dzəmbə ciki tsa ci ta həni na, mbaʼ həniy dzar tə hiɗi. 17 Dzəghəʼ dzəghəʼ kə mbəzliy gura dikə dikə mbə ka sləni kiy ghyi tsa ci mbaɗəci ta satiy ghəci mbə hiɗi na, kala zləɓa ghəci, kala zləɓa ma zəmə ghəci ya nima shi zəmə kwasəbə shi. 18 Tə kwa mbərfaŋa vici zəghu va mbə zəlghu ki na, mbaʼ mətiy. Sa mətiy na na mbaʼ her ka sləni ci dzashi ta gəzanci məti zəghu va kaa Davitə. Mbə zəzə kuma shiy: «Ghala vəghu tsaa niy nza zəghu va tə ghumiy, sa niy gəzanci ghummə kumay, niy zləɓa məni kuma gəzanci ghummə naw. Njaa dza ghumməə gəzanci məti zəghu na sana kiya. Sa dza ghumməə gəzanci na nza mənti kuma gəmgəm na sa?» niy nə ghəshi. 19 Sa nashi Davitə mbə ɗaɗahu kuma dzar kwa jipə shi na, mbaʼ sənay tsəgha, əə mətiy zəghu va, kə. Ma kə kaa ngəshi na: «Əə mətiy zəghu va na?» kə kaa ngəshi. «Aa mətiy,» kə ghəshi kaa ngəci. 20 Sa gəzanakə ghəshi tsəgha kaa Davitə ki na, dza na mbaʼ ɓarvay mbə hiɗi, mbaʼ dzaa pishivay, vərə vərətəvay, mbaʼ mbarakən kubeŋer. Dza na ka dzay dzəmbə ciki tsa Kwa sləkəpə, mbaʼ dzaa tsəfəkwiy kwa kuma nzə. Sa zhikiy naa dzakə ghyi tsa ci ki na, «Ndaram shi zəmə,» kə. Mbaʼ məndi ɓanavə shi zəmə, mbaʼ zəməhushi. 21 Ma kə ka sləni ci kaa ngəci na: «Kuma ka wa na na məni gha na shəkaa mazə? Ghala vəghu tsaa niy nza zəghu va mbə piyiy, ə niy məni gha sumay, ka wahə ti. Ma sa mətiy na nana na, dza gha mbaʼ gha satiŋa ka zəmə shiy na?» kə ghəshi kaa ngəci 22 Ma kə Davitə kaa ngəshi na: «Sa niy mənee va sumay ka wahiy, nda nza hur tsa Kwa sləkəpə zhanta tə ya, mbaʼ mbəlanti zəghu va njana nza na ghulay ghəci mbə piy niy nə ya. 23 Mbaʼ ghəci mətiy nana kiy, ta wa dzee zhiniy məni sumay kiya? Ta zhananavə piyee kee ni ghula shəkəna. Yən na saa dzaa dza ta kəsay nana. Na na ciy, ka zhighəkəvay na ta kəsara ghulaw,» kə.

Batəsheba yakə Saləmuŋ kaa Davitə

24 Liy hum ki na, mbaʼ Davitə dzaa dəpəti nəfə tsa mali ci Batəsheba, mba hihu hi li. Dzəghwa mali va mbaʼ ɓəvə hur, baw yakə zəghu zal, mbaʼ Davitə fanati slən Saləmuŋ. Mbaʼ Kwa sləkəpə ɗiti zəghu va. 25 Dza na mbaʼ ghunay Natan ndə gəzə kuma nzə kaa Davitə ta gəzanci ɗi tsa ɗiti na va zəghu va. Dzəghwa Natan mbaʼ fanati slən Yedidiya, ɗi naa gəziy: ntsa ɗiti Kwa sləkəpə. Sa nza na mbaʼ Kwa sləkəpə niy ɗiti.

Davitə zləghuhu məlmə Raba

(Voir 1 Chron 20.1-3)

26 Ghala vəghu tsa va kiy, a Zhəwabə ntsaa sləkə ka sawji Davitə niy pəslambə mbə məlmə Raba, məlmə ka Amun dikə na, mbaʼ zləghuhu giwa nza mazə tsa shi ti. 27 Dza na mbaʼ ghunashi mbəzli ta dza ta gəzə kaa Davitə: «“Ee pəslambə mbə məlmə Raba, mbaʼee zləghuhə giwa nza yam shi va ɗaŋ ti. 28 Nanay, ɓasəvə niy tərə ka sawji a gha səəkə ta pəsliy dzəmbə məlmə va, nza gha zləghuhu dəʼu ghən tsa gha. Ka ɗee yən zləghu dəʼu ghən tseyəw, yən dza məndiy dzashi ta fal ghalaɓa, mbərəkəŋa gha,” kə Zhəwabə, pə ghuy kaa Davitə,» kə kaa ngəshi. 29 Sa dza mbəzli vaa gəzanci Kuma va kaa Davitə ki na, Dza na ɓasə ɓasəvə niy tərə ka sawji mbaʼ səəkəə pəslambə mbə məlmə Raba, mbaʼ zləghuhu. 30 Dza na laŋ ɓəhu daghuɓa tsaa niy fambə məndi mbə ghən Mulek hiyala ka Amun. Tə mbəzə kwa shamshama niy mənti məndi daghuba tsa va, taŋ kilu mahəkanəmətsəkə niy nza shəndəkə tsa ci, mbaʼ haku tsa nza dimə ti niy nza ti. Dza məndi mbaʼ məndi ɓəvə haku tsa vaa fati tə daghuɓa mazə tsa mbə ghən Davitə. Dza ghəshi mbaʼ ghəshi zhiniy pahu nihuti shiy tərəŋu mbə məlmə va. 31 Dza Davitə mbaʼ dzay lə mbəzli mbə məlmə va, mbaʼ dzaa fambəshi mbə sləni kwa bərci ghənghən ghənghən: Sləni slasla shiy lə hwa kwa sliʼi, mbaʼ baʼu hərezli, mbaʼ kəəsli fəhi, mbaʼ dəʼu bərikə. Tsəgha niy mənti Davitə lə nihuti məlməhi ka Amun gwanashi. Liy hum ki na, mbaʼ zhay zhimbə məlmə Zheruzalem lə ka sawji ci gwanashi.