Davitə hənəhu həni lə Batəsheba, Mali Uri
11
Ma sa səəkəta nahuti piya, geʼi lə vəghu tsa ka mezhizhiy səvəri ta dza ta mbəzə ki na, dzəghwa Davitə mbaʼ ghunashi kar Zhəwabə lə nihuti mbəzliy sləkə ka sawji ci mbaʼ ka sawji ka Izərayel gwanashi ta dza ta mbəzə. Dza ghəshi mbaʼ ghəshi dzaa bəkuvə mbəzli mbə ka Amun, mbaʼ ghəshi dzaa ɓasəshi vəgha Raba, məlmə məlmə mbəzli va dikə na, ta pəsli ta mbəzli mbəɓa. Davitə na na ci kiy, mbə məlmə Zheruzalem niy nziyiy na.2 Ma tə nahuti vici sa dəkantəvay na havəghu na, dza na hetihwer mbaʼ kafiy ka turə dzar mə ghən ghyi tsa ci, sa huti məndi nja bela. Ma ghəci məɓa ki na, mbaʼ nata nahuti mali ghənzə mbə pi. Mali kiyasə sava niy nza. 3 Dza na ki, mbaʼ ghunay ndə ta dza ta ɗuw nda mali wa na sava. Mbaʼ məndi səəkəə gəzanci: «Batəsheba zha Elam mali Uri ndə ka Hiti na,» kə məndi kaa ngəci. 4 Sa gəzanci məndi tsəgha ki na, dza na mbaʼ ghunashi mbəzli ta dza ghəshiy pəməkə. Mbaʼ məndi pəmanakə. Dza na mbaʼ hənəhu həni li, ka zhata mali va. Ghala vəghu tsa vay, ʼwar kərə niy nza shiy lə ghəranta kaa mali va.
5 Dzəghwa ki, mbaʼ Batəsheba ɓəvə hur. Mbaʼ ghunay ndə ta dza ta gəzanci hur tsa va kaa Davitə. 6 Sa gəzanci məndi ki na, mbaʼ ghunay ndə va Zhəwabə: «Gəzanci kaa Uri ndə ka Hiti a ghəci səəkəə kəsara, kə mazə, pə gha kaa Zhəwabə,» kə kaa ntsa va. Mbaʼ məndi dzaa gəzanci tsəgha kaa Zhəwabə ki, mbaʼ ghunay Uri tsa va. 7 Dzəghwa Uri mbaʼ səəkəə kəsay. Dza Davitə ka ɗuw və, nda njaa na kar Zhəwabə lə nihuti ka sawji, nda njaa məniva mbəzə. 8 Liy hum ki, ma kə kaa ngəci na: «Mbalaa jighyi a gha dzaa dəkətəvaŋa,» kə kaa ngəci. Dza Uri mbaʼ səvəriy kiy ghyi tsa mazə. War sa səvəriy na na, dza mazə mbaʼ ghunashi mbəzli lə shiy kaa ngəci.
9 Ma sa səvəriy Uri kiy ghyi tsa mazə na ci ki na, kala dza ma ghəciy jighyi, mbaʼ dzaa həniy kwasəbə ka sawjiy ndəghu mazə, kwa miy dəgha mazə. 10 Mbaʼ məndi dzaa gəzanci kaa Davitə: «Dzay Uriy dzakə ghyi tsa ciw,» kə məndi kaa ngəci. Ma kə Davitə kaa ngəci na: Mbə dza gha səəkə kiy, tawa dza ma ghaa dzakə ghyi tsa ghaa?» kə. 11 Ma kə Uri kaa ngəci na: «Sanay, dzar mbə shiy nja ciki ka ndəghu na Kar sərndəkə tsa Kwa sləkəpə lə ka Izərayel mbaʼ ka Zhuwda. Kar Zhəwabə ntsee dikə tsa lə nihuti mbəzliy sləkə ka Sawji ghay, dzar mbə gamba hənishi ghəshi. Ma yən nee ki na mbaʼee dzaa dzaraa dzakə ghyi tsee ta zəmə shi zəmee, ka sa shi ya, ka həni lə malee na? Fəla dzee zəməkəŋa, ka mənivə gəla niva shiy yaw mazuw,» kə. 12 Ma kə Davitə kaa Uri ki na: «Ghənzə tsəghay, nziyŋa tikə ndatsə diɓa, ma həzlimiy, nza gha zhiniy zhaŋa,» kə. Dza Uri ki, mbaʼ nziyiy fəca va mbə məlmə Zheruzalem paʼa va həzlimə. 13 Dza Davitə mbaʼ harvə ta zəmə shiy lə ta sa shiy kwasəbə, dza na mbaʼ ghyamti. Ma sa mənta vəciy dza ta həni na, mbaʼ Uri səvəriy həniy kwasəbə ka sawjiy ndəghu mazə, kala dza ma ghəciy dzakə ghyi tsa ci ta həni.
14 Ma tə həzlimə mekishi ki na, dza Davitə mbaʼ tsasliti zliya kaa Zhəwabə, mbaʼ ɓanavə kaa Uri ta vəlanci. 15 Ma kə kaa kuma tsaslaghwa na kwa zliya va na: «Sa ka ghuy dza ta mbəziy, nza ghuy fiy Uri kwa kuma, dzəghwa tə pi tsa gura mbəzə ghyanakə, nza ghuy zhəkiyŋwiy liy hum ta mbə ka mbəzə dzashi dzəkən, nza ghəshi pəəsliti,» kə.
Zəwabə mənti kuma gəzanakə Davitə, mbaʼ məndi pəəsliti Uri
16 Sa naghanti Zhəwabə pi tsa mbə məlmə Raba ki na, dza na lə ɗi ci, mbaʼ fiy Uri dza kwa bəla nza ka mbəzə ghyanakə ni. 17 Dzəghwa mbəzli mbə məlmə va ki, mbaʼ ghəshi səvərishi ta mbəzə lə kar Zhəwabə, mbaʼ ghəshi bəkuvə mbəzli mbə ka sawji Davitə, mbaʼ nihuti mbəzliy sləkəshi, mbaʼ məndi paslanti Uri ndə ka Hit Kwərakwə ki. 18 Liy hum ki na, dza Zhəwabə mbaʼ ghunay ndə va Davitə ta dza ta gəzanci bar tsa mbəzə. 19 Ma kə kaa ntsa ghunay na va na: «Sa dza ghaa kəranti slanci kuma kən mbəzə tsa va gwanata kaa maziy, 20 ta satiy dza nəfə tsa ci bərkee. Mbaʼ kə dzaa ni: “Ta wa kətəghəvaŋwiy ghuy ta mbəzə tərəŋuŋuy dzəvəgha məlmə vaa? Əə sənay ma ghuy kar məndiy hə havəə dzəti mbəzli səəkə mə kələm, pə ghuy shəkəna? 21 Njaa niy nay ghuy njasa pəəsliti məndi Abimelekə zəghu Yerubeshetaa? Səəkə mə kələm niy ndəghakən mali vənaa dzəkən, mbaʼ mətiy mbə məlmə Tebetə. Ta wa kəətəghəvaŋwiy ghuy dzəta kələm kiya?” kə dzaa niy: “Ya Uri tsahuti ntsaa sləkə ka sawji ghay, a məndi pəəsliti,” pə gha dzaa ni kaa ngəci,» kə Zhəwabə kaa ntsa ghunay na va.
22 Dza ntsa ghunay məndi va ki, mbaʼ dzaa gəzanci kuma ghunay Zhəwabə va ta gəzə gwanata. 23 Ma kə kaa ngəci diɓa na: «Ka sawjiy Ndəghu məlmə vay, ghyianakəɓa ghəshi na kaa ngəŋiy. Sa səvərishi ghəshiy dzəti ngula ta mbəzə lə ghiyiy, mbaʼ ghiy tahashi paʼa kwa miy dəghaa dzəmbə məlməshi va. 24 Dza ka rigi ki na, ka həgəŋiy səəkə mə kələm. Ava tsəgha bakwanti məndi nihuti mbə mbəzliy sləkə ka sawji gha, mbaʼ məndi paslanti Uri ndə ka Hit tsahuti ntsaa sləkə ka sawji gha kuraku,» kə. 25 Sa favə mazə tsəgha ki, ma kə kaa ntsa ghunikə məndi va na: «Mbala a gha dzaa ta mətsahanavə bərci kaa Zhəwabə lə kuma dzee na ta gəzaŋa: “Ma kə maziy: Ka zhəŋa nəfə tsa gha dalala va kuma va ma. Mbaʼ kə məndi dzashi ta mbəziy, ka bashi bəkuvə mbəzli məndiy nza, ya dza kwa nama bəlaw. Ə pə gha gumatəvaŋa wəzə wəzə ta kuma kən məlmə va mbaʼ gha bakwanti mbəzli mbə” kə, pə gha kaa ngəci,» kə mazə.