Məndi panakənshi haʼu kaa mbəzli ghunashi Davitə
(Voir 1 Chron 19.1-5)
10
Sa nzay məndi nza liy hum shi va ki na, mbaʼ mazə tsa ka Amun mətiy, mbaʼ məndi pəərəti zəghu ci Hanun kwa səɗa ci. 2 Ma kə Davitə mbə nəfə ci ki na: «Ta mananci wəzə hur dzee kaa Hanun mazə ka Amun, zəghu Nahashə njasa niy məntəra diy va,» kə. Dza na ki, mbaʼ ghunashi mbəzli dikə dikə ni mbə ka sləni ci ta dza ta səku mbə mbəri diy. Dzəghwa mbəzli va mbaʼ ghəshi tsəhəshi tə hiɗi ka Amun. 3 Ma kə mbəzliy sləkə mbəzli tə hiɗi ka Amun kaa Hanun mazə tsa shi va na shi ki na: «Əə fati Davitə Bama tə dəŋa na ghunikə na mbəzli ta səkuŋa mbə mbəri dəŋa təkəti gha na? Əə sənay ma gha ta nighə pi tsa mbə məlmə ghummə ta sənay njasa dza naa məni, ta mbə ghəciy səəkə ta zləghuhu ghunashi na mbəzli va pə gha na?» kə ghəshi kaa ngəci. 4 Sa gəzəkə mbəzli va kuma va tsəgha ki na, dza Hamun mbaʼ gəzanshi kaa mbəzli, mbaʼ məndi kəəsəti mbəzli ghunikə Davitə va, mbaʼ məndi slaslananti nahuti bəla guzhem shi, sla məndi slaslanti kwəbəŋer shi paʼa tə mətsəni shi, mbaʼ məndi zlashiy dzashi. 5 Dzəghwa mbaʼ məndi dzaa gəzanci kuma va kaa Davitə. Dza na mbaʼ ghunay ndə ta dza ta gəzanshi kuma, sa nza na tərəŋu kuma mananatishi məndi va niy panakənshi haʼu. Ma kə kaa kuma ghənay na ndə ta gəzanshi na: «Nzəyŋuyim mbə məlmə zheriku. Ma sa ka gwəzhem ghuy zhiniy pəsəshiy, nza ghuy gha zhəghəvaa zhikə,» kə.Ka Izərayel mbəzə lə ka Amun, mbaʼ ka Shiri
(Voir 1 Chron 19.6-19)
6 Ma sa nighəti ka Amun a nəfə tsa Davitə satiy tərəŋuiy dzəkən shi va shi manati ghəshi va, kə ghəshi na, dza ghəshi mbaʼ ghəshi papavə ka sawji tə gəna shi mbə ka Shiri ka Bet-Rehuv, mbaʼ mbə ka Shiri ka Cuva: Ka sawji bələku bələku bakəmətsə bələku, zhini paʼ ghəshi pavə nihuti va mazə ka Maaka bələku bələku məŋ, mbaʼ nihuti bələku bələku məŋ lə bakə bələku mbə ka Tuv. 7 Dzəghwa mbaʼ məndi səəkəə gəzanci kaa Davitə. Dza na mbaʼ ghunay Zhəwabə mazə ka sawji ci lə ka sawjiy kurahəhu kuma mbəzə gwanashi. 8 Dzəghwa ka Amun mbaʼ ghəshi səvərishi ta mbəzə, mbaʼ ghəshi ɓasəshi vəgha miy pi tsaa dzəmbə məlməshi dikə na. Ma ka shiriy mbə məlmə Cuva lə ni mbə məlmə Rehuv, mbaʼ ka Tuv lə ka Maaka na, mbaʼ niva dza kwa nahuti bəla tə gamba. 9 Nighə nighə kə Zhəwabə na, dza kwa bəla bakə mbəzə tsa va məniy və lə ka sawji ci. Dza kwa kuma shi lə dziy liy hum shi. Dza na təraʼ təravə niy gura ka sawji tə mbəzə mbə ka Izərayel, mbaʼ fiy shi dza kwa bəla nza ka Shiri. 10 Ma niy tərəmbə na, dza kwa bəla nza ka Amun ni va, mbaʼ fambəshi mbə dəvə Avishay zəmbəghiy. 11 Ma kə kaa zəmbəghiy tsa va ki na: «Mbaʼ kə ka Shiri dzaa mbaŋəyiy, nza gha səəkə ta kəətiŋiy, mbaʼ kə ka Amun mbaŋuyiy, nzee dza ta kəətiŋuy. 12 Kwa zal kwa zal pə gha dzaa garəŋa, ka dza her ghum ma. Jihəkəvam ghum ta mbəzə, ta mbəzli ghum lə ta məlməhi Hiyala ghummə. Nza Kwa sləkəpə məni njasa təɓanta na,» kə. 13 Dzəghwa kar Zhəwabə lə mbəzli kwasəbə ki, mbaʼ ghəshi kafəshi ta dza ta mbəzə lə ka Shiri, mbaʼ ghəshi zəmanavəshi bali kaa mbəzli va. 14 Ma sa nashi ka Amun mbəzli ka Shiri mbə bali na, dza ghəshi ka huhushi va kar Avishay lə mbəzli ci kuraku, mbaʼ ghəshi dzashiy dzəmbə məlmə. Dzəghwa Zhəwabə ki, mbaʼ garəti nuw ka Amun, mbaʼ zhəghəkəvay dzəmbə məlmə Zheruzalem.
15 Ma sa nighəti ka Shiri bərci shi daw va ka Izərayel ki na, mbaʼ ghəshi ɓasəti mbəzli shi gwanashi. 16 Dza Hadadezer mazə tsa shi mbaʼ ghunashi mbəzli ta basə ni pəriɓa pəriɓa mbəzli tə miy həl Əfəratə ta jakəva ghəshiy dzəkən shi. Dza mbəzli va mbaʼ ghəshi səəkəshiy dzəmbə məlmə Helam. Shuvak ntsaa sləkə ka sawji Hadadezer niy nza dikə tsa shi. 17 Mbaʼ məndi dzaa gəzanci kaa Davitə. Dza na ɓasə ɓasəti ka sawji ka Izərayel gwanashi, mbaʼ taŋiy li shi dzəvəri tə həl Zhurdeŋ, mbaʼ ghəshi tsəhəshi mbə məlmə Helam. Dza ka Shiri mbaʼ ghəshi ɓasəshi ta dzəghwa mbəzə lə kar Davitə lə mbəzli ci. Pizl ghəshi pəslishi pərɓa ghəshi. 18 Dzəghwa ka Izərayel mbaʼ ghəshi zəmanavəshi bali. Dza kar Davitə lə mbəzli ci mbaʼ ghəshi bakwanti gədewesli ka mbahə muwta bələku bələku mbərfəŋ, mbaʼ ka zlərə gədewesli bələku bələku faɗəmətsəkə bələku. Mbaʼ ghəshi ʼyanti Shuvak dikə tsa ka sawji tsa mbəzli va ka mbəri tiɓata. 19 Ma sa nighəti nihuti məzhizhiy niy nza mbə dəvə Hadadezer ka Izərayel mbay na, mbaʼ ghəshi pəlavə kwal zərkə lə ka Izərayel, mbaʼ ghəshi mənishi ka mbəzli tə dəvə shi. A ka Shiri niy hazləni va zhiniy səəkə ta kəəti ka Amun.