2 Samuwel 2

Məndi pəərəti Davitə ka Mazə ka Zhuwda mbə məlmə Ebərwəŋ

Liy hum ki na, dza Davitə ka ɗuw kuma va Kwa sləkəpə. Ma kə na: «Ee dza ta nziy mbə məlmə tə hiɗi ka Zhuwda na?» kə. «Mbala ta nziy,» kə Kwa sləkəpə kaa ngəci. «Dzəmbə nama məlmə kee dzaa?» kə. «Dzəmbə məlmə Ebərwəŋ,» kə Kwa sləkəpə kaa ngəci. 2 Dzəghwa Davitə ki, mbaʼ dzay dzəmbə məlmə va ghəshi lə miʼi ci va bakə ni, kar Ahinuwam zha ka Zhizərel mbaʼ Abigayel mali Naval, ndə ka Karmel tsaa mətiy va. 3 Dza na diɓa mbaʼ pəməvə mbəzli ci va niy nza kwasəbə, lə mbəzli kiy ghyeghyer shi, mbaʼ ghəshi dzaa nzənziyshi dzar mbə məlməhi vəgha məlmə Ebərwəŋ. 4 Dzəghwa mbəzli ka Zhuwda mbaʼ ghəshi səəkəə shəkambə in dzəghwa mbə ghən Davitə ta nza ghəci ka mazə tsaa sləkə mbəzli mbə takə tsa shi.

Dzəghwa mbaʼ məndi səəkəə gəzanci kaa Davitə: «Mbəzli mbə məlmə Yavesh tə hiɗi ka Galad lanti na Sawul,» kə məndi kaa ngəci. 5 Dza na mbaʼ ghunashi mbəzli ta gəzanshi kuma kaa mbəzli va. Ma kə ghəshi dzaa ni na: «Ma kə Davitiy: “Nza Kwa sləkəpə təfətəŋuy miy, sa nza na mbaʼ ghuy mənti kuma njasa təɓə na kaa Sawul ntsa ghuy dikə tsa, mbaʼ ghuy lanti mbəri tsa ci. 6 Nza ghənzə məntəŋuy wəzə hur, mbaʼ məntəŋuy kuma njasa təɓə na kuraku. Yən kurakuy kuma wəzə na dzee ta məniŋuy tə mbərkə kuma mənti ghuy va. 7 Sana kiy, ə pə ghuy mətsəhə bərci kaa nefer ghuy. Ka dza her ghuy va kuma ma. A Sawul ntsa ghuy dikə tsa mətiy. Nanzə kiy, wəzə na ghuy sənay: A mbəzli mbə takə tsa ka Zhuwda shəkambə in dzəghwa mbə ghən tsee, mbaʼ ghəshi pəərətəra ka mazə tsa shi, pə ghuy” kə Davitə,» kə ghəshi dzaa ni.

Məndi pəərəti Ishəbushetə ka mazə ka Izərayel

8 Ghala kwataŋata nava kuma ghula ta mənivay, a Avəner zəghu Ner, dikə tsa ka sawji Sawul niy pəməghə Ishəbushetə zəghu Sawul dzəmbə məlmə Mahanayim. 9 Dzəghwa na mbaʼ pəərəti mbəɓa ka mazə, ta sləkə ka Galad, lə ka Ashur, mbaʼ ka Zhizərel, mbaʼ ka Efrayim, mbaʼ ka Benzhameŋ. Ɗi naa gəziy, mazə tsa ka Izərayel gwanashi niy nza na. 10 Piya faɗəmətsəkə niy nza sa Ishəbushetə zəghu Sawul va ghala vəghu tsaa niy pəərəti məndi ka mazə tsa ka Izərayel. Piya bakə ghəci mənti mbə məni mazə. Ma na mbəzli mbə takə tsa Zhuwda na shiy, Davitə niy sləkə na niva. 11 Piya mbərfəŋ mbaʼ tir kwaŋ niy mənti na mbə məlmə Ebərəŋw, mbə sləkə ka Zhuwda.

Ka Zhuwda mbəzə lə ka Izərayel

12 Dza kar Avəner, zəghu Ner ghəshi lə mbəzli ta səɗa Ishəbushetə zəghu Sawul mbaʼ ghəshi kafəshi mbə məlmə Mahanayim ta dza njasaa dzəmbə məlmə Gabawuŋ. 13 Dza kar Zhəwabə, zəghu nza mbəghiy Ceruya mbaʼ mbəzli ta səɗa Davitə kafəshi kwəraku. Dza mbəzli va bakanashi mbaʼ ghəshi kuməti ndəku vəgha kwəfa mbə məlmə Gabawuŋ va. Mbaʼ nihuti pərikə, mbaʼ nihuti pərikə ghəshi nziyshi. 14 Ma kə Avəner kaa Zhuwabə na: «Zlashi gulahi mbə ka sawjihi ghum ghum a ghəshi dzəghəva kwa jipə shi kwa kuma ghumə,» kə. «Tsəgha na,» kə Zhəwabə. 15 Dza ka sawji Ishəbushetə zəghu Sawul, məŋ lə bakə mbaʼ ghəshi səvərishi mbə takə tsa Benzhameŋ. Tsəgha ghəshi səvərishi mbə ka sawji Davitə kuraku. 16 Ya wa ndə mbə shi ki na, mbaʼ kəsəvə ndə mbəzə tsa ci mbə ghən, mbaʼ ʼyanti mbə slərpə ci lə hwa. Mbaʼ ghəshi bəkushi gwanashi. Dza məndi ki, mbaʼ məndi fanati slən kaa pi tsa vəgha Gabawuŋ va məniva shi va ti: «Za hərezli,» kə məndi.

17 Fəcava ki na, jikirkirkir mbəzə məniy. Mbaʼ mbəzli Davitə mbashi kar Avəner lə mbəzli ci. 18 Mbə mbəzə tsa va niy nza ndərazhi mali har məndi vaa Ceruya mahəkanə: Kar Zhəwabə lə Avishay mbaʼ Asahel. Asahel tsa vay, nja kimə niy nza na kiyaŋukiyaŋu tsa ci. 19 Dza na ka nuw Avəner lə bali kwa pi tsa dza na, kala ɓarva ma kwasəbə. 20 Dzəghwa Avəner tərəɗə zhəghata kuma ci dziy liy hum, ma kə na: «Gha saa nura tsa sa Asahel?» kə. «Yən na,» kə Asahel. 21 Ma kə Avəner kaa ngəci na: «Ka nura gha ma, tsahuti ndə mbə ka sawji va pə ghaa nuw, ya dza kwa bəzəmə gha, ya dza kwa zleɓi gha, nza gha pəəslətiy ɓəhu shi mbəzə ci,» kə. Ma Asahel na ci ki na, kala zləɓa ɓarva kwasəbə war a ghəciy nuw. 22 Zhini ma kə Avəner kaa ngəci na: «Ɓarvaa kwasəbee, ta wa nə gha war yən pəəslitəŋa pə gha tay? Mbaʼ pən pəəslitəŋa sanay, nza yaa mbay nighə zəməŋa Zhuwabə kwa mətsə ci na?» kə. 23 War ma Asahel na ci ki na, kala zləɓa ma ɓarva kwasəbə. Dzəghwa Avəner ki, gəpə ʼyanti lə gwapa ci dziy liy hum mbə hur. Tsahu gwapa va pərikə tə hum ci. Kiripə təriy, mbaʼ mətiy tiɓata. Ya wa ntsaa tsəhiy tə pi tsa mətiy Asahel va na, mbaʼ gariy tiɓa.

24 Dzəghwa kar Zhuwabə ghəshi lə Avishay tapə ta nuw Avəner. Tsəhə ghəshi mə hum pi tsa har məndi vaa Givəya-Ama kwa ghumə va Giya kwa kwal tsaa dzəmbə gamba Gabawuŋ na, viciy pəku. 25 Dza ka sawji mbə takə tsa Benzhameŋ mbaʼ ghəshi ɓasəshi teʼteʼ kwasəbə Avəner, mbaʼ ghəshi nziyshi mə hum pi. 26 Dzəghwa Avəner ka zlapanci kuma kaa Zhəwabə, ma kə kaa ngəci na: «War mbə mbəzə dza ghummə va ta zanti ghən tsa ghummə na? Əə sənay ma gha huvə huvəta dza kuma vaa kərkə va pə gha na? A shi ndəghə gha ta gəzanshi kaa ka sawji gha a ghəshi zlay nuw ngwardəshiaa?» kə. 27 Ma kə Zhəwabə na: «Ava Hiyala tiɓa ka favə, kala sa gəzəkə gha kuma va tsəghay, niy dza mbəzlee niy zlay nuw ngwardəshi paʼa tə həzlimə mekəshiw,» kə.

28 Dza Zhəwabə ki, mbaʼ viyata təliməə garə mbəzə. Sa favə ka sawji na, mbaʼ ghəshi garəti nuw ka Izərayel mbaʼ mbəzə kiriy tsəgha. 29 Liy hum ki na, mbaʼ kar Avəner lə ka sawji ci kafəshi, hi ghəshi virəvirə mbə dza dziy kwa teʼu pi Zhurdeŋ, dza ghəshi mbaʼ ghəshi taŋəti həl Zhurdeŋ ka dzar tə hiɗi Bitəruŋ, mbaʼ ghəshi tsəhəshi tə hiɗi Mahanayim. 30 Sa səəkəshi kar Zhəwabə lə mbəzli ci mbə nuw Avəner ki na, mbaʼ ɓasəti ka sawji gwanashi. Sa ɓəla məndi mbəzli na, kar Asahel lə mbəzli məŋ lə məsliɗə niy kama na tiɓa. 31 Ma na ghəshi ghəshi mbəzli Davitə nashi kiy, a ghəshi niy bakwanti mbəzli diwi diwi mahəkanə mbaʼ kwaŋ mətsəkə mbə ka sawji mbə takə tsa Benzhameŋ lə nihuti mbəzli Avəner. 32 Dza məndi ki, mbaʼ məndi ɓəvə mbəri tsa Asahel mbaʼ məndi dzaa lanti kwa kuli diy mbə məlmə Betəlehem. Sa lanti ghəshi mbəri ki na, hi ghəshi mbə dza. Ma tə kəɗi pi na, mbaʼ ghəshi tsəhəshi mbə məlmə Hebruŋ.