3
Təruŋ niy hiy mbəzə kwa jipə mbəzli Sawul lə mbəzli Davitə. Kwa kuma kwa kuma niy mətsəhəva bərci mbəzli Davitə, ma na mbəzli Sawul na, war liy hum liy hum niy dziy na.Ndərazhi yakə Davitə mbə məlmə Hebruŋ
2 A Davitə niy yavə ndərazhiy zhər mbə məlmə Hebruŋ. Kwataŋa zəghu ciy, Amənuŋ niy nza slən tsa ci, Ahinuwam zha ka Zhizərel niy yanakə na. 3 Kwa baka na, Kileyavə. Abigayel mali mbəri Nabal ndə ka Karmel niy yanakə na. Kwa mahəkana na Abəsaluŋ, Maaka zha Taləmay mazə ka Geshur niy yanakə na. 4 Kwa faɗa na, Aduniyasə, Hagitə yanakə na. Kwa cafa na, Shefatiya, Avital niy yanakə na. 5 Kwa kwaŋay, Yitreyam, mali ci Egəla niy yakə na. Ava tsəgha na ndərazhi Davitə yavə na mbə məlmə Hebruŋ.
Abəner zhəghanavə hum kaa Ishəbushetə mbaʼ dzay dza kwa bəla Davitə
6 Ghala vəghu tsaa niy nza mbəzə va kwa jipə mbəzli Sawul lə mbəzli Davitiy, kwa kuma kwa kuma niy mətsəhəva bərci Avəner mbə mbəzli Sawul. 7 A nahuti mali niy nza tar bəla va Sawul, Ricəpa kə məndi kaa slən tsa nzə. Zha Aya niy nza na. Ma kə Ishəbushetə kaa Avəner tə nahuti vici tə kuma mali va na: «Sa wa na həni gha lə mali mbəri diraa?» kə. 8 War sa favə Avəner kuma va tsəgha ki na, tərəŋu nəfə tsa ci satiy, ma kə na: «Njaa ɓətəra gha njasa nzee ntsa gəmgəm tsa, ndə mbəzə tsa gha kwasəbə takə tsa ka Zhuwdaa? Paʼ va vəghu tsa ndatsiy, zhəghanavə humee kaa mbəzli kwa miy dəgha dəŋa Sawul, lə ngwardiy mbaʼ madigahiyəw. Shiy tiɓa kala mənəhwee ta mbəlantəŋa va tərəŋa ghaa dzəmbə dəvə Davitəw. Ma ndatsə sa dzaree kwa mali na na, ka ɓəra fəti gha na? 9 Nza Kwa sləkəpə ɓasakənɗa nguvə jikirkir na, yən kala dzaa məni kuma gəzəkə na məni kaa Davitə. 10 Sa nza nay, aa zəməkə fəla ta ɓanti mazə kwa miy dəgha Sawul, ta mbə Davitəə sləkə ka Izərayel lə ka Zhuwda, kafə na tə hiɗi Daŋ paʼ tə hiɗi Ber-Sheva,» kə. 11 Sa gəzəkə Avəner tsəgha na, mbaʼ her Isəbushetə dzashi tərəŋu, kala mbay ghəciy zhananci kuma ya kutiŋ sa nza na mbə hazləni ghəci niy nza və.
12 Liy hum ki na, dza Avəner mbaʼ ghunashi mbəzli kaa Davitə. Ma kə ghəshi dzaa ni kaa mgəci na: «Ma kə Avəneriy: “Shi wa na hiɗi nia? Slati kiri lə ya nzee kəətitəŋa ta mbə mbəzli tə hiɗi ka Izərayel gwanashiy nza kwasəbə gha,” kə,» kə ghəshi dzaa ni kaa ngəci. 13 Ma kə Davitə sa gəzanci məndi kuma va na: «Tsəgha na, ee zləɓavə sla kiri lə gha. Nanzə kiy, Shiy kutiŋ na shi ɗee va gha. Nəghətaa gha səəkəə dzəghwa kumee kala pəməkəra gha pərɓa malee Mikal, zha Sawul va ka gha gha səəkəə dzəghwa kumee ma,» kə. 14 Dzəghwa Davitə ki, mbaʼ ghunashi mbəzli va Ishəbushetə zəghu Sawul, ma kə ghəshi dzaa ni na: «Ma kə Davitiy: “Zhanavəra Mikal, malaee va ɓəvee tə guzhiɓə ka Filisteŋ bələku,” kə,» kə ghəshi dzaa ni. 15 Sa dza mbəzli vaa gəziy tsəgha na, dza Ishəbushetə mbaʼ ghunashi mbəzli, mbaʼ ghəshi dzaa kəsəkə Mikal va Paltiyel zəghu Layishə zal tsaa niy nza na ti. 16 Dza zata tsa va, ka nuw lə wahə paʼ mbə məlmə Bahurim. Ma kə Avəner kaa ngəci tiɓa ki na: «Ə pə ghaa zhəghəvaa jighyi ntsa,» kə. Dza ntsa va mbaʼ zhəghətəvay.
17 Dzəghwa Avəner ki, mbaʼ dzaa ɓasəti mbəzli dikə dikə ni mbə ka Izərayel. Ma kə kaa ngəshi na: «Mbəradzəŋwiy nza ghuy mbə ɗi Davitə ta nza ghəci ka mazə tsa ghuy. 18 Nanay, a vəghu tsa va səəkiy, A ghuy sənay a Kwa sləkəpə niy gəzəkə dzəkən Davitə. Ma kə niy niy: “Dza kwa Davitə ndə sləni tsee dzee ta mbəlanti hulfə mbəzlee ka Izərayel mbə dəvə ka Filisteŋ lə ka mbəzə shi gwanashi,” kə niy ni,» kə.
19 Dzəghwa na diɓa, tsəgha ghəci dzaa gəzanshi kaa mbəzli dikə dikə ni mbə takə tsa Benzhameŋ. Liy hum ki na, mbaʼ dzay dzəmbə məlmə Hebruŋ ta gəzanci kuma pəhəti ghəshi ta məni ghəshi lə mbəzli mbə takə tsa Izərayel, mbaʼ mbəzli mbə takə tsa Benzhameŋ gwanashi kaa Davitə. 20 Lə zhər bakəmətsəkə niy nza na tə səəbə ci, mbaʼ ghəshi dzaa kəsay Davitə mbə məlmə Hebruŋ. Mbaʼ Davitə kaʼwətishi, taʼ tanatishi shi zəmə. 21 Liy hum ki, ma kə Avəner kaa Davitə na: «Ta dza dzee ta ɓasəkə ka Izərayel gwanashiy dzəghwa kuma gha, gha mazə, ntsee dikə tsa, nza ghəshi slati kiri lə gha, nza gha məni mazə ya dza kwama ɗi gha,» kə. «Tsəgha na,» kə Davitə, mbaʼ zlay Avəner dzay lə zərkə.
Zhəwabə dikə tsa ka sawji Davitə pəəsləti Avəner
22 Liy hum juw ki na, mbaʼ kar Zhəwabə lə ka sawji Davitə zhəghəkəvashi mbə pa. Lə shiy tərəŋu niy səəkə ghəshi sa zləghuvəshi ghəshi. Ghalaɓay, a Avəner niy ɓarvay vəgha mazə Davitə mbə məlmə Hebruŋ, liy hum sa niy zlay Davitəə zhay lə zərkə. 23 War sa səəkəshi kar Zhəwabə lə ka sawji ci gwanashi na, mbaʼ tsahuti ndə səəkəə gəzanci: «A Avəner zəghu Ner səəkə tiɓa va mazə, mbaʼ mazə zlay dzay kala mananci ma kuma,» kə. 24 Sa favə Zhuwabə tsəgha na, mbaʼ dzaa kəsay mazə. Ma kə kaa ngəci na: «A ni mənti gha va shiyaa? Mbaʼ Avəner səəkiy va gha na, mbərəkə gha zlay dzay tsəgha na? 25 Aa sənay ma gha Avəner zəghu Ner shəkəna? Səəkə tsa ci vay, ta ngəɗiŋa na, ta sənay njasa ka ghaa dza ta mbəzə lə njasa ka ghaa zhəghəvaa zhikə, mbaʼ ta sənashi shi məni gha gwaʼ gwaʼa,» kə.
26 Sa səvəriy Zhəwabə kiy ghyi tsa Davitə na, mbaʼ ghunashi mbəzli tə səbə Avəner ta dza ta zhəghəkə. Dza mbəzli va mbaʼ ghəshi dzaa kəsay geʼi lə wawərə tə pi tsa har məndi vaa Sira, mbaʼ ghəshi zhəghəkə. Niy sənay Davitəw. 27 Sa zhəghəkəvashi mbəzli va lə Avəner dzəmbə məlmə Hebruŋ ki na, dzəghwa Zhuwabə mbaʼ harvəə dzəvəgha bəla, kwa miy dəghaa dzəmbə məlmə, nja ta gəzanci kuma tə mbə. Dza na gəpə ʼyanti mbə hur ka mbəri, ta wa shi zhəmbəghiy Asayel, sa niy pəəsliti Avəner va.
28 Sa tsəhəta kuma va kwa sləmə Davitə, ma kə na: «Ya paʼ humɓay, a Kwa sləkəpə sənay, kuma ghiy mbə məti Avəner zəghu Ner ghiy lə mbəzli tə hiɗi yaw, kə. 29 Kən Zhuwabə lə mbəzli kwa miy dəgha ci kə nguvə va. Ya humɓay, lə mbəzli hu miymiy kwa mətsəni shi, aw na ka dərna, aw na, ka ghəra sləni ka miʼiy ghəra, aw na, mbəzli pəsliti məndi lə hwa, kala tsəgha diɓa na, mbəzli mbə ma, kə dzaa nza mbə shi,» kə. 30 Saa niy pəəsliti na Asayel zəmbəghəshi, mbə mbəzə tə pi tsa har məndi vaa Gabawuŋ, va tsəgha niy pəəsliti kar Zhəwabə lə Avishay Avəner.
31 Ma kə Davitə kaa kar Zhuwabə lə mbəzli kwasəbə gwanashi na: «Slakwantim kubeŋer kən ghən ghwuy, a ghwuy pəhəti bəhuhwi titi ghwuy ta təhuni mbəri tsa Avəner,» kə. A mazə Davitə niy pəhay mbəri tsa va dəʼu ghən tsa ci məndi mbə dza ta la ci. 32 Mbə məlmə Hebruŋ niy lanti məndi Avəner. Dzəghwa mazə Davitə kwaw faghwa wahə zlaŋzlaŋ tə kuli ci, Ka wahə mbəzli gwanashi kuraku. 33 Dza mazə ki, mbaʼ ghakəvəri cəm ta təhuni Avəner. Ma kə kwa cəm tsa va na:
Niy təɓə ghaa məti,
nja ntsa kama kuma ci kwa ghwa kiw Avənerəw.
34 A pəhə pəhə niy nza divədivi ghaw,
A tsa tsa niy nza shiɗəshiɗə gha kwa dəŋwə kiw.
Njasa ka ka ghəli vaa fiy ghuɓə ta ndə,
mbaʼ ghəshi pəəslitiy,
tsəgha pəəslitəŋa məndi ɓay,» kə kaa cəm tsa va.
Zhəghwa mbəzli gwanashi ka zhiniy wahəə dzəkən mbəri tsa Avəner ki. 35 Ma vici tita na, dza mbəzli gwanashi, ka mbaɗə Davitə ta zəmə shiy ghəci. Kala zləɓa ghəci, hwaʼ zəməkə fəla. Ma kə na: «Ɓasakənɗa tə Hiyala nguvəə gura jikir na yən kəə zəmə ya peŋ, ya nima shiy ka vici pəku,» kə.
36 Sa favə mbəzli gwanashi kuma va na, mbaʼ kuma va təɓanatishi. Talay, ya wa shiy niy məni mazə na, mbə təɓanshi niy nza ghəshi kaa mbəzli gwanashi. 37 Fəca va kiy, a ka Zhuwda gwanashi lə ka Izərayel gwanashi niy sənay, kuma mazə dzar mbə məti Avəner zəghu Ner vaw, kə ghəshi. 38 Ma kə mazə kaa mbəzli kwa dəgha ci na: «Sənay ghuy, a mazə, ntsa dikə tsa mətiy tə hiɗi ka Izərayel ndatsə pə ghuy na? 39 Ya tsəgha nzee mazə sanay, daw favee bərcee. Ghyanakəɓa ndərazhi mali har məndiy vaa Ceruya na kaa ngəra. Nza Kwa sləkəpə dəʼu ghən tsa nzə ɓasanakənshi nguvə tə mbərkə jikir tsa mənti ghəshi,» kə.