Kar Baana lə Rekabə pəəsliti Ishəbushetə
4
Sa favə Ishəbushetə zəghu Sawul a məndi paslanti Avəner kwa Hebruŋ, kə məndi na, mbaʼ məhərli ci səəta tərəŋu. Dzəghwa mbaʼ hazləni kəəsəvə ka Izərayel gwanashi.2 Mbə mbəzli sləkə zəghu Sawul vay, a nihuti ka sləkə ka sawji niy nza tiɓa bakə mbə mbəzliy sləkə ka sawji ci. Baana, kə məndi kaa slən tsa tsahuti, tsahuti na, Rekabə, kə məndi kaa slən tsa ci. Bakanashiy, ndərazhi Rimun mbə takə tsa Benzhameŋ, mbə məlmə Berut niy nza ghəshi. Məlmə Berut vay, tə hiɗi takə tsa Benzhameŋ niy nza na. 3 A mbəzli mbə məlmə va niy hushiy dzəmbə məlmə Gitayim, mbaʼ ghəshi dzaa nziyshi mbəɓa paʼ ndatsə. 4 A zəghu niy nza va Zhuwnatan zəghu Sawul, Mifibushetə, kə məndi kaa slən tsa ci, vidir ghəci. Zəghu vay, piya cifə niy nza sa ci ghala vəghu tsaa niy mbəzə məndi va mbə məlmə Zhizərel. Sa favə mbəzli a məndi bakwanti kar Sawul lə Zhuwnatan, kə məndi na, dza ghəshi ka huwhushi. Dza maliy kəli zəghu va va mbaʼ ɓəvə zəghu va ka huta li, ghənzə mbə diva li ki na, mbaʼ zəghu va təriy dzəti hiɗi, mbaʼ shəɗəshiɗə ci bakanashi yiɗishi, va tsəgha niy nza naa vədir.
5 Dza ndərazhi Rimun ndə ka Berut, kar Rekabə lə Baana ki, mbaʼ ghəshi kafəshi bakanashi vici kwa ghən, mbaʼ ghəshi dzaa kəsay Ishəbushetə. Tsəhə ghəshiy, Ishəbushetə dzay ta həni, ta ɓə hi tsa havəghu. 6-7 Mbaʼ ghəshi dzakəshiy dzakə ghyi tsa ci lə alkamari. Njasa nza na alkamari ghəshi ɓəkə ghəshi mənti. Dzakə ghəshi na, Ishəbushetə mbə ciki tsa ci məhəni tə pi həni tsa ci. Dzəghwa ghəshi gəpə ghəshi ƴanti mbə hur tsa ci ka mbəri. Sa paslanti ghəshi tsəgha ki na, piyəŋ ghəshi slahu ghən ti ka hushi li. Hi ghəshi virvirvir mbə dza dziy kwa Zhurdeŋ. 8 Mbaʼ ghəshi dzaa kəsay Davitə lə ghən tsa Ishəbushetə mbə məlmə Hebəruŋ. Ma kə ghəshi kaa ngəci na: «Avanay ghən tsa Ishəbushetə, zəghu Sawul ndə mbəzə tsa gha va niy pəla pəəsliŋa. A Kwa sləkəpə watəŋa shi gha, gha mazə tsaa sləkəŋiy tə Sawul lə mbəzli kwa miy dəgha ci ndatsə,» kə ghəshi. 9 Ma kə Davitə kaa ngəshi na: «Ava Kwa sləkəpəə tiɓa ka favə, ghənzə saa mbəlantəra va mbə ngəraʼu gwanay. 10 Ntsaa niy ɓəkəra nuwur tsa məti Sawul va yən mbə məlmə Cikəlagiy, bar tsa wuzə tsaa ɓəkəra na niy təkəti na. Sa dzee nee kiy, mbaʼee gəzanshi kaa mbəzli, mbaʼ ghəshi kəsətiy paslanti. Tsəgha niy wanatee zhəmə ci ghəci ntsaa ɓəkə bar tsa wəzə tsa. 11 Tərə na ghuy ghuy ka rəɗaa dzaa kəsay ntsa kama fəti və kiy ghyi tsa ci mə həni mbaʼ ghuy pəəsliti shəkəna? Ta ɓasakənŋuy nguvə dzee tə mbərkə sa pəsliti ghuy va. Ta zantəŋuy dzee tə hiɗi,» kə.
12 Dzəghwa Davitə ki, mbaʼ gəzanshi kaa ka sawji ci a ghəshi bakwanti kar Rekabə lə Baana. Dza məndi mbaʼ məndi slaslavə divədivi shi lə shəɗeshəɗer shi, mbaʼ məndi dzaa pəpəhiy shi ndəku vəgha kufa mbə məlmə Hebruŋ. Dza məndi kaa ghən tsa Ishəbushetə na ci ki, mbaʼ məndi harəti, mbaʼ məndi dzaa lakən kən Avəner kwa kuli mbə məlmə Hebruŋ.