Davitə məni mazə dzəkən ka Izərayel gwanashi
(1 NəMezh 11.1-3)
5
Liy hum ki na, dza mbəzli mbə takəhi ka Izərayel gwanashi mbaʼ ghəshi səəkəə kəsay Davitə mbə məlmə Hebruŋ. Ma kə ghəshi kaa ngəci na: «Hulfə kutiŋ naa sa ghummə, mbə ndə kutiŋ səvəri ghummə. 2 Ya kwataŋa ghala vəghu tsaa niy nza Sawul mazə tsa ghiyiy, gha niy nza dikə tsa ka sawji ka mbəzə ka Izərayel. Ma kə Kwa sləkəpə niy niy kaa ngəŋay: “Gha dza naa sləkə mbəzlee ka Izərayel, gha dza naa məni mazə dzəkən shi” kə niy ni,» kə ghəshi kaa ngəci. 3 Dzəghwa mbəzli dikə dikə ni mbə ka Izərayel gwanashi mbaʼ ghəshi səəkəə kəsay mazə Davitə mbə məlmə Hebruŋ. Dza na mbaʼ slati kiri kwa Kuma Kwa sləkəpə li shi. Dza ghəshi mbaʼ ghəshi shəkambə in dzəghwa mbə ghən ci ta nza ghəci ka mazə tsa ka Izərayel. 4 Piya mahəkanəmətsəkə niy nza sa Davitə ghala pi tsaa pəərə məndi. Piya faɗəmətsəkə ghəci mənti mbə məni mazə. 5 Piya mbərfəŋ mbaʼ reta niy mənti na mbə məni mazə dzəkən takə tsa Zhuwda mbə məlmə Hebruŋ. Mbə məlmə Zheruzalem na, piya mahəkanəmətsəkə mahəkanə ti ghəci mənti mbə məni mazə dzəkən ka Izərayel gwanashi lə dzəkən Zhuwda.Davitə dzay dzəmbə məlmə Zheruzalem ta nziy mbəɓa
(1 NəMezh 11.4-9; 14.1-2)
6 Liy hum ki na, dza mazə Davitə kafə kafiy lə ka sawji ka mbəzə ci ta dzəmbə Zheruzalem ta dza ta mbəzə lə ka Zhebushitə mbəzliy niy nza tə hiɗi va. Ma kə mbəzli va kaa ngəci na: «Ka səmbəŋa ghaa dzəmbə nana məlmuw. Ya ghulefesli lə vədevəderiy, makə na ghəshi ta zəmavəŋuy bali,» kə ghəshi. «Ka ɓəhu məlmə va Davitə tepuw» Niy ɗi ghəshiy gəzə lə gəla gəzə kuma tsəgha na va. 7 Ya tsəgha niy gəzəkə ghəshi kiy, a Davitə niy ɓəhu Shiyuŋ məlmə kwa bərci, mbaʼ məndi fanati slən Məlmə Davitə.
8 Ma kə Davitə niy ni fəcavay: «Mbaʼ kə ndəə ɗi mbashi ka Zhebushitiy, kwal tsa lati məndi va dziy mbə hiɗi kəə nuw ta dzəmə ta pəsli ti shi. Ta na ghulefesli lə vədevəderiy, ka ɗi kuma shi yaw,» kə niy ni. Tə kuma va səəkə kuma ka məndi vaa gəzə: «Vədevəder lə ghulefesliy, ka dzəmbə ciki tsa Kwa sləkəpə ghəshiw,» kə məndi.
9 Dza Davitə ki, mbaʼ nziyiy mbə məlmə kwa bərci va. Məlmə Davitə, kə kaa slən tsa nzə. Dza na mbaʼ zhiniy ngati kələm kwa jipə zlara har məndi vaa Milu lə ghyi tsa ci. 10 War a bərci Davitə mətsəhəva kwa kuma kwa kuma, sa nzana kwasəbə Kwa sləkəpə, Hiyalaa sləkə shiy gwaʼ gwaʼa niy nza.
11 Dzəghwa Hiram, mazə ka Tir mbaʼ ghunashi mbəzli va Davitə lə shighu fə har mədiy sedər. Mbaʼ ghunanaghə ka məni sləni shighu lə ka fəɗi hərezliy nga shiy. Mbaʼ ghəshi nganati ghyi kaa Davitə. 12 Dzəghwa tiɓa kiy, mbaʼ Davitə sənay a Kwa sləkəpə fiy ka ntsaa sləkə ka Izərayel kataŋ, kə, mbaʼ sənay tə mbərkə ka Izərayel sa nza ghəshiy mbəzli nzə fati na bamaa dzəti mazə tsa məni na va, kə.
Ndərazhi yakə Davitə mbə məlmə Zheruzalem
(1 NəMezh 3.5-9; 14.3-7)
13 Liy hum sa ɓarvay Davitə mbə məlmə Hebruŋ, mbaʼ səəkəə nziyiy mbə məlmə Zheruzalemiy, aa niy ɓəɓəvə nihuti miʼiy dzəkən ni kiy ghyi tsa ci, mbaʼ nihuti miʼi niy nza və dzar vəgha bəla diɓa. Mbaʼ miʼi va niy zhiniy yanakə ndərazhiy zhər lə ghyehi. 14 Avanashi slənedemer ndərazhi yavə na ghəci mbə məlmə Zheruzalem: Shamuwa, mbaʼ Shuvavə, mbaʼ Natan, mbaʼ Saləmuŋ, 15 mbaʼ Yivəhar, mbaʼ Elishəwa, mbaʼ Nefegə, mbaʼ Yafiya, 16 mbaʼ Elishama, mbaʼ Eliyadə, mbaʼ Elifelet.
Davitə mbashi ka Filisteŋ ɗaŋ səɗa
(1 NəMezh 14.8-16)
17 Ma sa favə ka Filisteŋ a məndi pəərəti Davitə ka mazə ka Izərayel, kə məndi na, dza ghəshi gwanashi mbaʼ ghəshi kafəshi ta pəla ci, ta kəsə. Mbaʼ məndi səəkəə gəzanci kaa Davitə, mbaʼ dzaa nziyiy tə pi wəzə kala gar mbay məndi tiɓa. 18 Dzəghwa ka Filisteŋ mbaʼ ghəshi səəkəə Kalay pi tsaa dziy kwa teʼu pi tsa har məndi vaa teʼu pi tsa ka Refay. 19 Dzəghwa Davitə ka ɗuw kuma va Kwa sləkəpə: «Ee dza ta pəsli ta ka Filisteŋ va na? Ta fambərashi dza gha mbə devee na?» kə. «Mbala ta pəsli ta ka filisteŋ, ta fambəshi dzee mbə dəvə gha,» kə Kwa sləkəpə kaa ngəci.
20 Sa gəzanakə Kwa sləkəpə tsəgha ki na, dza Davitə mbaʼ dzaa pəsliy ti shi tə pi tsa har məndi vaa Baal-Perashim, mbaʼ irətishi. Ma kə ki na: «A Kwa sləkəpə ghunantəra kwal dzəvəri mbə ka mbəzee ta mbashee njasa ka ghərakuli vaa ghunivə kwal dzəghwa tə pi tsa diŋəzliti məndi,» kə. Va tsəgha fanati məndi slən Baal-Perashim kaa pi tsa va. Ɗi naa gəziy: “Pətsa gura məndiy ghunivə kwal ti” 21 A ka Filisteŋ niy zlazlashi hiyalahi shi tə pi tsa va, mbaʼ kar Davitə lə mbəzli ci pahushi.
22 Zhəghwa ka Filisteŋ mbaʼ ghəshi zhiniy kalay pi tsa dziy kwa teʼu pi tsa har məndi vaa teʼu pi tsa ka Refay. 23 Zhəghwa Davitə ka zhiniy ɗuw kuma va Kwa sləkəpə. Ma kə Kwa sləkəpə kaa ngəci na: «Ka dza gha tsər ta pəsli ti shi ma, liy hum liy hum pə ghaa daɓəshi nza gha dza kəsashi tə kuma pi tsa nza fəhi va ti. 24 Sa ka ghaa favə gaka səɗa mbə dza mə ghən fəhi vay, nza gha diva ta pəsli ti shi. Sa nzanay, ghala vəghu tsa va dzee ta dza kwa kuma gha ta irə ka Filisteŋ,» kə. 25 Dzəghwa Davitə mbaʼ dzaa mənti njasa gəzanakə Kwa sləkəpə va, mbaʼ irəti ka Filisteŋ. Sa kəsəvə na tihəshi tə pi tsa har məndi vaa Gevayiy, paʼa kwa ghala lə pi tsa har məndi vaa Gezer.