Davitə Kafiy ta ɓə sərndəkə tsa Kwa sləkəpə dzəmbə Zheruzalem
(1 NəMezh 13.1-14; 15.25-16.3)
6
Dzəghwa Davitə diɓa mbaʼ ɓasəti ka sawjiy gura mbə ka Izərayel, mbəzli bələku bələku bələku mahəkanəmətsəkə. 2 Dza na mbaʼ kafiy lə mbəzli va gwanashi ta dzəmbə məlmə Baale-Yehuda, ta dza ta ɓə sərndəkə tsa Kwa sləkəpə. Sa nə məndi va: «Sərndəkə tsa Hiyala Kwa sləkəpəə sləkə shiy gwaʼ gwaʼa, saa nziyta mə ghən Sherubeŋhi,» kə məndi kaa har ci. 3 Mə hum pi niy nza ghyi tsa Avinadavə, kiyɓa niy nza sərndəkə tsa va. Mbaʼ məndi dzaa ɓəvə, mbaʼ məndi faghwa kwa muwta gədu yəwun na, ka dzashi li ki. Kar Uza lə Ahiyu ndərazhi Avinadavə niy nza na kwasəbə muwta gəduw va. 4 Dzəghwa mbaʼ məndi kafəshi lə muwta va kiy ghyi tsa Avinadavə va mə hum pi, lə Sərndəkə tsa Hiyala va kwa, ka ʼwanci kwal Ahiyu. 5 Kar Davitə lə ka Izərayel gwanashi ki na, ka vəshi, kala tsə Kwa kuma Kwa sləkəpə. Ka tsa shi fəɗiti məndi ghənghən ghənghən tə tsəm tsa har məndiy Shipər, shiy nja gəzhipipir lə bembeder. 6 Ma sa tsəhəshi ghəshi tə ngula har məndi vaa Nakuŋ ka məndiy dəʼu shiy ti na, mbaʼ slay manashi shiy njasa ɗi ghəshi ndəghanti sərndəkə tsa Hiyala va. Dza Uza ka dzəghə jihəci lə dəvə. 7 Mbaʼ nəfə tsa Kwa sləkəpə satiy dzəkən Uza va kuma mənti na va kala zəzəti ma kuma. Dza na mbaʼ sləviy ka mbəri tiɓa vəgha sərndəkə tsa va.8 Sa nay Davitə njasa sləviy Kwa sləkəpə Uza ka mbəri tsəgha ki na, mbaʼ məhərli ci səəta. Mbaʼ fanati slən Peretə-Uza kaa pi tsa va. Ɗi slən tsa vaa gəziy: Pətsa məti Uza ti. Ya paʼ ndatsiy, tsəgha ka məndiy har slən tsa pi tsa va. 9 Mbaʼ her Davitə dzashi va Kwa sləkəpə fəcava, ma kə na: «Ka dzee fəvə sərndəkə tsa Kwa sləkəpə kiy ghyi tseyew,» kə. 10 Dza na ki, mbaʼ bashanti ɓə sərndəkə tsa vaa dzakə ghyi tsa ci, ghyi tsa ci va nə məndi, ghyi mazə tsa Davitə, kə məndi. Mbaʼ dzaa fiy kiy ghyi tsa Ubet-Edum, ndə ka Gatə. 11 Tir mahəkanə sərndəkə tsa Kwa sləkəpə va mənti kiy ghyi tsa Ubet-Edum ndə ka Gatə tsa va ki. Dzəghwa Kwa sləkəpə mbaʼ təfanatishi miy kaa kar ntsa va lə mbəzli kiy ghyi tsa ci gwanashi.
Məndi ɓəghə sərndəkə tsa Kwa sləkəpəə dzəmbə məlmə Zheruzalem
( 1 NəMezh 15.25–16.3)
12 Liy hum ki na, mbaʼ məndi səəkəə gəzanci kaa mazə Davitə: «A Kwa sləkəpə təfanati miy kaa kar Ubed-Edum ghəshi lə mbəzli kiy ghyi tsa ci, mbaʼ təfakən miy kən shi vəshi gwanashi, tə mbərkə sərndəkə tsa Hiyala va,» kə məndi. Sa favə Davitə tsəgha na, mbaʼ dzaa ɓəkə sərndəkə tsa Hiyala va kiy ghyi tsa Ubed-Edum dzakə ghyi mazə tsa ci va lə vəshi. 13 Avanay njasa niy məni məndi mbə ɓə sərndəkə tsa va: Kwaŋ kə mbəzliy ɓə ci bəlakata səɗay, piyəŋ ka Davitəə sləni kəɓə mbaʼ məceri nza sliw ti kaa kwa sləkəpə. 14 Ka naa dzay, ka tsə kwa kuma Kwa sləkəpə lə bərci ci gwaʼ gwaʼa, kwataka shiy nja shi ka ndə ta Hiyala vaa sərəə dzəghwa hati niy nza na titi ci. Tə məgapa leŋ niy tsati məndi shi va. 15 Ava tsəgha ɓəghə kar Davitə lə ka Izərayel gwanashi sərndəkə tsa Kwa sləkəpə dzəmbə Zheruzalem, ka ngumə lala lə vəshi, ka viy təlimim.
16 Ghala vəghu tsa tsəhə məndi lə sərndəkə tsa va kiy ghyi mazə tsa Davitiy, a Mikal zha Sawul va niy naghay pi dzəghwa kwa mergi ghənzə kiy ghyi. Mbaʼ niy nay mazə Davitə mbə tsə, ka dəghwaghuli kwa kuma Kwa sləkəpə, mbaʼ niy ndərəti mbə nəfə tsa nzə. 17 Dzəghwa mbaʼ məndi səəkəə fiy sərndəkə tsa va tə pi tsaa niy gumati məndi ta fə ci, mbə ciki gamtaʼwal tsaa niy lanati Davitə ki. Dza Davitə mbaʼ sləsliy shiy kaa Hiyala ta zərkə, mbaʼ ndananti ni ndi ndi ni. 18 Ma sa kəɗanti Davitə slasla shi va lə ndi shi va ki na, mbaʼ təfanatishi miy kaa mbəzli ka Izərayel lə slən tsa Hiyala Kwa sləkəpəə sləkə shiy gwaʼ gwaʼa. 19 Dza na mbaʼ tatahanavəshi shi zəmə kaa ka Izərayel gwanashi, njasa ɓasəshi ghəshi va gwanashi, zhər lə miʼi gwaʼa: Ya wa ndiy, ghəni peŋ kutiŋ, mbaʼ gatuw tsa tati məndi tə ya dibinuji kutiŋ, mbaʼ gatuw tsa tati məndi tə ya fə ghulighuli na har məndiy rezeŋ kutiŋ. Liy hum, ki na mbaʼ ghəshi dzashiy jighi gwanashi.
20 Dza Davitə kuraku ki, mbaʼ dzay dzakə ghyi ta səku mbəzli kiy ghyi tsa ci. Ma ghəci mbə dzakə na, mbaʼ Mikal zha Sawul va səvəritaa dzəghwa kuma ci, ma kə kaa ngəci na: «Ndatsə citi gha shəndəkə tsa gha lə sərəva tsa sərantəvaŋa gha tsa hasəŋa kwa kuma miʼiy ghəranshi sləni kaa ka sləni gha nja ntsa gəmiy tsa kiyaa mazə ka Izərayel,» kə.
21 Ma kə Davitə kaa ngəta na: «Ta fə shəndəkəə dzəti Kwa sləkəpəə nara va wəzəɓa yən kaa dəŋa lə mbəzli kiy ghyi tsa ci gwanashi, mbaʼ tivəra ta sləkə mbəzli nzə ka Izərayel mənee kuma va tsəgha. 22 Daw sava dzee zhiniy zhəghəti ghən tsee, ka məntəvara nja ntsa juw tsa. Ya tsəgha nziy, ghalaɓa dza miʼiy ghəra sləni va kaa ka slənee va gəzə ghaa guraa fati shəndəkə tə ya,» kə. 23 Niy yavə zəghu Mikal zha Sawul va paʼ tə məti nzə kiw.