Hyalaa gəzanci kuma dza na ta manaci kaa Davitə
(1 Ch 17.1-15)
7
Dzəghwa mazə Davitə dzəraʼ nziyiy kiy ghyi mazə tsa ci ki, mbaʼ kwa sləkəpə ɓanavə nziy tsa wəzə tsa, mbaʼ ndəghuti va ka mbəzə ci va niy nza dzar vəgha hiɗi ci gwanashi. 2 Ma kə tə nahuti vici kaa Natan ndə gəzə kumaa səəkə va Hiyala na: «Nighə sanay, mbə ghyi tsa mənti məndi lə shighu ka dimə har məndiy sedər nzee. Ma sərndəkə tsa Hiyala na ci ki na, mbə ciki gamtaʼwal tsa tsati məndi lə məgapa. Njaa nata gha kuma vaa?» kə. 3 Ma kə Natan kaa ngəci na: «Mbaʼ pə gha pəhəti kuma mbə nəfə tsa gha ta məniy dzəkən kuma vay, ə pə ghaa məni. Sa nza nay, kwasəbə gha na Kwa sləkəpə,» kə.4 Ma hivir liy hum kuma va ki na, dza Kwa sləkəpə mbaʼ gəzanci kuma kaa Natan. Ma kə na: 5 «Mbala gəzanci kaa Davitə ndə sləni tsee. Ma pə gha kaa ngəciy: Ma kə Kwa sləkəpiy: “Gha dza na ta ngara ciki tsa dzee ta nziy mbuw. 6 Ghala ɓəkəvəree ka Izərayel mbə Ezhiptə paʼ va vəghu tsa ndatiy, səəkee nziyəhu nziy mbə cikə tsa nganga tsaw. War dzar mbə cikə gamtaʼwal niy dza dza məndi lə ya mbaʼ məndi lakən gaska kən. 7 Gwanay vəghu tsaa niy nzee va kwasəbə ka Izərayel gwanashi kiy, səəkee gəzanakə ya kaa tsama ndə mbə mbəzliy niy fiy ya ta ʼwa kwal kaa ngəshi: Tawa ngara ma ghuy ciki tə shighu ka dimə ta nziyee mbəa? pənuw” kə Kwa sləkəpə, pə gha kaa ngəci,» kə Kwa sləkəpə kaa Natan. 8 Zhini ma kə kaa ngəci diɓa na: «Njana nza na tsəgha kiy, avanta kuma pə gha dzaa zhiniy gəzanci kaa ndə sləni tsee Davitə: Ma kə Hiyala Kwa sləpəə sləkə shiy gwaʼ gwaʼay: “Yən pəlakəŋa na tə pi makə shiy gha mbə makə teŋkesli ta səəkə gha ta məni mazə dzəkən mbəzlee ka Izərayel. 9 Ya mbə nama kuma məni ghay, mbə kəətiŋa niy nzee. Cəkeʼ bakwantəŋee ka mbəzə gha. Ta fati shəndəkə dzee dzəti slən tsa gha nja sa nza na va tə mezhizhiy guranti tə hiɗi. 10 Ta ɓanavəshi ni shi hiɗi dzee kaa mbəzlee ka Izərayel. Tə hiɗi va dzee ta fiyshi, nza ghəshi nziy ti shi lə ghyeghyer shi. Ka dza ghəshiy zəzə kuma ghulaw. Ka dza mbəzli gəm gəm niy zhiniy ʼyapəvəshi njasa kwataŋa va, 11 ghala vəghu tsaa niy fiyee va ka sla nguvə ta sləkəshiw. Ta mbəlantəŋa dzee mbə dəvə ka mbəzə gha gwanashi, mbaʼee ndaŋa dəkəva mbə nziy tsa gha. Avee gəzaŋa yən Kwa sləkəpə, yən na saa dza ta yavəŋa hulfə. 12 Sa ka vəghu tsa gha tikə tə hiɗi kiriy, mbaʼ gha mətiŋa, mbaʼ gha dzəghwaa kəsashi jijihiŋa kwa kuliy, ta pəərəti ndə dzee mbə ndərazhi gha kwa səɗa gha, zəghu yakə gha dəʼu ghən tsa gha. Ta ɓanavə bərci dzee kaa mazə tsa ci. 13 Ghəci dza na ta ngara ghyi. Kaa mbəzli kwa miy dəgha ci dzee ta ɓanavəshi məni mazə ta paʼa kwa ndimndim. 14 Didi dzee nza və, ghəci kuraku na, zəghwee ghəci dzaa nza. Mbaʼ kə təvəti kumay, njasa ka didi vaa i zəghu ci dzee i. 15 Na na ci ya paʼa humɓay, ka dzee zhəghanci hum njasa zhəghanavee va kaa Sawul tsa ndəghantee va tə ghaw. 16 Sa ka gha mətiŋay, Ka dza mazə tsa ghaa ɓarvay mbə dəvə mbəzli kwa miy dəgha ghaw, war ghəshi dza naa məni mazə ya paʼa humɓa. Ka dza ndəə ɓəhu və shi ya paʼa humɓaw,” kə Kwa sləkəpə, pə gha kaa Davitə,» kə Kwa sləkəpə kaa Natan. 17 Dza Natan cəkeʼ dzaa zhanavə kuma gəzanakə Kwa sləkəpə va kwa shiw kaa Davitə.
Davitə cəʼu Kwa sləkəpə
(1 Ch 17.16-27)
18 Liy hum shi va ki na, mbaʼ mazə Davitə dzay dzəghwa kuma Kwa sləkəpə, ma kə na: «A Hiyala Kwa sləkəpə, ya yən, ya mbəzli kiy ghyi tsee kiy, məniŋiy ghiy mbəzli gar nzee dzəghwa tə pi tsa fiyra gha tsa kiw. 19 Ya tsəgha nzə kiy, daw gha zhiniy nata kuma va kwa mətsə gha. Zhəghwa ghay, ka zhiniy gəzə shi dza gha ta məni kwa kuma kaa mbəzli kwa miy dəghee yən ndə sləni tsa gha. Shi ɗi ghaa məni gha lə ndə ngəri Hiyala Kwa sləkəpə. 20 A kuma dzee va yən Davitə zhiniy gəzəkəŋa kiya? Gha dəʼu ghən tsa ghay, a gha sənara yən ndə sləni tsa gha Hiyala Kwa sləkəpə. 21 Tə mbərkə kuma gəzəkə gha, mbaʼ gha tarəkə məni nzə mbə nəfə gha mənti gha kuma diɓədiɓə na va tsəgha na gwanata. Dza gha mbaʼ gha cikəvəriɗa yən ndə sləni tsa gha. 22 Ta na navay, dikə nza gha Hiyala kwa sləkəpə. Ndə tiɓa nja ghaw. Njasa ka ghiy vaa favə məndiy gəzə ndimndimiy, nahuti Hiyala tiɓa dzəghwa kən ghaw. 23 Nahuti hulfə tə hiɗi ka yiməva lə hulfə gha, ka Izərayel səkwa gha va gha Hyalaa mbəlanti, ta nza ghəshi ka mbəzli ghaw. Sa mbəlantishi ghay, mbaʼ slən tsa shi dzantəvay. A gha mənti shiy tərəŋu tərəŋu kaa ngəshi. Tə mbərkə hiɗi gha vay, a gha mənti shiy ka dza her mbəzli və shi. kuma na nava hulfəə dza vaa yiməva lə hulfə gha va mbəlanti gha mbə dəvə hulfə ka Ezhipə lə hiyalahi shi vaa? 24 Sa dza ghay, mbaʼ gha fiy ka Izərayel ka hulfə gha, ta nza ghəshi ka mbəzli gha kwa ndimndim, mbaʼ gha zhəghəŋa ka Hiyala shi ki. 25 Nana kiy Hiyala Kwa sləkəpiy, kuma gəzəkə gha vaa dzəkənee yən ndə sləni tsa gha lə dzəkən mbəzli kwa miy dəgha yay, titihu əə pə gha pəhəti ta nza ghənzə tsəgha ya paʼa humɓa, nza gha mənti njasa gəzəkə gha va. 26 Ghalaɓa kiy, ta fə shəndəkə dza məndiy dzəti gha ta kwa ndimndim, ka gəzə: “Hiyala ka Izərayel va na Hiyala Kwa sləkəpəə sləkə shiy gwaʼ gwaʼa,” kə məndi. Titihu, nziyŋa lə mbəzli kwa miy dəghee yən ndə sləni tsa gha Davitə, mbaʼ gha ɓanavəshi bərci ta kwa ndimndim. 27 Ta na navay, gha dəʼu ghən tsa gha, gha Hiyala ka Izərayeləə sləkə shiy gwaʼ gwaʼa gəzara na yən ndə sləni tsa gha: “Yən dza na ta yavəŋa hulfə,” pə gha, va tsəgha dza ma heree yən ndə sləni tsa gha ta cəʼu kuma cəʼwee na va gha. 28 Sanay Hiyala Kwa sləkəpiy, gha na Hiyala, dzərvə mbə kuma ghaw. A gha gəzəkəra wəzə tsa kənee yən ndə sləni tsa gha. 29 Əə cəʼuŋee a gha təfakən miy kən mbəzli kwa miy dəghee nza ghəshi mbəə məni mazə kwa kuma gha ya paʼa humɓa. Sa nza nay, gha dəʼu ghən tsa gha gha Hiyala Kwa sləkəpə gəzəkə na tsəgha. Təfakən ma gha miy dzəkən mbəzli kwa miy dəghee yən ndə sləni tsa ghay, lə təfə miy dza naa nza kən shi ya paʼ humɓa,» kə Davitə.