Davitə mbəzə lə mbəzli fə na ghala li shi
(Voir 1 Chron 18.1-13)
8
Kwa kuma juw ki na, mbaʼ Davitə səvəriy ta mbəzə lə ka Filisteŋ, mbaʼ mbashi, mbaʼ shəkanti bamaa niy nza va və shi. Kala zhiniy ghəshiy mbay sləkə nihuti hulfəhi gwanashi ni nja kwataŋa. 2 Dza na diɓa mbaʼ mbashi ka Muwabə, mbaʼ gəzanshi həhənishi kaa ni kəəsəvə na mbəzli, mbaʼ bərkəti bitə tsa ngula hənishi ghəshi ti lə zəʼwə. Dza na mbaʼ təhəvəri mbəzli va mahəkanə mbə lə zəʼu va, mbaʼ bakwanti bəla bakə mbaʼ zlata nahuti bəla tə ghuməta. Ghala fəcava ki na, mbaʼ ka Muwabə zhighəshi ka mbəzli mbə dəvə Davitə, ka tsəhanci ghən. 3 Dzəghwa Davitə diɓa mbaʼ mbashi kar Hadadezer zəghu Rehuvə mazə ka Cuva lə mbəzli tə hiɗi ci, ghala vəghu tsaa niy ɗi na ɓəhu həl Əfərata ta nza ghəci ka həl tsa tə hiɗi ci. 4 Dza Davitə mbaʼ kəsəhu ka sawji mə gədewesli diwiy mən lə mbərfən, mbaʼ ka sawji lə səɗa diwiy diwiy bakə diwiy və. Dza na mbaʼ təravə gədewesli bələku mbə shi, ma niy tərə na mbaʼ kaslanti jəleŋer ti shi. 5 Dzəghwa ka Shiriª mbə məlmə Damasə mbaʼ ghəshi səəkəshi ta yəpə ta Hadadezer mazə ka Cuva. Dzəghwa Davitə mbaʼ bakwanti mbəzli diwiy diwiy bakəmətsəkə bakəti diwiy mbə ka Shiri va. 6 Dza na mbaʼ fəfiy mbəzli ci dzar tə hiɗi ka Shiri ta sləkəshi. Mbaʼ ghəshi zhəghəshi ka mbəzli mbə dəvə ci, ka tsəhanci ghən. Ya ghəshi lə nima mbəzli niy mbəzə Davitiy, kar Kwa sləkəpəə ɓanavə bərciy mbashi. 7 Dzəghwa Davitə mbaʼ zlighuhu galhi niy nza va ka sawjiy niy ndəghu Hadadezer, mbaʼ paghəshiy dzəmbə məlmə Zheruzalem. Tə mbəzə kwa shamshama niy mənti məndi galhi va. 8 Dzəghwa na diɓa, mbaʼ pahu mbəzə ghəm na daŋ tərəŋu mbə məlmə Betah, lə mbə məlmə Berutay tə hiɗi sləkə Hadadezer.9 Dzəghwa mbaʼ Tuy mazə ka Hamatə favə: A Davitə mbashi ka sawji Hadadezer gwanashi, kə məndi. 10 Dza na ki mbaʼ ghuynay zəghu ci Yuram va Davitə, ta dza ta səku ci, lə ta fal ci tə sa mbəzəhu na mbəzə lə Hadadezer, mbaʼ ghəci mbay. Sa nza nay, ka mbəzə niy nza kar Mazə Hadadezer tsa va ghəshi lə Mazə Tuy. Lə shi mənti məndi tə tsahi gəna, mbaʼ ni tə mbəzə kwa shamshama, mbaʼ ni tə mbəzə ghəm na niy dza Yuram ta səku Davitə. 11 Sa ɓanavəshi na kaa mazə Davitə na, mbaʼ Davitə vəlanati vəli li shi kaa Kwa sləkəpə kwasəbə nihuti mbəzə kwa shamshama va lə nihuti tsahi gənaa niy zləghuhu na va va mbəzliy niy mbashi na va mbə mbəzə, mbəzliy niy nza va mbə dəvə ci gwanashi. 12 Mbəzliy vay: Ka Shiri, lə ka Muwabə, mbaʼ ka Amun, mbaʼ ka Filisteŋ, mbaʼ ka Amalek, mbaʼ va mbəzli Hadadezer zəghu Rehuvə, mazə ka Cuva niy nza ghəshi. 13 Sa bəkukə Davitə ka Shiri bələku bələku məŋ lə dəghəsə bələku dziy kwa teʼu pi tsa har məndi vaa teʼu pi ghuni ki na, mbaʼ slən tsa ci zhiniy dzantəvay. 14 Dza na ki, mbaʼ fəfiy mbəzli ci dzar tə hiɗi Edum ta sləkəshi. Dzar tə hiɗi va gwanashi niy fəfiy na mbəzli, mbaʼ ka Edum gwanashi zhəghəshi ka mbəzli mbə dəvə ci. Ya dza kwama niy dza Davitə ta mbəzə kiy, war mbə ɓanci bərci niy nza kwa sləkəpə ta mbashi mbəzli ghəci.
Mbəzli dikə dikə ni mbə ka sləni Davitə
(Voir 1 Chron 18.14-17)
15 Davitə niy sləkə na ka Izərayel gwanashi. Lə kwal tsa tiɗiɗə tsa, ka nuw kuma lə kwal tsa nzə niy məni na kuma kaa mbəzli sləkə na gwanashi. 16 Zhəwabə tsa nza mbəghiy vaa Ceruya niy nza dikə tsa ka sawji ci. Ma Yehushafat zəghu Ahilud na ndə kwal tsa mazə. 17 Kar Saduk zəghu Ahituvə ghəshi lə Ahimelekə zəghu Abiyatar na, ka ta Hiyala ni va. Ndə tsasli shiy na, Sereya. 18 Banayahu zəghu Yehuyada niy sləkə na ka Kəretə lə ka Peletəə niy ndəghwu mazə. Ndərazhi Davitiy, ka ta Hiyala niy nza ghəshi kuraku.