Sawul pəəsliti ghən tsa ci mbə mbəzə mə dəlagwa Gilbəwa
31
Ghala vəghu tsa va ki na, mbaʼ ka Filisteŋ pəslishi ta ka Izərayel mə dəlagwa Gilbəwa. Mbaʼ ghəshi zəmanavəshi bali kaa ka sawji ka Izərayel, ɗaŋ ka Filisteŋ bəkuvə mbəzli mbə shi. 2 Dza ghəshi tapə ta nuw kar Sawul lə ndərazhi ci kwa mətsəni kwa mətsəni. Mbaʼ ghəshi bakwanti ndərazhi Sawul: kar Zhəwnataŋ lə Avinadavə, mbaʼ Malki-Shuwa. 3 Ghalaɓa ki na, ghyanakə mbəzə tsa va ləɓiy kən Sawul. Mbaʼ ka pa lə havə nighəvə dzəghwa tə pi tsa nza na. Sa nashi Sawul na, tərəŋu her ci dzashi. 4 Ma kə kaa ntsaa ɓə shi mbəzə ci na: «Təɗivə kafaʼi tsa gha a gha paslantəra, ka ɗee ka Filistəŋəə numa Hiyala niy pəəslira dəʼu ghən tsa shi, ta sawara ghəshiw,» kə. Kala zləɓa ma ndə ɓə shi mbəzə ci va, sa nza na, tərəŋu her ci dza shi. Dzəghwa Sawul ki, fəhu təɗivə kafaʼi tsa ci, mbaʼ daŋwatəvay dzəti. 5 Sa nay ndə ɓə shi mbəzə tsa va Sawul mətiy ki na, dza na mbaʼ daŋwatəvay dzəti na ci kafaʼi kuraku, mbaʼ mətiy kwasəbə. 6 Ava tsəgha bekushi kar Sawul lə ndərazhi ci mahəkanashi, mbaʼ ndə ɓə shi mbəzə ci, mbaʼ mbəzli ci gwanashi tə vici kutiŋ.7 Ma sa favə ka Izərayeləə niy nza pəri nahuti bəla teʼu pi ghəshi lə ni kwa kuma həl Zhurdeŋ: «A ka sawji ka Izərayel huhushi mbaʼ məndi bakwanti kar Sawul lə ndərazhi ci» kə məndi na, mbaʼ ghəshi huhushiy zlashi məlməhi shi. Dza ka Filisteŋ mbaʼ ghəshi səəkəə nziyshi mbə məlməhi va.
8 Ma tə həzlimə na, mbaʼ ka Filisteŋ səvərishi ta ɓasə shi tə vəgha mbəzli bakwanti ghəshi va. Mbaʼ ghəshi kəsashi mbəreketi kar Sawul lə ndərazhi ci va mahəkanə ni mə dəlagwa Gilbuwa. 9 Dzəghwa ghəshi piyəŋ ghəshi slanti ghən tə Sawul, mbaʼ ghəshi ɓəhu shi mbəzə ci. Dza ghəshi ka turə lə ghən tsa va dzar tə hiɗi ka Filisteŋ, ka vəvəli nuwur tsa va kaa mbəzli dzar mbə ceker mbəreketi shi lə kaa mbəzli shi gwanashi. 10 Dza ghəshi bəm ghəshi fiy shi mbəzə Sawul mbə ciki mbəri tsa har məndi vaa Astarte. Mbaʼ ghəshi daŋavəgha mbəri tsa ci vəgha kələm tsa məlmə Bet-Sheyan.
11 Sa favə mbəzli mbə məlmə Yabeshə tə hiɗi ka Galad shi mənti ka Filisteŋ va kaa Sawul na, 12 dza zhər nza her və shi, kafə ghəshi kafəshi. Hi ghəshi virəvirəvirə mbə dza, mbaʼ ghəshi tsəhəshi mbə məlmə Bet-Sheyan, mbaʼ ghəshi ɓaɓanti mbəreketi kar Sawul lə ndərazhi ci vəgha kələm tsa məlmə Bet-Sheyan. Dza ghəshi mbaʼ ghəshi zhəghəkəvashiy zhimbə məlmə Yavesh lə mbəreketi va. Mbaʼ ghəshi ndantishi mbəɓa. 13 Sa ndantishi ghəshi na, meʼ ghəshi pavə esler shi, mbaʼ ghəshi parambəshi mbə shiy lantishi ta mbəlaŋ mbə məlmə Yaveshə. Liy hum ki na, mbaʼ ghəshi mənti vici mbərfəŋ mbə məni sumay.