ka Amalek ndanti məlmə Cikəlag
30
Ma tə kwa mahəkana vici ki na, mbaʼ kar Davitə lə mbəzli ci tsəhəshi mbə məlmə Cikəlag. Tsəhə ghəshi na məndi panti shi mbəɓa, mbaʼ məndi ndanti məlmə va. Ka Amalek niy səvərishi na ta mbəzə lə mbəzli tə hiɗi njasaa dzəghwa həci va ka Zhuwda, mbaʼ lə mbəzli mbə məlmə Cikəlag. 2 Dza ghəshi mbaʼ ghəshi kəəsəhu miʼi mbə məlmə va lə nihuti mbəzliy niy nza mbəɓa, ndərazhi lə mitikukwir gwaʼa. Ə na na nza nay, niy pəəsliti ndə ghəshi ya kutiŋəw, war kəəsə na naa niy kəsəhushi ghəshi ka dzashi li shi. 3 Ma sa tsəhəshi kar Davitə lə mbəzli ci mbə məlmə Tsiklag ki na, mbaʼ ghəshi nata ndindi. Zhini mbaʼ məndi kəsəhu miʼi shi lə ndərazhiy zhər shi mbaʼ ghiyehi shi. 4 Dzəghwa ghəshi lə mbəzli ci va kwaw ghəshi faghwa wahə zlaŋzlaŋ. War ka wahə, war ka wahə, kwəpə ghəshi tashi va wahə. 5 Kar Ahinuwam zha ka Zhizərel ghəshi lə Abigayel mali Nabal ndə ka Karmel tsaa mətiy va, miʼi Davitə va bakə niy, a məndi niy kəəsəhushi. 6 Təruŋ her Davitə niy dzashi, Sa nza na mbə gəzə pəəsli ci mbəzli ci va niy nza lə hərezli. Ya wa ndə mbə shiy, a nəfə tsa ci niy zhanci ta kuma ndərazhiy zhər ci, lə ghyehi ci. Ya tsəgha nzə ki na, mbaʼ Davitə zhiniy kumavə bərci, sa kəətiti Kwa sləkəpə Hiyala ci.Davitə nuw ka Amalek
7 Ma kə kaa ndə ta Hiyala, Abiyatar zəghu Ahimelekə na: «Titihu, ɓəkəra shi kwa hati ndə ta Hiyala va nza shiy ɗuw kuma va Kwa sləkəpə kwa shi,» kə. Dzəghwa Abiyatar mbaʼ ɓanakə shi. 8 Dza Davitə ki ka ɗuw kuma va Kwa sləkəpə: «Mbaʼ pən nuw mbəzliy mənti kuma na niy, ta kəsashi dzee na?» kə. «Nəwshi, ta kəsashi dza gha, ta zləghuvə mbəzli gha va kəsəhu ghəshi dza gha,» kə Kwa sləkəpə kaa ngəci.
9 Dzəghwa kar Davitə lə mbəzli ci va diwi diwi kwaŋ ni, mbaʼ ghəshi kafəshi dzəti kwal ki. Ma sa tsəhəshi ghəshi kwa həl Besur na, mbaʼ nihuti mbəzli garəshi. 10 Mbəzli diwi diwi bakə na shiy niy garəshi tiɓa mbə shi, sa niy dalishi ghəshi kala mbə ma ghəshiy taŋə həl. Dzəghwa Davitə ghəshi lə nihuti mbəzliy tərə diwi diwi faɗə ni ka nuw mbəzli va. 11 Dza mbəzliy dzashi va kwasəbə Davitə mbaʼ ghəshi kəsay məgəla zəghu ka Ezhiptə mbə gamba, mbaʼ ghəshi pəmanakə kaa Davitə. Dza məndi mbaʼ məndi ɓanaghə peŋ mbaʼ zəməhu, tiʼ kaa yam, mbaʼ sahushi. 12 Laŋ məndi ɓanavə gatuw tsa tati məndi tə ya fə har məndiy figə, mbaʼ ya fə har məndiy rezeŋ dəguzəku bakə. Sa zəməhu na shi va na, mbaʼ kumavə bərci. Sa nza nay, vici mahəkanə mbaʼ vərɗi mahəkanə niy mənti na, kala zəməhu ya shiy, kala sahu ya yam. 13 Ma kə Davitə kaa ngəci ki na: «A ntsa gha dikə tsaa? kuma tsahu ghaa?» kə. «Zəghu ka Ezhiptə nzee, mava tsa ndə ka Amalek. Kwa mahəkana vici na ndatsə ghala zlara ntsaa sləkəra tikə sa tərəɗee gurapəra. 14 Mbə pa səəkə ghiy njasaa dzəghwa həci va ka Keretə lə va ka Zhuwda mbaʼ va ka Kalebə mbaʼ ghiy ndanti məlmə Cikəlag,» kə məgəla tsa va. 15 Ma kə Davitə kaa ngəci na: «Nza ghaa nza gar pəməghəra dzəti pi tsa nza mbəzli səəkə ghuy va li shi na?» kə. Ma kə məgəla tsa va na: «Zəməkəra fəla lə slən tsa Hiyala gha kala dzaa pəəslira lə gha kala dzaa zhanambəra mbə dəvə ntsaa sləkəra. Ghalaɓay, ta pəməghəŋa dzee dzəti pi tsa nza mbəzli va» kə. Mbaʼ Davitə zəmanakə.
Davitə pəsliy ta ka Amalek
16 Dza na ki, mbaʼ pəməghə Davitə dzəti pi tsa nza ka Amalek va. Tsəhə ghəshi na, mbəzli va kwəshananan dzar tə hiɗi shi gwanashi. War shiy ghəshiy zəmə, ka sa shiy. Ka məni makwaghwa lə shiy niy pavə ghəshi va tə hiɗi ka Filisteŋ lə tə hiɗi ka Zhuwda. 17 Dza kar Davitə lə mbəzli ci, pizl, pəslambə mbə shi pəətə mekishi, war ə ghəshiy bekushi, paʼa tə həzlimə hetihwer. Cəkeʼ ghəshi bakwantishi. War kwataka gula diwi diwi faɗə shiy niy mbəlishiy hushi mə ngeləwbahi. 18 Dzəghwa Davitə ki, cəkeʼ zhinivə shiy niy pahu ka Amalek va, lə mbəzliy niy kəsəhu ghəshi va gwaʼa. Mbaʼ zhinivə miʼi ci va bakə ni. 19 Ndə tiɓa, ya ntsa dikə tsa, ya ntsa juw tsa, ya zəghu shi, ya zha shi kalaa niy nay ghəshi mbə mbəzli shi ya kutiŋəw. Nihuti shiy tiɓa mbə shi shi va niy pahu məndi kala ghəshi tiɓaw. Cəkeʼ niy zhinikəshi kar Davitə. 20 Dzəghwa kar Davitə diɓa mbaʼ ghəshi kahu teŋkesli mbəzli va, lə kuyi shi, mbaʼ slay shi. Mbəzliy niy ka shi vay: «Avanashi shi zləghuvə Davitə,» kə ghəshi niy ni.
21 Dzəghwa kar Davitə lə mbəzli ci va ki, mbaʼ ghəshi zhaa kəsashi nihuti mbəzli shi va diwi diwi bakə ni niy zlashi ghəshi vəgha həl Besur, sa niy dalishi ni va. Dza mbəzli va ka səəkə ta kaʼwə kar Davitə lə mbəzli səəkə na va li shi. Dzəghwa kar Davitə lə mbəzli va mbaʼ ghəshi tsəhəshi vəgha shi, ka səkushi. 22 Ma kə nihuti mbəzli nza ndərəm kwa hur shi ghəshi gwanashi lə nihuti mbəzliy zəzə kuma gəmgəm na gwanashi mbə mbəzliy niy səəkə va kwasəbə Davitə na: «Njanaa niy dza ma ghəshi kwasəbə ghumiy, shiy tiɓa ghəshi dzaa ʼwati mbə shi zləghukə ghummə niw. Kwataka miʼi shi lə ndərazhi shi kə ghəshi pəməvə, ka dzashi gwaʼa tsəgha,» kə ghəshi. 23 Ma kə Davitə na ci ki na: «A ngwadəhira, ka məni ghuy tsəgha lə shi ndammə Kwa sləkəpə ma. A ghuy sənay ghənzə ndəghutəmmə na, mbaʼ fambə mbəzliy niy səəkə vaa pəslambə mbə məlmə ghummə mbə dəvə ghummə. 24 Ndə tiɓa dzaa ni, wəzə na zəzə kuma ghuy va, kuw.
Ya wa ndiy, ə kə məndi ɓanavə na ci bəla mbə shi zləghuvə məndi ni.
Ya mbə mbəzə səəkə ndə,
ya shi ghummə niy ndəghu ndə.
Gwanashi kə ghəshiy təhə shiy kwa jipə shi,» kə.
25 Ghala fəcava ki na, mbaʼ Davitə pəhəti nava kuma tsəgha, ka kuma dza məndiy nuw tə hiɗi ka Izərayel. Mbaʼ mənita ka kuma jiji shi ya paʼ ndatsə.
26 Ma sa tsəhəshi ghəshi mbə məlmə Cikəlag ki na, dza Davitə mbaʼ vəlanavəshi shiy mbə shi zləghukə na va kaa madigahiy mbə mbəzli dikə dikə ni mbə ka Zhuwda. Ma kə kaa ngəshi na: «Avanashim ni ghuy shiy tavəŋuyee mbə shi zləghukə ghiy va ka mbəzə Kwa sləkəpə,» kə. 27 Avanashi mbəzliy niy vəlanavəshi na shi va: Kaa ka Betel, mbaʼ kaa ka Ramwətə tə hiɗi njasaa dzəghwa həci, mbaʼ kaa ka Yatir, 28 mbaʼ kaa ka Arəwer, mbaʼ kaa ka Shifəmwətə, mbaʼ kaa ka Eshətimuwa, 29 mbaʼ kaa ka Rakal, mbaʼ kaa mbəzli mbə məlməhi tə hiɗi ka Yerahəmelitə, mbaʼ kaa mbəzli mbə məlməhi tə hiɗi ka Keni, 30 mbaʼ kaa ka Hurma, mbaʼ kaa ka Bur-Ashan, mbaʼ kaa ka Atak, 31 mbaʼ kaa ka Hebruŋ, mbaʼ kaa mbəzliy niy dzahu Davitə dza dzar mbə shi ghala pi tsaa niy dza dza ghəshi va lə mbəzli ci. Ava tsəgha na mbəzliy niy vəvəlanavəshi na shi va.