Ka Filisteŋ zhəghəti Davitə
29
Dzəghwa ka Filisteŋ ki, mbaʼ ghəshi ɓasəti ka Sawji shi gwanashi tə pi tsa har məndi vaa Afekə. Ma ka Izərayel na, mbaʼ ghəshi nziyshi lə ni shi mbəzli vəgha yam mbə məlmə Zhizərel va. 2 Tə kuma ka sawji bələku, kala tsəgha na, tə kuma ka sawji diwi diwi məŋ niy dza mezhizhi ka Filisteŋ. Ma kar Davitə lə mbəzli ci na, ka kəray ghəshi liy hum kwasəbə mazə Akishə. 3 Ma sa nashi mbəzli dikə dikə ni sləkə ka sawji ka Filisteŋ ki, ma kə ghəshi na: «A shiy ɓəkə ka Ebərə tikaa?» kə ghəshi. Ma kə Akishə kaa ngəshi na: «Waa Davitə ntsaa niy ghəranci sləni va ka Sawul mazə ka Izərayel na. Aa mənti nda piya kutiŋ nda bakə kwa səbee. Ghala jikiy na lə ya paʼa ndatsiy, kəsata kumee gar ɓanci fətiw,» kə.4 Dzəghwa nəfə tsa mbəzliy sləkə ka sawji ka Filisteŋ mbaʼ satiy dzəkən Akishə. Ma kə ghəshi kaa ngəci na: «Gəzanci kaa ntsa va a ghəci zhəghətəvay zhəmbə məlmə ɓanavə gha va ta nziy ghəci mbə. Ka dza na kwasəbə ghummə ta mbəzəw. Aa mbəə zhəghətəvay tə ghummə mbə mbəzə. Mbaʼ kəə ɗi pəla kwal tsaa sləkay lə ntsa ci va dikə tsa niy nza kwataŋa sanay, ka sawji ghummə va dza naa bəku. 5 Naa aa zanti gha ghən, Davitə tsa va na saa niy ha miʼi va kwa cəm kala tsə:
“A Sawul mbashi mbəzli bələku bələku məŋ,
ma Davitə na, mbəzli bələku bələku bələku,” kə ghəshi niy ni na?» kə ghəshi
6 Dzəghwa Akishə ki, mbaʼ haray Davitə. Ma kə kaa ngəci na: «Ava Kwa sləkəpə tiɓa ka favə, ndə tiɗiɗə nza gha. Jəw ɗee ghaa dza kwasəbee ta mbəzə tsaw. Ghala jikəŋa gha lə ya paʼa va vəghu tsa ndatsiy, səəkee nata kuma gəmgəm na va ghaw. Ə na na nza nay, zləɓavəŋa nihuti mbəzliy sləkə ka Filisteŋəw. 7 Njana nza na tsəgha kiy, zhəghətəvaa jighi lə zərkə. Ghalaɓay, ka dza ghaa mənti kumaa təɓanshi ma kaa ngəshiw,» kə. 8 Ma kə Davitə kaa Akishə na: «Əy a kuma məntee kiyaa? Ghala ghatee ghəraŋa sləni paʼa va vici ndatsə kiy ntsee dikə tsay, əə kəsata gha fəti vəya gar dza mee ta mbəzə lə ka mbəzə gha, gha mazə ntsee sləkəra na?» kə. 9 Ma kə Akishə kaa Davitə na: «Ee sənay, shiy tiɓa ghaa məntiw. Nja kuma ndə Kwal Hiyala təɓara kuma gha. Mbəzliy sləkə ka Filisteŋ na niy ni: “Ka dza na ta mbəzə kwasəbə ghummuw,” kə ghəshi. 10 Njana nza na tsəghay, nza gha kafəŋa həzlimə pəətə mekishi ghuy lə mbəzli kwasəbə gha ni, sa ka pi waliyiy, nza ghuy dzaŋuy,» kə.
11 Ma tə həzlimə pəətə mekishi ki na, mbaʼ kar Davitə lə mbəzli ci kafəshi, ka dzashiy dzəti hiɗi ka Filisteŋ. Ma ka Filisteŋ na, ka dzashiy dzəti pi tsa har məndi vaa Zhizərel.