Ka Filisteŋ mbə mbəzə lə ka Izərayel
28
Ghala vəghu tsa va ki na, dzəghwa ka Filisteŋ mbaʼ ghəshi ɓasəti ka sawji shi gwanashi ta dza ta mbəzə lə ka Izərayel. Ma kə Akishə kaa Davitə na: «A gha sənay ta dza dza gha ta mbəzə tsa va kwasəbee lə ka sawji gha ɓay Davitə?» kə kaa ngəci 2 Ma kə Davitə kaa ngəci na: «Tsəgha na, ta dza dzee, nza gha nashima shi dzee yən ndə sləni tsa gha ta mənti dəʼu ghən tsa gha,» kə. «Tsəgha kiy, gha dza naa nzaa ndə ndəghura ya paʼa humɓa,» kə Akishə.Sawul tsəhiy va mali kwa nighə shiy
3 Ghala vəghu tsa vay, a Saməyel niy mətiy, mbaʼ ka Izərayel gwanashi niy təhwananti, mbaʼ ghəshi lanti mbə məlmə ci Rama. Dzəghwa diɓa na, mbaʼ Sawul niy makəti mbəzli va nga zləra lə va nighə shiy tə hiɗi ci.
4 Sa dza ka sawji ka Filisteŋ ki na, mbaʼ ghəshi dzaa ɓasəshi tə pi tsa har məndi vaa Shunem. Dzəghwa Sawul mbaʼ ɓasəti ka sawji ka Izərayel gwanashi mə dəlagwa Gilbəwa. 5 Ma sa nashi sawəl njasa ɓasəshi ka Filisteŋ na, mbaʼ her ci dzashi tərəŋu, war ə ghəci gwərgwərə dalala mbə nəfə tsa ci. 6 Dzəghwa na ka ɗuw kuma va Kwa sləkəpə. Kala zləɓanci ma kuma ghənzə, ya kwa shiw, ya dza kwa shi ka məndi vaa har ʼwərimª, ya dza kwa ndə gəzə kumaa səəkə va Hiyala. 7 Ma kə kaa mbəzliy ghəranci sləni na: «Mbalam pəlaram maliy nighə shiy ee dza ta nighə shiy və,» kə. «A nahuti mali kwa nighə shiy mbə məlmə En-Dwər,» kə mbəzli va kaa ngəci. 8 Dzəghwa Sawul ki, mbaʼ mbarakən nihuti kubeŋer kala gar sənay məndi, ka dzay dzəmbə məlmə va lə mbəzli bakə kwasəbə. Nishə ghəshi kəsata mali va həvir. Ma kə Sawul kaa ngəta na: «Va gha səəkee a gha nighətəra shiy. Ntsaa mətiy na sa ɗee va gha ɗuwtəra kuma və. Ta gəzaŋa slən tsa ci dzee,» kə. 9 Ma kə mali va kaa ngəci na: «Ya ghay, a gha sənay wəzə, a Sawul makəti mbəzli va nighə shiy tə hiɗi ci, pə gha. Tawa ɗi gha palara kuma dzee jighəra mbə kiyaa?» kə. 10 Ma kə Sawul kaa ngəta na: «Ava kwa sləkəpə mbə favə, lə slən tsa nzə zəməŋee fəla, shiy tiɓa dzaa kəsaŋa mbə kuma naw,» kə. 11 «A ntsa ɗi gha yən harəkəməŋa mbə mbəzliy bekushiaa?» kə mali va. «Saməyel pə gha harəkəməra,» kə Sawul.
12 Sa nə Mali va, nighə kə ka shiy na, mbaʼ nay Saməyel. kiyakə ngumata lala zlaŋzlaŋ, ma kə kaa Sawul na: «Tawa dakətəra ghaa? Mazə Sawul nza gha,» kə. 13 Ma kə kaa ngəta na: «Ka hazləni gha ma, gəzara shi nashi gha,» kə. «Məcakwə ntsaa mətiy na shi nashee mbə səmə kwa hiɗi,» kə mali va kaa ngəci. 14 «Waʼi wa na ghəshaa?» kə Sawul. «Pəhal zal na sa nayee səəmə lə kubaŋ tsa dikə tsa kən ghən ci,» kə mali va.
Sa gəzəkə mali va tsəgha ki na, kahə sawəl sənay, Saməyel na sava, kə. Dza na tsəfəku tsəfəkwiy, gaʼa kuma ci mbə hiɗi, ta ci haʼu tsa haʼu na ti. 15 Ma kə Saməyel kaa ngəci na: «Tawa gagara gha lə harɗaa səəmə, yən guŋəraa?» kə. Ma kə Sawul na: «kuma nza na kənee, mbaʼ heree dzashi tərəŋu və. Ə səvərishi ka Filisteŋ ta mbəzə lə ya. Mbaʼ Hiyala zhəghavəra hum. Ka ɗuw kumee viy, kala zləɓara ghənzə ya dza kwa shiw, ya dza kwa ka gəzə kumaa səəkə və. Va tsəgha haraŋee a gha gəzara kuma dzee məni,» kə. 16 Ma kə Saməyel kaa ngəci na: «Tawa ɗuw gha kuma viya. Ya ghay, a gha nay, a Kwa sləkəpə zhəghavəŋa hum, mbaʼ zhəghəta ka kwa mbəzə gha. 17 kumaa niy gəzara na va ta gəzaŋa na sava mənti Kwa sləkəpə. Aa ɓanti məni mazə mbə dəvə gha, mbaʼ ɓanavə kaa tsahuti ndə, kaa Davitə. 18 Sa satiy nəfə tsa Kwa sləkəpəə dzəkən ka Amalekiy, mbaʼ ghunaŋa ta bakwantishi gwanashi, kala ɗiti fəti gha ta kumaa niy gəzaŋa na va. Va tsəgha məntəŋa na kuma nata gha na sana. 19 Ta fambəŋa dza na ghuy lə ka Izərayeləta mbə dəvə ka Filisteŋ. Həzlimiy, tikə dza ghuy nza vəghee lə ndərazhi gha, tə pi tsa nza mbəzliy bekushi. Ka Kwa sləkəpə dzay, mbaʼ fambə ka sawji ka Izərayel ya ghəshi mbə dəvə ka Filisteŋ,» kə.
20 War sa favə Sawul kuma gəzəkə Saməyel va na, mbaʼ her ci dzashi tərəŋu. Zabadalaʼi təriy dzəti hiɗi gwanay gwanay. Avaci niy nza kala bərci mbə. Sa nza nay, niy zəməhu na ya waɓa ghala vəghu na, paʼa həvir vaw. 21 Dza mali va kəətə kəətəghəvataa dzəvəgha Sawul, mbaʼ nay njasa siy na dalalay. Ma kə kaa ngəci na: «Ee ɗiti fəti va gha yən kwa sləni gha, mbaʼee zləɓavə məniŋa kuma gəzara gha, ya ta pəəslira niy dza gha. 22 Nana kiy, zləɓavə nee kuma dzee ta gəzaŋa kuraku ki. Kadiw ee dzaa ɓəkəŋa shi zəmə jiwu a gha zəməhushi ta mbə ghaa kumavə bərci, ka gha zhəghwa kwal,» kə. 23 «Awə, ka zəmə shi zəmə yaw,» kə Sawul. Dzəghwa kar mali va lə mbəzli ci va ka mbaɗə. Mbaʼ ghəshi dənahu, mbaʼ zləɓavə kuma shi, mbaʼ satiy tə hiɗi, mbaʼ nziyiy tə pi həni. 24 A mali va niy kəliti məceri kiy ghyi. Dza na kiyaŋu kiyaŋu dzaa slanti, mbaʼ tati. Dza na mbaʼ hwaɗivə ghupəə tati peŋ tsa kama is mbə. 25 Dza na ki, mbaʼ ɓanakəshi shi zəmə va kaa kar Sawul lə mbəzli ci va, mbaʼ ghəshi zəməhushi. Liy hum ki na, mbaʼ ghəshi kafəshi tə virɗi va, ka zhashi.