Davitə zhiniy mbiy mbə ka Filisteŋ
27
Liy hum shi va ki na, dza Davitə ka zəzə kuma. Ma kə mbə ghən ci na: «Ya tsəgha nzə fəcahutiy, ta ghavə dza Sawul pəəslitəra. Wəzəɓa dzee huraa dzəti hiɗi ka Filisteŋ na. Ghalaɓay, ta zlay pəlara dza na tə hiɗi ka Izərayel gwanashi, ma nzee mbəlira və tsəgha ki,» kə. 2 Dzəghwa na ki, kafə, kafiy ghəshi lə mbəzli ci va diwi diwi kwaŋ ni, mbaʼ ghəshi tsəhəshi va Akishə mazə ka Gatə, zəghu Mawəkə. 3 Dza ghəshi gwanashi mbaʼ ghəshi nziyshi vəgha Akishə, ya wa ndə na lə ghyi tsa ci. Davitiy, ghəshi lə miʼi ci va bakə ni, kar Ahinuwam zha ka Zhizərel, mbaʼ Abigayel mali Nabal ndə ka Karmel tsaa mətiy va niy nza na. 4 Ma sa favə Sawul a Davitə hwiy dzəti hiɗi ka Gatə, kə məndi ki na, mbaʼ zlay pəla ci.5 Ma kə Davitə kaa Akishə tə nahuti vici na: «Mbaʼ pə gha gar zləɓavə məntəɗa wəzə huriy, titihu ndara kwal ee dzaa nziyra ya mbə nama məlmə vəgha bəla. Ka təɓə na yən ndə sləni tsa ghaa nziy tə pə kuti lə gha mbə məlmə nza gha, gha mazə kiw,» kə. 6 Dza Akishə fəcavata mbaʼ ɓanavə məlmə Cikəlag ta nziy ghəci mbə. Va tsəgha nza na mezhizhi ka Zhuwda sləkə məlmə va paʼ ndatsə.
7 Piya kutiŋ mbaʼ tir faɗə niy mənti Davitə lə nziy tsa ci tə hiɗi ka Filisteŋ. 8 Ghala vəghu tsa vay, mbə dza niy nza na ghəshi lə mbəzli ci va ta pəsli ta ka Geshuritə, lə ka Girəzhitə mbaʼ ka Amalek. Mbəzli va na shiy niy nza tə hiɗi va mbəradzəshi lə nziy tsa shi, njasaa dzəti hiɗi Shur paʼa kwa ghala lə hiɗi ka Ezhiptə. 9 Sa ka Davitəə pəsliy ti shiy, war ə niy bəku na mbəzli tə hiɗi va. Niy zlay na ya zal, ya mali tə ghumiyəw. Ka naa dzay, mbaʼ kahu teŋkesli shi, mbaʼ kwiy shi, mbaʼ slay shi, mbaʼ kwantəmcahi shi, mbaʼ ngeləwbahi shi, meʼ kaa kubeŋer. Sa ka naa zhəkəvay ki na, ka dza va Akishə. 10 Sa ka Akishə ɗuw və: «kuma səəkə ghuy mbə pa ndatsaa?» kəə niy, «njasaa dzəghwa həci va hidi ka Zhuwda» ka naa ni. Fəcahuti na: «Njasaa dzəghwa həci va hiɗi ka Yerahəmelitə» kəə ni. Facahuti diɓa na: «Njasaa dzəghwa həci va hiɗi ka Keni,» kəə ni. 11 Sa ka Davitəə dzay ta pay, cəkeʼ kaa naa bakwamti zhər lə miʼi, kar naa zləɓa məndiy səəkə lə ndə ya kutiŋ dzəmbə məlmə Gatəw. Nəghətaa ghəshi cikəvəri njasa ka naa məni. War tsəgha niy məni Davitə, gwanay vəghu tsaa niy nza na va tə hiɗi ka Filisteŋ 12 A Akishə niy ɓanavə nəfə tsa ci gwanay kaa Davitə. Mbə zəzə kuma ciy: «A Davitə mənti kuma gəmgəm na tərəŋu kaa mbəzli ci ka Izərayel, ka zhini naa jakiy li shiw. Ndə sləni tsee dza naa nza ya paʼa humɓa,» niy nə na.