Davitə zhiniy zlay pəəsli Sawul
26
Dzəghwa nihuti mbəzli mbə məlmə Zifə mbaʼ ghəshi səəkəə kəsay Sawul mbə məlmə Giveya. Ma kə ghəshi kaa ngəci na: «Sənay gha dzar mbə kəleŋer Hakila kwa kuma pi tsa kama fəhi va ti tərəŋu mbiy Davitə pə gha na?» kə ghəshi. 2 Sa favə Sawul tsəgha na, dza na mbaʼ təravə ka sawjiy guraa mbay mbəzə bələku bələku mahəkanə mətsəkə mbə ka Izərayel. Mbaʼ kafiy li shiy dzəghwa gamba Zifə ta pəla Davitə. 3 Sa tsəhiy na mbə kəleŋer Hakila kwa kuma gamba kama fəhi va ti tərəŋu ki na, mbaʼ gariy tiɓa lə mbəzli ci vəgha kwal. Davitə na ci ki na, mbə gamba niy nza na, dzəghwa na mbaʼ favə a Sawul səəkiy ta pəla, kə məndi. 4 Dza na mbaʼ ghunashi mbəzli ta nighə nda tsəgha na kataŋ. Sa səəkəshi mbəzli vaa gəzanci na, mbaʼ sənay lə kataŋ səəkiy Sawul ta pəla, kə. 5 Dzəghwa Davitə ki, mbaʼ kafiy tsəhiy tə pi tsa nza Sawul va lə mbəzli ci. Mbaʼ nay dzəghwa tə pi tsa hənishi kar Sawul lə Avəner zəghu Ner, mazə tsa ka sawji ci. Tə jipə jipə ka sawji ci niy həniy Sawul mbaʼ ghəshi dəzlətsəɓə dzar vəgha.6 Dza Davitə daʼ harashi kar Ahimelekə ndə ka Hit ghəshi lə Avishay zəmbəhiy Zhuwabə. Avishay tsa vay, Ceruya niy nza slən tsa mbəghiy. Ma kə kaa ngəshi na: «A ntsaa zləɓavə ghiy dzəghwa li ta kəsay Sawul tə pi tsa ɓasəshi ghəshi vaa?» kə. «Ee zləɓavə dzəghwa lə gha,» kə Avishay kaa ngəci.
7 Dzəghwa kar Davitə lə Avishay nishə ghəshi tsəhəshi həvir tə pi tsa ɓasəshi mbəzli va va. Ghala vəghu tsa vay, məhəni niy nza Sawul tə hi tə jipə jipə mbəzli ci va, gərə gwapa ci mbə hiɗi tə ghən ci. Tə hi niy nza kar Avəner lə ka sawji dzar vəgha. 8 Ma kə Avishay kaa Davitə na: «Ndatsiy, a Hiyala zhiniy fambə ndə mbəzə tsa gha mbə dəvə gha. Zlara ee daŋwambə tsər kutiŋ mbə hiɗi lə gwapa. Ka ihwee bakə səɗaw,» kə. 9 Ma kə Davitə kaa ngəci na: «Ka pəsli gha ma. Mbaʼ kə Kwa sləkəpə təravə ndəə shəkambə in mbə ghən ci, dzəghwa mbaʼ ndə pəslitiy, ta ɓasanakən nguvə dza na. 10 Ava Kwa sləkəpə tiɓa ka favə, sa dza vəghu tsa məti ciy səəkiyiy, Kwa sləkəpə dəʼu ghən tsa nzə dza naa pəəsləti. Kala ɓəhu kə məti gəm ta nay, mbaʼ məndi paslanti mbə mbəzə. 11 Nza Kwa sləkəpə ɓasakənɗa nguvəə gura caslakə na yən kə dapati dəvəə dzəti ntsa təravə na mbaʼ shəkambə in dzəghwa mbə ghən ci. Gwapa tə ghən ci va mbaʼ pəhər tsa nza yam va kwa pə gha ɓəvə a ghum dzam,» kə.
12 Dzəghwa Davitə ki, laŋ ɓəvə shiy niy nza va tə ghən Sawul, kar gwapa lə pəhər, dza ghəshi ki ka dzashi. Ndə tiɓaa nashiw, ndə tiɓaa sənashi shiy mənishiw, ndə tiɓaa fərghiyuw. Gwanashi niy ɓanti ghəshi hi saa niy fatishi Hiyala tərəŋu tə hi. 13 Dza Davitə mbaʼ taŋiy dzəvəri nahuti bəla teʼu pi tsa va, mbaʼ dzay dzəmə ghən dəlagwa kərakə lə mbəzli Sawul va. 14 Dza na ki, ka zlapə kuma kaa kar Avəner zəghu Ner ghəshi lə ka sawji sləkə na va. Ma kə kaa ngəshi na: «Avəner, zləɓara kuma,» kə. Ma kə Avəner na: «A ndə nza gha zlapə gha kuma kaa mazəa?» kə. 15 Ma kə Davitə kaa ngəci na: «Zal gee, tsahuti ndə mbə ka Izərayel njeyew pə gha kiy, njaa mbay ma gha ndəghuti mazə, ntsa gha dikə tsa kiyaa? A ndə niy səəkiy ta pəəsli ci. 16 Ava Kwa Sləkəpə tiɓa ka favə. Shi mənti gha vay, shiy wəzə ghəshiw. Gar bəkuŋuy nza məndi tə mbərkə sa ndəghuti ma ghuy ntsa ghuy dikə tsa, ntsa təravə Kwa sləkəpə mbaʼ shəkambə in dzəghwa mbə ghən ci. Sanay, nighətima, kuma na shiy niy nza va tə ghən mazə, kar gwapa ci va lə pəhər yam tsa ci vaa?» kə.
17 Sa favə Sawul na, mbaʼ sənay məli Davitə na sava, kə. Ma kə na: «Gha na saa gəzə kuma tsa na zəghwee Davitə?» kə. «Yən na, mazə tsee sləkəra,» kə Davitə. 18 Ma kə Davitə diɓa na: «Sa wa na nura gha yən ndə sləni tsa gha kiyaa ndə sləkəra? A shi məntee kiyaa? A rəɗa hutee kiyaa? 19 Sana kiy, əə cəʼuŋee a gha fa kuma ɗee na gəzəŋa yən ndə sləni tsa gha mazə. Kwa sləkəpə kə gəzaŋa pəəsliray, nja shi sləniy məndi ta vəlanta kə mbəri tsee dzaa zənanta. Ke ngəri kə həərəŋay, nza Kwa sləkəpə bazlantishi, tə sa nzana mbə tihəra məndi, ka makəra va nziyee tə hiɗi ɓanavə Kwa sləkəpə kaa mbəzli nzə. Ɗi naa gəziy, əə tihəra məndi ta dza ta tsəfəku kwa kuma nihuti hiyalahi. 20 Ta na tsee ghən nee kiy, ka ɗee məti kərakə lə Kwa sləkəpuw. Tawa səvəriy mazə ta mbəzə lə ya njasa ka məndi vaa dza ta shəmbə takwərihi dzar mbə kəlaŋ kiyaa? Ghala mbə ghiy lə məcələkwə na?» kə.
21 Ma kə Sawul kaa ngəci na: «Ee mənti kuma jikir na. Ə pə gha zhəghəkəvaŋa, zəghwee Davitə, ka zhinee məniŋa kuma jikir na ghulaw, sa nza nay, a gha fati bamaa dzəti piy tsee ndatsə. Nja ntsa kama məhərli və məntee kuma. Əə səree tərəŋu,» kə. 22 Ma kə Davitə na: «Avanta gwapa gha tikə mazə, ghunay ndə mbə ka sawji gha, a ghəci səəkəə ɓəvə. 23 Ya kaa tsama ndə mbə ghumiy, nza Kwa sləkəpə wanati zhəmi ci geʼi lə kuma nuti na lə kwal tsa nzə, lə na mənti na kala dzərvə mbə. A Kwa sləkəpə niy famɓəŋa mbə dəvee ndatsə, kala zləɓa ma dapə dəvee dzəti gha, sa nza ghaa ntsa təravə Kwa sləkəpə mbaʼ shəkambə in dzəghwa mbə ghən gha. 24 Njasa fatee va bamaa dzəti piy tsa gha ndatsiy, tsəgha kə Kwa sləkəpə dzaa fati bama tə tsee piy kuraku, mbaʼ mbəlantəra ya va tsama ngəraʼu,» kə. 25 Ma kə Sawul kaa ngəci na: «Nza Kwa sləkəpə təfətəŋa miy zəghwee Davitə. Ta na navay, tərəŋu dza gha ta məni shiy. Ya nima shi dza ghaa məniy, ta dzava dza ghəshi,» kə. Liy hum ki na, ka dzay Davitə dza kwa na ci bəla, ma Sawul na, ka dzay jighi.