Kar Davitə lə Naval
25
Ghala vəghu tsa va ki na, mbaʼ Saməyel mətiy. Dzəghwa ka Izərayel gwanashi mbaʼ ghəshi ɓasəshi ta təhuni ci. Mbaʼ məndi lanti mbə məlmə ci Rama. Liy hum ki na, mbaʼ Davitə kafiy dzay dzəti gamba har məndiy Paraŋ.2 A tsahuti ndə niy nza tiɓa mbə məlmə Mawəŋ, lə shiy və tərəŋu. Mbə məlmə Karmel shi ci va niy nza. Bələkwə bələku mahəkanə mətsəkə niy nza teŋkesli və. Kwiy na, bələku bələku məŋ. Mbaʼ niy dzay dzəmbə məlmə Karmel va ta təɗi səbə tə dəmbəkə tsa ci va ki. 3 Nabal niy nza slən tsa ntsa va. Abigayel, kə məndi kaa slən tsa mali ci. Mali vay, mali tsəhuli tsəhuli, ka təɓə niy nza na. Ma zata tsa va na ci ki na, ndə caslakə, ka ndərəm ghəci niy nza. Mbə takə tsa Kalebə niy nza na.
4 Davitə mbə gamba ki na, mbaʼ favə: «Mbə təɗi səbə na Nabal tə teŋkesli ci,» kə məndi. 5 Dza na mbaʼ ghunashi mbəzli məŋ mbə mbəzli ci. Ma kə kaa ngəshi na: «Mbalam kəsayim Nabal mə Karmel, nza ghuy səkuti lə slən tsee. 6 Ma pə ghuy dzaa ni kaa ngəciy: “Davitə ghunaŋiy na ta səkuŋa, ma kiy: Bitə kə piy tsa gha. Lə zərkə pə gha, tsəgha ghyi tsa gha. Kwa kuma kwa kuma kə shi ghaa mətshəva. 7 Ee favə mbə təɗi səbə nza gha tə teŋkesli gha, kə məndi. Ghala vəghu tsaa niy nza ka makə shiy gha lə ghiy mə Karmeliy, niy mananatishi kuma jikir na ghiyuw, shiy tiɓa niy zashi və shiw. 8 ɗuwti tə gha va mbəzli gha va, ta gəzaŋa dza ghəshi. Əə cəʼuŋee a gha kaʼwəti mbəzlee ni wəzə, sa nzana fəca vici makwaghwa ghiy səəkəŋiy. Titihu ɓanavəshi shi dza ghaa nza gar ɓanavəshi kaa ka sləni gha, lə kaa zəghu gha Davitə, kə,” pə ghuy dzaa ni kaa ngəci,» kə.
9 Dza mbəzli Davitə va, mbaʼ ghəshi dzaa gəzanakə kuma gəzanshi na va gwanata kaa Naval. Gwəŋəshi ghəshi nziyshi ka ndəghə. 10 Ma kə Nabal kaa ngəshi na: «A ndə na Davitə sənayaa? A ndə na zəghu Zheseaa? Ɗaŋshi na meviviy huhushi va mbəzliy sləkəshi mbə vəghu tsa ghum tsa. 11 Na dzee ɓəvə peŋ tsee, ti kaa yamee mbaʼ sliw tsa hənəyee kaa mbəzliy təɗira səbə tə teŋkeslee ta ɓanshi kaa mbəzli sənashi mee nda dza kwama tsahu ghəshi nə ghuy na?» kə. 12 Dza mbəzli Davitə va, tərəɗə ghəshi zhəghətəvashi ka dzashi. Mbaʼ ghəshi dzaa zhanavə kuma gəzəkə ntsa va va gwanata. 13 Ma kə Davitə kaa ngəshi na: «Ya wa ndiy, ə kəə ɓə kafaʼi tsa ci,» kə. Ya tsama ndə na, mbaʼ ɓəvə kafaʼi tsa ci. Dza Davitə kuraku laŋ ɓəvə tsa ci. Mbəzli gar diwi diwi faɗə niy kafəshi na kwasəbə Davitə ta mbəzə. Mbəzli bələku bələku bakə na, tiɓashi niva niy nza ta ndəghu shiy.
Abigayel mali Nabal kəətiti Davitə
14 Dzəghwa tsahuti ndə mbə mbəzliy ghəra sləni kaa Nabal mbaʼ dzaa slanakə kumaa mənita va kaa Abigayel mali Naval. Ma kə kaa ngəta na: «Ava Davitə ghunikə mbəzli ci səəkə mbə gamba ta səku ntsa ghiy dikə kala kaʼwətishi ma ghəci lə wəzə,» kə. 15 Ghala pitsaa niy nza ghiy lə mbəzli va tə pi kuti tə gamba ngar kiy, juw niy məniŋiy ghəshi kuma wəzə naw. Səəkə ghəshiy məntəŋiy kuma jikir naw, Səəkə shi ghiy zashiw. 16 Nja kwa kələm niy nza ghiy və shi, havəghu lə həvir, gwanay vəghu tsaa niy nza ghiy va li shi ghiy mbə makə teŋkesli. 17 Sanay, zəzəvə kuma wəzə a gha nighəti shi dza ghaa mənti. Kala tsəghay, ta səəkə dza kuma gəmgəm naa dzəkən ntsa ghiy dikə tsa lə dzəkən ghyi tsa ci. Ta na na ciy, caslakiy na ghən tsa ci, ka gəzəva kuma kaa ngəciw,» kə. 18 Sa favə Abigayel tsəgha ki na, dza na kiyaŋu kiyaŋu mbaʼ dzaa ɓəvə peŋ diwiy diwiy bakə, mbaʼ tay kwa ghulpə bakə, mbaʼ teŋkesli həəni həəni ni cifə, mbaʼ shi pərə səli səli ni tasaw cifə, mbaʼ reziŋ tsa ghuli ghuli tsa, dəguzəku tsa va bələku, mbaʼ gatwə tsa tati məndi tə ya fə har məndiy figə diwiy diwiy bakə. Dza na mbaʼ pahaməshi mə kwantəmcahi. 19 A kə kaa ka sləni nzə na: «ʼWatim kwal mbadzaməm, mbə nuwŋwiy nzee,» kə. A na kaa Nabal zata tsa vay, niy gəzanci kuma məni na va naw. 20 Dza na taram dzataa dzəmə kwantəmca nzə ka dzəghwa, kala pəəzli ma ghənzə va kəlaŋ. Ghala vəghu tsa va ki na, mbə səəkə kar Davitə niy nza kwa kuma nzə lə mbəzli ci. Nighə na tsəgha ki na, ghənzə kwa kuma shi. 21 Ma kə Davitə niy ni mbə ghən ciy: «Gəm niy ndəghutee shi ntsa ni gwanashi mbə gamba kala zashi ma shiy ya kutiŋ mbə shi ci. Avanay watəra wəzə tsa mananatee va lə jikir. 22 Nza Hiyala slakənɗa nguvəə gura caslakə na, yən kə zlay ya ndə kutiŋ tə ghumiy mbə mbəzli kiy ghyi tsa Naval, ka pi kəɗi həzlimə,» kə niy ni.
23 War sa nay Abigayel Davitə na, kiyaŋu kiyaŋu səkwata mə kwantəmca. Dza na mbaʼ tsəfəkuta kwa kuma ci, gaʼ kuma nzə mbə hiɗi. 24 Kə diɓa gələɓə gələɓəta ta shiɗəshiɗə ci, ma kə na: «See na fəti, yən kutira ndə sləkəra. Əə cəʼuŋee ndara kwal ee gəzaŋa kuma, favə kuma ɗee na gəzaŋa yən kwa sləni gha. 25 Titihu ndə sləkəra, ka ɓə kuma Nabal ntsa gəmgəm tsa va gha ka kuma ma. A gha sənay slən Nabal tsa vay, ndə gazlaka ɗi naa gəzə. Njasa nza slən tsa ci vay, war tsəgha na kataŋ. Ta na tsee ghən yən kwa sləni gha kiy ndə sləkəray, niy nashi ka sləni gha va niy ghunashi gha yaw. 26 Sana kiy ndə sləkəray, ava Kwa sləkəpə tiɓa ka favə, tiɓa gha ka favə kuraku. Kwa sləkəpə dəʼu ghən tsa nzə makətəŋa na va shəkə miymiy, lə va wa shi gha dəʼu ghən tsa gha. kumaa niy dza naa dzaa dzəkən Navaliy ndə sləkəray, dzəkən ka mbəzə gha lə mbəzliy ɗi məniŋa jikir kəə dza. 27 Əə cəʼuŋee a gha ɓəvə shi ɓəkəŋee ni yən kwa sləni gha, nza gha tahanavəshi kaa mbəzli kwasəbə gha ni ndə sləkəra. 28 Titihu pəlatara kumee va jikir na yən kwa sləni gha. Ta na navay, ee sənay ta ɓanavə məni mazə dza Kwa sləkəpə kaa mbəzli kwa miy dəgha gha ta kwa ndimndim ndə sləkəra. Sa nzanay, a gha mbəzəhu mbəzə lə mbəzliy ɗima kuma Kwa sləkəpə. Səəkə məndiy kəsata kuma jikir na mbə nziy tsa gha ghala nza ghaw. 29 A mbəzli kafəshi ta nuwŋa, ta pəəslitəŋa, gha ndə sləkəra. A na Kwa sləkəpə Hiyala ghay, ka zlay ndəghu piy tsa gha na, ta nza gha vəgha, ghulaŋa mbə mbəzli tə ghuməshi niw. Ta na ka mbəzə ghay, ta ɓəvə piy tsa shi dza naa ndəghanti, njasa ka ndə vaa faghwa haku kwa gevirndiŋ bəzlanti. 30 A gha sənay ta məntəŋa kuma wəzə na va gəzəkə na dza Kwa sləkəpə gwanata, Ta fiyŋa dza na ka mazə ka Izərayel. Ghalaɓa kiy, 31 ka dza naa təɓə ghaa zhiniy zəzə, tawa niy wee shi ya tə ndə dəʼu ghən tsee, mbaʼee pəəsliti ndə tə gəmaa? pə ghaw. Ghala vəghu tsa dza Kwa sləkəpə vaa məntəŋa wəziy, əntaa gha zanti ghən tə ya, yən kwa sləni gha ma,» kə. 32 Ma kə Davitə kaa ngəta na: «ʼWəsa nə ya kaa Kwa sləkəpə, Hiyala ka Izərayel ghənzə saa ghunikəŋa ndatsə ta kumə lə ya. 33 ʼWəsa nə ya kaa ngəŋa dəʼu ghən tsa gha tə kuma zəzəti gha na wəzə na, sa nzana mbaʼ gha makətəra va pəəsli ndə, lə va wa shi ya dəʼu ghən tsee. 34 Ta na navay, ava Kwa sləkəpə Hiyala ka Izərayel tiɓa mbə favə, ghənzə saa makətəra va məniŋa jikir. Kala sa səəkəŋa gha kiyaŋu kiyaŋu ta kumə lə yay, niy dza ndəə tərə ya kutiŋ tə ghumiy kiy ghyi tsa Nabal ka pi waliw,» kə.
35 Dza Davitə mbaʼ ɓəvə shi ɓəkə na va kaa ngəci. Ma kə kaa ngəta na: «Mbalaa jighi lə zərkə. Avee zləɓavə kuma gəzəkəra gha va, mbaʼee məntəŋa wuzə hur,» kə.
Nabal mətiy, mbaʼ Davitə ɓəhu Abigayel ka mali ci.
36 Liy hum ki na, dza Abigayel ka zhataa jighi. Tsəhə na kiy ghyi na, Nabal mbə məni makwaghwa nja mazə. War vəshi ghəciy vəshi, gwaʼ gwaʼa ghəci ghyiantəvay. Dzəghwa mali va gwəŋəta nziyta kala gəzanci ma ya waɓa paʼ tə mekishi. 37 Ma sa kəɗiy pi, mbaʼ tay way mbə ghən Nabal ki na, dza mali ci va mbaʼ slanakə kumaa mənita va. Sa favə Nabal na, mbaʼ her ci slashi, hyaŋ ghəci ghuliy tiɓa. 38 Liy hum vici məŋ na, dza Kwa sləkəpə diɓa zəray sləviy Naval, mbaʼ mətiy.
39 Dzəghwa mbaʼ Davitə favə: «A Nabal mətiy,» kə məndi. Ma kə na: «ʼWəsa nə ya kaa Kwa sləkəpə ghənzə saa yəpəti yəpə tə ya, mbə kuma slini tavəra Nabal va. ʼWəsa nə ya kaa ngəta sa makətəra na yən ndə sləni tsa nzə va məni jikir. Ndərəm tsaa niy ɗi Nabal va məniray, a Kwa sləkəpə zhəghakən kən ghən tsa ci,» kə. Dzəghwa Davitə ki, mbaʼ ghunashi mbəzli va Abigayel, ta ɗuw, ta nza ghənzə ka mali ci. 40 Dzəghwa ka sləni Davitə mbaʼ ghəshi dzaa kəsata Abigayel mbə məlmə Karmel. Ma kə ghəshi kaa ngəta na: «Davitə ghunaŋiy na va gha ta ɓəŋa ka mali ci,» kə ghəshi. 41 Dza na mbaʼ kafəta, tsəfəku tsəfəkuta, gaʼ kuma nzə mbə hiɗi. Ma kə na: «Ee zləɓavə nzaa mava ci, ta nzee ka kwa yaɓə shiɗəshiɗə ka sləni ci,» kə. 42 Dza na kiyaŋu kiyaŋu kafəta, ɗal dzataa dzəmə kwantəmca nzə, pəm pəməvə miʼi cifə mbə miʼiy ghəranta sləni, ka dzata kwasəbə mbəzli ghunashi Davitə va. Mbaʼ mənita ka mali Davitə tsəgha ki.