Davitə zlay pəəsli Sawul
24
Dza Davitə mbaʼ kafiy tə pi tsa va, mbaʼ dzaa nziyiy tə pi tsa har məndi vaa Eyən-Gedi, dzar mbə dəlagwahi vəgha pi tsa yakiyakə tsa. 2 Ma sa zhəghəkəvay Sawul mbə mbəzə lə ka Filisti ki na, mbaʼ məndi gəzanci: «A Davitə dzay dzəti gamba Eyən-Gedi,» kə məndi kaa ngəci. 3 Dzəghwa na mbə ka sawji ka Izərayel gwanashi mbaʼ təravə mbəzliy gura tə mbəzə bələku bələku mahəkanəmətsəkə. Mbaʼ kafiy li shi ta dza ta pəla kar Davitə lə mbəzli ci, mbaʼ ghəshi tsəhəshi paʼ kwa kuma pi tsa har məndi vaa kələɓahi nza besher mbə gamba ti. 4 Mbaʼ ghəshi tsəhəshi vəgha pi tsa ka məndiy kəəli teŋkesli ti, dzar vəgha kwal. Mbaʼ ləgu niy nza tə pi tsa va. Dza Sawul mbaʼ dzəmbiy ta ci kwəshi ci, mbalaa liyɓa mbəmbəshi kar Davitə lə mbəzli ci. 5 Ma kə mbəzli Davitə kaa ngəci ɗahu ɗahu na: «Avanay vəghu tsaa niy gəzaŋa Kwa sləkəpə va niy nə na: “Fəcahutiy, ta fambə ndə mbəzə tsa gha dzee mbə dəvə gha, nza gha məni shi ɗi gha li,” kə niy ni,» kə ghəshi. Dza Davitə kəətə kətəghəvay dzəvəgha Sawul, mbaʼ slavə bəla tə kubaŋ tsa Sawul sahə kala sənay ghəci. 6 War sa slavə na na, mbaʼ her ci ghati dza tərəŋu tərəŋu. Sa nzana mbaʼ ghəci slavə bəla tə kubaŋ tsa Sawul. 7 Ma kə kaa mbəzli ci va na: «Nza Kwa sləkəpə ndəghutəra va məni shi tsəgha ni kaa Ndə sləkəra, ntsa təravə na, mbaʼ shəkambə in dzəghwa mbə ghən ci. Ka dapə dəvee dzətiw, sa nzanay ntsa təravə Kwa sləkəpə mbaʼ shəkambə in dzəghwa mbə ghən ci na,» kə. 8 Dza Davitə mbaʼ bashanti kumaa niy ɗi mbəzli ci va, lə kuma gəzəkə na va, mbaʼ makətishi va pəsliy dzəkən Sawul. Dzəghwa Sawul mbaʼ satiy səvəriy mbə ləgu va, ka dzay. 9 Liy hum juw ki na, mbaʼ Davitə səvəriy mbə ləgu va tə səəbə ci, dza na ka har zlaŋ zlaŋ. «A mazə tsee sləkəra,» kə. Dzəghwa Sawul tərəɗə zhəghata kuma ci dziy liy hum ta nighə ntsaa gəzanci kuma. Dza Davitə gələɓə gələɓiy tə shinin ci, gaʼ kuma ci mbə hiɗi. 10 Ma kə kaa ngəci na: «Tawa zləɓa gha kuma mbəzliy ni va: “Mbə ɗi məniŋa kuma jikir na nzee,” kə ghəshaa? 11 A gha nay dəʼu ghən tsa gha, ndatsə sanay, a Kwa sləkəpə fambəŋa mbə dəvee liy ləgu səəkə gha va. “Ə pə gha paslanti” kə məndi kaa ngəra. Ma yən nee ki na, mbaʼ hur tsee zhitəra tə gha. “Ka dapə dəvee dzəti ndə sləkəraw, sa nzanay, ntsa təravə Kwa sləkəpə mbaʼ shəkambə in dzəghwa mbə ghən ci na” pən. 12 Ava ghaa nighə Didi, nata bəla kubaŋ tsa gha gha ta dəvee sa slavee sa? Kwa vəghu tsa nay gha yən slavə bəla kubaŋ tsa gha kala pəəsliŋee kiy, ti ka gha sənay kuma gəmgəm na mbə nəfə tsee dzəkən ghaw, ka ɗi zhiniŋa ghən yaw, məntəŋa kuma jikir na yaw, pə gha. Gha na saa pəlara ta pəəslira. 13 Kwa sləkəpə dza naa sla nguvə kwa jipə ghum. Ghənzə dza na ta wara shi ya tə gha. Ta na tsee ghəniy, ka dapə dəvee dzəti ghaw. 14 Kar məndiy gəzə ndimndim: “Va ntsa jikir tsa ka kuma jikir naa səəkə,” kə məndi. Ta na tsee ghəniy, ka dapə dəvee dzəti ghaw. 15 Ndə njaay na ntsa səvəriŋa gha tsa ta mbəzə li kiya mazə ka Izərayel? A ntsa nu gha tsaa? Ghala mbə ya lə kiri tsa məti məti tsa na? ghala mbə ya lə məcələku na? 16 Kwa sləkəpə dza na ta sla nguvə kwa jipə ghum. Ghənzə dza naa ɓə fəti kaa ntsa nza fəti və. Ghənzə dza naa nighəti, nza yəpəti yəpə tə ya. Ghənzə dza naa ni: “fəti va ghaw,” kə kaa ngəra, mbaʼ mbəlantəra mbə dəvə gha,» kə Davitə.17 Ma sa kəɗanti na gəzə kuma va ki, ma kə Sawul na: «Gha na saa gəzəra kuma tsa na zəghwee Davitə?» kə. Dza na bəghə tə wahə zlaŋ zlaŋ. 18 Ma kə kaa Davitə na: «Tərəŋuɓa gha nuti na kuma lə kwal tsa nzə kaa ngəra. Sa nzanay, a gha məntəra kuma wəzə na, ta na tsee ghəniy, kuma jikir naa məntəŋee. 19 Ndatsiy, a gha cikəvəriɗa wəzə tsa mənɗa gha. Sa nzanay, a Kwa sləkəpə niy fambəra mbə dəvə gha, dzəghwa ghay, kala ɗi pəəslira gha. 20 Səəkə naa nza, mbaʼ ndə kəsay ndə mbəzə tsa ci na, mbərəkə ndə zlay dzay kala mananci ma kuma na? Nza kwa sləkəpə ngavəŋa səɗa gha ta kuma məntəɗa gha na ndatsə. 21 Nanay, ee sənay gha dza na ta məni mazə. Kwa miy dəgha gha dza məni mazə nza tə hiɗi ka Izərayel. 22 Nana kiy, zəməkəra fəla lə slən tsa Kwa sləkəpə, gha kala dzaa zanti mbəzli kwa miy dəghee sa kee mətira, gha kala dzaa zanti slən tsee mbə mbəzli yakə dirə,» kə. 23 Dzəghwa Davitə mbaʼ zəmanakə fəla kaa Sawul. Dza Sawul ki, ka dzay jighi, mbaʼ kar Davitə lə mbəzli ci zhashiy dzəti pi tsaa niy mbəshi ghəshi va.