Davitə mbəlanti mbəzli mbə məlmə Kiyla
23
Ma tə nahuti vici ki na, mbaʼ məndi səəkəə gəzanci kaa Davitə: «Ava ka Filisteŋ mbə mbəzə lə mbəzli mbə məlmə Kiyla, ka ɓasə shi zəmə mbəɓa,» kə məndi. 2 Dza Davitə ka ɗuw kuma va Kwa sləkəpə, ma kə na: «Ee dza ta mbəzə lə ka Filisteŋ va na? Ta mbashi dzee na?» kə. Ma kə Kwa sləkəpə kaa ngəci na: «Mbala, ta mbashi dza gha, mbaʼ gha mbəlanti mbəzli mbə məlmə Keyla,» kə. 3 Ma kə mbəzli kwasəbə Davitə kaa ngəci na shi ki na: «Kwataka tikə tə hiɗi ka Zhuwda kiy, mbə hazləni nza ghummə. Njaa dza naa nza sa ka ghumməə dzəghwa Keyla ta mbəzə lə ka Filisteŋ kiyaa?» kə ghəshi. 4 Dza Davitə ka zhiniy ɗuw kuma va Kwa sləkəpə. Ma kə Kwa sləkəpə kaa ngəci na: «Kafə, maɗiy dzəghwa Keyla, ta fambə ka Filisteŋ dzee mbə dəvə gha,» kə. 5 Dzəghwa Davitə lə mbəzli ci ki, mbaʼ ghəshi dzashiy dzəghwa Keyla, mbaʼ ghəshi pəslishi ta ka Filisteŋ. Kaʼ ghəshi kahu dəbəkə tsa shi, zhini irə irə ghəshi irətishi. Mbaʼ Davitə mbəlanti mbəzli mbə məlmə Keyla tsəgha ki.6 Ghala vəghu tsaa niy hukəvay Abiyatar zəghu Ahimelekə vaa dzəvəgha Davitə dzəmbə məlmə Keylay, aa niy ɓəvə shi kwa hati kubaŋ tsa kən ghən ndə ta Hiyala tsa dikə tsa, lə shiy ɗuw kuma va Kwa sləkəpə kwa shi.
7 Dza məndi ki, mbaʼ məndi gəzanci kaa Sawul: «Mbə məlmə Keyla na Davitə,» kə məndi kaa ngəci. Ma kə na: «A Hiyala fambə mbə dəvee. Sa nzanay, aa kalay ghən tsa ci dəʼu ghən tsa ci, sa dzay na vaa dzəmbə məlmə nza miy tsaa dzəmbə kəli kəli lə gəzli,» kə. 8 Dzəghwa na ɓasə ɓasəti ka sawji ci gwanashi ta dzəghwa Keyla ta takay Davitə lə mbəzli ci. 9 Mbaʼ Davitə favə mbə pəhə kuma gəmgəm na na Sawul dzəkən, kə. Ma kə kaa Abiyatar ndə ta Hiyala na: «ɓəkə shi ka məndi vaa ɗuw kuma va Kwa sləkəpə li shi,» kə. Mbaʼ ntsa va ɓəkəshi. 10 Ma kə Davitə ki na: «A Kwa sləkəpə, Hiyala ka Izərayel, ee favə yən ndə sləni tsa gha: “Mbə pəla səəkə na Sawul ta zanti mbəzli mbə məlmə Keyla tə mbərkee,” kə məndi. 11 Ta fambəra dza mbəzliy sləkə məlmə va mbə dəvə ci na? Ta səkwa dza Sawul njasa favee va na? Titihu Kwa sləkəpə Hiyala ka Izərayel, gəzara,» kə. Ma kə Kwa sləkəpə kaa ngəci na: «Ta səkwa dza na,» kə. 12 Zhini ma kə Davitə na: «Ta fambəŋiy dza mbəzliy sləkə məlmə Keyla ghiy lə mbəzlee mbə dəvə Sawul na?» kə. «Yə, ta fambəŋwiy dza ghəshi mbə dəvə ci,» kə Kwa sləkəpə. 13 Dzəghwa Davitə lə mbəzli ci ki, mbaʼ kafiy səvəriy mbə məlmə Keyla, mbəzli gar diwi diwi kwaŋ. Mbaʼ ghəshi dzashiy dzəti tsahuti pi. Sa favə Sawul: «A Davitə hwiy səvəri mbə məlmə va,» kə məndi na, mbaʼ bashanti dza ta mbəzə tsa va.
14 Dzəghwa Davitə ki, mbaʼ dzaa nziyiy dzar mbə dəlagwa, mbə gamba Zifə, dzar vəgha pi tsa yakiyakə tsa. Ghala vəghu tsa va ki na, war mbə pəla Sawul niy nza, ma Hiyala ki na, kala fambə ghənzə mbə dəvə ci. 15 Sa fəti Davitə ghən, a Sawul səvəriy ta pəla ci, ta pəəsliti, kə na, mbaʼ nziyiy tə pi tsa har məndi vaa Hurəsha, tə gamba Zifə.
16 Dzəghwa Zhunataŋ zəghu sawəl va tə nahuti vici, mbaʼ dzaa kəsay Davitə tə pi tsa har məndi vaa Hurəsha. Mbaʼ mətsahanavə bərci ta mbə ghəciy ɓanavə nəfə tsa ci kaa Hiyala. 17 Ma kə kaa ngəci na: «Ka dza her gha ma. Ka dza dirə Sawul kəsati tə ghaw. Ya ghəciy, aa sənay wəzə wəzə, gha dza naa nzaa mazə ka Izərayel, mbaʼee ka kwa taŋa ntsa vəgha gha kə,» kə. 18 Dzəghwa ghəshi bakanashi mbaʼ ghəshi slati kiri kwa kuma Kwa sləkəpə. Mbaʼ Davitə nziyiy mə Hurəsha, ka dzay Zhunataŋ jighi.
Sawul mbə nuw Davitə
19 Dzəghwa nihuti mbəzli mbə məlmə Zifə mbaʼ ghəshi dzaa kəsay Sawul mbə məlmə Giveya. Ma kə ghəshi kaa ngəci na: «Tə gamba ghiy mbiy Davitə. Tə pi tsa har məndi vaa Hurəsha dzar vəgha pi tsa yakiyakə tsa, mə dəlagwa Hakila njasaa dzəghwa həci tə pi tsa kama fəhi va tərəŋu. 20 Ghala vəghu tsa dza ghaa ɗi səəkiy maziy, nza gha səkwa, ghiy dza naa kəsavəŋa,» kə ghəshi. 21 Ma kə Sawul kaa ngəshi na: «Nza Kwa sləkəpə təfətəŋwiy miy, ghuy shi zhitəŋwiy hur tsa ghuy tə ya. 22 Sanay, mbalam a ghuy zhaa nuwanti nda ghulay na tə pi tsa va, nza ghuy fə ghən ti ya kwama dza naa dza, ka ɗuw ntsaa nay. Sa nzanay: “kuma gaga tsəhuliy naw,” kə məndi kaa ngəra. 23 Gwanay pə ghuy dzaa naghanti pi tsa dza naa nza gar mbiy ti, mbaʼ ghuy sənay. Ma sa ka ghuy sənay pi tsa nza na ti wəzə wəzə kiy, nza ghuy zhikəə kəsara, ma nza ghummə dzammə. Kama na tə hiɗi ghummiy, kutiŋ kutiŋ dzee pəlanti pi tsa dzar tə pi tsa nza takəhi ka Zhuwda ta kəsay,» kə.
24 Dzəghwa ka Zifə va ki, mbaʼ ghəshi kafəshi vəgha Sawul ka zhashiy jighi. Nza ghəci səəkə liy hum shi. Ghala vəghu tsa vay, mbə gamba Mawəŋw niy nza Davitə ghəshi lə mbəzli ci, tə pi tsa kama kəleŋer va kama fəhi ti ɗaŋ, njasaa dzəghwa həci. 25 Dzəghwa kar Sawul lə ka Sawji ci, mbaʼ ghəshi kafəshi ta dza ta pəla ci. Mbaʼ məndi dzaa gəzanci kaa Davitə, dza na mbaʼ səkwaa nziyiy tə pi tsa nza kələɓahi va mbə gamba Mawəŋw. Mbaʼ məndi gəzanci kaa Sawul, dza na ki ka nuw Davitə ta dza ta kəsay tə pi tsa va. 26 Mbaʼ Sawul tsəhiy lə mbəzli ci mə dəlagwa nza kar Davitə va. Ka dza ghəci dzəmə vəgha nahuti bəla dəlagwa va lə ni ci mbəzli na, mbaʼ kar Davitə lə ni ci mbəzli dzəmə vəgha nahuti bəla. War ə kar Davitəə diva ta mbəlishi va kar Sawul. Ma kar Sawul lə ni ci mbəzli na, mbaʼ ghəshi tsəhəshi ndəku li shi, ka ɗi makayshi ta kəəsəshi. 27 War ghula tsəgha ki na, wəɗə tsahuti ndə səəkiy, ma kə kaa Sawul na: «Səəkəm kiyaŋu kiyaŋu ava ka Filisteŋ pəslishi ta mbəzli tə hiɗi ghummə,» kə. 28 Sa favə Sawul tsəgha ki na, mbərəkə zlay nuw Davitə, ka dzay ta mbəzə lə ka Filisteŋ. Va tsəgha ka məndiy har pi tsa va: «kələɓa tihəva,» kə məndi.