Davitə zhəghiy ka dikə tsa mbəzli ɗaŋ
22
Liy hum kuma va ki na, dza Davitə mbaʼ dzay tiɓa, mbaʼ dzaa mbiy mbə ləgu dəlagwa kwa məlmə Adulam. Sa favə ngwardiy lə mbəzli kiy ghyi tsa diy na, mbaʼ ghəshi dzəghwaa kəsay. 2 Dza mbəzli nza kuma kən shi, lə mbəzli nza temer kən shi, mbaʼ ni kama vəshi mbə nefer shi gwanashi, ɓasə ghəshi ɓasəshi kwasəbə, mbaʼ ghəci məniy ka mazə tsa shi. Mbəzli gar diwi diwi faɗə niy nza na kwasəbə.3 Dza Davitə kafə kafiy tiɓa, mbaʼ dzay dzəmbə Mispe tə hiɗi ka Muwabə. Ma kə kaa mazə ka Muwabə sa tsəhiy na na: «Titihu, zlashi kar dirə lə mərə a ghəshi səəkəə nziyshi mbə ghuy paʼa va vəghu tsa dzee sənashi shi ɗi Hiyala məni lə ya,» kə. «kuma tiɓaw» kə ntsa va. 4 Dzəghwa Davitə mbaʼ pəməghəshiy dzakə ghyi tsa mazə ka Muwabə. Gwanay vəghu tsaa niy nza na va tə mbiy, kiyɓa niy nziyshi ghəshi. 5 Ma kə Gad ndə gəzə kumaa səəkə va Hiyala kaa Davitə tə nahuti vici na: «Ka nziyŋa gha tə mbə, mbə ləgu na ma. Kafə zhəghəvaa dzəti hiɗi ka Zhuwda,» kə. Dza Davitə ki, mbaʼ dzay dzəti gamba Heretə.
Sawul bakwanti ka ta Hiyala ka Nəwvə
6 Ma tə nahuti vici ki na, mbaʼ Sawul favə: «A məndi nashi kar Davitə lə mbəzli kwasəbə,» kə məndi. Ghala vəghu tsa vay, mbə məlmə Giveya niy nza na, mənziy mə hum pi, ta mbəlaŋ, lə gwapa ci ta dəvə. Mbaʼ ka sləni ci gwanashi vəgha. 7 Ma kə Sawul kaa mbəzli vəgha va na: «Favəm kuma ɗee na gəzəŋuy wəzə mbəzli mbə takə tsa Benzhameŋ: Sa bərkəti ghuy na, ta ndaŋwiy veher lə za fəhiy ta tay dza zəghu Zhese va ɓasəŋuy kuraku, njasa ndaŋuyshee va nə ghuy na? Naa ta fiyŋwiy dza na ka ka sləkə ka sawji diwi diwi məŋ, ya ka sləkə ka sawji bələku na? A ghuy sənay ka məntəŋuy na tsəghaw pə ghuy. 8 Ya sa nza na tsəgha kiy, sa wa na pəhə ghuy kuma ɓasəŋuy dzəkənee kiyaa? njaa nza na, tərəhə ntsaa gəzara a zəghu gha slati kiri lə zəghu Zhese, kə, tərəhə ntsa shashanci kuma kənee kiya? Nja sa nza na tsa sana, mbə ɓə bərci zəghwee kaa ndə sləni tsee ta nga kəlaŋa ghəci tə ya na, tərəhə ntsaa gəzara na?» kə.
9 Ghala vəghu tsa gəzə Sawul va kuma vay, tiɓa niy nza Duweg ndə ka Edum məgarə kwasəbə ka sləni Sawul. Ma kə na: «Ee niy nay zəghu Zhese va tsəhiy mbə Nuvə va Ahimelekə zəghu Ahituvə. 10 Mbaʼ Ahimelekə ɗuwanati kuma va Kwa sləkəpə, mbaʼ ɓanavə shi zəmə, zhini mbaʼ ɓanavə kafaʼi tsa Guliyatə ndə ka Filisteŋ,» kə.
11 Dzəghwa Sawul ki, mbaʼ ghunashi mbəzli ta har Ahimelekə ndə ta Hiyala, zəghu Ahituvə ghəshi lə nihuti mbəzli kiy ghyi tsa ci, ghəshi ka ta Hiyala gwanashi. Dza ghəshi gwanashi, mbaʼ ghəshi səəkəshiy dzəghwa kuma ci. 12 Ma kə kaa ngəci na: «Ghunanti sləmə wəzə ta fa kuma ɗee na gəzə zəghu Ahituvə,» kə. «Gəzə kuma gha, mbə fa nzee mazə tsee,» kə ndə ta Hiyala tsa va. 13 Ma kə Sawul kaa ngəci na: «Sa wa na pəhə ghuy kumaa dzəkənee ghuy lə zəghu Zheseyaa? Gha ɓanavə na shi zəmə lə kafaʼi mbaʼ gha ɗuwhu kuma va Hiyala kaa ngəci ta mbə ghəciy zhiniɗa ghən ka fəra kəlaŋa njasa məni na tsa ndatsə, tawa mənti gha tsəghaa?» kə. 14 Ma kə Ahimelekə kaa mazə na: «Tsahuti ndə tiɓa mbə mbəzliy ghəraŋa sləni gwanashi gar ɓəti kuma ci məndi ka sa kataŋ na dzəghwakən Davitə na? Shiŋa na, ntsaa ndəghuŋa ghəci, zhini ntsa fati məndi shəndəkəə dzəti kiy ghyi tsa gha ghəci. 15 Əə nza na, fəcava yən gha ɗuwanci kuma va Hiyala shəkəna? Ya zəzə zəziy səəkee zəzəhu pəhə kuma tə ghaw mazuw. Tiɓaw mazuw, Ka fə gha ya yən, ya ndə mbə mbəzli kwa miy dəgha ghiy gwanataa dzəmbə kuma va ma. Sa nzanay, kuma tiɓee sənata yən ndə sləni tsa ghaa dzəkən kuma vaw,» kə. 16 Ma kə mazə na: «Ahimelekə, Ta pəəsliŋa dza məndi ghuy lə mbəzli kwa miy dəgha ghuy gwanashi,» kə. 17 Ma kə kaa ka sawjiy ndəghu, shiy niy nza tiɓa vəgha na: «Bəkum ka ta Hiyala Kwa sləkəpə va, sa nzanay, a ghəshi kəətəhu Davitə ya ghəshi. A ghəshi niy sənay əə hu Davitə, kə ghəshi, kala gəzəra ghəshi,» kə. Ma mbəzli va na, kala zləɓa dapə dəvə ghəshiy dzəti ka ta Hiyala Kwa sləkəpə. 18 Ma kə mazə kaa Duweg na: «Gha gha Duweg, bəku ka ta Hiyala va,» kə. Dza Duweg ndə ka Edum ka kəətivaa dzəvəgha ka ta Hiyala va, ka bekushi dəʼu ghən tsa ci. Mbaʼ bakwanti mbəzliy pa shi ka ka ta Hiyalaa paa dzəghwa hati shi, mbəzli dəghəsəmətsəkə cifəti fəcava. 19 Dzəghwa Sawul diɓa, mbaʼ ghunashi mbəzliy dzəmbə Nuvə məlmə ka ta Hiyala va, mbaʼ ghəshi dzaa bakwanti zhər lə miʼi, mbaʼ ndərazhi lə vərənjəʼwəhi, mbaʼ slay, mbaʼ kwantəmcahi, mbaʼ teŋkesli mbəɓa 20 War kwataka Abiyatar, Zəghu Ahimelekə, zəghu Ahituvə na saa niy mbəliy. Mbaʼ hwiy dzaa kəsay Davitə. 21 Dza na mbaʼ gəzanci: «A Sawul bakwanti ka ta Hiyala kwa sləkəpə,» kə. 22 Ma kə Davitə kaa ngəci na: «Fəca nzee va mbə məlmə Nwəviy ee niy nay Duweg ndə ka Edum mbəɓa, mbaʼee niy sənay, ka dza naa bashi gəzanci kumaa mənita va gwanata kaa Sawuləw, pən. Yən mənti na dzata kuma vaa dzəkən mbəzli kwa miy dəgha ghuy gwanashi. 23 Nziyŋa kwasəbee, ka dza her gha ma. Ntsaa dzaa ɗi pəəsliŋay, yən ɗi na pəəsli kuraku. Shiy tiɓa dzaa ndəŋwaŋa vəgha yaw,» kə.