21
Dza Davitə ki, kafə kafiy ka dzay. Ma Zhunataŋ na, ka zhay zhimbə məlmə.Ahimelekə ndə ta Hiyala tsa ka Nuvə kaʼwəti Davitə
2 Dzəghwa Davitə mbaʼ tsəhiy mbə məlmə Nuvə kiy ghyi tsa Ahimelekə ndə ta Hiyala. Dza ntsa va mbaʼ səəkiy ta kumə li kala gwərgwərə, ma kə na: «A shiy mənishi nza gha kutiŋaa? Sa wa na kama ndə kwasəbə ghaa?» kə. 3 Ma kə Davitə kaa gəci na: «Mazə nə na kaa ngəra ghəciy ghunira: “Ka ɗee ndəə sənata kuma ghuniŋee na tiw,” kə. Va tsəgha gəzanshee kaa mbəzli ka ghiy nza li shi a ghəshi ndəghəra tə tsahuti pi. 4 A shi zəmə va gha tiɓa sənzənvaa? kumavəra peŋ cifə. Kala ghəci tiɓay, mbaʼ gha ndara ya nima shi zəmə va gha,» kə. 5 Ma kə ndə ta Hiyala tsa va kaa ngəci na: «Peŋ tsa gəmiy tsa viyaw, war peŋ tsa vəlanati məndi vəli li kaa Hiyala na sa tiɓa. A ghaa ɓəvə kaa mbəzli gha va ghəshi kə hishi kala səəkə ma dzar vəgha miʼi,» kə. 6 Ma kə Davitə kaa ngəci na: «Ta na miʼiy, kwal va ghiy ta dzar kwa shi, ghiy kəə dza ta mbəzə ndimndim tsa ghiy, ya sa ka ghiy vaa dza kwataŋaw. Zhini diɓa, dza mee ta mbəziy, shi Hiyala ka shi mbəzə mbəzli kwasəbee nza. Ya əə nza dza ndatsə naa dza gəmta nay, aa zhəghəta ka dza Hiyala tə sa nza shi mbəzə vaa shi Hiyala,» kə. 7 Dza ndə ta Hiyala tsa va ki, mbaʼ ɓanavə peŋ tsa Hiyala va kaa Davitə, sa niy kama tsahuti peŋ tiɓa. Peŋ tsa vay, peŋ tsaa niy vəlanati məndi vəli li kaa Hiyala, saa niy nza tə tabəl kwa kuma nzə mbaʼ məndi mbərəti lə ndə ghu niy nza na.
8 Fəcava ki na, mbaʼ tsahuti ndə sləni tsa Sawul niy nza tiɓa kwa kuma Kwa sləkəpə. Ndə ka Edum niy nza na. Duweg, kə məndi kaa slən tsa ci. Ghəci niy nza dikə tsa mbəzliy makə shiy kaa Sawul.
9 Ma kə Davitə kaa Ahimelekə diɓa na: «Ya gwapa, ya kafaʼi va gha tiɓa ta na? Ɓəvee ya kafaʼi ya nihuti shi mbəzee sa nzana kuma gar diva ti kuma mazə vaw,» kə. 10 Ma kə ntsa va kaa ngəci na: «A kafaʼi tsa Guliyatə ndə ka Filisteŋ tsa pəsliti gha va dziy kwa teʼu pi tsa har məndi vaa teʼu pi Teribintə tikə. Mbə kubaŋ na pəərə pəərə liy hum shiy sərəə dzəghwa hati ndə ta Hiyala. Mbaʼ pə ghaa ɗiy, ka ɓə gha. Nihuti shi mbəzə tikə kala ghəciw,» kə. Ma kə Davitə kaa ngəci na: «Kwa baka ci tiɓaw, ndara,» kə.
Davitə huy dzəti hiɗi ka Filisteŋ
11 Fəcavata ki na, dza Davitə mbaʼ huy kərakə lə Sawul, mbaʼ tsəhiy va Akishə mazə ka Gatə. 12 Ma kə mbəzli kwa dəgha ci kaa Akishə na: «Davitə mazə tsa ka Izərayel sava sa? Ghəci saa niy ha miʼi va kwa cəm kala tsə:
“A Sawul mbashi mbəzli bələku bələku məŋ,
ma Davitə na, mbəzli bələku bələku bələku,” kə ghəshi niy ni sa,» kə ghəshi.
13 Sa favə Davitə kuma va na, mbaʼ kuma va gwaŋəzay mbə nəfə tsa ci, mbaʼ her ci dzashi tərəŋu va mazə Akishə. 14 Dza na mbaʼ zhəghəti ghən tsa ci nja ndə gazlaka kwa kuma shi. Kə ka dza dza dzar mbə jipə shi, ka tsatsasli shiy dzar tə gəzligəzli, mbaʼ zlashi ndighur ci ka hu dziy tə guzham ci. 15 Ma kə Akishə kaa mbəzli kwa dəgha ci na: «Ndə gazlaka ghuy nay ntsa na, ta wa ɓəkəra ghuyaa? 16 Aa kama ka gezlekiki tikə nə ghuy ɓəkəra ghuy ntsa ta gazlaka vəghee na? Ka dzakə ghyi tsee tsatsa nduw,» kə.