Zhunataŋ slati kiri lə Davitə
20
Dzəghwa Davitə, mbaʼ kafiy tə pi tsa har məndi vaa Nayutə vəgha məlmə Rama, mbaʼ dzaa kəsay Zhunataŋ. Ma kə kaa ngəci na: «A shi məntee kaa dəŋaa? A fəti vəya vaa? A kuma jikir na mananatee ɗi na pəsliraa?» kə. 2 Ma kə Zhunataŋ kaa ngəci na: «Nava tiɓaw, tə ghuməŋa dza ghaa nza. Ya wa shi ɗi dirə məniy, pərɓa gəzə ka naa gəzara. Sa wa na dza naa mbəliy nava kuma vəya kiyaa? ka məniva nava kumaw,» kə. 3 Ma kə Davitə diɓa na: «Fəla ghənzə kala tsəgha. Waa a dəŋa sənay wəzə wəzə a ghaa ɗi kumee kə, ma zəzəti na: “wəzə na Zhunataŋ sənata kuma vaw, tərəŋu dza naa zhanci” kə. Ava Kwa sləkəpə tiɓa ka favə, tiɓa gha ka favə diɓa. Ta na navay, kərakə nzee lə mətiw,» kə. 4 Ma kə Zhunataŋ kaa ngəci na: «Gəzara shi ɗi gha yən məntəŋa, ta məntəŋashi dzee,» kə. 5 Ma kə Davitə kaa ngəci na: «Həzlimə dza məndi ta məni makwaghwa pəzli tirə, ta nziy dzee kwasəbə mazə ta zəmə shiy. Ndara kwal ee dza ta mbəra mbə gamba paʼa tə həzlimədzə hetəhwer. 6 Sa ka dəŋa ɗuwra, sa dza naa narama tiɓay, nza gha gəzanci: “A Davitə cəʼuvə kwal vəya, lə titihu, ta dzaa dzəmbə Betəlehem məlmə yakə məndi mbə, ta sla shi ka məndiy sla kaa Hiyala mbə piya, ghəshi lə mbəzli kwa miy dəgha shi gwanashi,” pə gha dzaa ni kaa ngəci. 7 Mbaʼ kə dzaa ni: “Wəzə na nava” kiy, kuma tiɓa gar dza her ndə sləni tsa gha vuw, ɗi naa gəzə. Ma mbaʼ kə nəfə tsa ci dzaa satiyiy, sənay tə gha ghalaɓa, aa tarəkə pəəslira pə gha. 8 Njana nza na mbaʼ gha slati kiri lə ya yən ndə sləni tsa gha Kwa kuma Kwa sləkəpiy, mənɗa tə gha wəzə hur. Mbaʼ kə fəti vəya ya dza kwa nama bəla talay, mbaʼ gha pəəslitəra dəʼu ghən tsa gha. Tawa dza ghaa maw ɓəra kaa dəŋa kiyaa?» kə. 9 Ma kə Zhunataŋ kaa ngəci na: «Niva shiy tiɓaw. Mbaʼ pən sənay a dirə tarəkə pəsliŋa kataŋ pəniy, ta gəzaŋa dzee, avee zəməkaa fəla,» kə. 10 Ma kə Davitə kaa ngəci na: «Ya dəŋa zləɓatəŋa kuma kwa jikir kiy, a ntsaa dzaa gəzara kiyaa?» kə. 11 Ma kə Zhunataŋ kaa ngəci na: «Ndi, dzam dzəti gamba,» kə. Dza ghəshi bakanashi ki, mbaʼ ghəshi dzashiy dzəti gamba.12 Ma kə Zhunataŋ diɓa na: «Lə slən tsa Kwa sləkəpə, Hiyala ka Izərayel gəzəŋee. Ya həzlimə na, ya həzlimədzə na, geʼi lə vəghu tsətsiy, ta njəɗi kuma mbə nəfə tsa dirəə dzəkən gha dzee. kuma wəzə na kə sa mbə nəfə ciy dzəkən ghay, ka dzee ghuni ndə ta gəzəŋaw. 13 Ma mbaʼ kə dirə tarəkə məniŋa kuma jikir nay, ta ghunay ndə dzee ta gəzəŋa, mbaʼee zlaŋaa dzaŋa, nza gha dzaŋa lə zərkə. Nza Kwa sləkəpə nziyta lə gha njasa niy nza na va lə dirə. Kala dza pən gəzaŋay, ɓasakənɗa tə Kwa sləkəpə nguvə ghyanakə na. 14 Kwa kuma, mbaʼ pən dzaa nza tə ghuməray, mənɗa tə gha wəzə hur njasa təɓə na va Kwa sləkəpə. Ma mbaʼ pən mətiɗay, 15 nəghətaa gha zlay məni wəzə hur kaa mbəzli kiy ghyi tsee ya paʼa sa ka Kwa sləkəpə zanti ka mbəzə gha kutiŋ kutiŋ, gwanashi tsa shi tə hiɗi ma,» kə. 16 Dzəghwa Zhunataŋ ki, mbaʼ slati kiri lə Davitə mbaʼ lə mbəzli kiy ghyi tsa ci, ma kə na: «Nza Kwa sləkəpə wanati shi Davitə tə ka mbəzə ci,» kə. 17 Ma kə diɓa na: «Zəməkəra fəla lə ɗi tsa ɗira gha, sa nzanay, njasa ɗee ghən tsee ɗiŋee,» kə. Dzəghwa Davitə mbaʼ zəmanakə.
18 Zhini ma kə diɓa na: «Həzlimə dza məndi ta məni makwaghwa pəzli tirə. Ta fəti ghən dza mbəzli, gha tiɓaw kə ghəshi. Sa nzanay, ka dza ghəshiy naŋa tə pi tsa ka ghaa nziyuw. 19 Həzlimədziy, nza gha tsəhəŋa paʼa kwa pi tsaa niy mbəŋa gha va niy nza, nza gha dza nziyŋa vəgha haku tsa har məndi vaa Ezel. 20 Sa dzee tsəhəra tə pi tsa vay, ta hata havə dzee mahəkanə səɗa dza kwa bəla va njasa hee shiy. 21 Kee dzay, mbaʼee ghunay məgəla tsaa ghəraɗa sləni ta iməshi. Mbaʼ pən dzaa ni kaa ngəci: “Ava hevivi va liy hum gha, zhəghəva a gha iməshi” pəniy, Zhəghəkəvaŋa tə gha ghalaɓa. Əntaa gha zəzə kuma ma. kuma tiɓa gar dzəkən ghaw ɗi naa gəzə. Ava Kwa sləkəpə tiɓa ka favə. 22 Ma mbaʼ pən dzaa ni kaa məgəla tsa va: “Kətivaa dzar, tarɓa kwa kuma gha na hevivi va” pəniy, dzaŋa tə gha ghalaɓa. Sa nzanay əə ɗi Kwa sləkəpə ghaa dzaŋa ɗi naa gəzə. 23 Ma na kuma pəhəti ghum na kwa jipə tsa ghum dzəkən madiga tsa ghumiy, əntaa ghum za ghən ti ma. Kwa sləkəpə na ndə ndəgha fəti kwa jipə tsa ghum ya paʼa humɓa,» kə. 24 Dzəghwa Davitə ki, mbaʼ dzaa mbiy mbə gamba.
Ma sa səəkəta vici makwaghwa pəzli tirə ki na, dzəghwa mazə Sawul dərasə səəkəə dziyiy tə pi tsa ka məndiy zəmə shiy, ta zəmə shiy. 25 Tə pi tsa ka na vaa nziy ndimndim niy nziyiy na. Gihə gihə niy nza pi tsa va vəgha kələm. Mbaʼ Avəner nziyiy vəgha Sawul, mbaʼ Zhunataŋ kwa kuma Sawul. Ma pi tsa ka Davitəə nziy ti na ci ki na, gəmiy tsava, kala ndə ti. 26 Guŋiy Sawul nziyiy fəcava, kala ɗuwma kuma. Ə dza kuma kəsay vətəghə, kala gar kama ghəci ɗewɗew kwa kuma Hiyala ta səəkə ta zəmə shiy. Ya njaaɓay, tsəgha dza naa nza,» kə mbə ghən ci. 27 Zhini tə kwa baka vici makwaghwa va diɓa na, gəmiy pi tsa Davitə. Ma kə Sawul kaa zəghu ci Zhunataŋ ki na: «A shiy mənishi kama zəghu Zhese tiɓa mbə zəmə shiy mbəra, zhini kala nayee ndatsə diɓaa?» kə. 28 Ma kə Zhunataŋ kaa ngəci na: «A Davitə cəʼuvə kwal viya lə titihu ta dzaa dzəmbə məlmə Betəlehem. 29 “Titihu ndara kwal ee dzara, sa nzanay ta sla shiy dza ghiy kaa Hiyala, ghiy kwa miy dəgha ghiy, mbə məlmə Betəlehem, mbaʼ zədirə gəzara tsəhə mbə sla shi va. Gha gar məntəɗa wəzə huriy, ndara kwal ta kamee tiɓa mbə makwaghwa, ee dza ta kumə lə ngwardirə,” kə kaa ngəra. Va tsəgha kama Davitə tiɓa ta zəmə shi Makwaghwa kwasəbə gha,» kə 30 Sa favə Sawul tsəgha ki na, mbaʼ nəfə tsa ci satiy dzəkən Zhunataŋ. Ma kə kaa ngəci na: «Sa yakə dishəti mali, mali gəmgəm na tsa. Əə sənay mee dza kwa bəla zəghu Zhese va nza gha pən na? Haʼu na sa va tə ghuy lə məŋa. 31 Əə sənay ma gha, kama zəghu zhese va tə ghumiy na, ka dza bərciy nza va ghaw, ka mənivə mazə ghaw, pə gha na? Ə pə gha ghunashi mbəzli a ghəshi pəlakə, nza ghəshi kəsəkəra tikə. Ndə gar pəsli na,» kə. 32 Ma kə Zhunataŋ na: «Sa wa na ɗi gha pəsli cia? A shi mənti naa?» kə. 33 Dza Sawul kafə, kafata gwapa ci ta dzərə Zhunataŋ. Dzəghwa tiɓa ki na, mbaʼ Zhunataŋ favə, lə kataŋ ɗi diy pəsli Davitə, kə. 34 Mbaʼ nəfə tsa Zhunataŋ satiy tərəŋu, dza na kafə kafiy, mbaʼ ɓarvay tə pi tsa zəmə məndi va shiy. Zəməhu na ya waɓa fəca kwa baka vici makwaghwa pəzli tirə vaw. Sa nzanay, mbə zhanci niy nza nəfə tsa ci tə sa tsəərəti diy va Davitə.
35 Ma tə həzlimə mekəshi ki na, mbaʼ Zhunataŋ səvəriy dzəti gamba, dzəti pi tsa slati ghəshi va gəta ta kumə lə Davitə. Ghəshi lə zəghu juw niy nza na. 36 Ma kə kaa zəghu va na: «Kəsli bali dzar kwa kuma, sa kee hashi heviviy, nza gha iməkərashi,» kə. Dza zəghu va ka kəsli bali, mbaʼ Zhunataŋ hata havə taŋ ghəci. 37 Ma sa tsəhiy zəghu va geʼi lə pi tsa nza havə va ki na, dza Zhunataŋ ka zlapanci kuma. Ma kə na: «Tarɓa kwa kuma gha na havə va. 38 ka garə gha ma, ə pə ghaa diva,» kə. Dza zəghu va mbaʼ dzaa ɓəvə havə va, ka səəkiy dzəvəgha Zhunataŋ ntsa ci va dikə tsa. 39 Niy sənata kuma tiɓa zəghu va na na ci kiw. A na kar Zhunataŋ lə Davitiy, a ghəshi niy sənata kuma shi. 40 Dzəghwa Zhunataŋ ki, mbaʼ ɓanavə rigi tsa ci va lə hevivi ci kaa zəghu va, «Ɓashiy jighi,» kə kaa ngəci. 41 Dza zəghu va ka dzay. Ma sa dzay zəghu va ki na, mbaʼ Davitə səvəriy tə pi tsaa niy mbiy na va, njasaa dzəghwa həci va haku tsa va. Dza na mbaʼ tsəfəkwiy mahəkanə səɗa, gaʼ kuma ci mbə hiɗi kwa kuma Zhunataŋ. Dza ghəshi hutəm ghəshi hutəmətəvashi, ka wahə bakanashi. Ə na nzanay, tərəŋuɓa Davitə niy wahə na. 42 Ma kə Zhunataŋ kaa Davitə ki na: «Mbala lə zərkə. Əntaa gha zanti ghən ta sla kiri tsa slati ghum va lə slən tsa Kwa sləkəpə ma. A ghum gəzəkə: “Ghənzə na kwa ndəgha fəti kwa jipə tsee lə gha, mbaʼ kwa jipə jijihiŋa lə jijijhira ya paʼa humɓa,” pə ghum,» kə.