Zhunataŋ yəpəti yəpə ta Davitə
19
Dzəghwa ki, mbaʼ Sawul pəhəti pəəsli Davitə mbə nəfə tsa ci. Dza na mbaʼ gəzanshi kuma va kaa kar zəghu ci Zhunataŋ ghəshi lə mbəzli kwa dəgha ci gwanashi. A na Zhunataŋ zəghu ci vay, tərəŋu niy ɗi na kuma Davitə. 2 Dza na mbaʼ dzaa ghəlanavə kuma va, ma kə kaa ngəci na: «Ndəghu tə gha ghən tsa gha va dirə Sawul, sa nzanay, mbə ɗi pəəsliŋa na. Həzlimiy, pəlavə tə gha piy mbəŋa. 3 Sa kee dzay, mbaʼee pəhay dirə dzəti gamba dza gha vaa mbəŋa mbə. Kee dza na, ka gəzanci kumaa dzəkən gha, nzee favə kuma dza naa gəzə, nzee gəzaŋa,» kə.4 Ma tə həzlimə, sa səvərishi ghəshi ki na, dza Zhunataŋ ka gəzə kuma wəzə naa dzəkən Davitə kaa diy, ma kə na: «Wəzə na ghaa məni kuma jikir na kaa Davitə ndə sləni tsa ghaw mazuw, sa nzanay, məntəŋa kuma jikir na naw, war kuma wəzə na na sa məniŋa na tərəŋu. 5 Ya lə məti niy nza na mbiy, aa niy zləɓavə dza ta mbəzə lə Guliyatə, mbaʼ paslanti. Dzəghwa Kwa sləkəpə fəca va ki, mbaʼ mbəlanti ka Izərayel gwanashi va ka jakahi shi lə bama ti. A gha nata kuma va, mbaʼ gha vəshiŋa. Mbaʼ pə gha pəəsliti Davitə sanay, tə gəm dza ghaa pəəsliti, shi mənti na tiɓaw. Tawa dza ghaa məni nava kuma jikir naa?» kə. 6 Sa gəzəkə Zhunataŋ tsəgha ki na, mbaʼ Sawul zləɓavə kuma ci va. Dza na hwaʼ zəməkə fəla, ma kə na: «Ava Kwa sləkəpə tiɓa ka favə, ka pəsli Davitə məndiw,» kə. 7 Liy hum ki na, mbaʼ Zhunataŋ haray Davitə, mbaʼ zhananavə kuma va gwanata. Dza na mbaʼ pəməghə kaa Sawul, mbaʼ Davitə zhinivə sləni ci nja kwataŋa.
Mikal mbəlanti Davitə va məti
8 Dzəghwa mbəzə mbaʼ zhiniy ghay lə ka Filisti, mbaʼ Davitə dzay ta mbəzə li shi, tərəŋu ghəci mbashi, mbaʼ zəmanavəshi bali.
9 Ma tə nahuti vici na, mbaʼ safə tsa gəm gəm tsa va səəkə va Kwa sləkəpə səəkiy dzəmbə Sawul. Mənziy niy nza na kwa gəzli kiy ghyi tsa ci, lə gwapa ta dəvə ci. Ma Davitə na, mbə tsa gəzəpəli ci ghəci niy nza. 10 Dzəghwa Sawul mbaʼ dzərata gwapa ci va ta daŋavəgha Davitə vəgha kələm. Wəsl, Davitə wəsləhu, gərə ʼyambəvata mbə kələm. Dza Davitə mbaʼ hwiy, mbaʼ mbəliy va məti tə vərɗi va. 11 Dzəghwa Sawul mbaʼ ghunashi mbəzli dzakə ghyi tsa Davitə ta fə ghuɓə ti, nza ghəshi paslanti tə həzlimə mekishi. Dza Mikal mali Davitə, mbaʼ gəzanci. Ma kə kaa ngəci na: «Kala huŋa pə gha tə vərɗi nay, mbəri dza ghaa nza həzlimə,» kə. 12 Dza na mbaʼ ɓəkəghwa Davitə kwa mergi, mbaʼ hwiy mbəliy. 13 Dzəghwa Mikal laŋ ɓəvə mbəri tsa fəɗiti məndi tə tsəm, fə, fati tə pi həni, mbaʼ fəti shi fə ghən mənti məndi tə shiti kwə ta ghən ci, mbaʼ pəlanakən shiy. 14 Ma sa tsəhəshi mbəzli ghunashi Sawul va ta kəsə Davitə ki, ma kə Mikal kaa ghəshi na: «Gurapiy na,» kə. 15 Dza Sawul mbaʼ zhiniy ghunashi ta nighə Davitə. Ma kə kaa ngəshi na: «Ɓəkəram tə pi həni tsa ci va ee paslanti,» kə.
16 Sa zha mbəzli vaa dzakə ghyi tsa Davitə na, war kwataka mbəri tsa fəɗiti məndi va, mbaʼ shiy fə ghən mənti məndi va tə shiti kwə tə pi tsa ka məndiy fə ghən shi kəsashi ghəshi tə pi həni. 17 Sa mənta na tsəgha ki, ma kə Sawul kaa Mikal na: «Tawa ngəɗitəra gha tsəghaa? Tawa zlay gha ndə jaka tsee mbəliyaa?» kə. Ma kə Mikal kaa ngəci na: «“Zlara ee dzara, kala tsəghay, ta pəəslitəŋa dzee”, kə kaa ngəra,» kə.
Kar Davitə lə Sawul mbə məlmə Rama
18 Ma sa hwiy Davitə mbaʼ mbəliy va Sawul ki na, mbaʼ dzaa mbiy vəgha Saməyel mbə məlmə Rama. Mbaʼ slanakə kuma mananati Sawul va gwanata. Dza ghəshi bakanashi lə Saməyel mbaʼ ghəshi dzaa nziyshi tə pi tsa har məndi vaa Nayutə, pi tsa nziyshi ka gəzə kumaa səəkə va Hiyala ti. 19 Dzəghwa mbaʼ məndi dzaa gəzanci kaa Sawul: «Tə pi tsa har məndi vaa Nayutə vəgha məlmə Rama na Davitə,» kə məndi kaa ngəci. 20 Dza na mbaʼ ghunashi mbəzli ta dza ta kəsə ci. Sa tsəhəshi ghəshi na, mbaʼ ghəshi nashi ka gəzə kumaa səəkə va Hiyala mbə gəzə kumaa səəkə va Hiyala, war ka gəzə, war ka gəzə, mbaʼ Saməyel məgarə tə kuma shi. Dzəghwa safə tsa Hiyala mbaʼ dzay dzəmbə mbəzli ghunashi Sawul va, vɓəm ghəshi məshi mbə gəzə kumaa səəkə va Hiyala kuraku, war ka gəzə, war ka gəzə. 21 Dzəghwa mbaʼ məndi dzaa gəzanci kaa Sawul. Dza na mbaʼ ghunashi nihuti mbəzli. Sa tsəhəshi niva diɓa na, mbaʼ ghəshi məshi mbə gəzə kumaa səəkə va Hiyala, war ka gəzə, war ka gəzə kuraku. Zhini Sawul diɓa mbaʼ ghunashi kwa mahəkana mbəzli, tsəgha niva zhiniy dzashi dzəmbə gəzə kumaa səəkə va Hiyala, war ka gəzə, war ka gəzə diɓa 22 Dza na dəʼu ghən tsa ci ki, mbaʼ kafiy ta dzəmbə məlmə Rama. Ma sa tsəhiy na kwa Wawərə dikə na va tə pi tsa har məndi vaa Seku na, dza na ka ɗuw va mbəzli tiɓa: «kuma na kar Saməyel lə Davitaa?» kə. «Tə pi tsa har məndi vaa Nayutə vəgha məlmə Rama na ghəshi,» kə məndi kaa ngəci. 23 Dza na ka dzaa dzəti pi tsa va. Ma ghəci mbə kwal na, dza safə tsa Hiyala mbaʼ dzay dzəmbə kuraku, war ə ghəciy gəzə kumaa səəkə va Hiyala, war ka gəzə, war ka gəzə, paʼa ka tsəhiy lə gəzə nzə tə pi tsa har məndi vaa Nayutə vəgha məlmə Rama. 24 Sa tsəhiy na na, dza na mbaʼ səranti kubeŋer kən ghən ci nja nihuti mbəzli va kuraku, war ə ghəciy gəzə kumaa səəkə va Hiyala, war ka gəzə, war ka gəzə, kwa kuma Saməyel. Dza na Kurəpə dzay dzəti hiɗi kala kubeŋer kən ghən ci, vəghwanti na tsəgha, hiyanti na tsəgha. Va təgha ka məndiy gəzə kuma ka məndi vaa ni: «Əə Zhəghiy Sawul ka ndə gəzə kumaa səəkə va Hiyala kuraku shəkəna?» kə məndiy ni.