Kar Zhunataŋ kəsəti madiga ghəshi lə Davitə
18
War sa kəranti Davitə gəzə kuma lə Sawul ki na, dzəghwa Zhunataŋ zəghu Sawul va mbaʼ mawti kuma Davitə tərəŋu, mbaʼ ɗiti njasa ɗi na ghən tsa ci. 2 Fəca vici va ki na, dza Sawul mbaʼ gəzanci nziyiy vəgha kaa Davitə, kala zlay ma ghəciy dzay va diy. 3 Dza Zhunataŋ ki, mbaʼ pəhəti məni madiga lə Davitə, sa nza na njasa ɗi na ghən tsa ci ghəci ɗiti. 4 Dza na kuratə sərəvə kubaŋ tsa kən ghən ci, mbaʼ ɓanavə kaa Davitə. Zhəghwa na diɓa, mbaʼ ɓanavə kubeŋer mbəzə ci, lə kafaʼi tsa ci, mbaʼ rəgi tsa ci, mbaʼ kanda ci.5 Ya dza kwama ka Sawul ghunay Davitə ta mbəziy, kar naa mbashi mbəzli. Dza Sawul mbaʼ fiy ka ntsaa sləkə ka sawjiy dza ta mbəzə. Mbəzli gwanashi niy ɗi na kuma ci. Ya mbəzli kwa dəgha Sawuliy, mbə ɗi kuma ci niy nza ghəshi.
Sawul dzəghə pəəsli Davitə
6 Ghala vəghu tsaa niy zhəghəkəvashi mbəzli va səəkə mbə mbəzə sa paslanti Davitə Guliyatə ndə ka Filisti tsa vay, a miʼi niy səvərishi mbə məlməhi ka Izərayel gwanashi, kala ha cəm, kala ngumə lala lə vəshi, ka tsə dzəghwa bembeɗer lə gəzhəpipir ta dza ta kumə lə mazə Sawul. 7 A kə ghəshi niy ni kwa cəm tsa shi va, ghəshi mbə tsə shi va na:
«A Sawul mbashi mbəzli bələku bələku məŋ,
ma Davitə na, mbəzli bələku bələku bələku,» kə ghəshi niy ni.
8 Sa favə Sawul tsəgha na, kala ɗima ghəci tsəgha, mbaʼ nəfə tsa ci satiy tərəŋu. Ma kə mbə ghən ci na: «Njaa njaa ka məndi ni: “mbəzli bələku bələku bələku mbashi Davitə, ma yən na, kwataka mbəzli bələku bələku məŋ,” kə məndi kiyaa? A shiy zhiniy tərə ghula kala war ɓanci mazəa?» kə. 9 Dza na ghala fəcava mbaʼ ghati nighə Davitə kwa gəm gəm.
10 Ma tə mekəshiy, mbaʼ safə tsa gəm gəm tsa səəkə va Hiyala səəkiy dzəkən Sawul, dza na ka bəbəku kuma kiy ghyi tsa ci, njasa kama na lə məhərli ci. Dza Davitə ka tsa gəzəpəli ci njasa sənaɓiy na mbə məni. Lə gwapa ci niy nza Sawul ta dəvə. 11 Ghavə na tsəgha, kafə kafata, mbaʼ dzərata. Mbə ghən ciy: «Kadiw ee daŋavəgha Davitə vəgha kələm lə gwapa va,» niy nə na. Bakə səɗa ghəci zhinti tsəgha, war mbə wəsləhu Davitə. 12 Ghala vəghu tsa va ki na, mbaʼ Sawul ghati dza her va Davitə. Sa nza nay, aa niy fəti ghən kwasəbə Davitə na Kwa sləkəpə, mbaʼ ndəghanti ghəci Sawul, kə. 13 Dzəghwa Sawul ta mbə Davitə nza kərakə li ki, mbaʼ fiy ka dikə tsa ka sawji bələku bələku məŋ. Ghəci ka naa ʼwa kuma kaa ka sawji ta dza ta mbəzə. 14 Ya humɓay, war mbə mbashi mbəzli niy nza na mbə mbəzə, sa niy nza Kwa sləkəpə kwasəbə. 15 Sa nay Sawul ghəciy mbashi mbəzli tsəgha ki na, mbaʼ her ci dzashi və. 16 Ma na ka Izərayel gwanashi lə ka Zhuwda na shiy, mbə ɗi kuma Davitə niy nza ghəshi. Sa nza nay ghəci niy ʼwanshi na kuma mbə dza ta mbəzə.
Davitə ɓə Mikal zha Sawul ka mali ci
17 Ma kə Sawul kaa Davitə tə nahuti vici na: «Avanata Meravə, kwa taŋa zhee, Ta ndaŋa dzee ka mali gha. Nanzə kiy, ndə kala dza ma her pə gha mbə slənee. Ka mbəzə lə mbəzliy mbəzə lə Kwa sləkəpə gwanashi,» kə. Niy təkəti nay: «Wəzəɓa ka Filisteŋ pəəsli na kən yən dəʼu ghən tsee,» niy nə na. 18 Ma kə Davitə kaa ngəci na: «A ndə nzeaa? kuma na ghyi tsa dirə, ya takə tsa ghiy mbə hulfə ka Izərayel gar ɓə zha mazə yaa?» kə. 19 Ma sa səəkiy vəghu tsaa niy dza məndi ta pəhanci Meravə zha Sawul va kaa Davitə ki na, mbaʼ Sawul ɓanavə kaa Adəriyel ndə ka Mehula.
20 Ya tsəgha nzə ki na, mbaʼ Mikal nahuti zha Sawul ɗiti Davitə. Ma sa gəzanci məndi kuma va kaa sawəl ki na, kuma wəzə ghəci nata. 21 Niy təkəti nay: «Sa kee ɓanavə zhee vay, kəlaŋa dza naa nza ti, ta mbə ka Filisteŋ paslanti,» niy nə na. Ma kə kaa Davitə ki na: «Avanay gha kumavə kwal kwa baka səɗa ndatsə ta nza gha ka shira?» kə. 22 Ma kə kaa mbəzli kwa dəgha ci na: «Mbalam harvəm Davitə dzəvəgha bəla a ghuy gəzanci: “A mazə ɗi kuma gha, ya mbəzli kwa dəgha ci gwanashiy, a ghəshiy ɗiŋa. Ə pə gha zləɓavə ɓə zha ci va” pə ghuy kaa ngəci,» kə. 23 Dzəghwa mbəzli va mbaʼ ghəshi dzaa gəzanci kuma va kaa Davitə njasa gəzanakəshi Sawul va. Ma kə Davitə kaa ngəshi na: «Ɓəlaŋ na məni mashi lə mazə va ghuy bay na? Yəniy, ndə ndərma nzee, zhini kwa tsee kwal yən,» kə. 24 Dzəghwa mbəzli va, mbaʼ ghəshi dzaa zhananavə kuma gəzəkə Davitə va kaa Sawul 25 Ma kə kaa ngəshi na: «A pə ghuy kaa ngəciy: “Kwataka ka Filisti bələku na shi ɗi mazə ghaa bakwanti, mbaʼ gha slakə guzhiɓə shi, ta fəshi dzəmbə zha ci va gwaʼa tsəgha, ta mbəə wati shi ci tə ka mbəzə ci va,” pə ghuy kaa ngəci,» kə. Ta mbə Davitiy dzay dzəmbə dəvə ka Filisteŋ, mbaʼ ghəshi paslanti niy nə Sawul. 26 Dza mbəzli va ki, mbaʼ ghəshi dzaa gəzanci kuma va tsəgha kaa Davitə. Mbaʼ nata kuma va wəzə gar məni, ta nza ghəci ka zata zha mazə. Vəghu tsa sliy mazə va ghula ta məniva ki na, 27 dza kar Davitə lə mbəzli ci mbaʼ ghəshi kafəshi. Mbaʼ ghəshi dzaa bəkuvə zhər bələku bələku bakə mbə ka Filisteŋ. Dzəghwa ghəshi mbaʼ ghəshi slaslavə guzhiɓə ti shi, mbaʼ Davitə ɓanakəshi kaa mazə, ta mbə mazə ɓanavə zha ci, mbaʼ məndi mbəratishi. Dzəghwa Sawul ki, mbaʼ ɓanavə zha ci Mikal, ta nza ghənzə ka mali ci.
28 Mbaʼ Sawul favə mbə məhərli ci, kwasəbə Davitə na Kwa sləkəpə, zhini mbə ɗi Davitə Mikal zha ci va, kə. 29 Va tsəgha ki na, mbaʼ her ci zhiniy dzashi tərəŋu va Davitə, kala ɗima kuma ci ghəci kwa vələm.
30 Ghala vəghu tsa vay, war mbə səvəri niy nza mbəzliy sləkə ka Filisteŋ lə ka sawji shi ta mbəzə lə ka Izərayel. Ya humɓa jikəshi ghəshi ta mbəziy, war tərəŋuɓa Davitə lə mbəzli ci ka naa mənti kuma kən nihuti mbəzliy sləkə ka Sawji Sawul. Va tsəgha ki na, tərəŋu slən tsa ci niy dzantəvay.