Ana mbə mananta ʼwəsa kaa Kwa sləkəpə
2
Dzəghwa Ana ka cəʼu Kwa sləkəpə ki, ma kə na:
«Təruŋ na vəshi mbə nəfə tsee tə mbərkə Kwa sləkəpə,
tə mbərkə Kwa sləkəpiy, gwaʼa na haʼu kənee.
Ta mbay dzee ushi ka mbəzee.
Təruŋ vəshiree sa kətitəra na.
2 War Kwa sləkəpə kutita na Hiyala kataŋ na,
Nahuti hiyala tiɓa nja ghənzuw.
Ndə tiɓa ndəghummə nja Hiyala ghummuw.
3 Ka gəgəzə kuma kəli ghən ghuy ma,
zlatam gəzə kuma gəmgəm na,
sa nzana Kwa sləkəpiy,
Hiyalaa sənashi shiy gwaʼ gwaʼa na.
Ghənzə na kwa məni nguvə dzəkən shi məni mbəzli gwanashi.
4 Aa ɓalanti rəgihi mbəzli ka bərci,
mbaʼ ɓanavəshi bərci kaa ka daw bərci.
5 Mbəzliy niy nza ngəsli ngəsli niy,
kaa mbəzli dza ghəshiy ghəra sləni ta kumavə shi zəmə,
ma na mbəzliy niy nza lə ma shiy,
ta dəkəva dza ghəshi.
Maliy niy nzaa jəŋay, mbərfəŋ dza naa yakə ndərazhi.
Ma mali kwa ndərazhi ɗaŋ ni na, kala ya ghula.
6 A Kwa sləkəpəə mbay ɓanti piy mbə ndə,
ka mbay fambə piy mbə ndə.
Aa mbay ɓəghə ndəə dzəti pi tsa nza mbəzli bəku bəku ni,
zhini mbaʼ mbay zhinikəvəri mbə shi.
7 A Kwa sləkəpəə mbay mənti ndə ka ndə ndərma,
zhini ka mbay məni ndə ka ndə shiy.
Aa mbəə fati bama tə ndə, aa mbəə shəkanti.
8 Kar Kwa sləkəpəə kafakati ndə daw bərci mbə kurbi,
kar naa ɓanti ndə cəcəku tə kəsəkə,
mbaʼ fiy kwasəbə mezhizhə,
kwa gəzlihi mbəzli diɓədiɓə ni.
Sa nzanay, Kwa sləkəpə fəti na səɗa nza hiɗi ti
mbaʼ ngati hiɗi ti.
9 Kar naa ndəghu mbəzliy nuw kuma nzə,
ma na ka məni kuma huvə huvə nay,
kar ghəshiy zashi mbə kusli.
Sa nzanay, ka mbay ndə ngəriy ɓanti kuma kən lə bərci ciw.
10 Ka zhini ghən kaa Kwa sləkəpiy,
kar naa drazlantishi səəkə mə ghumə, mbaʼ zantishi,
Sa nzanay, ghənzə na kwa sla nguvəə guranti tə hiɗi gwanashi.
Ta ɓanavə bərci dza na kaa mazə tsa təravə na mbaʼ mətsahanavə dikə,» kə.
11 Liy hum ki na, mbaʼ Eləkana zhəghətəvay dzəmbə məlmə ci Rama, ma zəghu ci Saməyel na ci ki na, mbaʼ nziyiy mbə məlmə Shilu ta ghəra sləni kaa Kwa sləkəpə kwasəbə Eli, ndə ta Hiyala.
kuma mənti ndərazhi Eli jikir na
12 Ndərazhi Eliy, mbəzli gəmgəm ni niy nza ghəshi, niy fə bama ghəshiy dzəti Kwa sləkəpuw. 13 Tə sa nza ghəshi ka ta Hiyalay, avanata kumaa niy məni ghəshi kaa mbəzli: Sa ka məndiy ta sliw tsa ka məndi vaa sləniy kaa Kwa sləkəpiy, ə ka ntsaa ghəra sləni kwasəbə shiy kəətəghəvay dzəvəgha sliw tsa va lə gəta fəɗati məndi miy mahəkanə ti. 14 Ka na dza na, i iyaghwa ya dzəghwa shaka, ya dzəghwa dəghu, ya dzəghwa cighə tsa ta məndi sliw tsa va kwa. Ma sliw tsa dza gəta vaa ikəmə ki na, nza ndə ta Hiyala ɓə tsava. War tsəgha niy məni ndərazhi Eli lə ka Izərayeləə niy səəkə tiɓaa dzəmbə məlmə Shilu. 15 Ka ghəshiy dza diɓa, ndə ghula ta ndi gəkə sliw tsa sliy na va kaa Kwa sləkəpiy, mbaʼ kə ntsaa ghəra sləni kaa ndə ta Hiyalaa səəkiy, a kəə ni kaa ntsaa sliy shiy va na: «Slavəra sliw kaa Ndə ta Hiyala ta səli, sa nzanay ka dza naa zləɓa sliw tsa tata tsa va ghaw, tsa ləməciy tsa na tsa dza naa ɗi,» ka naa ni. 16 Mbaʼ kə ntsa va ni: «Kadiw a məndi ndanti gəkə ma nza gha sla tsa ɗi gha,» kiy, «awə, sənzənva ɗee ghaa slara, kala tsəghay ta sla dzee lə bərci,» ka naa ni. 17 War tsəgha niy məni ndərazhi Eli kuma jikir na tərəŋu kwa kuma Kwa sləkəpə, sa niy fati ma ghəshi bamaa dzəti shiy niy slasla məndi kaa Kwa sləkəpə.
Saməyel mbə ghəra sləni kaa Kwa sləkəpə kwa Shilu
18 Ghala vəghu tsa vay, war mbə ghəra sləni niy nza Saməyel zəghu juw na va kaa Kwa sləkəpə na na ci ki. Mbaʼ shi mənti məndi tə məgapa leŋ kwa hati ci pəhə pəhə nja shi kwa hati ndə ta Hiyala. 19 Njasa səəkə piyay, war mbə caslanci kubaŋ niy nza mbəghiy Saməyel geʼi lə ghən tsa ci. Ma sa ka ghəshiy dzaa dzəmbə məlmə Shilu lə zata ta slasla shi ka ghəshiy sla mbə piya kaa Kwa sləkəpə ki na, mbaʼ naa ɓanaghə 20 Ka Eli dza ki na, mbaʼ təfanatishi miy kaa kar Eləkana lə Ana. Ma kəə ni kaa ngəshi na: «Nza Kwa sləkəpə yavəŋa nihuti ndərazhi kwa mali na, ta mbəərə tsa ɓanavə na tsa kaa Kwa sləkəpə,» kəə ni. Ka ghəshiy dza ki na, ka zhashi jighi. 21 Dzəghwa Kwa sləkəpə ki, mbaʼ kəətiti Ana, mbaʼ zhiniy yavə ndərazhiy zhər mahəkanə, lə ghyehi bakə. Ma Saməyel zəghu juw na va na ci ki na, war mbə mətsəhə kəli ghəci kwa kuma Kwa sləkəpə.
Eliy naɓə ndərazhi ci
22 Ghala vəghu tsa va kiy, gwaʼ gwaʼa niy halantəvay Eli, mbaʼ məndi səəkəə gəzanci kuma məni ndərazhi ci va kaa ka Izərayel gwanashi. Ka gəzanci lə hənita ka ndərazhi ci vaa həni lə miʼiy ghəra sləni va miy gaska gamtaʼwaləə kumə lə Kwa sləkəpə, kə məndiy, niy ni kaa ngəci. 23 Ma sa favə na tsəgha ki, ma kə kaa ngəshi na: «Ee favə kuma məni ghuy jikir na va mbəzli gwanashi, tawa məni ghuy tsəghaa? 24 A ndərazhee, kuma favee vaa dzəkən ghuyiy, kuma jikir tərəŋu na, zlashim məni gəla niva shiy. Mbəzli Kwa sləkəpə na shi tsəku ghuy va dzəmbə kuma jikir na. 25 Mbaʼ kə ndə mənti kuma jikir na kaa ndə ngəri nja ghəciy, Hiyala ka naa sla nguvə va. Ma mbaʼ kə ndə mənti kuma jikir na kaa Kwa sləkəpə kiy, wa ntsaa dzaa sla nava nguvaa?» kə kaa ngəshi. Ya tsəgha niy gəzanakəshi dəshi kuma va tsəgha ki na, niy fa ghəshiw, sa nzanay, a Kwa sləkəpə niy tarəkə bakwantishi. 26 Ma na Saməyel tsa va naci ki na, war mbə mətsəhə kəli niy nza na, ka təɓanta kuma ci kaa Kwa sləkəpə, lə kaa ke ngəri kuraku.
Hiyalaa gəzə bəku kar Eli lə mbəzli kiy ghyi tsa ci
27 Ma tə nahuti vici ki na, dzəghwa ndə gəzə kuma Hiyala mbaʼ səəkəə kəsay Eli, ma kə kaa ngəci na: «Avanta kuma gəzəkə Kwa sləkəpə: Ghala vəghu tsaa niy nza jijihiŋaa mevivi Farawaŋ tə hiɗi ka Ezhipətiy, a gha sənay, ee niy cintishi ghən tsee. 28 Mbə takəhi ka Izərayel gwanashiy, jijiŋa Aruŋ niy təravee ta nza ghəci ka ndə ta Hiyala, nza ghəci ta Hiyala tə pi tsa ka məndiy ta, ghəci ndi shiy zən nja urdi, zhini ghəci dzaa pa shi kwa hati ta dzəghwa kumee, zhini mbaʼee ɓanavəshi nashi bəla lə jijihiy mbə shi dza ka Izərayel slaslara. 29 Ya sa nzana tsəgha kiy, tawa sawa ghuy shi nə ya va tsəgha kə məndiy slaslara shi, tsəgha məndi vəlira vəli ya paʼa humɓa, pən kiya? Tawa ka ghuy tərahu shiy gura mbə shiy gwanashi sa ka mbəzlee ka Izərayel ɓəra ta ngaslay hur tsa ghuy kiya? Tawa haʼu gha tərəŋuɓa tə ndərazhi gha kaa ngəraa? 30 Njana nzana tsəgha kiy, vanta kuma gəzaŋee yən Hiyala Kwa sləkəpə ka Izərayel: “Ya tsəgha niy gəzəkee ka ghəraɗa sləni dza mbəzli kiy tsa gha lə takə tsa ghaa nza ya paʼa humɓa” pən niy niy, a kuma yiɗita, gwaʼa na nava nana. Yən gəzə na yən Kwa sləkəpə. Ntsaa haʼu təyay, ta haʼu dzee ti kuraku, ma ntsaa haʼu ma tə yay, ta ndəghanti dzee. 31 Kwa kuma juw tiɓay, ta səəkə dzee ta zanti slən məgəla tsa kiy ghyi tsa gha lə mbə takə tsa gha, ka dzaa məndi kəsay pəhal kiy ghyi tsa gha ya kutiŋ ghulaw. 32 Ya humɓay, war ta nay ntsaa mbərəhu sləni gha dza gha mbə ciki tsee. Ka məni kuma wəzə na ghəci gwanata kaa ka Izərayel. A na kiy ghyi tsa gha kiy, ka dza pəhal nza kiyɓa ghula tepuw. 33 War ndə kutiŋ dzee zlay ta ghəraɗa sləni ghəci tə pi tsaa ta Hiyala mbə jijihiŋa. Ta mbə kuma vaa zhəŋa tərəŋu mbə nəfə gha, kala ɗi nighə gha lə mətsə gha. Ma ni gwanashi ni mbəzliy dzaa təriy, ta bekushi dza ghəshi ghəshi gulashi. 34 Ta bekushi dza kar Hufəni lə Pinəhasə ndərazhi gha va bakə ni tə vici kutiŋ. Ti dza ghaa sənay lə kataŋ dza kuma gəzəkee va gwanata ta məniva pə gha. 35 Sa kee dza kiy, mbaʼe tivə ntsaa dzaa zhəghəra ma hum ta nza ghəci ka ndə ta Hiyala. Ghəciy, ta məni kumaa təɓəra mbə nəfə tsee njasa ɗee dza na. Ta ɓanavə ya ndərazhi dzee, nza ghəshi nzaa ka ta Hiyala. Ghəci dza naa nza kwasəbə mazə tsa dzee tivə, paʼ kwa ndimndim. 36 Tsaa dzaa tərə ndə tə ghumiy mbə jijihiŋay, ta səəkə dza naa kəsay, mbaʼ tsəfəkwiy kwa kuma ci, ta cəʼu dala kutiŋ ya shi zəmə Juw. Ma kə dzaa ni kaa ngəci na: “Titihu, ndara ya namaɓa sləni kwasəbə ka ta Hiyala, ta mbee kumavə shi zəməə dzəghwa hur tsee” kə dzaa ni, kə Kwa sləkəpə,» kə ndə gəzə kuma Hiyala tsa va kaa Eli.