Hiyalaa Har Saməyel ta ghəranta sləni
3
Ma Saməyel məgəla tsa va na ci kiy, mbə ghəranta sləni niy nza na kaa Kwa sləkəpə kwasəbə Eli. Ghala vəghu tsa vay, ɓəlaŋ ɓəlaŋ niy gəzə Kwa sləkəpə kuma kaa mbəzliw, ya nja kwa shəwiy, niy gəzə kuma na ɓəlaŋ kaa mbəzliw. 2 Ghalaɓay, a mətsəhi Eli niy maɗiy ghulfəshi, niy nay pi na wəzə ghulaw. Ma tə nahuti virɗi na, mbaʼ həniy, tə pi tsa ka naa həni. 3 Saməyel kuraku ki na, məhəni ghəci niy nza mbə gaska Kwa sləkəpə vəgha sərndəkə tsa nzə. Ghulata niy nza ghu mbə tsə tə gərkuwa Hiyala. 4 Dzəghwa Kwa sləkəpə ki, mbaʼ haray Saməyel, «Way,» kə. 5 Dza na mbaʼ dzaa kəsay Eli lə bali, «Avanaɗa sa haraɗa gha,» kə kaa ngəci. Ma kə Eli kaa ngəci na: «Harəhuŋa yaw, mbala həniŋa,» kə kaa ngəci. Mbaʼ zəghu va dzaa həniy. 6 Zhini Kwa sləkəpə diɓa, mbaʼ haray kwa baka səɗa. Dza na mbaʼ satiy zhaa kəsay Eli, ma kə ngəci na: «Avanaɗa sa haraɗa gha» kə. Ma kə Eli ngəci diɓa na: «Harəhuŋa yaw pəraa zəghwee, mbala həniŋa,» kə.7 Ghala vəghu tsa vay, niy Sənata Kwa sləkəpə Saməyel dəʼu ghən tsa ci diw. Niy səəkə naa gəzəhu kuma kaa ngəciw. 8 Dzəghwa Kwa sləkəpə diɓa, mbaʼ zhiniy haray kwa mahəkana səɗa, zhini na pəlhəm satiy, mbaʼ dzaa kəsay Eli diɓa. Ma kə kaa ngəci na: «Avanaɗa sa haraɗa gha» kə. Dzəghwa Eli ki, mbaʼ fəti ghən, Kwa sləkəpə har na zəghu va, kə. 9 Ma kə kaa ngəci ki na: «Mbala həniŋa, mbaʼ kə ndəə zhiniy harəŋay, “gəzə kuma gha Kwa sləkəpə, mbə faŋa na ndə sləni tsa gha,” pə gha dzaa ni,» kə Eli kaa ngəci. Dza Saməyel ki, mbaʼ dzaa həniy tə pi tsa ka naa həni. 10 Dzəghwa Kwa sləkəpə ki, mbaʼ səəkəta dzəvəgha Saməyel ka har njasa kwataŋa va diɓa, ma kə na: «Saməyel, Saməyel» kə. Ma kə zəghu va na: «Gəzə kuma gha, mbə faŋa na ndə sləni tsa gha,» kə. 11 Ma kə Kwa sləkəpə kaa ngəci ki na: «Ta məni shiy dzee mbə ka Izərayel, Ya wa ntsa dza kuma vaa tsəhəta kwa sləmə ciy, ka dza naa ɗi favuw. 12 Fəca va dzee ta ɓə ngəraʼu tsaa niy gəzəkee vaa gwanay dzəkən kar Eli lə mbəzli kiy ghyi tsa ci, ka dzee tərəmbiy ya Juw. 13 Ee gəzanci, ta ɓasə nguvə dzee dzəkən ghyi tsa ci ta kwa vələm tə mbərkə fəti ci, pən kaa ngəci. Sa nzanay, a ndərazhi ci məntəra kuma jikir na, ka sawara tərəŋu. Mbaʼ ghəci sənay wəzə məni ghəshiw kə na, war ə ghəciy nighəshi lə mətsə. 14 Va tsəgha zəmanakee fəla kaa mbəzli kiy ghyi tsa ci, ya njaa slaslara ghəshi shiy, ya wa shi ɓəkə ghəshi ta vəlirashiy, ka dzee mbay zanti ghən ta kuma shi va jikir na ya paʼ humɓaw,» kə Kwa sləkəpə.
15 Dzəghwa Saməyel ki mbaʼ həniy, ma sa waliy pi na, mbaʼ satiy ghunanti miy pəhiy dzəmbə ciki tsa Kwa sləkəpə. Mbə dza niy nza her ci ta zhananci kuma gəzanakə Kwa sləkəpə va kaa Eli. 16 Dzəghwa Eli ki, daʼ haray, ma kə na: «A zəghwee Saməyel» kə. «Way» kə Saməyel 17 Ma kə Eli na: «Njaa nə Kwa sləkəpə kaa ngəŋaa? Titihu, ka mbəra gha ya namaɓa kuma ma. Mbaʼ pə gha mbəliyəra ya kuma kutiŋ mbə kuma gəzaŋa na vay, nguvə tərəŋu na dzee ɗi ghənzəə ɓasakənəŋa,» kə. 18 Dzəghwa Saməyel ki, mbaʼ zhananavə kuma va gwanata kala mbəliy ma ya juw tsətsə. Sa favə Eli tsəgha, ma kə na: «Ghənzə na Kwa sləkəpə, məni shi ɗi na ghənzə» kə.
19 Dzəghwa mbaʼ Saməyel kəliy. War kwasəbə niy nza Kwa sləkəpə. Ya nama kumaa niy gəzəkəvəri na lə slən tsa nziy, niy tərə naa dzəti hiɗiw. 20 Tə hiɗi ka Izərayel gwanashi, ghava na mbə məlmə Daŋ paʼa mbə məlmə Ber-shevay, a məndi niy sənay ndə gəzə kuma Kwa sləkəpə tsa kataŋ tsa na Saməyel, kə məndi. 21 Ma Kwa sləkəpə ki na, war mbə ci ghən tsa nzə ghənzə niy nza mbə məlmə Shilu ki. Ya wa kuma ɗi na gəzə kaa mbəzliy, mbə məlmə va niy gəzanci na kaa Saməyel.