4
Kaa mbəzli mbə hulfə ka Izərayel gwanashi niy gəzanshi Saməyel kuma ka Kwa sləkəpəə gəzanci.Ka Filisti zləghuhu sərndəkə tsa Kwa sləkəpə va ka Izərayel
Tə nahuti viciy, mbaʼ ka Izərayel kafəshi ta mbəzə lə ka Filisti. Dza ghəshi mbaʼ ghəshi ɓasəshi tə pi tsa har məndiy Even-ezerə. Ma ka Filisti na, mbaʼ ghəshi ɓasəshi tə pi tsa har məndiy Afekə. 2 Dzəghwa ka Filisti mbaʼ ghəshi dzashi dzəghwa mbəzə lə ka Izərayel ki, jikirkirkir mbəzə tsa va məniy, mbaʼ ka Filisti zəmanavəshi bali kaa ka Izərayel, gar diwiy diwiy faɗəmətsəkə ghəshi bakwanti mbəzli mbə shi, mbə mbəzə tsa va. 3 Ma sa zhəghəkəvashi niy tərə mbəzli dzəti pi tsaa niy ɓasəshi ghəshi va ti ki, ma kə mbəzliy ʼwa kwal mbə ka Izərayel na: «A shiy mənishi zlashi Kwa sləkəpə ka Filisti ʼwəshantəmmə ndatsaa? Dzammə dzəmbə məlmə Shilu a ghummə dzaa ɓəkə sərndəkə sla kiri tsa Kwa sləkəpəə dzəmbə jipə ghummə. Ghalaɓa kiy, ta mbəlantəmmə dza Kwa sləkəpə, mbə dəvə ka mbəzə ghummə,» kə ghəshi. 4 Dzəghwa ka Izərayel ki, mbaʼ ghəshi ghunashi mbəzli dzəmbə məlmə Shilu. Mbaʼ mbəzli va ɓəkə sərndəkə sla kiri tsa Kwa sləkəpə, Hiyalaa sləkə shiy gwaʼ gwaʼa, saa məni mazə mbə Sherubeŋhi. Kar Hufəni lə Pinhasə, ndərazhi Eli va bakə niy, kwasəbə sərndəkə tsa va niy nza ghəshi. 5 War sa tsəhəshi məndi lə sərndəkə tsa va tə pi tsa ɓasəshi ka Izərayel va ki na, dzəghwa ghəshi gwanashi ka ngumə lala tərəŋu dalala, paʼa ka gərəgərə hiɗi. 6 Mbaʼ ka Filisti favə lala va. Ma kə ghəshi na: «Njaa ɗi gəla lalaa gaka na mbə jipi ka Ebərəª gəzaa?» kə ghəshi. Mbaʼ ghəshi fəti ghən, sərndəkə tsa Kwa sləkəpə ɓəkə mbəzli vaa dzəmbə jipə shi, kə ghəshi. 7 Mbaʼ ghəshi hazlənishi, ma kə ghəshi kwa jipə shi na: «A hiyala səəkətaa dzəmbə shi. Gwaʼa nza ghummə! kwa taŋay, niy nza na mbə shiw. 8 Ta na navay, gwaʼa nza ghummə, a ntsaa dzaa mbəlantəmmə mbə dəvə hiyala kwa bərci tərəŋu na va kiya? hiyala vay, ghənzə na sa niy sanamiyshi ngəraʼu va ghənghən ghənghən kaa ka Ezhiptə mbə gamba. 9 A zhər ka Filisti, pəhəti nefer ghummə ghummə, dzamməm kwa zhər kwa zhər, kala tsəghay, ta zhəghəmmə dza ghummə ka mevivi ka Ebərə njasa niy nza ghəshi vaa mevivi ghummə kuraku. Garəmmə ghummə kwa zhər kwa zhər a ghummə mbəzə li shi» kə ghəshi. 10 Dzəghwa ka Filisti ki, mbaʼ ghəshi kafəshi ta mbəzə. Dza ghəshi mbaʼ ghəshi ushanti ka Izərayel, ya wa ndə na, mbaʼ hwiy jighyi. Təruŋəshi niy mbashi məndi ka Izərayel mbə mbəzə tsa va. Mbəzli diwiy diwiy məŋ mahəkanə mətsəkə niy bakwanti məndi mbə ka mbəzə shi. 11 Dzəghwa ka Filisti, mbaʼ ghəshi ɓəhu sərndəkə tsa Hiyala va. Ndərazhi Eli va bakə ni, kar Hufəni lə Penhasə na, mbaʼ məndi bakwantishi.
Njasa mətiy Eli, Ndə ta Hiyala
12 Ma fəcavata ki na, mbaʼ tsahuti ndə mbə takə tsa Beŋzhaməŋ hukəvay mbə mbəzə tsa va dzəmbə məlmə Shilu. Dza na mbaʼ slakwanti kubeŋer kən ghən ci, mbaʼ ngərakən hiɗi kən ghən ci ta mbə məndi sənay a kuma jikir na kəsashi, kə məndi. 13 Tsəhə ntsa vay, Eli mənziy kwa gəzli ci vəgha kwal, ka ndəghə kumaa dzaa məniva, sa nzanay war mbə dza niy nza her ci va kuma sərndəkə tsa Hiyala va. Sa dzəmbiy ntsa va mbə məlmə ki na, mbaʼ gəziy kumaa mənita. Sa favə mbəzli kumaa mənita va na, dza ghəshi gwanashi ka wahə zlaŋzlaŋ. 14 Mbaʼ Eli favə wahə va, «A shiy mənishi gaka mbəzli tsətsə kiya?» kə. Dza ntsa va ka divaa səəkə ta gəzanci kumaa mənita va. 15 Ghalaɓay, piya məsliɗəmətsəkə dəghəsəti niy nza sa Eli, aa niy ghulfiy, niy nay pi na ya juw nzuw. 16 Ma kə ntsa va ngəci ki na: «Avanay səəkə tsee mbə mbəzə sana, ndatsə ndatsə hukəvaree,» kə. «Njaa na kumaa mənita kiya zəghwee,» kə Eli kaa ngəci. 17 Ma kə ntsa va na: «A ka Filisti ɓanavəshi bali kaa ka Izərayel, mbaʼ ghəshi bakwanti mbəzli ghummə ɗaŋ, ndərazhi gha va bakə ni, kar Hufəni lə Pinhasiy a məndi bakwantishi, mbaʼ ka Filisti ɓəhu sərndəkə tsa Hiyala va diɓa,» kə. 18 War sa gəzəkə ntsa va kuma sərndəkə na, mbaʼ Eli ɓəhu tərə səəkə mə pi tsa nziyiy na va dzəghwa liy hum dza kwa miy gaska Hiyala, mbaʼ ghən tsa ci pəsliy ta həɗaka ci, ɓəlahə mətiy. Sa nzanay, ndə lə vəgha və niy nza na, pəhal ghəci diɓa. Piya faɗəmətsəkə niy mənti na mbə ʼwanshi kwal kaa ka Izərayel.
19 Ghala vəghu tsa vay, lə Hur niy nza makwa Eli, mali Pinhasə, ndal niy tərə na ta yaw. War sa favə na, a ka Filisti ɓəhu sərndəkə tsa Hiyala va, zhini mbaʼ kar shəta lə zata bekushi, kə məndi na, mbaʼ hur ʼwati mananta, mbaʼ gələɓətaa yata. 20 Dza na ka ɗi mətita, sa nata miʼiy niy nza vəgha tsəgha ki, ma kə ghəshi kaa ngəta na: «Ka dza her gha ma, zəghu zal yakə gha», kə ghəshi kaa ngəta. Tərəm nziyta kala zləɓa ma kuma, kala zləɓa dəpə nəfə tsa nzə. 21 Liy hum ki, ma kə na: «Njana ɓarəvay shəndəkə tsa Hiyala mbə ka Izərayeliy, Ikavudə dzee har zəghu va,» kə. Ɗi slən tsa vaa gəziy: «A Shəndəkə ɓarvay kərakə lə ka Izərayel,» ɗi naa gəzə. Sa nzana mbaʼ məndi ɓəhu sərndəkə tsa va, zhini mbaʼ kar shəta lə zata bekushi, va tsəgha niy fanati na slən tsa va tsəgha kaa zəghu va. 22 Sa ɓəhu ka mbəzə shi va sərndəkə tsa Hiyala kiy, va tsəgha niy nə na: «A shəndəkə ɓarəvay kərakə lə ka Izərayel,» kə.