Shi mənti sərndəkə tsa Hiyala tə hiɗi ka Filisti
5
Dzəghwa ka Filisti ki, mbaʼ ghəshi ɓəvə sərndəkə tsa Hiyala va mbə məlmə Even-Ezer, mbaʼ ghəshi ɓəghə dzəmbə məlmə Asədud. 2 Dza ghəshi mbaʼ ghəshi fambəə dzəmbə ciki Hiyala shi va vasəti ghəshi har məndiy Daguŋ. Mbaʼ ghəshi fiy vəgha. 3 Ma tə mekəshi sa fərghəshi mbəzli mbə məlmə Asədud na, mbaʼ ghəshi dza kəsata Daguŋ dzar tə hiɗi kwa kuma Sərndəkə tsa Kwa sləkəpə, dza ghəshi laŋ ghəshi ɓəvə zhinə ghəshi zhiniy tə pi tsaa niy nza na. 4 Zhikə ghəshi tə həzlimə ɓa na, mbaʼ ghəshi zhini kəsata hiyala va dzar tə hiɗi kwa kuma Sərndəkə tsa kwa, kwataka vəgha nzə naa tərmbə, ma kar ghən lə divədivi nzə na, mbaʼ ghəshi ngəngəlishi dzar dzəghwa miy ciki. 5 Va tsəgha ki ya paʼa ndatsiy, ka ta hiyala Daguŋ lə mbəzliy dzəmbə ciki hiyala tsa va mbə məlmə Asdudiy, ka zləɓa kəɗi səɗa ghəshi kwa miy ciki tsa va, dzəghwa tə pi tsaa niy tərəta na vaw.6 Dzəghwa Kwa sləkəpə diɓa, mbaʼ zhiniy cintishi bərci nzə lə sati tsa nəfə tsa nzə tərəŋwiy dzəkən mbəzli mbə məlmə Asədud. Mbaʼ shakatishi tə hiɗi lə zheher kwa ndəgha, tsəgha mbəzliy dzar vəgha məlmə shi gwaʼa. 7 Ma sa nata ghəshi kumaa kəsashi ki, ma kə ghəshi na: «Ka ɗi Sərndəkə tsa hiyala ka Izərayel va ghiy mbə ghiyuw. A Hiyala va citəŋiy bərci nzə lə ngəraʼu tsa samiyŋiy na dalala, tsəgha ghənzə cinti kaa Daguŋ hiyala ghiy va diɓa,» kə ghəshi. 8 Dza ghəshi mbaʼ ghəshi harashi mezhizhə tə hiɗi ka Filisti gwanashiy dzəmbə məlmə shi. Ma kə ghəshi ngəshi na: «Njaa dza ghiy məni lə Sərndəkə tsa hiyala ka Izərayel tsaa?» kə ghəshi. «Ɓəghəm dzəmbə məlmə Gatə» kə mezhizhə va, mbaʼ məndi ɓəghə dzəmbə məlmə Gatə va. 9 War sa ɓəghə məndiy dzəmbə nava məlmə ɓa na, dzəghwa Hiyala mbaʼ cintishi bərci nzə lə sanshi ngəraʼu kaa mbəzli mbə məlmə va. Təruŋ her mbəzli va dzashi sa nzana mbaʼ zheher kwa ndəgha kəsəvə mbəzli mbə məlmə va gwanashi, ndərazhi lə mətikukur gwaʼa. 10 Dza ghəshi tiɓata mbaʼ ghəshi ɓəghə Sərndəkə tsa va dzəmbə məlmə Ekruŋ. War sa tsəhiy na na, dzəghwa ka Ekruŋ ka ngumə lala zlaŋ zlaŋ. Ma kə mazə tsa shi na: «A ghəshi ɓəkəra Sərndəkə tsa Hiyala ka Izərayel ta mbəə bakwantəŋiy lə mbəzli mbə məlmee,» kə. 11 Dzəghwa ghəshi ki, mbaʼ ghəshi harashi mezhizhə tə hiɗi ka Filisti gwanashi, mbaʼ ghəshi ɓasəshi. Ma kə mazə ka Ekruŋ kaa ngəshi na: «Zhinəghəm Sərndəkə tsa Hiyala ka Izərayel dzəti hiɗi ci, mbaʼ ghuy dzaa fiy tə pi tsaa niy nza na. Va nəghətaa ghəci zantəŋiy lə mbəzli tə hiɗee,» kə. Ta na navay, tərəŋu niy dzashi her mbəzli mbə məlmə gwanashi, sa nzanay, dalalata niy cintishi Hiyala bərci nzə lə sanshi ngəraʼu. 12 Ma niy niy bekushi ma mbəzliy, a kwa ndəgha niy kəsəvəshi. Sa wahə ghəshi na, paʼa mə ghumə wahə shi va tsəhəta.