Ka Filisti zhinəghə Sərndəkə sla kiriy dzəti hiɗi ka Izərayel
6
Tir mbərfəŋ niy mənti Sərndəkə tsa Kwa sləkəpə va tə hiɗi ka Filisti. 2 Ma dza ghəshiy, mbaʼ ghəshi ɓasəti ka ta hiyala shi, lə ka nga zləra. Ma kə ghəshi kaa ngəshi na: «Njaa dza ghummə mənti lə Sərndəkə tsa Kwa sləkəpə tsaa? Gəzaŋəyim njasa dza ghiy mənti ta zhinəghə dzəti pi tsa səəkə na,» kə ghəshi. 3 Ma kə mbəzli va kaa ngəshi na: «Mbaʼ pə ghuy ɗi zhananti Sərndəkə tsa Hiyala ka Izərayel vay, əntaa ghuy zhini tsəghay ma. Ɗi nay, mbaʼ ghuy ɓəvə shiy kwasəbə, ta mbəə pəlayŋuy jikir tsa ghuy. Mbaʼ pə ghuy mənti tsəghay, ta mbəliŋuy dza ghuy. Ghalaɓay, ta sənay dza ghuy nda sa wa na niy ciŋuy Hiyala va bərci nzə lə saŋuy ngəraʼu,» kə ghəshi. 4 Ma kə mbəzli va na: «A shi təɓə ghiy ɓəghə kwasəbə, ta pəli kuma ghiy jikir naa?» Kə ghəshi. Ma kə mbəzli va na. «Tsahi mbəzə shamshama ni pə ghuy vasəti nja pa zheher kwa ndəgha va cifə, mbaʼ mbəzə kwa shamshama nja pa kumesli cifə, njasa nza mezhizhi va cifə tə hiɗi ka Filisti. Sa nzanay, ngəraʼu tsa kutiŋ tsa na saa kəsaŋuy va, ghuy lə mezhizhi ghuy gwaʼa. 5 Ə pə ghuy dzaa vasəvə pa shiy nja zheheriy ndaghatəŋuy va, mbaʼ pa shiy nja kumesliy yiɗi shiy va tə hiɗi ghuy, nza ghuy ɓəghəshi kaa Kwa sləkəpə ka Izərayel ta mbə ghuy fati bama ti. Nda nza naa zlay ciŋuy bərci nzə lə saŋuy ngəraʼu ghuy lə hiyalahi ghuy, mbaʼ hiɗi ghuy. 6 Ka mənti ghən tsa ghuy ghuy caslakə njasa niy mənti ka Ezhiptə va ghəshi lə mazə Farawaŋ kwataŋa ma. Sa niy sanamiyshi Hiyala va ngəraʼu na, niy zlashi ka Izərayel ghəshiy dzashi sa? 7 A pə ghuy məntiy, mbalam məntim muwta gəduw yəwun na, nza ghuy kəsəvə slay nza məcerihi mbə sa ʼwa ti shi bakə, shi səəkə ma zəkwəə nza tə wəri shi. Ka ghuy dzay, mbaʼ ghuy pəhanavəshi muwta gəduw va, nza ghuy zhinəghə məcerihi ti shi vaa dzəghwa gəzhi. 8 Sa ka ghuy dza kiy, mbaʼ ghuy ɓəvə Sərndəkə tsa Kwa va, mbaʼ ghuy faghwa kwa muwta gəduw va. Ma shi dza ghuy vaa vasəti tə mbəzə kwa shamshama ta pəli kuma ghuy jikir nay, nza ghuy faghwashi kwa tsahuti sərndəkə, mbaʼ ghuy fiy vəgha tsa Kwa sləkəpə va, nza ghuy zlashi slay vaa dzashi. 9 Nza ghuy nighəshi kwa pi tsa dza ghəshi ta dza. Mbaʼ pə ghuy nashi slay vaa nuw kwal tsaa dzəti hiɗi ka Izərayel njasaa dzəmbə məlmə Bet-Shemeshiy, Hiyala ka Izərayel ɓəkəmmə na ngəraʼu tsa tərəŋu tsa tsa. Kala dza kə ghəshiy nuw kwal tsa vay, ta sənay dza ghummə ghənzə ɓəkə na ngəraʼu tsaw, war aa təriy naa dzəti ghummə tsəgha pə ghummə,» kə ghəshi. 10 Dzəghwa ka Filisti ki, mbaʼ ghəshi mənti njasa gəzanakəshi məndi va. Mbaʼ ghəshi dzaa kəəsəvə slay nza məcerihi ti shi bakə, mbaʼ ghəshi pəhanavəshi muwta gəduw, mbaʼ ghəshi kalay məcerihi shi kwa gəzhi. 11 Dzəghwa bəm, ghəshi faghwa Sərndəkə tsa Kwa va kwa muwta gəduw va. Bəm, kaa tsahuti sərndəkə tsa nza kar mbəzə kwa shamshama va nja kumesli ni, mbaʼ ni nja zheher kwa ndəgha ni va kwa. Mbaʼ ghəshi pəlashi slay va. 12 Sa kafə slay va na, ka nuw kwal tsaa dzəmbə məlmə Bet-Shemesh tiɗiɗə. War ə ghəshiy wahə, war ka nuw kwal tsa va. Zhəghəva ghəshi ya dza kwa zleɓi, ya dza kwa bəzəmuw. Ma mezhizhə ka Filisti ki na, war ka nuwshi, mbaʼ ghəshi nuwughəshi paʼ tə ghalaa dzəmbə məlmə Bet-Shemesh. 13 Ghala vəghu tsa vay, mbə sla alkamari niy nza mbəzli mbə məlmə va, dziy kwa teʼu pi. Sa nə ghəshi kafə kə ghəshi kaa kuma shi na, kar tə Sərndəkə tsa Kwa sləkəpə, mbaʼ ghəshi vəshishi. 14 Sa tsəhəshi slay va geʼ lə za Zhuzəwe ndə ka Bet-Shemesh na, mbaʼ ghəshi garəshi, vəgha kəlɓa tiɓa. Dza mbəzli mbaʼ ghəshi baʼwanti shighu mənti məndi va muwta gəduw va ti shi, mbaʼ məndi slaslanti slay bakə ni va, mbaʼ məndi ndantishi kaa Kwa sləkəpə. 15 A mbəzli mbə takə tsa Levi niy ɓəkəghwa pərɓa Sərndəkə tsa Kwa sləkəpə va, lə tsahuti sərndəkə tsaa niy nza shi vasəti məndi va tə mbəzə kwa shamshama kwa, mbaʼ ghəshi niy fiy shiva gwanashi tə kələɓa dikə na va. Dzəghwa mbəzli mbə məlmə Betə-Shemeshə fəcava, mbaʼ ghəshi sləsliy shiy kaa Kwa sləkəpə, mbaʼ ghəshi ndanavə ni ndi ndi ni shiy diɓa. 16 Sa nashi mezhizhə ka Filisti cifə ni va shi va na, mbaʼ ghəshi zhəghətəvashi dzəmbə məlmə Ekuruŋ fəcavata.17 Cifə niy vasəti ka Filisteŋ shiy tə mbəzə kwa shamshama nja pa zheheriy niy ndaghatishi va, ta ɓəshi kaa Kwa sləkəpə, ta pəli kuma shi jikir na. Tə məlmə tə məlmə niy vasətishi ghəshi. Kutiŋ ta məlmə Asdudə, kutiŋ ta Gaza, kutiŋ ta Ashəkəluŋ, kutiŋ ta Gatə, kutiŋ ta Ekuruŋ. 18 A ghəshi niy vasəti kumesli tə mbəzə kwa shamshama, kutiŋ kutiŋ tə məlməhi sləkə mezhizhə ka Filisti va cifə ni diɓa. ʼWavə na tə məlməhi ngangaghwa məndi kwa kələm paʼa tə niy kama kwa kələm, paʼa vəgha haku tsa dikə tsa va vəgha Betə-Shemeshə mbə za Zhuzəwe. Tə haku tsa va niy fiy məndi Sərndəkə tsa Kwa va. Ya paʼ sanay, war ghulata na kələɓa va mbə za va.
19 Zhər bələku bələku məŋ cifəmətsəkə niy nza na mbə məlmə Betə-Shemeshə. Dzəghwa Kwa sləkəpə mbaʼ bakwamti zhər mbərfəŋəmətsəkə mbə mbəzli mbə məlmə va tə sa niy nighəhu ghəshi pi tsa kwa Sərndəkə tsa Kwa sləkəpə va. Dza niy tərə mbəzliy bekushi ma, ka təhuni mbəreketi, sa niy ɓasanakənshi Kwa sləkəpə va nguvə tərəŋu. 20 Ma kə ghəshi na: «A ntsaa dza mbay gariy kwa kuma Kwa sləkəpə, Hiyala ɗewɗew na naa? Kaa kar wa dza ghummə ɓəghə sərndəkə tsa nzə tsa, ta nza ghənzə kərakə lə ghummaa?» kə ghəshi 21 Dzəghwa ghəshi, mbaʼ ghəshi ghunashi mbəzli dzəmbə məlmə Kiriyatə-Yəharim ta gəzə kaa mbəzli va: «A ka Filisti zhinikə Sərndəkə tsa Kwa. Səəkəm a ghuy ɓəghə dzəmbə məlmə ghuy,» pə ghuy kaa ngəshi, kə ghəshi kaa mbəzli va.