7
Sa dza mbəzli vaa gəzanshi kuma va ki na, mbaʼ mbəzli mbə məlmə Kiriyatə-Yeharim dzaa ɓəkə Sərndəkə tsa Kwa sləkəpə va. Mbaʼ ghəshi fiy kiy ghyi tsa Avinadavə, ntsa nza ghyi tsa ci mə hum pi. Mbaʼ ghəshi tivə Eliyazar zəghu Avinadavə ta ndəghu Sərndəkə tsa va.Saməyel məniy ndə sla nguvə mbə ka Izərayel
2 Ghalaa niy fiy məndi va sərndəkə tsa Kwa mbə məlmə Kiriyatə-Yeharimiy, aa niy hiy. Piya bakəmətsəkə niy mənti na mbəɓa. Mbəzli mbə hulfə ka Izərayel gwanashiy, mbə ɗi zhəghəva niy nza ghəshiy dzəvəgha Kwa ghalaɓa. 3 Ma kə Saməyel kaa ngəshi gwanashi ki na: «Mbaʼ pə ghuy ɗi zhəghəvaa dzəvəgha Kwa sləkəpə lə nəfə kutiŋiy, ə pə ghuy zlay tsəfəku kwa kuma nihuti hiyalahi lə kwa kuma hiyalahi har məndi vaa Astarte. Kaa Kwa sləkəpə kutita pə ghuy ɓanavə nefer ghuy, kwa kuma nzə kutita pə ghuy tsəfəku. Ghalaɓa kiy, ta mbəlantəŋuy dza na mbə dəvə ka Filisti,» kə 4 Sa favə ka Izərayel tsəgha ki na, mbaʼ ghəshi ɓanti hiyalahi har məndi vaa Baʼal lə Astarte mbə jipə shi. Dza ghəshi ka tsəfəku kwataka kwa kuma Kwa sləkəpə gwaʼa tsəgha. 5 Ma kə Saməyel kaa ngəshi diɓa na: «Mbalam a ghuy ɓasəŋuy ghuy ka Izərayel tə pi tsa har məndi vaa Misəpa. Nzee cəʼu Kwa sləkəpə dzəkən ghuy tiɓa,» kə. 6 Dzəghwa mbaʼ ghəshi dzaa ɓasəshi tə pi tsa har məndi vaa Misəpa ki, mbaʼ ghəshi gakə yam, ka shikəshi dzəti hiɗi kwa kuma Kwa. Vəghu ghəshi mbə məni sumay. Ma kə ghəshi tə pi tsa va na: «A ghiy mənti kuma jikir na kaa Kwa,» kə ghəshi. Dzəghwa Saməyel tiɓa tə pi tsa har məndi vaa Misəpa ki, mbaʼ məniy ka ndə sla nguvə tsa mbə hulfə ka Izərayel.
7 Dzəghwa mbaʼ ka Filisti favə a ka Izərayel ɓasəshi tə pi tsa har məndi vaa Misəpa, kə məndi. Dza mezhizhi shi mbaʼ ghəshi kafəshi lə mbəzli shi ta mbəzə lə ka Izərayel. Sa favə ka Izərayel na, mbaʼ her shi dzashi. 8 Ma kə ghəshi ka Saməyel na: «Əntaa gha nziyŋa guŋaa zlaŋiy ma. Ə pə ghaa cəʼu Hiyala Kwa sləkəpə ghummə ta mbə ghənzəə mbəlantəmmə mbə dəvə ka Filisti,» kə ghəshi. 9 Dza Saməyel mbaʼ ɓəvə zəghu təmbəkə tsa tə ʼwa, mbaʼ slantiy ndananti gwanay kaa Kwa. Dza na ka cəʼu Kwa sləkəpə ta mbə ghənzəə kətiti ka Izərayel, mbaʼ Kwa sləkəpə zləɓavə cəʼu ci va. 10 Ghala vəghu tsa ndi Saməyel va shiy kaa Kwa sləkəpiy, a ka Filisti niy kətikəvashi ndaku lə ka Izərayel ta mbəzə. Ma dzəghwa Kwa sləkəpə ki na, mbaʼ dzamti her shi lə dərazli van lə bərci, mbaʼ ka Izərayel tahanavəshi bali. 11 Dzəghwa ka sawji ka Izərayel mbaʼ ghəshi səvərishi mbə Misəpa, ka nuw ka Filisti, mbaʼ ghəshi irətishi paʼa vəgha pi tsa har məndi vaa Bet-kar. 12 Dzəghwa Saməyəl mbaʼ bəvə haku dikə, mbaʼ fiy kwa jipə kar Misəpa lə pi tsa har məndiy La Daŋ. «Even-Ezer» kə kaa slən tsa haku tsa va. Ɗi naa gəziy, haku tsaa kəətipə. Ma kə niy ni ghəci mbə fə haku tsa vay: «Paʼ tikə kətitəmmə Kwa sləkəpə,» niy nə na.
13 Ava tsəgha ushanti ka Izərayel ka Filisti. Zhini ghəshiy zhikə ta dzəmbə hiɗi ka Izərayeluw. A Kwa sləkəpə niy ʼyapətishi lə bərci nzə ghala vəghu tsa Saməyel gwanay. 14 Məlməhiy niy ɓəhu ka Filisteŋ va ka Izərayeliy, a ka Izərayel niy zhinəhu shi shi. ʼWava na tə məlmə Ekuruŋ paʼ mbə məlmə Gatə. Mbaʼ ka Izərayel zləghukəvəri ghən tsa shi mbə dəvə ka Filisteŋ. Lə zərkə niy nza na kwa jipi ka Izərayel lə ka Amur.
15 Saməyel naci ki na, war ndə sla nguvə ghəci niy nza mbə ka Izərayel ghala nza na mbə nziy tsa ci. 16 Njasa səəkə piyay, war mbə dza niy nza naa dzəmbə Betel lə dzəmbə Gilgal, mbaʼ dzəmbə Misəpa, ta sla gwuvə kaa ka Izərayel dzar tə pi tsa va gwanay. 17 Sa ka naa dza ki na, mbaʼ zhəghətəvay dzəmbə məlmə Rama, tə pi tsa nza ghyi tsa ci. Tiɓa niy sla na nguvə kaa kaa ka Izərayel. Tiɓa niy ngati na pi tsaa slasla shiy kaa Kwa sləkəpə.