Ka Izərayel ɗuw a məndiy paranatishi mazə
8
Ma sa maɗi Saməyel haliy ki na, dzəghwa na mbaʼ fiy ndərazhi ci, ta nza ghəshi ka ka sla nguvə tə hiɗi ka Izərayel. 2 Tsa dikə tsa zəghu ciy, Zhəwel niy har məndi, ma tsa juw tsa na, Abiya. Mbə məlmə Batəsheba niy sla ghəshi nguvə. 3 Na nashi kiy, niy nuw səəbə dəshi ghəshi mbə kuma məni ghəshiw. A ghəshi niy ɓanavə məhərli shi kaa gəna, ka ghəshiy dzay, kala slama nguvə lə kwal, sa ka məndiy ɓanavəshi shiy. 4 Sa nighəti mbəzliy ʼwa kwal mbə ka Izərayel tsəgha ki na, mbaʼ ghəshi ɓasəshi, mbaʼ ghəshi dzaa kəsay Saməyel mbə məlmə Rama. 5 Ma kə ghəshi kaa ngəci na: «Avanaŋa haliŋa, ndərazhi gha niy, ka nuw səəbə gha ghəshi mbə kuma məni ghəshiw, va tsəgha ɗi ghiy ghaa pərətəŋiy mazə ta sləkəŋiy, njasa nzana va va hulfə nihuti mbəzli gwanashi. 6 Sa ɗuw ghəshi va mazə ta sləkəshi ki na, kala təɓanci ma kuma va kaa Saməyel ya juw, dza na ka cəʼu kwa. 7 Ma kə kwa kaa ngəci na: «Zləɓanatishi kuma ɗuw ka Izərayel va gwanata. Mbə kuma shi vay, gha na sa ndəghanti ghəshiw, yən na, ka ɗi ghəshi yən sləkəshi ghulaw. 8 Ghala vəghu tsa ɓəkəvərishee va mbə hiɗi ka Ezhiptə paʼa ndatsiy, war mbə zlara na ghəshi ta dza ta tsəfəku kwa kuma nihuti hiyalahi. kuma sənaɓəshi ghəshi va mbə məniray, ghənzə dza ghəshiy məniŋa kuraku. 9 Ma pə gha məntiy, zləɓanatishi kuma ɗuw ghəshi va. A na nzanay, gəzanshi tə gha wəzə wəzə njasa dza mazə məni mazə tsa ciy dzəkən shi,» kə.10 Dzəghwa Saməyel mbaʼ zhananavəshi kuma gəzəkə Kwa sləkəpə va kaa ka Izərayel, mbəzliy ɗuw mazə va və. 11 Ma kə kaa ngəshi na: «Sənay tə ghuy, Sa dzee pərətəŋuy maziy, avanay njasa dza naa məni mazə dzəkən ghuy: Ta ti ka sawji dza na mbə ndərazhi ghuy ta mbahə muwta mbəzə ci mə gədewesli, nihuti na, ta zlərə gədewesli ci, nihuti diɓa, na ka kəsli bali kwa kuma muwta gəduw ci mə gədewesli ta ndəghu ci. 12 Ta tivə nihuti mbəzli dza na ta sləkə mbəzli bələku bələku məŋ, nihuti na ka sləkə mbəzli cifəmətsəkə. Ka na dza diɓay, mbaʼ tivə nihuti ta zanci za ci, lə ta məni shi ci səəkə kwamti, nihuti diɓa na ta pəsli shi mbəzə, lə shiy dzəti muwta gəduw. 13 Ta ti ghyehi dza na mbə ghyehi ghuy ta ta urdi, nihuti na ta ta shi zəmə, nihuti na ta ta peŋ, kiy ghyi tsa ci. 14 Ta ɓəɓəhu Niy guranti mbə veher ghuy, lə niy gura mbə fefer ghuy ka məndiy ta tay tə ya shi, lə niy guranti mbə fefer ulivəhi ghuy, ta ɓanshi kaa mbəzli ta səɗa ci dza na. 15 Ta ɓə shiy kutiŋ mbə shiy məŋ dza na mbə shi dza ghuy zakə lə mbə ya fefer ghuy, ta ɓanshi kaa ka sləni ci lə mbəzli ta səɗa ci. 16 Ta tərahu niy guranti dza na mbə zhəriy ghəraŋuy sləni, lə mbə niy miʼi, lə gula, ya kwantəmcahi ghuy ta ghəranci sləni. 17 Ta ti dəmbəkə kutiŋ dza na mbə dəmbəkə məŋ, mbə teŋkesli ghuy lə kwiy ghuy. Ghwiy diɓay, mevivi ci dza ghuy nza. 18 Ka ghuy dza ghalaɓa kiy, ka wahə va mazə tsa ghuy va tivə ghuy. Ghalaɓa na ka dza Kwa ə zləɓaŋuy kumaw,» kə Saməyel kaa ngəshi.
19 Ma ka Izərayel nashi ki na, kala zləɓa fa kuma Saməyel va ghəshi. Ma kə ghəshi na: «Na ghiy mbuw, war mazə na sa ɗi ghiy. 20 Ghalaɓay, nja hulfə nihuti mbəzli gwanashi ni dza ghiy nza kuraku. Ka mazə tsa ghiy dzay, ka slaŋiy gwuvə ghiy, nza ghəci dza kwa kuma ka sawji ghiy ta mbəzə,» kə ghəshi. 21 Dza Saməyel mbaʼ fanti kuma shi va gwanata, mbaʼ dzaa zhananavə kaa Kwa sləkəpə. 22 Ma kə Kwa kaa ngəci na: «Mananatishi kuma ɗuw ghəshi va, paranatishi mazə,» kə. Liy hum kuma va ki na, «mbalam jighyi,» kə Saməyel kaa ka Izərayel.