Sawul mbə pəla kwantəmcahi diy
9
A tsahuti ndə niy nza tiɓa, Kish kə məndi niy ni kaa slən tsa ci, mbə takə tsa Beŋzhaməŋ ghəci, tə hiɗi ka Beŋzhameŋ ghəci niy nza lə nziy tsa ci. Zəghu Aviyel niy nza na, jijihishi kar Cerur lə Bekuratə, mbaʼ Afiya. Ntsa vay, ndə kala dza her ci va kuma, lə bərci və niy nza na. 2 A zəghu niy nza va Kish tsa va, Sawul, kə məndi niy ni kaa slən tsa ci, məgəla ka təɓə ghəci niy nza, ndə tiɓa tə hiɗi ka Izərayel, mbaʼ niy təɓə nja ghəciw. Bitiɓa ghəci niy nza na kən mbəzli gwanashi.3 Ma tə nahuti vəciy, mbaʼ kwantəmcahiy miʼi Kish zashi. Ma kə kaa zəghu ci va na: «Harvə ndə kutiŋ mbə ka sləni ghum a gha dza ta pəla kwantəmcahi va,» kə kaa ngəci. 4 Dzəghwa kar Sawul lə ntsa va mbaʼ ghəshi kafəshi, ka dzar mbə kəleŋer tə hiɗi ka Efrayim, lə hiɗi ka Salisha, shaŋ ghəshi ta kəsashi. Zhini ghəshi ka dzar tə hiɗi ka Shalim, shaŋ ghəshi. Zha ghəshi ka dzar tə hiɗi ka Beŋzhameŋ, shaŋ ghəshi diɓa. 5 Ma sa tsəhəshi ghəshi tə hiɗi ka Cufə, ma kə Sawul kaa ndə ghəranci sləni tsa kwasəbə va na: «Zhəghətəvam ghum jighyi, kala tsəghay ghum na shi dza dirəə zhay ta zəzəə dzəkən, mbaʼ zlay zəzəə dzəkən kwantəmcashi,» kə. 6 Ma kə ndə sləni tsa va na: «Mbə məlmə kwa kuma ghum nay, a ndə gəzə kumaa səəkə va Hiyala tiɓa, mbaʼ məndi fati bama ti tərəŋu. Ya wa shi gəzəkə nay, war tsəgha ka ghəshiy mənishi. Dzam a ghum dzaa kəsay sənzənva nda nza naa gəzaŋum kumaa dzəkən dza ghum na,» kə. 7 Ma kə Sawul na: «Tsəgha na, dzam. Nanzə kiy, a shi dza ghum ɓanavə kaa ndə gəzə kuma Hiyala tsa vaa? sanay gwaʼa na shi zəmə kwa mbəleɗəmer ghum, nihuti shiy va ghum gar ɓanavəshiw, shiy tiɓaa tərə va ghumuw,» kə. 8 Ma kə ndə ghəra sləni tsa va na: «A dala vəya tikə jiwu, nza ghum ɓanavə, nza ghəci gəzaŋum kumaa dzəkən dza ghum na,» kə. 9 Mbaʼ kə ndəə ɗi dza ta ɗuw kuma va Hiyala tə hiɗi ka Izərayel ghalaɓay, «Dzammə va ntsaa nashi shiy dzaa məniva,» ka naa ni. Mbəzli har məndi vaa ka gəzə kumaa səəkə va Hiyala ndatsiy, «ka nashi shiy dzaa məniva,» niy harshi məndi ghalaɓa. 10 «kuma wəzə na sa gəzəkə gha va, dzam ta kəsay,» kə Sawul. Dza ghəshi ka dzaa dzəmbə məlmə nza ndə gəzə kumaa səəkə va Hiyala va. 11 Ma ghəshi mbə dzəmə vəgha bahwaa dzəmbə məlmə va na, mbaʼ ghəshi kumay lə ghyehi mbə məlmə va ghəshiy səkwa ta ga yam. Ma kə ghəshi kaa ngəshi na: «Tikə na ntsaa nashi shiy dzaa məniva va na?» kə ghəshi. 12 Ma kə ghyehi va kaa ngəshi na: «Yə, tikə na, məɓa tə kuma ghuy na. Divam ghuy kəə ɗi kəsay. Sa nzanay, ndatsə səəkə naa dzəmbə məlmə ghiy, ta dzay dza na ta sla shiy kaa Hiyala ndatsə mə pi tsa ɗal tsa, ta mbəzli gwanashi. 13 War tsəhəŋuy ma ghuy mbə məlmiy, ta kəsay dza ghuy, ghəci ghula ta dzəmə pi tsa va ta zəmə shiy lə mbəzli. Ka dza mbəzliy gha zəmə shiy kala tsəhiy ghəciw, sa nzanay, ghəci dza naa təfə miy dzəkən shi sliy məndi. Sa ka na təfakən miy kiy, ma nza mbəzli harashi məndi gha zəmə shiy. Mbaʼ pə ghuy divaa dzəmə sənzənvay, ta kəsay dza ghuy» kə ghəshi.
Sawul kumə lə Saməyel
14 Dza kar Sawul ki, ka nuw lə kwal tsa shi, ma ghəshi mbə dzəmbə məlmə va ki na, ava Saməyel mbə səvəri kwa kuma shi ta dzəmə pi tsa ɗal tsa va ki. 15 Ghala mbəra Sawul ghula ta tsəhiy, a Kwa sləkəpə niy gəzanakə kuma kaa Saməyel. Ma kə niy ni kaa ngəciy: 16 «Həzlimə vici tsətsiy, ta ghunayŋa ndə dzee mbə takə tsa Beŋzhaməŋ, nza gha shəkanambə in mbə ghən ci ta nza ghəci ka mazə tsa hulfə mbəzlee ka Izərayel, nza ghəci mbəlantishi mbə dəvə ka Filisti. Ee nata kuma kən shi, a wahə shi tsəhəta kwa sləmee,» kə. 17 War sa nay Saməyel Sawul ki, a kə kwa kaa ngəci na: «Ava ntsa gəzaŋee va ki, ghəci dza na ta məni mazə dzəkən mbəzlee,» kə kaa ngəci.
18 Dzəghwa Sawul mbaʼ kətəghəvay dzəvəgha Saməyel kwa miy dəghaa dzəmbə məlmə, ma kə kaa ngəci na: «Ə cəʼuŋee a gha citəra dzəghwa tə pi tsa nza ghyi tsa ntsaa nighə shiy dzaa məniva,» kə. 19 «Yən na ntsa va, mbadzam dzəmə pi tsa ɗal tsa va. Ndatsiy, ghummə dza na ta zəmə shiy lə ghuy. Ma həzlimə mekishi, sa kee zləɓatəŋa kumaa dzəkən kuma ɗi gha va ɗuwiy, nza gha dzaŋa. 20 A na kwantəmcahiy zashi va ghala vici mahəkaniy, ka dza her gha ma. A məndi kəsashi. Talay, shi wa dza shi gura dimə ti shiy nza tə hiɗi ka Izərayel, kala shi gha, ghuy lə mbəzli kiy ghyi tsa dəŋaa?» kə Saməyel. 21 Ma kə Sawul na: «Njaa pə ghaa? Ntsa mbə takə tsa Benzhameŋ, takə tsaa guranti jiwu mbə hulfə ka Izərayel yən, zhiniy ghiy gura jiwu kwa na ghiy miy dəgha kiy, njaa ka gha gəzəra gəla niva shiy kiya?» kə.
22 Dzəghwa Saməyel ki, mbaʼ pəməvə kar Sawul lə ndə ghəra sləni tsa ci vaa dzəmbə ciki tsa dza məndi va ta zəmə shiy, mbaʼ fiyshi kwa gəzlihi mbəzli diɓədiɓə ni, kwasəbə nihuti mbəzli harashi məndi gar mahəkanəmətsəkə. 23 Dza na mbaʼ haray ndə ta shiy, ma kə kaa ngəci na: «Mbala ɓəkə sliw tsaa niy ndaŋee va niy nə ya nza gha fiy vəgha bəla pən» kə kaa ngəci. 24 Dzəghwa ntsa va mbaʼ dzaa ɓəkə val, lə tsahuti sliw tsaa dzar vəgha, mbaʼ səəkəə fiyshi kwa kuma Sawul. Ma kə Saməyel kaa Sawul ki na: «Avanay sliw tsa fiyŋa məndi ta zəmə gha, zəmə. Ta zəmə gha ndatsə kwasəbə mbəzli harashee ni fiyŋa məndi» kə. Dzəghwa Sawul fəcava ki, mbaʼ zəməhu shiy ghəshi lə Saməyel. 25 Sa zəmanti ghəshi shiy ki na, mbaʼ ghəshi kafəshi tə pi tsa ɗal tsa va ka səkwashiy dzəmbə məlmə. Dzəghwa kar Sawul lə Saməyel mbaʼ ghəshi dzashiy dzəmə pi tsa nja beela tsa va mə ghən ciki, mbaʼ ghəshi slahu kuma shi.
Saməyel shəkambə in mbə ghən Sawul ta nza ghəci ka mazə
26 Ma həzlimə pəətə mekishi ki na, mbaʼ kar Sawul lə ndə sləni tsa va fərəghəshi. Sa waliy pi na, dza Saməyel daʼ harəvə Sawul dzəmə pi tsa mə ghən ciki va. Ma kə kaa ngəci na: «kafə mbalaa jighi, dzam ee pəhaŋa» kə. Dzəghwa Sawul ki, mbaʼ kafiy ka dzay. Dza ghəshi lə Saməyel bakanashi ka səvəri kiy ghyi. 27 Ma sa tsəhəshi ghəshi tə pi tsa kəray məlmə va ki, ma kə Saməyel kaa ngəci na: «Gəzanci kaa ndə sləni tsa gha tsa a ghəci ʼwati kwal» kə. Mbaʼ Sawul gəzanci, mbaʼ ntsa va ʼwati kwal. Ma kə Saməyel ki na: «Na na gha kiy, garəŋa tiɓa ee gəzaŋa kuma gəzəkə Kwa sləkəpə» kə.