10
Sa gariy Sawul ki na, dzəghwa Saməyel mbaʼ ɓəvə in kwa pəhər, naʼi shəkambə dzəghwa mbə ghən tsa Sawul, dza na hutəm hutəməvə, ma kə kaa ngəci na: «In tsa shəkee tsaa dzəghwa mbə ghən ghay, li pəərətəŋa Kwa sləkəpə dəʼu ghən tsa nzə ta nza gha ka mazə tsaa sləkə mbəzli nzə. 2 Sa ka gha kafə vəghee sanay, ta dza dza ghaa kumay lə zhər bakə vəgha kwəli Rashel, tə pi tsa har məndi vaa Seləsha, tə ghala hiɗi ka Beŋzhaməŋ. Ma dza ghəshiy ni kaa ngəŋay: “Kwantəməcahi pəla gha vay, a məndi nashi, a dəŋa zanti ghən ta na kwantəmcahi kuma, ghuy na shi zəzə na sana: Njaa dzee mənti kee nay zəghwee vaa? kə kaa kuma gəzə na” dza ghəshiy ni kaa ngəŋa. 3 Sa ka gha dzay, ka nuw lə kwal tsa gha. Sa ka gha tsəhəŋa vəgha fə dikə na va har məndiy Taburiy, ta kumay dza ghuy lə nihuti zhər mahəkanə ghəshi mbə dzaa dzəti pi tsa har məndi vaa Betel ta dza ta vəli kaa Hiyala. Tsahuti mbə shiy, lə ʼwegeger mahəkanə, tsahuti na lə peŋ mahəkanə, ma kwa mahəkana na, lə tay kwa ghuləpə. 4 “Kuriŋ nza gha na?” dza ghəshiy ni kaa ngəŋa. Ka ghəshi dzay ka ɓəŋa peŋ bakə. Sa ka ghəshi bəŋay, ɓə tə gha. 5 Sa ka gha kafə tiɓa kiy, nza gha dzaa dzəti pi tsa har məndi vaa Giveya-Eluhim, pi tsa nza mbəzliy sləkə ka Filisti va ti. Ghaa maɗi ta dzəmbə məlmə vay, ta kumay dza gha lə ka gəzə kumaa səəkə va Hiyala ɗaŋ ghəshi mbə səəkə mə pi tsa ɗal tsa va, ghəshi lə ka tsa gəzhəpipir, mbaʼ ka tsa bembeɗer, mbaʼ ka viy sherey, mbaʼ ka viy cereki. Ka gəzə kumaa səəkə va Hiyala vay, war ə dza ghəshiy gəzə kumaa səəkə va Hiyala, war ka gəzə, war ka gəzə. 6 Ka gha nighə kiy, safə tsa Hiyala səəkiy dzəkən gha, ka gha dza na, ka gəzə kumaa səəkə va Hiyala kwasəbə shi. Ka gha dza ki na, mbaʼ gha zhəghəŋa tiɓa ka tsahuti ndə. 7 Sa ka gha nashi shi gəzəkəŋee va gwanashi mənishi tsəghay, nza gha məni shi nashi gha gar mən ni. Sa nzanay, kwasəbə gha dza Hiyalaa nza ghalaɓa. 8 Ka gha dza kiy, nza gha ʼwati kwal pərɓa gha kənee dzəghwa məlmə Gilgal. Sa ka gha tsəhəŋay, nza gha nziyŋa kwaɓa ka ndəghəra, mbə vici mbərəfəŋ. Sa kee dzəghwa ta ndanta shiy kaa Hiyala lə ta slaslanta shiy, tə mbərkə zərkə tsa kwa jipə shi lə mbəzli nziy, nzee kəsaŋa. Ma nzee gəzaŋa shi dza ghaa məni,» kə Saməyel kaa Sawul.9 Sa gəzanakə na kuma va ki na, ka dzay Sawul. War sa zhəghanavə na hum kaa Saməyel na, mbaʼ Hiyala zhəghanti nəfə tsa ci. Fəcavata ki na, mbaʼ shi gəzanakə Saməyel va gwanashi mənishi. 10 Ma sa tsəhəshi kar Sawul lə ndə sləni tsa ci va mə Giveya ki na, mbaʼ ghəshi kumay lə ka gəzə kumaa səəkə va Hiyala ɗaŋ. Dzəghwa safə tsa Hiyala, mbaʼ səəkiy dzəkən Sawul, mbaʼ ʼwati gəzə kumaa səəkə va Hiyala, war ka gəzə, war ka gəzə, kwasəbə shi. 11 Mbəzliy niy sənay gwanashi ghala kwataŋa ki na, mbaʼ ghəshi nay mbə gəzə kumaa səəkə va Hiyala kwasəɓə ka gəzə kumaa səəkə va Hiyala. Dza ghəshi ka ɗəɗuw kwa jipə tsa shi: «A shiy kəsay zəghu Kish shəki? Əə məniy Sawul ndə gəzə kumaa səəkə va Hiyala kuraku shəkəna?» kə ghəshi. 12 Ma kə tsahuti ndə mbə shi na: «Ya ni gwanashi ni vay, aa dəshiya?» kə. Ghalaɓa gha məndiy gəzə kuma ka məndi vaa gəzə: «Ə məniy Sawul ka ndə gəzə kumaa səəkə va Hiyala kuraku shəkəna?» kə məndi.
13 Ma sa kəɗiy Sawul lə gəzə kumaa səəkə va Hiyala ki na, mbaʼ dzay dzəmə hum pi tsa va. 14 Ma sa nashi zəmbəghiy diy ghəshi lə ndə ghəra sləni tsa ci va na, dza na ka ɗuw və shi: «kuma niy dzaŋuy ghuyaa?» kə. «Ta pəla kwantəmcahi niy dzaŋiy ghiy kala nashi ghiy. Sa nashi ma ghiy na, mbaʼ ghiy niy dzaŋiy va Saməyel» kə Sawul. 15 Ma kə zəmbəghiy diy tsa va na: «Njaa nə na kaa ngəŋuy shəki?» kə. 16 Ma kə Sawul na: «A məndi nashi kwantəmcahi va, kə ka kaa ngəŋiy,» kə. A na kuma məni mazə gəzanakə Saməyel vay, niy həcanakə nava kuma naw.
Məndi pəərəti Sawul ka mazə
17 Dzəghwa Saməyel mbaʼ harashi ka Izərayel dzəghwa kuma Kwa tə pi tsa har məndi vaa Misəpa. 18 Ma kə kaa ngəshi na: «Avanta kuma gəzəkə Kwa sləkəpə, Hiyala ka Izərayel: “Yən ɓəkəvəriŋuy na ghuy ka Izərayel mbə hiɗi ka Ezhiptə, yən mbəlantəŋuy na mbə ngəraʼu tsaa niy saŋuy ghəshi lə saa niy saŋuy nihuti hulfəhi mbəzli gwanashi,” kə. 19 Dzəghwa ghuy sana kiy, mbaʼ ghuy ndəghanti Hiyala ghuy, ghənzə saa kəətiŋuy mbə ngəraʼu tsa ka ghuy nza mbə gwanay, lə kumaa gagaŋuy gwanata. “Pərətəŋiy mazə”, pə ghuy kaa ngəta. Ghənzə tsəgha kiy, səəkəm garəm kwa kuma Kwa sləkəpə, njasa nza takəhi ghuy lə njasa nza miy dəghahi mbə takəhi ghuy,» kə.
20 Sa gariy Saməyel takəhi ka Izərayel gwanashi ki na, mbaʼ Kwa tivə takə tsa Beŋzhaməŋ. 21 Sa taŋə miy dəghahi mbə takə tsa Beŋzhaməŋ ki na, mbaʼ Kwa tivə miy dəgha Matəri. Dza na kwa miy dəgha va ki mbaʼ tivə Sawul zəghu Kish. Dza məndi ka pəla, shaŋ məndi ta nay. 22 Zhəghwa məndi ka ɗuw va Kwa sləkəpə: «Səəkiy ntsa va tikə nanzə na?» kə məndi. «Mbalam pəlam, dzar mbə mbəleɗemer fiy məndi va mbiy na,» kə Kwa sləkəpə. 23 Dza məndi lə bali mbaʼ məndi dza pəlakə mbə shi va. Mbaʼ gariy tə jipə mbəzli. Bitiɓa ghəci niy nza na kaa mbəzli gwanashi.
24 Ma kə Saməyel kaa ka Izərayel gwanashi na: «Nay ntsa ghuy sa? Ghəci na ntsa tivə Kwa sləkəpə. Ndə tiɓa nja ghəci mbə hulfə ghummə gwanataw,» kə. Dzəghwa mbəzli gwanashi ka ngumə lala: «Bitə kə piy tsa mazə, bitə kə piy tsa mazə» kə ghəshi 25 Dzəghwa Saməyel mbaʼ mbəranakəshi shi dza ghəshiy məni kaa mazə, mbaʼ tsaslatishi tə zliya, mbaʼ fiy mbə gaska gamtaʼwal Kwa sləkəpə, kwa kuma nzə. Ma liy hum ki na, mbaʼ gəzanshi dzashiy jighi kaa mbəzli gwanashi. 26 Dzəghwa Sawul kuraku mbaʼ zhəghətəvay jighi dzəmbə məlmə Giveya, dzakə ghyi tsa ci. Mbaʼ nihuti mbəzli dza ma her shi va kuma ɗaŋ tə səəbə ci, sa niy ndəŋwashi Kwa sləkəpə nefer shi 27 Ya tsəgha nzə kiy a mbəzli gəmgəm ni niy nza tiɓa. Ma kə ghəshi niy ni na: «Nay ntsaa dzaa mbay mbəlantəmmə di pən,» kə ghəshi. Mbaʼ ghəshi ndərəti kala ɓanci ma shiy ghəshiy səəkə. Ma na Sawul na ci kiy, guŋiy niy nziyiy na.