Sawul ushanti ka Amun
11
Liy hum sa pəərəti məndi Sawul ki na, dza Nahash mazə ka Amun mbaʼ səəkəə ɓasiy lə mbəzli ci kwa kuma məlmə Yavesh tə hiɗi ka Galad, ta mbəzə lə mbəzli mbəɓa. Ma kə mbəzli ka Yavesh gwanashi kaa ngəci na: «Slati kiri ghummə nza ghiy nzaa ka ghəraŋa sləni,» kə ghəshi. 2 Ma kə Nahash kaa ngəshi na: «Mbaʼ pə ghuy ɗi yən sla kiri lə ghuyiy, mbaʼ ghuy zləɓavə yən yahwanti mətsə kwa bəzəmə tə ghuy ɓasəŋuy. Ghalaɓay, ta panakənshi haʼu dzee kaa ka Izərayel gwanashi,» kə. 3 Ma kə mbəzli dikə dikə ni mbə məlmə Yavesh kaa ngəci na: «Ndaŋiy vici mbərfəŋ, a ghiy ghughuni mbəzli dzar tə hiɗi ka Izərayel gwanashi ta ɗuw kəəti. Kala dza kə ndəə nza tiɓa gar mbəlantəŋəyiy, nza ghiy dzaa kəsaŋa ta yahu mətsəhi ghiy gha,» kə ghəshi.4 Dzəghwa mbəzli ghunashi məndi va ki, mbaʼ ghəshi tsəhəshi mbə Giveya, məlmə Sawul, mbaʼ ghəshi gəzanshi kuma va kaa mbəzli mbəɓa. Sa favə mbəzli va na, dza ghəshi gwanashi ka ngumə lala zlaŋ zlaŋ, ka wahə. 5 Geʼi ghalaɓa vəghu tsa va ki na, ava Sawul mbə səəkə kwamti mbə ndəghu slay ci. Sa favə na gaka va na, dza na ka ɗuw: «A shiy mənishi wahə mbəzli tsətsaa?» kə. Dzəghwa mbaʼ məndi gəzanakə kuma gəzəkə mbəzli ghunikə məndi va mbə məlmə ka Yavesh. 6 War sa favə Sawul kuma va tsəgha na, mbaʼ safə tsa Hiyala səəkiy dzəkən. Mbaʼ nəfə tsa ci satiy tərəŋu. 7 Dzəghwa na mbaʼ kəəsəvə slay bakə, mbaʼ slaslavərishi, dza na mbaʼ ghunashi mbəzli lə sliw tsa va dzar tə hiɗi ka Izərayel gwanashi. Ma kə ghəshi dzaa ni kaa mbəzli na: «Ya wa ntsaa dzaa nuw ma kar Sawul lə Saməyel ta dza ta mbəziy, war tsətsə dza məndiy mənti lə slay ci» kə ghəshi dzaa ni. Dza Kwa sləkəpə mbaʼ fambə hazləni mbə nefer ka Izərayel sa favə ghəshi kuma va, mbaʼ ghəshi kafəshi ta mbəzə nja ndə kutiŋ.
8 Dzəghwa Sawul mbaʼ mbərati ka Izərayel tə pi tsa har məndi vaa Bezekə. Mbəzli bələku bələku mahəkanə bələku mahəkanə niy nza ka Izərayel gwanashi ni, takə tsa Zhuwda na, mbəzli bələku bələku mahəkanə bələku. 9 Ma kə ghəshi kaa mbəzli ghunikə ka Yavesh va na: «Ma pə ghuy kaa mbəzli mbə məlmə Yavesh tə hiɗi Galadiy: “Həzlimə vici kwa ghəniy, ta mbəlantəŋuy dza məndi,” kə məndi, pə ghuy kaa ngəshi» kə ghəshi kaa mbəzli va. Dza mbəzli va mbaʼ ghəshi dzaa gəzanshi kuma va tsəgha kaa ka Yavesh. Sa favə ghəshi tsəgha na, mbaʼ ghəshi vəshishi. 10 Ma kə ghəshi kaa ka Amun na: «Həzlimiy ta səvəri dza ghiy ta dza va ghuy nza ghuy məni shi dza ghuy ɗi lə ghiy» kə ghəshi.
11 Ma tə həzlimə ki na, dza Sawul mbaʼ təhəvəri mbəzli ci mahəkanə mbə. Dza ghəshi piy maɗi ta kəɗi, pizl ghəshi pəslambə mbə ka Amun, ka bekushi, paʼa havəghu vici kwa ghən. Ma niy tərəmbə mbəzli mbə shi na, mbaʼ ghəshi ndanishi. Mbəzli tiɓa niy tərə bakə tə pi kutiw. 12 Ma sa kiriy mbəzə ki, ma kə ka Izərayel kaa Saməyel na: «kuma na mbəzliy niy ni va: Ka mənivə mazə Sawul dzəkən ghumuw, kə ghəshia? Citəŋəyshim a ghiy bakwantishi» kə ghəshi. 13 Ma kə Sawul na: «Ndə tiɓa məndi dzaa pəəsli fəca gəla vici nja sa ndatsə naw. Sa nzanay, ndatsə mbəlanti Kwa ka Izərayel,» kə. 14 Ma kə Saməyel kaa mbəzli na: «Dzammə dzəmbə məlmə Gilgal, a ghummə dzaa kəslati slən tə pəərə mazə tsa Sawul,» kə. 15 Dzəghwa mbəzli gwanashi ki, mbaʼ ghəshi dzashiy dzəmbə məlmə Gilgal. Dza ghəshi məɓa mbaʼ ghəshi pəərəti Sawul ka mazə kwa kuma Kwa sləkəpə. Mbaʼ məndi sləsliy shiy ta zərkə kaa Kwa sləkəpə. Liy hum ki na, dza kar Sawul lə ka Izərayel gwanashi ka məni makwaghwa tərəŋu.