Saməyel gəzə kwa kərni kuma ci kaa ka Izərayel
12
Liy hum ki, ma kə Saməyel kaa ka Izərayel gwanashi na: «A ghuy nay, ee məntəŋuy kuma ɗuwti ghuy vəya gwanata, mbaʼee pərətəŋuy mazə. 2 Nana kiy, ghəci dza na ta ʼwaŋuy kwal. Yən na neyiy, ee halantəvara, tezlezli na ghən tsee. Ava ndərazhee mbə ghuy. Yən niy ʼwaŋuy na kwal ghala yən məgəla paʼa tə vici ndatsə. 3 Va tsəgha kiy, Avanara kwa kuma ghuy. Gəzəm kuma ghuy dzəkənee kwa kuma Kwa sləkəpə lə kwa kuma mazə tsa tivə na. A ntsa səəkee ɓəhu ya məcar tsa ci, ya kwantəmca cia? A ntsa səəkee ngəɗəhu shi cia? A ntsa səəkee ʼyapəti mbə məni kumaa? A ntsaa səəkəə ndara shiy ta mananci kumee kala mananati kuma va yaa? Mbaʼ pən ɓəhu shi ndə dza kwa kwal tsa gəmgəm tsay, gəzəkəvərim sənzənva, ee zhanavəŋuyshi,» kə. 4 Ma kə ka Izərayel na: «Səəkə ghaa ngəɗəhu shi ghiyuw, səəkə ghaa ʼyapəhuŋiy mbə kumaw, Səəkə ndəə ndaŋa shiy ta mananci kuma gha kala mananati ghaw,» kə ghəshi. 5 Ma kə kaa ngəshi diɓa na: «Ndatsiy, kar Kwa sləkəpə lə mazə tsa tivə na, na ka ndəgha fəti ta kuma va. kuma tiɓa ghuy kəsata vəya gar ɓəra fəti ghuyuw,» kə. Ma kə ghəshi na: «Yə, tsəgha na,» kə ghəshi.6 Zhini ma kə Saməyel kaa ngəshi diɓa na: «Kwa sləkəpəə təravə kar Muyisə va lə Aruŋ ta ɓəkəvəri jijihimmə mbə hiɗi ka Ezhipətiy, ghənzə na kwa ndəgha fəti. 7 Nana kiy, ɓasəŋuyim tiɓa kwa kuma Kwa sləkəpə. Ta mbəraŋuy gwanata tsa kuma mənti na lə kwal tsa nzə kaa ngəŋuy lə kaa jijihiŋuy dzee. 8 Ghala pi tsaa niy nza Zhakubə lə mbəzli ci tə hiɗi ka Ezhipətiy, a jijihiŋuy niy sa ngəraʼu, dza ghəshi mbaʼ ghəshi harata Kwa sləkəpə ta mbəlishi. Dza Kwa sləkəpə mbaʼ ghunashi kar Muyisə lə Aruŋ ta ɓəkəvərishi mbə Ezhiptə, mbaʼ ghəshi pəməkəshi dzəti hiɗi nza ghummə ni ti shi. 9 Sa dza ghəshiy, mbaʼ ghəshi zanti ghən ta Kwa sləkəpə Hiyala shi. Va tsəgha ki na, mbaʼ zlashi kaa Sezera mazə tsa ka sawji ka Hasəwrə, mbaʼ kaa ka Filisti, mbaʼ kaa mazə ka Muwabə, ta mbəzə li shi ka ushantishi. 10 Dzəghwa ghəshi ka wahə kaa Kwa sləkəpə. Ma kə ghəshi na: “A ghiy mənti kuma jikir na, sa nzanay, a ghiy zhəghavəŋa hum gha Kwa sləkəpə, mbaʼ ghiy dzaŋiy ta tsəfəku kwa kuma hiyalahi har məndiy Baaləhi lə Astartehi. Nanay, mbəlantəŋiy mbə dəvə ka mbəzə ghiy, nza ghiy tsəfəku kwa kuma gha,” kə ghəshi. 11 Sa dza Kwa sləkəpə ki na, mbaʼ ghunay Zhedeyəwŋª, mbaʼ zhiniy ghunay Bedanə, mbaʼ ghunay Zhefəte, mbaʼ ghunara yən Saməyel ta mbəlantəŋuy mbə dəvə ka mbəzə ghuy niy nza dzar vəgha ghuy, ta mbə ghuy nza lə zərkə tə hiɗi ghuy. 12 Ma sa nay ghuy Nahash mazə ka Amur mbə səəkə ta mbəzə lə ghuy na, “Nanay, mazə ɗi ghiy ta sləkəŋiy,” pə ghuy kaa ngəra. Njasa niy nza na kala mazə tsa ghuy Hiyala Kwa sləkəpə ghuy. 13 Nana kiy, avanay mazə njasa ɗi ghuy va. Ghwiy ɗuw na, dza Kwa sləkəpə mbaʼ pəərətəŋuy. 14 Mbaʼ pə ghuy dzaa hazləni va Kwa sləkəpə, ka mananta kuma ɗi na, ka fa kuma və, kala zhananta ma ghən, ka ghuy dza, ghuy lə mazə tsaa sləkəŋuy, ka nuw Hiyala Kwa sləkəpə ghuyiy, wəzə dza ghuy nza. 15 Ma mbaʼ pə ghuy kala dzaa fama kuma va Kwa sləkəpə, ka zhananta ghən kala məni ma kuma gəzəŋuy nay, ta citəŋuy bərci mbə vəgha nzə dza na njasa niy cintishi na va kaa jijihiŋuy. 16 Sana diɓay, tiɓa pə ghuy a ghuy nashi ma shi maɗaŋa maɗaŋa ni dza Kwa sləkəpə ta məni kwa mətsə ghuy. 17 Kwaghutsay, mbə sla Alkamari nza məndi, kar van nzəmuw. Ta cəʼu Hiyala dzee, sa kee cəʼutiy, ta dərazlikə vanə dza na ka nzəməkə. Ghalaɓay kiy, nza ghuy sənay a ghuy mənti kuma jikir na tərəŋu kaa Kwa sləkəpə tə ɗuw mazə tsa ɗuw ghuy tsa ta sləkəŋuy, pə ghuy,» kə Saməyel.
18 Dzəghwa Saməyel ki, mbaʼ cəʼuti Kwa sləkəpə, dza na vəcavata mbaʼ dərazlikə vanə, mbaʼ vanə nzəmiy. Mbaʼ mbəzli gwanashi hazlənishi tərəŋu va Kwa sləkəpə lə va Saməyel. 19 Ma kə ghəshi gwanashi kaa Saməyel na: «Cəʼwə Kwa sləkəpə Hiyala gha va tə ghiy ghiy ka sləni gha entaa ghiy bəkuŋiy. Sa nzanay, a ghiy zhiniy mətsahata kuma jikir naa zhəkən jikir tsa məni ghiy va gwanay tsa. Sa nə ghiy va pəərətəŋiy mazə, pə ghiy,» kə ghəshi. 20 Ma kə Saməyel kaa ngəshi na: «Ka hazləni ghuy ma. Ta na navay, a ghuy mənti kuma jikir na. Ya tsəgha nzə kiy, ka zhəghə hum ghuy kaa Kwa sləkəpə ma. Ə pə ghuy tsəfəku kwa kuma nzə lə nəfə kutiŋ. 21 Ka zlata ghuy ta dzaŋuy ta nuw shi gəmshi ni ma. Niva shiyiy, shi dza ghuy kumavə tiɓa mbə nuw shiw, ka mbəlantəŋuy ghəshiw. Sa nzanay, shiy gəmshi na ghəshi. 22 Ta na navay, Kwa sləkəpə təravəŋuy na, ta nza ghuy ka mbəzli nzə. Ka dza naa zlashi mbəzli nzə tə mbərkə slən tsa nzə va dikə tsaw. 23 Ta na tsee ghəniy, ka zlay cəʼu Kwa sləkəpee tə ghuyuw. Mbaʼ pən zlay cəʼu nziy, kuma jikir naa məntee kaa ngəta tsəgha. Ya humɓay, ta ciŋuy na wəzə na kuma lə na tiɗiɗə na dzee. 24 Ma na na ghuy kiy, ə pə ghuy hazləni va Kwa sləkəpə, ka mananta kuma ɗi na lə kwal tsa nzə, lə nəfə kutiŋ. Zəzətim dzəkən shi mənəhu na va tərəŋu tərəŋu ni kaa ngəŋuy. 25 Ma mbaʼ pə ghuy dzaa dzaŋuy dzəmbə məni kuma jikir nay, kərəpə dza ghuy bəkuŋuy, ghuy lə mazə tsa ghuy gwaʼa,» kə.