Sawul mbəzə lə ka Filisti, mbaʼ mənti kuma jikir na
13
[ 1 Ghala vəghu tsa pəərə məndi Sawul dzəmbə maziy, piya mahəkanəmətsəkə niy nza sa ci. Piya Faɗəmətsəkə bakətiª niy mənti na mbə məni mazə dzəkən ka Izərayel.] 2 Dza Sawul ki mbaʼ təravə zhər bələku bələku mahəkanəmətsəkə mbə ka Izərayel, ta nza ghəshiy ka sawji ci. Dza na mbaʼ tivə mbəzli mbə shi bələku bələku bakəmətsəkə ta nza ghəshi kwasəbə mbə məlmə Mikəmasə lə dzar mbə məlməhi mbə kəleŋer pi tsa har məndi vaa Betel. Ma nihuti mbəzli bələku bələku məŋ na, mbaʼ ghəshi kwasəbə zəghu ci Zhunataŋ mbə məlmə Giveya tə hiɗi Beŋzhameŋ. Niy tərə mbəzli gwanashi ni ki na, mbaʼ gəzanshi dzashiy jighyi.3 Ma tə nahuti vici ki na, dzəghwa Zhunataŋ mbaʼ bakwamti mbəzliy sləkə ka Filisti tə pi tsaa niy nza ghəshi mbə məlmə Giveya, mbaʼ kuma va tsəhəta kwa sləmə ka Filisti. Dza Sawul mbaʼ ghunashi mbəzli a ghəshi viyata təlimə mbəzə tə hiɗi ka Izərayel gwanashi. Ma kə ghəshi dzaa ni kwasəbə təlimə va na: «Gwanashi kə ka Ebərə favə kuma na, kə mazə,» kə ghəshi dzaa ni. 4 Dzəghwa ki, mbaʼ ka Izərayel gwanashi favə kuma va: «A Sawul bakwanti mbəzliy sləkə ka Filisti, mbaʼ nəfə tsa shi satiy tərəŋu, ka ɗi ghəshiy nata mətsə slən ndə ka Izərayeluw,» kə məndi. Dza ka sawji ka Izərayel gwanashi ki, mbaʼ ghəshi ɓasəshi kwasəbə Sawul tə pi tsa har məndi vaa Gilgal. 5 Dzəghwa ka Filisteŋ kuraku ki, mbaʼ ghəshi ɓasəshi ta mbəzə lə ka Izərayel. Muta gədewesli bələku bələku mahəkanə mətsəkə məŋ, mbaʼ ka zlərə gədewesli bələku bələku kwaŋəmətsəkə, mbaʼ nihuti ka mbəzə ɗaŋ, nja ndarghə kwa həl. Səəkə ɓasə ghəshi ɓasəshi tə pi tsa har məndiy Mikəmasə, njasaa dzəghwa ghumə va məlmə Bet-Awen. 6 Nighə nighə, kə ka Izərayel na, avashi ta nza gwaʼa, sa nzana gwaʼ gwaʼa ka mbəzə shi takayshi ya dza kwa nama bəla. Dza ghəshi mbaʼ ghəshi mbəmbəshi dzar mbə ləguhi, lə dzar kwa keʼwer, lə dzati kwa zlehahi, lə dzar mbə hiɗi, mbaʼ dzar kwa wawurəhi mbasəshi yam kwa shi. 7 Nihuti mbə ka Ebərə va na, mbaʼ ghəshi hushi paʼ ka taŋəti həl Zhurdeŋ dzashiy dzəti hiɗi ka Gad lə Galad.
Ghala vəghu tsa va ki na, war ghulay Sawul mbə məlmə Gilgal, ka sawji ci na; war ka gurəgurə kwasəbə va hazləni. 8 A Saməyel niy gəzanci kaa Sawul: «Nza gha ndəghəra mbə vici mbərfəŋ,» kə niy ni. Ma sa mənti na vici mbərfəŋ na va mbə ndəghə ci na, kala səkiy ma ghəciy dzəmbə Gilgal. Dzəghwa mbəzli mbaʼ ghəshi ʼwati ndaniva vəgha Sawul. 9 Ma kə Sawul ki na: «Kəəsəkəram dəmbeker dza məndi va ta ndanta kaa Kwa sləkəpə lə ni dza məndi va ta slanta ta zərkə,» kə. Dza məndi mbaʼ məndi kasanakəshi, mbaʼ ndantishi. 10 War sa kəranti na ndi shi va na, ndəsə Saməyel səəkiy. Dza Sawul mbaʼ kafiy ta dza ta səku. 11 Ma kə Saməyel ngəci na: «A shi mənti gha niaa?» kə. Ma kə Sawul na: «Waa ə nashee mbəzliy ndaniva vəghee, kala səəkəŋa ma gha geʼi lə vəghu tsaa niy slavəra gha. Zhini mbaʼ ka Filisti ɓasəshi kwa Mikəmasə. 12 Va tsəgha ki, ma pən niy ni mbə zəzə kumee na: Ava ka Filisti dzaa səəkəə pəslakən kənee tikə mbə Gilgal kala cəʼuti kəətee va Kwa sləkəpə, pən. Va tsəgha kafəree dəʼu ghən tsee ta ndanta shiy kaa Kwa sləkəpə,» kə. 13 Ma kə Saməyel ngəci na: «A gha mənti kuma nja ntsa kama məhərli mbə ghən ci. Garəŋa gha tə kuma pəhətəŋa Hiyala Kwa sləkəpə gha ta məni ghaw. Mbaʼ pə gha niy garəŋa ti nzay, ta ɓanavə bərci niy dza na kaa mazə tsa ghaa dzəkən ka Izərayel, ka sləkəshi jijihiŋa ta kwa ndimndim nza. 14 Ma nana, njana nzana kala garəŋa gha tə kuma gəzəkəŋa Kwa sləkəpə məni nziy, ka dza ghaa hiŋa mbə mazə ghulaw. A Kwa sləkəpə pəlavə ntsaa dzaa məni kuma njasa ɗi nəfə tsa nzə, ta nza ghəci ka mazə tsa mbəzli nzə,» kə.
15 Liy hum ki na, dza Saməyel mbaʼ kafiy mbə məlmə Gilgal, ka dzay dzəmbə məlmə Giveya tə hiɗi ka Beŋzhameŋ. Dzəghwa Sawul mbaʼ mbərati mbəzli ci, zhər gar bələku bələku kwaŋ. 16 Kar Sawul lə zəghu ci Zhunataŋ mbaʼ mbəzliy nza kwasəbə shiy, tə pi tsa har məndi vaa Geva tə hiɗi ka Beŋzhaməŋ niy ɓasəshi ghəshi. Ma ka Filisti na, mbaʼ ghəshi ɓasəshi tə pi tsa har məndi vaa Mikəmasə. 17 Ma tə nahuti vici ki na: «Mbaʼ ka Filisti ghunashi mbəzli ɗaŋ mbə shi ta dza ghəshi ta yiyiɗi ya nima shiy. Mbaʼ ghəshi təhəvərivashi kwa zəərə mahəkanə. Kwa taŋa zəəriy, mbaʼ nuwvə kwal tsaa dzəmbə ʼWəfəra tə hiɗi ka Shəwal. 18 Ma kwa baka na, kwal tsaa dzəmbə Bet-Huruŋ. Kwa mahəkana na, kwa kwal tsaa dzar kwa ghala dzati kwa teʼu pi tsa har məndi vaa Tsebuyim njasaa dzəmbə gamba.
19 Ghala vəghu tsa vay, niy nza ka pəsli shiy tə hiɗi ka Izərayeluw. Sa nzanay, niy ɗi ka Filisti mbəzli ka Ebərə pəsli shiy nja kar gwapa lə kar kafaʼiw. 20 Ya wa ndə ka Izərayel tsaa ɗi ya zhəghə miy ngur slay tsa ci, ya nderə ngur tsa ci, ya tsəʼi tsa ci, ya gəta la shiy ciy, war va ndə pəsli shiy tsa ka Filisti ka naa dza. 21 Ya nima shiy tsəhiy ndə ta nderə mbə shi va gwanashi, ya ta guma tsahi tə miy gətay, war gəna gar səlay bakə ka naa nza. 22 Va tsəgha niy kama gwepipi lə kafaʼihi va mbəzli kwasəbə kar Sawul lə Zhunataŋ fəca vici mbəzə ki. War kwataka va kar Sawul lə zəghu ci Zhunataŋ niy nza shi mbəzə gwaʼa tsəgha. 23 Dzəghwa ka Filisti mbaʼ ghəshi ghunashi nihuti ka mbəzə shi ta dza ghəshiy nziyshi kwa kwal tsaa dzəmbə Mikəmasə.