Zhunataŋ ushanti ka Filisteŋ
14
Ma tə nahuti vici ki, ma kə Zhunataŋ zəghu Sawul kaa ntsaa ɓə shi mbəzə ci na: «Dzam a ghum dza ta tsəhəm paʼa tə pi tsa ɓasəshi ka Filisti va pəriɓa pəriɓa,» kə. Niy gəzanci kuma va na kaa dəyuw. 2 Ghalaɓay, kwa ghala məlmə Giveya, niy nza Sawul mənziy ta fə har məndi vaa grenadə tə pi tsa har məndi vaa Miguruŋ, ghəshi lə mbəzli gar bələku bələku kwaŋ. 3 Ahiya zəghu Ahitəwba zəmbəghiy Ikabutə zəghu Pinehasə zəghu Eli, niy nza na ndə ta Hiyala Kwa sləkəpə kwa Shilu. Ghəci niy pakən na shiy nza kwa hati ka ta Hiyala ghalaɓa. Ma mbəzli niy nza kwasəbə Sawul na, niy səənay ghəshi a Zhunataŋ dzay kə ghəshuw.4 Kwal tsaa ni ɗi Zhunataŋ va dza kwa ta dza ta pəsli ta ka Filistiy, dzar kwa jipə herezli dikə dikə ni bakə, lə miy ti shi kiɗəku kiɗəku niy nza na. Tsahutiy Busəsə kə məndi slən tsa ci, ma tsahuti na, Sene. 5 Miy tsa tsahuti haku tsa vay, njasaa dzəghwa muw, kwa kuma məlmə Mikəmasə niy nza na. Ma tsahuti na, njasaa dzəghwa həci, kwa kuma məlmə Geba. 6 Ma kə Zhunataŋ kaa ntsaa ɓə shi mbəzə ci va ki na: «Dzam paʼa tə pitsa ɓasəshi ka Filisti ka nuw ma Hiyala ni, nda nza Kwa sləkəpə kəətitəm. Sa nzana, ya ɗaŋ na mbəzli, ya jiwu na ghəshiy, shiy tiɓa gar makəti Kwa sləkəpə va kəətishi ta ʼwəshamti ka mbəzə shiw,» kə. 7 Ma kə ntsa va kaa ngəci na: «Njasa tarəkə gha mbə nəfə tsa ghay, war tsəgha pə ghaa məni, mbadzam, war kwasəbə gha nzee, ya kwamaɓa ɗi gha dza na nee,» kə. 8 Ma kə Zhunataŋ na: «Ghənzə tsəghay, ə pə ghum dza, paʼa tə pi tsa nza mbəzli va va, nza ghum cintishi ghən tsa ghum. 9 Sa ka ghəshi naŋum, mbaʼ kə ghəshi ni: “garəŋuyim tiɓa, a ghiy dzəghwa kəsaŋuy” kə ghəshiy, nza ghum garəm tə pi tsa dza ghum vaa nza ka dza ghum dzəmə shiw. 10 Ma mbaʼ kə ghəshi dzaa ni: “Səəməm,” kə ghəshiy, nza ghum dzəmə. Sa nzana mbaʼ kə ghəshi dzaa gəzəkə tsəghay, ti dza ghum sənay a Kwa sləkəpə fambəshi mbə dəvə ghum, pə ghum,» kə.
11 Dzəghwa ghəshi ki, mbaʼ ghəshi kafəshi, mbaʼ ghəshi dzaa cinti ghən tsa shi kaa ka Filisti. Ma kə ka Filisti, sa nashi ghəshi na: «Ava ghuy nashi ka Ebərə mbə səəmə kwa keʼwer, sa niy mbəmbəshi ghəshi kwaɓa» kə ghəshi. 12 Ma kə ghəshi kaa kar Zhunataŋ lə ntsaa ɓə shi mbəzə ci va na: «Səəməm tikə, a ghiy gəzaŋuy nahuti kuma,» kə ghəshi. Ma kə Zhunataŋ kaa ntsaa ɓə shi mbəzə ci va ki na: «Nura dzam, a Kwa sləkəpə Fambəshi mbə dəvə ka Izərayel,» kə. 13 Dzəghwa Zhunataŋ ka tapəlakəə dzəmə, ka nuw ndə ɓə shi mbəzə ci va. Ma sa tsəhəshi ghəshi məɓa na, dzəghwa Zhunataŋ zanakə nakə nakə diʼwiy ka Filisti, ka kərni bekushi ntsa ci va liy hum ci. 14 Kwa taŋa səvəri tsa Zhunataŋ tsa ghəshi lə ndə ɓə shi mbəzə ci ta mbəzə lə ka Filistiy, mbəzli bakəmətsəkə niy bakwamti ghəshi, tə pi juw tsətsə. 15 Dzəghwa ki, mbaʼ hazləni kəəsəvə mbəzliy niy nza tə pitsaa ɓasəshi ka Filisti va, tsəgha mbəzli mbə məlməhi juw juw ni, tsəgha mbəzli gwanashi. Zhini tsəgha ka ndəghu məlməhi lə ka dza ta yiyiɗi shiy va hazlənishi diɓa. Mbaʼ hiɗi gərəgərəshi. Dza Hiyala mbaʼ dzanti her shi tərəŋu.
16 Dzəghwa mbəzliy niy tiy Sawul ta ndəghu pi mbə Giveya tə hiɗi ka Beŋzhameŋ mbaʼ ghəshi nashi njasa ndaniva ka Filisti lə bali, ka dza kwaɓa, ka dza kwaɓa. 17 Ma kə Sawul kaa ka sawji ci ki na: «Ɓəlatim mbəzli, ta sənay ndaʼa wa ntsaa kama tiɓa mbə ghummə tikə,» kə. Ma sa ɓəla məndi mbəzli ki na, kala nashi kar Zhunataŋ lə ndə ɓə shi mbəzə ci məndi. 18 Ma kə Sawul kaa Ahiya, ndə ta Hiyala ki na: «Kəətikə sərndəkə tsa Kwa va tikə,» kə. Fəcavay, tə pi tsa ɓasəshi ka Izərayel va niy nza sərndəkə tsa va. 19 Ghala pi tsa gəzə Sawul va kuma kaa ndə ta Hiyala ki na, war mbə mətsəhə səva ka Filisti nashi ki. Ma kə Sawul kaa ngəci ki na: «Nziyŋa bay, ka maw ghum ɗuw kuma va Hiyala ma,» kə.
20 Dzəghwa na ɓasə ɓasəti mbəzli ci, ka dzashi ta mbəzə lə ka Filisti. Dza ghəshi na, ka mbəzə shi va mbə mbəzə ka ghən tsa shi, war sə ghəshiy səva tərəŋu. 21 A ka Ebərə niy nza mbə ka Filisti va ghala kwataŋa, mbaʼ ghəshi niy nuwvəshi ta mbəzə, sa nighəti ghəshi tsəgha na, dza ghəshi mbaʼ ghəshi dzashi dza kwa bəla ka Izərayel, lə Sawul mbaʼ Zhunataŋ. 22 Ma sa favə nihuti ka Izərayeləə niy mbəmbəshi dzar mbə kəleŋer tə hiɗi ka Efrayim: «Mbə bali na ka Filisti,» kə məndi na, dza ghəshi kuraku mbaʼ ghəshi səəkəshi ka tihəshi lə mbəzə. 23 Ava tsəgha kəətiti Kwa sləkəpə ka Izərayel fəcava, mbaʼ ghəshi ushanti ka mbəzə shi. Mbə mbəzə tsa vay, a məndi niy tsəhəshi taŋ kaa Bet-Aven.
Ka sawji ka Izərayel yəpəti yəpə ta Zhunataŋ
24 Fəcavay, a Sawul niy gəzanakəshi kaa mbəzli ci, ka zəmanakəshi lə fəlata. Ma kə niy ni kaa ngəshiy: «Ntsaa dzaa zəməhu shiy ndatsə ka tihwer mənivay, ntsa bəzla bəzla tsa na. Sa kee wati shiya tə ka mbəzə yay, ma nza məndi gha zəmə shiy,» kə niy ni. Fəcava kiy, a ka Izərayel niy sahu ngəraʼu va ma. Va tsəgha niy dalishi ghəshi tərəŋu. 25 Dzəghwa ghəshi gwanashi ki, mbaʼ ghəshi tsəhəshi mbə gamba shafa, lə mbəzəku mbə gamba va, ka hu paʼa dziy tə hiɗi. 26 Sa tsəhəshi ghəshi mbə gamba va, mbə nay mbəzəku ghəshi ngar mbə hu dziy tə hiɗi na, ndə tiɓa ya kutiŋ zəmuw. Sa nzanay, mbə hazləni niy nza ghəshi va kuma gəzəkə Sawul va. 27 Zhunataŋ naci kiy, niy favə kumaa niy gəkə diy va naw, dza na yəku yəkuvə mbəzəku tsa va lə gətaa niy nza va ta dəvə ci, dərənə, dərənəmiy, war sa dərənəmiy na na, yar yar yar ghəci favə vəgha ci. 28 Ma kə tsahuti mbə ka sawji kaa ngəci na: «A dəŋa zəməkə fəla: “Ntsaa dzaa zəmə shi zəmə ndatsiy, ntsa bəzla bəzla tsa na,” kə. Va tsəgha dalishi mbəzli gwanashi sana va ma,» kə. 29 Ma kə Zhunataŋ na: «Diriy, kumaa pala naa dzəkən mbəzli mbə hulfə ghummə gwanashi. Nighətim sana, war sa dərənəmiy ya mbəzəku tsa juwiy, mbaʼee kumavə bərci. 30 Mbaʼ kə ka sawji niy zəməhu shi zləghuvə ghəshi ni va ka mbəzə ghummə ni ndatsə nzay, tərəŋuɓa ghalaɓa niy dza ghummə mbashi ka Filisti,» kə.
31 Fəcavay, a ka Izərayel irəti ka Filisti, mbaʼ ghəshi nuwughəshi ʼwava na mbə Mikəmasə, paʼa mbə Ayaluŋ. Kwəpə ghəshi tashi va ma. 32 Dza ghəshi vbəm pəslambə mbə shi ka mbəzə shi va. Ka kəəsə teŋkesli shi, lə slay shi, lə məcerihi shi, mbaʼ ghəshi sləsliyshi dzar tə hiɗi, mbaʼ ghəshi zəməhushi tə pi tsa nza miymiy va va. 33 Mbaʼ məndi dzaa gəzanci kaa Sawul: «Ava ka Izərayel mbə məni kuma jikir na kaa Kwa sləkəpə, aa zəmə ghəshi sliw tə pi tsa nza miymiy,» kə məndi. Ma kə Sawul na: «A ghuy dzəghwaŋuy kən kuma Kwa sləkəpə. Mbalam tsəkukəram haku tsa dikə tsa sana sana,» kə. 34 Ma kə diɓa na: «Mbalam dzar mbə mbəzli a ghuy dzaa gəzanshi, ya wa ndiy, mbaʼ kəsəkəra ya sla ci, ya təmbəkə tsa ci. Tikə dza ghuy slaslashi, nza ghuy zəməshi. Ghalaɓay, ka dza ghuy mənti kuma jikir na kaa Kwa sləkəpə, ka zəmə sliw tə pi tsa nza miymiyuw,» kə. Ya wa ndə ki na, mbaʼ kəsəkə tsa və dəmbəkə tə vərɗi va, mbaʼ məndi slanti tə pi tsa va. 35 Dza Sawul ki, mbaʼ ngati pi tsa dza məndiy slasla shiy ti kaa Kwa sləkəpə. Ghəci na kwa taŋa pi slasla shiy tsa gha naa nga kaa Kwa sləkəpə.
36 Ma kə Sawul diɓa na: «Dzaməm ta nuw ka Filisti həvir na, a ghummə dza ta pa shi shi paʼ tə kəɗi pi. Nəghətaa ghummə zlay ndə tə ghumiy ya kutiŋ mbə shi ma,» kə. Ma kə ka sawji ci kaa ngəci na: «kumaa təɓaŋa pə ghaa məni» kə ghəshi. Ma kə ndə ta Hiyala na: «Pərɓa kuma pə ghummə ɗuwti va Hiyala tikəta,» kə. 37 Dzəghwa Sawul ki, ka ɗuw va Hiyala, ma kə na: «A ghiy dzəghwa ta mbəzə lə ka Filisti na? Ta zlatavəŋiyshi dza ghaa mbə dəvə ghiy na?» kə. Fəca nava viciy, niy zləɓanati kuma Hiyalaw.
38 Dza Sawul ki, daʼ harashi mbəzli dikə dikə ni gwanashi, ma kə kaa ngəshi na: «Pəlam nda wa na kuma jikir naa mənita ndatsə. 39 Ava Kwa sləkəpəə mbəlanti ka Izərayel va tiɓa ka favə, li zəməŋuy ya fəla, ntsaa mənti kuma jikir na vay, pəəsli pəəsli na tsa va ndə. Ya zəghwee Zhunataŋ na,» kə. Sa gəzəkə na tsəghay, Ndə tiɓaa zləɓanakə kuma ya kutiŋ mbə mbəzliy ɓasəshi vaw. 40 Ma kə diɓa kaa ka Izərayel gwanashi ki na: «Ghuyiy, Garəŋuyim tar na ghuy bəla, ma ghiy lə zəghwee Zhunataŋiy, nza ghiy garəŋiy tar na ghiy bəla,» kə. Ma kə mbəzli kaa ngəci na: «Njasa təɓaŋa na pə ghaa məni,» kə ghəshi. 41 Dza na ka cəʼu Kwa sləkəpə, ma kə na: «A Hiyala ka Izərayel, [zləɓanati kuma kaa ndə sləni tsa gha ndatsə. Tə ghiy ghiy lə zəghwee Zhunataŋ kə ndə mənti kuma jikir nay, citəŋiy lə hərezli ʼwərim. Ka sawji ghiy ni kə mənti kuma jikir nay, mbaʼ gha citəŋiy lə hərezli tumimª,» kə.] Dzəghwa Hiyala mbaʼ tivə kar Sawul lə Zhunataŋ, mbaʼ ɓanti mbəzli gwanashi ni mbə kuma. 42 Ma kə diɓa na: «Məntim ta ti ndə kwa jipə ghiy lə zəghwee,» kə. Dzəghwa kuma mbaʼ tərətaa dzəti Zhunataŋ. 43 Ma kə Sawul kaa ngəci na: «Gəzara shi mənti gha,» kə. Ma kə Zhunataŋ na: «A yəkuvee mbəzəku jiwu tə gətaa niy nza ta dəvee, mbaʼee dərənəmiy. Avanara, ee zləɓavə məti,» kə. 44 Ma kə Sawul na: «Ta na navay Zhunataŋiy, ta məti dza gha. Nza Kwa sləkəpə ɓasakənɗa nguvəə gura caslakə na yən kə zlaŋa tə ghuməŋa,» kə. 45 Ma kə ka sawji va kaa ngəci na: «Njaa njaa ka Zhunataŋ mətia? kuma gəm gəm na nava. Əə kama na ghəci saa mənti mbashi ka Izərayel ka mbəzə shi tərəŋu mbə mbəzə tsa na? Ka məti naw. Ava Kwa sləkəpə tiɓa ka favə, ka tərəta na ya səti mbə ghən ciw. Sa nzanay, lə bərci Hiyala ghərati na sləni ndatsə na,» kə ghəshi. Tsəgha mbəlanti ka sawji va Zhunataŋ, kala mətiy ma ghəci. 46 Dzəghwa Sawul ki, mbaʼ zlay nuw ka Filisti, mbaʼ ka Filisteŋ dzashiy dzəti hiɗi shi.
Njasa mbashi Sawul ka mbəzə ci
47 Sa pəərəti məndi Sawul ka mazə tsa ka Izərayeliy, dza na ka pa lə ka jakahi ci dzar vəgha hiɗi ci gwaʼ gwaʼa: Aa niy pahu pa lə ka Muwabə, mbaʼ lə ka Amun, mbaʼ lə ka Edum, mbaʼ lə mezhizhə tə hiɗi Cuva, mbaʼ lə ka Filisti. Ya ghəshi lə ka wa niy pa nay, mbəzli tiɓa niy mbayuw. 48 Dzəghwa na tə nahuti vəciy, mbaʼ citi bərci ci mbə pa lə ka Amalek, mbaʼ mbashi. Tsəgha mbəlanti na ka Izərayel mbə dəvə shi, ghəshi mbəzliy niy papa shiy və shi.
49 A ndərazhiy zhər niy nza va Sawul: Kar Zhunataŋ, lə Yishuwi, mbaʼ Maləki-Shuwa. Mbaʼ ghyehi bakə: Meravə, kə məndi kaa slən tsa na dikə na. Na juw na na, Mikal. 50 Ahinuwam niy nza slən tsa mali ci, zha Ahimash niy nza na. Aviner, zəghu Ner, zəmbəghiy diy Sawul niy nza dikə tsa ka sawji ci. 51 Kar kish, diy Sawul, ghəshi lə Ner diy Avəneriy, ndərazhi Aviyel niy nza ghəshi. 52 Ghyanakə niy nza mbəzə kwa jipə tsa ka Filisti lə ka Izərayel, ghala vəghu tsaa niy nza Sawul mazə. Va tsəgha kiy, war nay ma Sawul ndə kala dza ma her, ya ndə lə bərci viy, war ə niy ɓə na ta nza ghəci ka ndə sawji tsa ci.