Sawul mənti kuma jikir na, mbaʼ kwa sləkəpə ndəghanti
15
Dzəghwa Saməyel tə nahuti vici, mbaʼ dzaa kəsay Sawul, ma kə kaa ngəci na: «Yən ghunay Kwa sləkəpə ta pərəŋa ka mazə tsa mbəzli nzə ka Izərayel. Va tsəgha kiy, fa kuma gəzəkə na. 2 Ma kə Hiyalaa sləkə shiy gwaʼ gwaʼay: “Ee ɗi wati shiy niy mənti ka Amalek va kaa ka Izərayel, saa niy makə ghəshi va kwal və shi, ghala vəghu tsaa niy səvəri ghəshi va mbə Ezhiptə. 3 Nana kiy, mbala ta mbəzə li shi. Kərəpə pə gha dzaa zantishi lə shi shi gwanashi ta fə shəndəkə dzəti Kwa sləkəpə, əntaa gha tərəshi ma. Zhər lə miʼi, gula lə ndərazhi tə ʼwa, slay lə teŋkesli, ngeləwbahi lə kwantəmcahi gwaʼay, cəkeʼ pə gha dzaa bakwamtishi gwanashi,” kə,» kə Saməyel.4 Dza Sawul ki, mbaʼ ɓasəti ka sawji ci tə pi tsa har məndi vaa Telayim, mbaʼ mbəratishi: Ka sawji bələku bələku bakəmətsəkə bələku, niy nza ni gwanashi ni ka Izərayel. Ma ka Zhuwda na, bələku bələku bələku. 5 Dza na mbaʼ tsəhiy li shi vəgha məlmə Amalek, mbaʼ ghəshi mbəmbəshi dziy kwa dzaŋudzalaŋuhi vəgha məlmə va ta pəsli ta mbəzli va. 6 Dzəghwa Sawul mbaʼ vələghə nuwur kaa mbəzli ka Keni, ma kə na: «Ɓarvaŋuyim mbə ka Amalek, mbalam kərakə li shi, nəghətee dzaa məntəŋuy kuma kutiŋ na li shi. A na na ghuyiy, a ghuy niy mananatishi wəzə hur kaa ka Izərayel ghala vəghu tsaa niy səvəri ghəshi va mbə hiɗi ka Ezhiptə,» kə. Dza ka Keni ki, mbaʼ ghəshi ɓarvashi mbə ka Amalek. 7 Dzəghwa Sawul, pizl pəsliy ta ka Amalek, mbaʼ irətishi. Sa gha na mbə məlmə Havila paʼa vəgha Shur, kwa ghumə va ka Ezhiptə. 8 Dza na mbaʼ kəsəhu Agag mazə ka Amalek, mbaʼ bakwanti niy tərə mbəzli gwanashi lə kafaʼi ta fə shəndəkə dzəti Kwa sləkəpə. 9 Ta na kar Agag lə tsaa gura dəmbəkə tsa zləghuvə kar Sawul lə ka sawji ci mbə teŋkesli, lə kwiy, lə slay, lə tsahuti dəmbəkə tsa nza vəgha və mbaʼ ndərazhi teŋkesliy, a ghəshi niy zlashi niva tə ghuməshi kala ndishi ma, ta fə shəndəkə dzəti Kwa sləkəpə. Ma ni gəmgəm ni shiy, lə ni kama vəri ti shi gwanashi na, kərəpə ghəshi bakwanti ni va ta fə shəndəkə dzəti Kwa sləkəpə.
10 Ma kə Kwa sləkəpə kaa Saməyel ki na: 11 «Yən sənay nzay ka pəərə Sawul yaw. Avanay zhəghavəra hum. Mənti kumaa niy gəzanakee naw,» kə. Dza kuma va mbaʼ səəti məhərli Saməyel, hi na mbə wahanta wahə kaa Kwa sləkəpə.
12 Ma pəətə mekəshi ki na, mbaʼ kafiy ta dza ta kəsay Sawul. Ma ghəci mbə kwal na, mbaʼ məndi gəzanci: «A Sawul niy dzay dzəmə məlmə Karmel, mbaʼ iy haku məɓa ta fə shəndəkəə dzəti slən tsa ci. Zhini mbaʼ dzay dzəghwa Gilgal,» kə məndi kaa ngəci. 13 Ma sa tsəhiy Saməyel vəgha ki, ma kə Sawul kaa ngəci na: «Təfətəŋa miy Kwa sləkəpə. Ee mənti shi gəzəkəra na va mənishi,» kə. 14 Dza Saməyel ka ɗuw və: «A shiy gaka nja wahə teŋkesli, lə slayaa?» kə. 15 Ma kə Sawul na: «Niy guranti mbə teŋkesli lə slay zlashi ka sawji tə ghuməshi. Tə hiɗi ka Amalek kakəshi ghəshi ta slaslantashi kaa Kwa sləkəpə Hiyala gha. Niy tərə na, mbaʼ ghiy bakwantishi gwanashi ta fə shəndəkə dzəti Kwa sləkəpə,» kə. 16 Ma kə Saməyel kaa ngəci na: «Makə tsəgha. Ta gəzəŋa kuma gəzəkəra Kwa sləkəpə tə vərɗi na dzee,» kə. «Gəzə,» kə Sawul. 17 Ma kə Saməyel na: «Kwataŋay, ntsa kwa tsa ci kwal tsa niy nay gha ghən tsa gha. Avanay sanay, gha ʼwanshi na kwal kaa takəhi ka Izərayel. Kwa sləkəpə pəərətəŋa na ka mazə tsa ka Izərayel. 18 Dzəghwa na mbaʼ ghunaŋa: “Mbala ta mbəzə lə ka Amalek, ka məni kuma jikir na va, nza gha bakwantishi gwanashi. Kərəp gha zantərashi ta fə shəndəkə dzəti Kwa sləkəpə” kə. 19 Sa wana nuti ma gha kuma gəzəkəŋa naa? Sa wana mənti gha kuma jikir na kwa kuma Kwa sləkəpə, mbaʼ gha dzaŋaa dzəkən ɓasə shi mbəzli vaa?,» kə 20 Ma kə Sawul kaa ngəci na: «Ee mənti kuma gəzəkəra Kwa sləkəpə məni nzə, mbaʼee tsəhəra ta mbəzə lə mbəzli gəzara na va. Dzee mbaʼee bakwanti ka Amalek njasa gəzəkə na va ta fə shəndəkə dzəti Kwa sləkəpə, mbaʼee kəsəkə Agag mazə tsa shi. 21 Ma na niy gura mbə teŋkesli lə slay niy dza məndiy bakwanti mbə mbəziy, mbaʼ ka sawjee kavəshi ta slaslantashi kaa Kwa sləkəpə Hiyala gha mbə məlmə Gilgal,» kə. 22 Ma kə Saməyel ki na: «Əə nza na ɗiɓa ndandanta shiy lə slaslanta shiy Kwa sləkəpə ɗi kən ɗi fəti ta kuma gəzəkə na na? Tiɓaw, ɗi fəti guranti na kən slaslanta shiy. Fə ghən ta kuma nzə gura na kən gəkə teŋkesli. 23 Zhini ghən kaa Hiyalay, jikir tsa kutiŋ tsa na lə nga zləra. Dzəghwa kən kuma gəzəkə na diɓay, jikir tsa kutiŋ tsa na lə ta mbəri. Njana ndəghanti gha kuma Kwa sləkəpiy, a Kwa sləkəpə ndəghantəŋa kuraku. Ka mənivə mazə ghaa dzəkən mbəzli nzə ghulaw,» kə. 24 Ma Kə Sawul na: «Ee mənti kuma jikir na, mbaʼee dzəghwara kən kuma Kwa sləkəpə lə na gəzəkəra gha. Hazləni kəsəvəra na va ka sawjee, mbaʼee mənti na ɗi ghəshi kuma. 25 Sana kiy, əə cəʼuŋee a gha pəlatara kumee jikir na. Zhəghətəvaŋa kwasəbee, ee dza ta tsəfəku kwa kuma Kwa sləkəpə,» kə. 26 Ma kə Saməyel kaa ngəci na: «Awə, ka zhəghəvee kwasəbə ghaw. A gha ndəghanti kuma Kwa sləkəpə, ghənzə kurakwiy, aa ndəghantəŋa, ka nza ghaa mazə tsa ka Izərayel ghulaw» kə.
27 Dzəghwa Saməyel tərəɗə zhəghtəvay ta dzay, sa zhəghətəvay na ta dzay na, mbaʼ Sawul kəəsəti tə kubaŋ tsa ci, ngwee bəla va zləkwanaghəvata. 28 Ma kə Saməyel kaa ngəci na: «War tsəgha zləghwanti Kwa sləkəpə məni mazə dzəkən ka Izərayel va gha ndatsə, mbaʼ ɓanavə kaa tsahuti ntsa wəzəɓa ghəci tsa kaa ngəŋa. 29 Sənay tə gha diɓa, Kwa sləkəpə nza shəndəkə va tə ka Izərayel tə mbərkə ghənziy, ka sla dzərvə naw, ka dzəghwa na kən kuma gəzəkə naw, sa nzanay, ndə ngəri na gar zhiy tə səəbə ta kumaw,» kə. 30 Ma kə Sawul diɓa na: «Ee mənti kuma jikir na. Sənzənvay, titihu aa cəʼuŋee fati shəndəkə dzətee kwa kuma mbəzli dikə dikə ni mbə ka Izərayel, lə kwa kuma ka Izərayel gwanashi ni. Zhəghəva dzam ee dza ta tsəfəku kwa kuma Kwa sləkəpə, Hiyala gha,» kə. 31 Dza Saməyel mbaʼ zhəghətəvay, ka nuw Sawul ki. Dza na mbaʼ tsəfəkwiy kwa kuma Kwa sləkəpə.
32 Liy hum ki, ma kə Saməyel na: «Pəməkəram Agagə mazə ka Amalek,» kə. Dza Agagə mbaʼ səəkiy dzəghwa kuma ci, sayi məhərli ci, kala dza ma her ci. Niy zəzəti nay: «Ee sənay, ka dza məndi pəəslira ghulaw,» niy nə na. 33 Ma kə Saməyel ngəci na: «A gha bakwanti ndərazhi nihuti miʼi lə kafaʼi tsa gha, mbaʼ gha təhəvərishi lə ndərazhi shi. Məŋa kurakwiy, ta təhəvərivata dza na lə zəghu nzə,» kə. Dza na mbaʼ paslanti Agagə kwa kuma Kwa sləkəpə tə pi tsa har məndi vaa Gilgal. 34 Liy hum kuma va ki na, mbaʼ Saməyel dzay dzəmbə məlmə Rama. Ma Sawul na, ka zhay dzakə ghyi tsa ci mbə məlmə Giveya. 35 Fəcava kəray Saməyel kumə ghəshi lə Sawul paʼa fəca məti na. Mbə zhanci niy nza nəfə tsa ci va kuma kən Sawul. Ta na Kwa sləkəpə nanzə kiy, «Njaa mbəlitee pəərəti Sawul ka mazə ka Izərayel tay?» niy nə na.