Hiyala təravə Davitə ta nza ka mazə kwa pi tsa Sawul
16
Ma kə Kwa sləkəpə kaa Saməyel na: «Waa ghulaŋa mbə wahə kuma Sawul na? na neyiy, ee ndəghanti, ka mənivə mazə naa dzəkən ka Izərayel ghulaw. Mbala taghwa in kwa təlimə gha, a gha kafə ta dzaa dzəmbə məlmə Betəlehem, dzakə ghyi tsa Zhese ghuniŋee, sa nzanay, mbə ndərazhi ci nayee mazə tsaa dzava lə ya,» kə. 2 Ma kə Saməyel na: «Njaa dzee dza dza vaa? Mbaʼ kə Sawul faviy, ta paslantəra dza na,» kə. Ma kə Kwa sləkəpə kaa ngəci na: «Ghaa kafiy, kəsəvə tə gha mbəkuli sla, «ta slanta dzee kaa Kwa sləkəpə,» pə gha dzaa ni, 3 ma nza gha haray Zhese ki. Ma sa ka na səəkiyiy, nzee ciŋa kuma dza ghaa məni, ntsa dzee vaa citəŋa kiy, nza gha shəkambə in dzəghwa mbə ghən ci ta nza ghəci ka mazə tsaa dzaa ghəraɗa slənee» kə.4 Dzəghwa Saməyel ki, mbaʼ yivə fəti ta kuma gəzanakə Kwa sləkəpə va, mbaʼ kafiy ka dzay dzəmbə məlmə Betəlehem. Ma sa tsəhiy na, war sa nay mbəzli dikə dikə ni mbə məlmə va na, mbaʼ her shi dzashi, dza ghəshi mbaʼ ghəshi səəkəə kəsay, ma kə ghəshi kaa ngəci na: «Bar tsa wəzə tsa ɓəkəŋa na na?» kə ghəshi kaa ngəci. 5 Ma kə na: «wəzə ɓəkəra na, ta slanta shiy kaa Kwa sləkəpə səəkee, gumantəvaŋuyim ɗewɗew a ghuy nura ta dza ta sla shi va,» kə. Dzəghwa Saməyel mbaʼ gəzanshi kaa kar Zhese lə ndərazhi ci kuraku a ghəshi gumantəvashi ɗewɗew ta sla shiy. 6 Ma sa səəkəshi ghəshi ki na, mbaʼ mətsə Saməyel dzataa dzəti Eliyav zəghu Zhese, ma kə mbə ghən ci na: «Ya njaay, ghəci dza sa tivə Hiyala vaa nza,» kə. 7 Ma kə Kwa sləkəpə kaa Saməyel nanzə ki na: «Ka dzaŋa gha ta nighə təɓə tsa ci lə bitə tsa ci ma, tivə tsava ndə yaw. Na neyiy, ghənghən na nighə pi tsee lə nighə pi tsa ndə ngəri. A na ndə ngəriy, shiy pəzli pərikə pərikə tə ngula ka naa nighə, na nee nee kiy, shi mbə nəfə ndə ngəri kee nighə,» kə.
8 Dzəghwa Zhese mbaʼ haray Avinadavə dzəghwa kuma Saməyel, ma kə Saməyel na: «Tivə tsatsa Kwa sləkəpə diɓaw,» kə. 9 Zhəghwa zhese mbaʼ pəməkə Shama, ma kə Saməyel diɓa na: «Ya sasay tivə Kwa sləkəpə diɓaw,» kə. 10 War tsəgha, war tsəgha Zhese pəməkə ndərazhi mbərəfəŋ mbə ndərazhi ci dzəghwa kuma Saməyel, ya tsəgha nzə ki, ma kə Saməyel kaa ngəci na: «Ndə mbə shi mbaʼ Kwa sləkəpə tivuw,» kə. 11 Ma kə diɓa na: «Gwanashi na ndərazhi gha tikə na?» kə. Ma kə Zhese na: «Gwanashi na ghəshiw, səəkiy tsa juw tsaw, mbə makə teŋkesli na,» kə. Ma kə Saməyel na: «Ghunay ndə ghəci pəməkə, sa nzanay, ka gha zəmə shi sliy məndi ghummə kala səəkiy ghəciw,» kə.
12 Dzəghwa Zhese mbaʼ ghunay ndə mbaʼ məndi dzaa pəməkə Davitə ki. Zəghu ghəmiy niy nzana, kiyasə mbə kuma ci, ka təɓə ghəci gwanay tsa ci. Ma kə Kwa sləkəpə kaa Saməyel ki na: «Ghəci na, sati a gha shəkə in dzəghwa mbə ghən ci ta pəərə ka mazə,» kə. 13 Dzəghwa Saməyel ki, mbaʼ ɓəvə in tsa kwa təlimə va, mbaʼ shəkambə dzəghwa mbə ghən Davitə ta pəərə ka mazə tiɓa kwa kuma ndərazhi diy. Ghala fəcava ki na, mbaʼ safə tsa Kwa sləkəpə səəkəə nziyiy kən Davitə. Dza Saməyel na ci ki, kafə kafiy, ka zhay zhimbə məlmə Rama.
Davitə ghəranci sləni kaa Sawul
14 Ma Sawul na ci kiy, a safə tsa Kwa sləkəpə niy ɓarəvay kən, mbaʼ Kwa sləkəpə ghunay safə tsa gəmgəm tsa ta gagay. 15 Ma kə ka ghəranci sləni kaa Sawul na: «Ava safə tsa gəm gəm tsa səəkə va Hiyala mbə səəŋa məhərli gha, mazə. 16 Mbaʼ pə gha gar zləɓatiy maziy, gəzaŋiy, ta ɗitəŋa fəti dza ghiy, ghiy ka sləni gha, a ghiy dza ta pəla ntsaa mbay tsa gəzəpəli. Ghala vəghu tsa dza safə tsa gəm gəm tsa va səəkə va Hiyalaa səəkiy dzəkən ghay, nza ghəci tsaŋa gəzəpəli ta mbəə məniŋa ganaʼa,» kə ghəshi. 17 Ma kə Sawul kaa ngəshi na: «Pəlavəram ntsaa mbay tsa gəzəpəli wəzə mbaʼ ghuy pəməkəra,» kə. 18 Ma kə tsahuti kutiŋ mbə ka ghəranci sləni na: «Ee sənay tsahuti ndə, zəghu Zhese ndə ka Betəlehem, tərəŋu mbay na tsa gəzəpəli. Ndə ka dza her ci naw, ndə ka mbay mbəzə na, aa mbata gəzə kuma, ndə ka təɓə na, zhini, kwasəbə Kwa sləkəpə,» kə. 19 Dzəghwa Sawul mbaʼ ghunashi mbəzli va Zhese, ma kə na: «Ghunayra Davitə zəghu gha va ndəghu teŋkesli,» kə. 20 Dza Zhese mbaʼ kəsəvə kwantəmca, dzəghwa na bəm fanati peŋ, mbaʼ tay kwa hupər, mbaʼ ugə. Dzəghwa na mbaʼ ɓanavəshi kaa Davitə nza ghəci dzaa ɓanavəshi kaa Sawul. 21 Dzəghwa Davitə ki mbaʼ tsəhiy va Sawul ka ghəranci sləni. Dza na tərəŋu ɗiti kuma ci, mbaʼ ɓəvə ka ndə kəsə shi mbəzə ci. 22 Dza Sawul mbaʼ ghunay ndə va Zhese, a kə na: «Zlay Davitə ghəci ghəraɗa sləni, a kuma ci təɓətəra,» kə. 23 Ya humɓa səəkiy safə tsaa səəkə va va Hiyalaa dzəkən Sawuliy, laŋ ka Davitə ɓəvə gəzəpəli ci ka tsa. Ka Sawul dza ki na, mbaʼ dəkiy, mbaʼ kumavə ganaʼa, ka safə tsa vaa dza na, mbaʼ zlay.