Səvəri 40

Njasa dza məndiy la pi tsa dza Kwa sləkəpə nza ti

Ma kə Kwa sləkəpə Kaa Muyisə diɓa na: 2 «Kwa taŋa vici, tə kwa taŋa tirəy, nza gha liy pi tsa dzee nziy ti yən Kwa sləkəpə, gaska gamtaʼwaləə kumə lə ya. 3 Nza gha fiy sərndəkə tsa nza hərezli sla kiri va kwa mbəɓa, mbaʼ gha kəlati lə gwadə. 4 Ka gha dzay, mbaʼ gha ɓəkə tabəl fiy tə pi tsa dza naa nza, nza gha sləkati peŋ tsa vəlira məndi ti, mbaʼ gha ɓəkə shiy fə gərkuwahi, nza gha tsəʼwati ghu tə gərkuwahi ti va. 5 Ka gha dza diɓay, mbaʼ gha fiy pi tsa mənti məndi va tə mbəzə kwa shamshama, ta ndi shiy zən nja urdi ti kwa kuma sərndəkə tsa nza hərezli sla kiri va kwa. Nza gha sərəy gwadə tsaa kəla pi kwa miy pi tsaa dzəmbə pi nziy tsee va. 6 Ka gha dza diɓay, mbaʼ gha fiy pi tsa dza məndiy ndi shiy ti kwa kuma miy pi tsaa dzəmbə pi tsa dzee nziy ti yən Kwa sləkəpə, gaska gamtaʼwaləə kumə lə ya. 7 Ka gha dza diɓay, mbaʼ gha fiy tsaghwa kwa jipə kar gaskaa kumə lə ya lə pi tsaa ta Hiyala, nza gha gaghwa yam kwa tsaghwa va. 8 Ka gha dza diɓay, mbaʼ gha liy shiy ha ngula dzar vəgha pi tsa va, nza gha sərəy gwadə tsaa kəla pi tsaa dzəghwa ngula va.

9 Ka gha dza diɓay, mbaʼ gha ɓəvə in tsa ka məndiy shəkəə dzəkən ndə ta fəə dzəmbə sləni Hiyala nza gha hway pi tsa nziyee va ti lə shi mbəɓa gwanashi li. Nza gha fiy ka see, lə shi ghəra məndi sləni li shi mbəɓa gwanashi, nza ghəci nza ka shiya. 10 Ka gha dza diɓay, mbaʼ gha varay pi tsa dza məndi vaa ndi shiy ti lə shi ti gwanashi, nza gha fiy ka see, nza ghəci nza ka see kutira gwaʼa tsəgha. 11 Ka gha dza diɓay, mbaʼ gha varay tsaghwa yam va lə shi fiy məndi va ti, nza ghənzə nza ka see.

Njasa fə məndi kar Aruŋ lə ndərazhi ciy dzəmbə sləni ka ta Hiyala

12 Ka gha dza diɓay, mbaʼ gha pəməghə kar Aruŋ lə ndərazhi ciy dzəməy gaska gamtaʼwaləə kumə lə ya, nza gha pishishi lə yam. 13 Sa ka gha dza na, mbaʼ gha panakən kubeŋer ndə ta Hiyala, nza gha shəkanakən in ta fəə dzəmbə slənee, nza ghəci nza ka ndə ta Hiyala tsee. 14 Sa ka gha pəməkə ndərazhi ci va diɓa na, nza gha panakənshi kubeŋer dikə dikə ni. 15 Nza gha shəkanakənshi in ta fəshiy dzəmbə slənee njasa shəkanakən gha va kaa dəshi, nza ghəshi nza ka ka ta Hyalee. Ghala pi tsa dza gha vaa shəkanakənshi in ta fəshiy dzəmbə sləni yay, ka ta Hiyala dza ghəshi zhəghəshi ka dzar paʼa tar jijihishi ta paʼa kwa ndimndim,» kə Kwa sləkəpə.

Muyisə liy pi tsa dza Kwa sləkəpə ta nziy ti

16 Dza Muyisə ki, mbaʼ mənti war njasa niy gəzanakə Kwa sləkəpə va. 17 Tə kwa taŋa vici, kwa taŋa tir, mbə kwa baka piya ghala səvərishi ghəshi mbə hiɗi ka Ezhiptə na, gəraŋ məndi garakati pi tsa dza Hyalaa nziy ti ki. 18 Laʼ Muyisə liy pi nziy tsa Kwa sləkəpə ki, mbaʼ liy shiy fə shiɗəshidə shighu dzati shi, mbaʼ gariy shighu jakə jakə ni, lə shiy jakəshi, mbaʼ shəlhi. 19 Dza na mbaʼ pəlakən gamtaʼwal tsa kən pi tsa dza Kwa sləkəpə vaa nza mbə, mbaʼ zhiniy pəlakən shiy kən gamtaʼwal tsa va njasa niy gəzanakə Kwa sləkəpə va.

20 Dza na laŋ ɓəvə hərezliy ndəgha fəti va ta sla kiri, mbaʼ faghwashi kwa sərndəkə, mbaʼ ighə getesli dzati mbə jaʼwahi ci. Dza na mbaʼ kalay sərndəkə tsa va lə gal. 21 Dza na mbaʼ ɓəkə sərndəkə tsa vaa dzəmbə pi tsa nza Kwa sləkəpə va, mbaʼ pəhəy gwadə tsaa kəlati sərndəkə tsa nza hərezliy sla kiri va kwa njasaa niy gəzanakə Kwa sləkəpə va.

22 Dza na mbaʼ fiy tabəl mbə gaskaa kumə lə Kwa sləkəpə, dza kwa bəlaa dzati muw va pi tsa nza Kwa sləkəpə va ti, pərikə kwa kuma gwadə tsaa kəlati pi va. 23 Dzəghwa na, mbaʼ sləkati peŋ ti kwa kuma Kwa sləkəpə, njasaa niy gəzanakə Kwa sləkəpə va.

24 Dza na bəm fiy shiy fə gərkuwahi mbə gaskaa kumə va lə Kwa sləkəpə, kwa kuma tabəl tsa va, dza kwa bəlaa dzəghwa həci va pi tsa nza Kwa sləkəpə va mbə. 25 Dza na mbaʼ tsəʼwati ghu tə gərkuwahi kwa kuma Kwa sləkəpə njasa niy gəzanakə Kwa sləkəpə va. 26 Dzəghwa na mbaʼ fiy pi ta Hiyala tsa məntim va tə mbəzə kwa shamshama mbə gaskaa kumə lə Kwa sləkəpə, pərikə kwa kuma gwadə tsaa kəla pi va. 27 Dza na, mbaʼ ndiy shiy zən nja urdi tə pi tsa va, njasa niy gəzanakə Kwa sləkəpə va.

28 Dza na mbaʼ famiy gwadə tsaa kəla pi miy pi tsa nza Kwa sləkəpə va mbə. 29 Sa fiy na pi tsaa ndi shiy ti kaa Kwa sləkəpə kwa miy pi tsa nza Kwa sləkəpə ti mbə gaskaa kumə lə Kwa sləkəpə na, dza na ndi ndanati shiy ti, zhini vəli vəlanati vəli ti njasa niy gəzanakə Kwa sləkəpə va. 30 Dza na bəm fiy tsaghwa yam kwa jipə kar gaskaa kumə lə Kwa sləkəpə lə pi ta Hiyala tsa va, gaʼ gaghwa yam kwa tsaghwa va, ta yaɓəva, ta nza ɗewɗew kwa kuma Kwa sləkəpə. 31 Li shi niy pi kar Muyisə lə Aruŋ, mbaʼ ndərazhi Aruŋ divədivi shi lə shiɗəshiɗə shi. 32 Ghala pi tsa ka ghəshiy dzəmbə pi tsaa kumə lə Kwa sləkəpə lə ghəshiy dzəti pi tsaa ta Hyalay, mbaʼ ghəshi yaɓantəvashi njasa niy gəzanakə Kwa sləkəpə va kaa Muyisə. 33 Dzəghwa na mbaʼ sliy ngula, mbaʼ hati dzar vəgha pi tsa nza Kwa sləkəpə va ti lə dzar vəgha pi tsaa ta Hiyala va. Dza na, kəla kəlati pi tsaa dzəghwa ngula va lə gwadə. Ava tsəgha kəranti Muyisə sləni va gwanata.

Kwa sləkəpə canatishi shəndəkə tsa nzə kaa ka Izərayel mbə gaska lanati ghəshi

34 Liy hum ki na, dzəghwa timbətimbə təpətəpə səkwataa dzəkən gaska gamtaʼwaləə kumə lə Kwa sləkəpə. Dza Kwa sləkəpə mbaʼ səkwata lə shəndəkə tsa nzəə dzəmbə pi tsa nza na va gwanay. 35 Niy mbay Muyisə dzəmbə gaskaa kumə va lə Kwa sləkəpuw, sa nzanay, a timbətimbə niy nza mbəɓa, zhini mbaʼ Kwa sləkəpə niy nza mbə pi tsa nza na va gwanay lə shəndəkə tsa nzə. 36 Ghala vəghu tsa ka timbətimbə vaa dzəmətaa dzəta ghumə kən pi tsa nza Kwa sləkəpə va tiy, ghalaɓa ka ka Izərayel maɗi tə tsava pi ta dzəti tsahuti pi mbə dzashi va. 37 Kala kafə kə timbətimbə vay, ka maɗi ghəshiw. War fəca dza naa zhiniy kafəta ka ghəshiy maɗi. 38 havəghuy, kən pi tsa nza Kwa sləkəpə va ti niy nza timbətimbə Kwa sləkəpə. Ma həvir na, mbə mbərə ghu mbə timbətimbə va kwa kuma ka Izərayel gwanashi mbə dzashi va niy dza ghəshi.