Səvəri 39

Njasa tsati məndiy kubeŋer ka ta Hiyala

Dzəghwa ka tsa shiy mbaʼ ghəshi tsati kubeŋer kaa ka ta Hiyala ta ghəra sləni mbə gaska Kwa sləkəpə. Tə ghur məgapa ghəwə ni, mbaʼ ni ghəm ni, mbaʼ ni ngezhezhi ni niy tsatishi ghəshi. Mbaʼ ghəshi tsati kubeŋer ka ghəra sləni Hiyala kaa Aruŋ, njasa niy gəzanci Kwa sləkəpə va kaa Muyisə. 2 Dzəghwa ghəshi mbaʼ ghəshi tsati shi dza məndiy sərəə dzəghwa hati ndə ta Hiyala tə ghur leŋ ka bərci mbaʼ ghur məgapa ghəwə ni, mbaʼ ni ghəm ni lə ni ngezhezhi ni, mbaʼ ghəshi ghaslətishi lə mbəzə kwa shamshamai. 3 Dzəghwa ghəshi mbaʼ ghəshi pəsliti mbəzə kwa shamshama ɓəleʼi, ɓəleʼi, mbaʼ ghəshi slaslavərishi nja ghur, mbaʼ ghəshi mbərambəshi mbə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ. Mbəzli nza məcaŋa vəshi niy tsati na shi va. 4 Dza ghəshi cisl ghəshi caslati ghur bakə tə miy shi va, ta pəhəshi li shi. 5 Ghur tə shi kwa hati vay, jakə ka shiy kutiŋ niy nza ghəshi li shi. Lə mbəzə shamshama na, mbaʼ ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci niy tsatishi məndi, njasa niy gəzanci Kwa sləkəpə va kaa Muyisə. 6 Dza ghəshi mbaʼ ghəshi gumavə hərezli unikəsə bakə, mbaʼ ghəshi fafaghwashi kwa mbəzə kwa shamshama, mbaʼ ghəshi tsatsaslati sləneɗemer ndərazhi Izərayel va ti shi njasa ka məndiy vaa tsasli shiy dzəti jaʼwa. 7 Dza ghəshi, mbaʼ ghəshi caslatishi tə ghur tə shi ka məndi vaa pəhəə dzəghwa hati. Tə hərezli va dza məndiy zəzəə dzəkən takəhi ka Izərayel va məŋ lə bakə ni, njasa niy gəzanci Kwa sləkəpə va kaa Muyisə.

Zlipa kwa hati ndə ta Hiyala tsa dikə tsa

8 Dza ka tsa shiy, mbaʼ ghəshi tsati zlipa kwa hati ndə ta Hiyala, njasa tsati ghəshi va shi kwa hati, tə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci. Mbaʼ ghəshi ghasləti lə ghur tə mbəzə shamshama na. 9 zlipa vay, yimyim niy nza bəlahi nzə faɗanashi. Ghənzə kə zlaɓə zlaɓəy, bəlakə dəvə kutiŋ niy nza bitə tsa nzə, tsəgha bəŋw tsa nzə . 10 Mbaʼ ghəshi ghasləti lə hərezli ka dimə zərə faɗə. Tə kwa taŋa zərə na, mbaʼ ghəshi fati haku sardəwanə, mbaʼ haku twəpazə, mbaʼ haku emerudə. 11 Tə kwa baka zərə na, mbaʼ ghəshi fati haku eskarbukəl, mbaʼ haku lazulitə, mbaʼ haku zhasəpə. 12 Tə kwa mahəkana zərə na, mbaʼ ghəshi fati haku agatə, mbaʼ haku kurnalinə, mbaʼ haku ametistə. 13 Tə kwa faɗa zərə na, mbaʼ ghəshi fati haku kirizulitə, mbaʼ haku berilə, mbaʼ haku unikəsə. Dza ghəshi mbaʼ ghəshi fafaghwa hərezli va dzar kwa mbəzə kwa shamshama. 14 Ya tə tsama hakwiy, mbaʼ ghəshi tsaslati slən tsa ndə kutiŋ mbə ndərazhi Izərayel va məŋ lə bakə ni, njasa ka məndi vaa tsasli shiy dzəti jaʼwa. Hərezli məŋ lə bakə ni vay, ka məjəʼa takəhi ka Izərayel va məŋ lə bakə ni niy nza ghəshi. 15 Dzəghwa ghəshi, mbaʼ ghəshi tsati mekərshi bakə tə mbəzə kwa shamshama kama kaɓə mbə shi dzar tə zlipa kwa hati va. 16 Dzəghwa ghəshi mbaʼ ghəshi mənti shiy hasli shiy bakə tə mbəzə kwa shamshama, mbaʼ jaʼwahi bakə tə mbəzə kwa shamshama, cisl ghəshi caslatishi dzar tə miy zlipa kwa hati va, kutiŋ tarkə , kutiŋ tarkə. 17 Dza ghəshi mbaʼ ghəshi fambə mekərshihi mbəzə kwa shamshama va bakə ni dzar mbə jaʼwahi bakə ni va dzar tə miy zlipa kwa hati va. 18 Dza ghəshi kaa nihuti miyhi nihuti mekərshihi bakə ni va, mbaʼ ghəshi fatishi dzəti shiy hasli shiy bakə ni va tə ghur shi kwa hati va dza kwa kuma. 19 Dza ghəshi diɓa, mbaʼ ghəshi vasəvə jaʼwahi bakə tə mbəzə kwa shamshama, mbaʼ ghəshi fatishi tə miy zlipa kwa hati takə takə, mbəɓa mbəɓa dza kwa naa dapə shi kwa hati va bəla. 20 Dza ghəshi mbaʼ ghəshi vasəvə jaʼwahi bakə tə mbəzə kwa shamshama, mbaʼ ghəshi fatishiy dzəti miy ghur bakə ni va tə shi kwa hati va takə takə, kwa kuma, ndəku vəgha pi tsa cislishi məndi va, məkə tə ghən məgapaa pəhə shi kwa hati va. 21 Dza ghəshi mbaʼ ghəshi jakay jaʼwahi tə zlipa kwa hati lə ni tə shi kwa hati va lə ghur ghəwə ni, ta mbə zlipa kwa hati vaa nza tə ghur shi kwa hati va. Ghalaɓa kiy, ka dza naa təhəva lə shi kwa hati va njasaa niy gəzanakə Kwa sləkəpə va kaa Muyisəw.

Nihuti kubeŋer ka ta Hiyala

22 Dza ka tsa shiy va mbaʼ ghəshi tsati kubaŋ tsa dikə tsa, ta pa shi kwa hati vaa dzəkən tə ghur ghəwə ni gwanay. 23 Wəri tsa kubaŋ tsa vay, tə jipə niy slati ghəshi, njasa tsati məndi tə hutəɓə niy nza na. Dəzlətsəɓə ghəshi tsanti dzar tə miy ci nza bərci mbəə nza və, nəghətaa ghəci sləkwə. 24 Dza ghəshi dzar ta mətsəni ci dəzlətsəɓə ghəshi ghasləti lə shiy nja ya fə grənadə. Lə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur leŋ ka bərci niy tsati ghəshi shi va. 25 Dza ghəshi mbaʼ ghəshi vasəvə kureŋahi tə tsahi mbəzə shamshama kama kaɓə mbə shi, mbaʼ ghəshi cacaslaghwashi dzar kwa jipə shi nja ya fə grənadə ni va dzar ta mətsəni kubaŋ tsa va. 26 Kutiŋ shi nja ya grənadə ni va, kutiŋ kureŋa, kutiŋ shi nja ya grənadə ni va, kutiŋ kureŋa niy cicislitishi ghəshi dzar ta mətsəni kubaŋ sləni tsa va, njasa niy gəzanci Kwa sləkəpə va kaa Muyisə.

27 Dzəghwa ka tsa shiy mbaʼ ghəshi zhiniy tsati nihuti kubeŋer dikə dikə ni tə leŋ kaa kar Aruŋ lə ndərazhi ci. 28 Zhini mbaʼ ghəshi tsati məgapaa pəərə ghən tə ghur leŋ, mbaʼ daghubahi tə ghur leŋ, mbaʼ kempi tə ghur leŋ ka bərci, 29 mbaʼ məgapa ta pəhə dzəvəri mbə hur, ghaslə ghaslə lə ghur leŋ ka bərci, mbaʼ ni ghəwə ni, mbaʼ ni ghəm ni, mbaʼ ni ngezhezhi ni, njasa niy gəzanci Kwa sləkəpə va kaa Muyisə. 30 Zhini mbaʼ ghəshi mənti shiy ghaslə nja mbərə ghu fə tə tsahi mbəzə shamshama kama kaɓə mbə shi, shiy ci fə tsa fambə məndi ndə dzəmbə sləni. Dza ghəshi mbaʼ ghəshi tsaslati kuma ti shi njasa ka məndi vaa tsaslati shiy dzəti djaʼwa: «Ntsa fiy məndi vəgha bəla kaa Kwa sləkəpə,» kə ghəshi ti shi. 31 Mbaʼ ghəshi caslatishi tə məgapaa pəərə ghən va lə ghur ghəwə ni, njasa niy gəzanakə Kwa sləkəpə va kaa Muyisə.

Muyisə nighə sləni gaska gamtaʼwal sa kərəta na

32 Ava tsəgha kərəta gwanata tsa məni sləni la pi tsa dza Kwa sləkəpə nza ti, gaska gamtaʼwaləə kumə lə Kwa sləkəpə. War njasa niy gəzanakə Kwa sləkəpə va Kaa Muyisə niy mənti ka Izərayel sləni va. 33 Dzəghwa mbaʼ ghəshi ɓanakə shiy məni pi tsa dza Kwa sləkəpə vaa nza ti kaa Muyisə: Shi dza məndiy la gaska va li shi, lə shi mbə: Shiy hasli shiy mbə, mbaʼ shighu mbə jakə jakə ni, mbaʼ zlaŋəlihi mbə, mbaʼ shəlhi mbə, mbaʼ shiy sərəə dzati shighu mbə, 34 mbaʼ shi dza məndiy pəliy dzəkən tə hutahi gemim ləvəti məndi lə shi ghəm ni, mbaʼ hutahi ka bərci ta pəlishi dzəkən, mbaʼ gwadə tsaa təhəvəri pi, 35 mbaʼ sərndəkə tsa nza shiy ci sla kiri va kwa, lə getesli ci, mbaʼ shiy kəli ci, 36 mbaʼ tabəl tsa mbəɓa lə shi ti gwanashi, mbaʼ peŋ tsa dza məndiy vəli kaa Hiyala, 37 mbaʼ shiy fə gərkuwahi mənti məndi tə tsahi mbəzə shamshama kama kaɓə mbə shi, lə gərkuwahi ci njasa sləkatishi məndi, lə shi dzar ti gwanashi, mbaʼ in tsaa tsə gərkuwahi, 38 mbaʼ pi ta Hiyala tsa mənti məndi tə mbəzə kwa shamshama, mbaʼ in tsaa shəkəə dzəmbə ghən ndə ta fəə dzəmbə sləni Hiyala, ya dzəkən shiy ta ghəra sləni Hiyala li shi, mbaʼ shiy zən nja urdi ta ndishi kaa Hiyala, mbaʼ gwadə tsaa kəla pi tsaa dzəmbə pi tsa nza Kwa sləkəpə ti, 39 mbaʼ pi tsaa ndi shiy kaa Kwa sləkəpə tsa mənti məndi tə mbəzə ghəm na, lə getesli ci, mbaʼ shi ci gwanashi, mbaʼ tsahi tsati məndi nja zləku ta ndi shiy ti shi, mbaʼ tsaghwa lə pi tsa dza məndiy fə ti, 40 mbaʼ shi tsatsa ni dza məndiy ha ngula dzar vəgha gaska va li shi, mbaʼ shəlhi nzə, lə shi dza məndiy fə shiɗəshiɗə shiy dzəghwa shi, mbaʼ gwadə tsa miy pi tsaa dzəghwa ngula va, mbaʼ ghur nzə, mbaʼ məteŋiŋ nzə lə shi dza məndiy ghəra sləni tə pi tsa nza Kwa sləkəpə ti gwanashi, gaskaa kumə lə Kwa sləkəpə. 41 mbaʼ kubeŋer sləni mbə makwaghwa ta ghəra sləni mbə gaska Kwa sləkəpə, mbaʼ kubeŋer dza Aruŋ ndə ta Hiyalaa ghəra sləni Hiyala li shi, mbaʼ ni dza ndərazhi ciy pa ta ghəra sləni ka ta Hiyala li shi. 42 War njasa niy gəzanci Kwa sləkəpə va kaa Muyisə niy mənti ka Izərayel sləni va gwanata. 43 Dzəghwa Muyisə ki, mbaʼ nata sləni mənti ghəshi va gwanata, war njasa gəzəkə Kwa sləkəpə va ghəshi mənti. Dza na ki, mbaʼ təfanatishi miy.