Gəzə kumaa dzəkən pi tsaa ta Hiyala, mbaʼ tsaghwa yam
38
Dza Besalel diɓa mbaʼ dəʼuti pi tsaa ndi shiy kaa Kwa sləkəpə tə shighu Akasiya. Kutiŋ tə basa mbaʼ vəli dəvə kutiŋ bitə tsa ci dzati dzati, tsəgha bəŋw tsa ci diɓa. Yimyim niy nza bəlahi ci faɗanashi. Bitə tsa ciy dzəta ghumə na, kutiŋ tə bazli mbaʼ vəli dəvə kutiŋ. 2 Mbaʼ manati shiy nja təlimim tə miy bəlahi faɗə ni va məkə məkə tə ghən. Shi vay, yim ka shiy kutiŋ niy nza ghəshi lə pi tsaa ta Hiyala tsa va. Dza na mbaʼ vasakən mbəzə ghəm na kən shi. 3 Dza na mbaʼ vasəti shiy ghəra sləni tə pi tsaa ta Hiyala tsa va gwanashi: kwekwer ta pa pəsər, mbaʼ shiy həlɓə shiy, mbaʼ hupehuperiy məsə miymiy, mbaʼ shiy i sliw, mbaʼ shiy ndi urdi ti shi. Tə mbəzə ghəm na niy vasəti na shi va gwanashi. 4 Dza na mbaʼ tsavəgha shiy nja zləku tə mbəzə ghəm na dzar vəgha pi tsa va, takə takə, kafə na ta mətsəni ci paʼa mbə jipə. 5 Dza na mbaʼ vasati jaʼwahi dzar tə miy bəlahi faɗə ni va tə shi tsati na va tə mbəzə ghəm na, ta i getesli dzəvəri mbə shi. 6 Dza na mbaʼ fəɗivə getesli tə shighu akasiya, mbaʼ vasakən mbəzə ghəm na kən shi. 7 Dza na mbaʼ ighə getesli va dzar mbə jaʼwahi dzar vəgha slərpəhi pi tsaa ta Hiyala tsa va, ta mbəə ɓə pi tsa va ti shi. Tə shighu niy dəʼuti na pi tsa va, lə hur niy nza na mbə.8 Dza na mbaʼ vasəti tsaghwa mbaʼ pi tsaa fə nzə tə mbəzə ghəm na. Tə nighə məti tsa miʼiy niy nza miy gaska gamtaʼwaləə kumə lə Kwa sləkəpə va niy vasəti məndi tsaghwa va.
Ngula dzar vəgha gaska gamtaʼwal nza Kwa sləkəpə mbə
9 Dza na mbaʼ sliy ngula dəzlətsəɓə dzar vəgha gaska gamtaʼwal nza Kwa sləkəpə va mbə, mbaʼ tsati shiy fə ghala ngula va lə ghur məgapa leŋ ka bərci. Dza kwa bəlaa dzəghwa həciy, basa bakəmətsəkə cifəti niy nza bitə tsa shi va. 10 Mbaʼ mənti shəlhi bakəmətsəkə lə shiy sərəə dzati shiɗəshiɗə shi bakəmətsəkə tə tsahi mbəzə ghəmə ni. Dza na mbaʼ mənti shiy jakə shəlhi va lə shiy kəlaʼu shiy ti shi tə tsahi gəna, ta kəlaʼu shi tsatsa ni va dzar ti shi. 11 Dza kwa bəlaa dzati kwa muw diɓa na, war tsəgha niy nza bitə tsa shi va, tsəgha shəlhi va, tsəgha shiy kəlaʼu shiy va lə shiy jakə shəlhi va, zhini tsəgha shi məntishi məndi li shi diɓa. 12 Dza kwa bəlaa dzəvəri mərkwiy, basa məŋ lə bakə mbaʼ bazli kutiŋ niy nza bitə tsa shi tsati na va. Shəlhi na, məŋ, tsəgha shiy sərəə dzati shiɗəshiɗə shi. Shiy jakə shəlhi va lə shiy kəlaʼu shiy ti shiy, tə tsahi gəna niy nza ghəshi. 13 Dza kwa ghumə, kwa pi tsa nza miy pi tsaa dzəghwa pi tsa vay, basa məŋ lə bakə mbaʼ bazli kutiŋ niy nza bitə tsa ngula va. 14 Bazli mbərfəŋ, mbaʼ vəli dəvə kutiŋ shi tsatsa ni va tar nahuti bəla miy pi tsa va, mbaʼ shəlhi mahəkanə, mbaʼ shiy sərəə dzati shiɗəshiɗə shi mahəkanə. 15 Tar nahuti bəla diɓa na, bazli mbərfəŋ mbaʼ vəli dəvə kutiŋ niy nza bitə tsa shi tsatsa ni va, mbaʼ shəlhi mahəkanə lə shiy sərəə dzati shiɗəshiɗə shi. Tsəgha niy nza ghəshi tar nahuti bəla lə tar nahuti. 16 Shi tsatsa ni va hay məndi ngula va li shiy, tə ghur leŋ ka bərci niy tsatishi na gwanashi. 17 Shiy sərəə dzati shiɗəshiɗə shəlhi va na tə mbəzə ghəm na. Ma shiy kəlaʼu shiy lə shiy jakə shəlhi va na, tə tsahi gəna. Dzar tə miy shəlhi va məkə tə ghən na, mbaʼ vasakən tsahi gəna. Shəlhi hay məndi ngula va li shi gwanashiy, tə tsahi gəna niy mənti məndi shiy jakətishi. 18 Ka tsa shiy niy tsati na gwadə tsa miy pi tsaa dzəghwa ngula va. Tə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur məgapa leŋ ka bərci niy tsati ghəshi. Bəŋw tsa ciy, basa cifə niy nza na, bitə tsa ciy dzəta ghumə na, basa kutiŋ mbaʼ vəli dəvə kutiŋ. Tsəgha niy nza bitə tsa ciy dzəta ghumə yim lə bitə tsa shi tsatsa ni va hati məndi ngula va li shi. 19 Tə shəlhi mənti məndi faɗə tə mbəzə ghəm na niy sərati məndi gwadə tsa va, mbaʼ məndi mənti shiy sərəə dzati shiɗəshiɗə shi faɗə tə mbəzə ghəm na diɓa. Ma shiy kəlaʼu shiy, lə shi jakəti məndi shəlhi va li shi, mbaʼ shi səraghwam kwa ghən shi na, tə tsahi gəna. 20 Ya nima shi laghwa məndi kwa hiɗi ta la pi tsa nza Kwa sləkəpə va mbə lə ta ha ngula dzar vəgha vay, tə mbəzə ghəm na niy nza ghəshi.
Ɗaŋ tsa shi ghərahu məndi sləni li shi
21 Avanashi ɗaŋ tsa shi yiɗəhu məndi ta la pi tsa dza Kwa sləkəpə vaa nza mbə, pi tsa dza məndi vaa fə sərndəkə tsaa ndəgha fəti ta sla kiri mbə. Muyisə niy gəzanshi na mbəra shi va kaa mbəzli mbə takə tsa Levi. Itamar zəghu Aruŋ ndə ta Hiyala niy nza dikə tsa sləni va. 22 Shiy niy gəzanakə Kwa sləkəpə va mənishi gwanashi tsa shi kaa Muyisəy, cesl niy məntishi Besalel zəghu Uri, jijiy Hur mbə takə tsa Zhuwda. 23 Kwasəbə niy nza Uhuliyavə zəghu Ahisamakə mbə takə tsa Daŋ. Uhuliyavə tsa vay, fəɗi hərezli, ka tsasli pa shiy dzəti shiy, ka tsa shiy tə ghur məgapa ghəwə ni, lə ni ghəm ni mbaʼ ni ngezhezhi ni, mbaʼ leŋ, niy nza sləni ci. 24 Gwanata tsa mbəzə shamshama na yiɗəhu məndi ta sləni pi tsa nza Kwa sləkəpə va mbiy, Ka Izərayel niy vəlanati na kaa Kwa sləkəpə. Kilu bələku bələku məŋ niy nza na. Lə shiy niy bərkə məndi shəndəkə tsa shiy mbə pi tsa nza Kwa sləkəpə va niy bərkəti məndi. 25 Gəna tsəhəti mbəzli mbərati məndi va mbə hulfə ka Izərayeliy, kilu bələku bələku mahəkanəmətsəkə mbaʼ məŋ lə mbərfəŋ ghən kən mbaʼ gramə bələku bələku mbərfəŋ mbaʼ cifəmətsəkə ghən kən niy nza na. Lə shiy niy bərkə məndi shəndəkə tsa shiy mbə pi tsa nza Kwa sləkəpə niy bərkəti məndi. 26 Gəna vay, gənaa niy tsəhəti ka Izərayel mbərati məndi va, mbaʼ piya shi mənti bakəmətsəkə ka dzəmə niy nza na. Mbəzli bələku bələku kwaŋəmətsəkə mbaʼ mahəkanə ghən kən, mbaʼ bələku bələku cifə mbaʼ cifəmətsəkə ghən kən niy nza ghəshi gwanashi tsa shi. Ɗi naa gəziy, gəna gramə cifə niy tsəhəti ndə kutiŋ. 27 Gəna kilu bələku bələku mahəkanəmətsəkə niy yəɗəhu məndi ta vasə shiy sərəə dzati shiɗəshiɗə shəlhi bələku, ta la pi tsa nza Kwa sləkəpə va mbə, mbaʼ niy dzati shəlhi sərə məndi va gwadəə dzəti shi. Ɗi naa gəziy, gəna kilu mahəkanəmətsəkə yiɗəhu məndi ta shiy sərəə dzati shəl kutiŋ. 28 Ma naa tərə va gəna kilu məŋ lə mbərfəŋ mbaʼ gramə bələku bələku mbərfəŋ mbaʼ cifəmətsəkə ghən kəniy, ta məni shiy kəlaʼu shiy dzəti shəlhi, lə shiy jakə shəlhi, mbaʼ ta vasə shiy dzəkən shi kwa ghən shəlhi niy yəɗəhu məndi nava. 29 Gwanata tsa mbəzə ghəm na tsəhəti ka Izərayeliy, kilu bələku bələku bakəmətsəkə, mbaʼ bələku mbaʼ bakəmətsəkə faɗəti ghən kən niy nza na. 30 Mbəzə ghəmə na vay, avanashi shiy niy mənəhu məndi li: shiy sərəə dzati shiɗəshiɗə shəlhi miy gaska gamtaʼwaləə kumə lə Kwa sləkəpə, mbaʼ pi ta Hiyala tsa tə mbəzə ghəm na, mbaʼ shi nja zləku ni va, mbaʼ shi ghəra məndi sləni tə pi ta Hiyala li shi gwanashi, 31 mbaʼ shiy sərəə dzati shiɗəshiɗə shəlhi hay məndi ngula li shi, mbaʼ niy sərəə dzati shəlhi miy pi tsaa dzəghwa ngula va, mbaʼ ya nima shi laghwa məndi kwa hiɗi ta la pi tsa nza Kwa sləkəpə va mbə, mbaʼ shi laghwa məndi kwa hiɗi ta ha ngula va li shi.