kumaa dzəkən sərndəkə sla kiri.
37
Dzəghwa Besalel mbaʼ dəʼuti sərndəkə tsaa ci sla kiri tə shighu akasiya. Bitə tsa ci dzati dzatiy, vəli dəvə bakə mbaʼ reta. Buŋ tsa ci na, vəli dəvə kutiŋ lə reta, bitə tsa ciy dzəta ghumə na, vəli dəvə kutiŋ lə reta. 2 Dza na mbaʼ vasay kwa hur ci lə tə hum ci, lə mbəzə kwa shamshama kala kaɓə mbə. Dəzlətsəɓə ghəci ghaslay dzar tə miy ci lə mbəzə kwa shamshama. 3 Dza na mbaʼ vasati jaʼwahi faɗə tə mbəzə kwa shamshama dzar tə miy bəlahi ci faɗanashi, bakə tar nahuti bəla, bakə tar nahuti. 4 Dza na mbaʼ fəɗivə getesli Akasiya bakə, mbaʼ vasakən mbəzə kwa shamshama kən shi. 5 Dza na piyəkə ighəshi dzar mbə jaʼwahi vəgha bəlahi sərndəkə tsa va va, ta mbə məndiy ɓə ti shi.6 Dza na mbaʼ vasəvə gal tsaa kəəli sərndəkə tsa va tə mbəzə kwa shamshama kala kaɓə mbə. Bitə tsa ciy, vəli dəvə bakə lə reta, bəŋw tsa ci na, vəli dəvə kutiŋ lə reta. 7 Dza na, mbaʼ vasəvə Sherubeŋhi bakə tə mbəzə kwa shamshama, mbaʼ fatishi dzar tə bəlahi bakə tə miy gal tsa va. 8 Kutiŋ tə miy nahuti bəla, kutiŋ tə miy nahuti sherubeŋhi va. Nahə ghəshi ka shiy kutiŋ lə gal tsa miy sərndəkə tsa va, dzar tə miy bəlahi ci va bakə ni. 9 Ya tsama mbə sherubeŋhi vay, dza kwa tsahuti niy nza kuma ci. Ma nighə pi tsa shi na, kən gal tsa miy sərndəkə tsa va, mbaʼ ghəshi pəlakən bəkəbəkəhi shi ta ndəghu ci.
kumaa dzəkən tabəl tsa ka məndiy fə peŋ ti kaa Hiyala
10 Dza Besalel mbaʼ dəʼuti tabəl tə shighu akasiya. Bitə tsa tabəl tsa va dzati dzatiy, vəli dəvə bakə, bəŋw tsa ci na, vəli dəvə kutiŋ, bitə tsa ciy dzəta ghumə na, vəli dəvə lə reta. 11 Dza na mbaʼ vasakən tsahi mbəzə shamshama kama kaɓə mbə shi kən, dəzlətsəɓə ghasləti lə mbəzə kwa shamshama dzar tə miy tsa ci. 12 Dza na, mbaʼ kəəsəti shəɗeshəɗer ci faɗanashi lə shighu ɓəleʼi ɓəleʼi ni, nja dəvə bəŋw tsa shi, mbaʼ ghasləti shighu va dəzlətsəɓə dzar tə miy tsa shi lə mbəzə kwa shamshama. 13 Dza na mbaʼ vasəvə jaʼwahi faɗə tə mbəzə kwa shamshama, mbaʼ fafatishi dzar tə miy bəlahi ci faɗanashi, dzar vəgha shiɗəshiɗə ci va faɗanashi 14 Jaʼwahi vay, ndəku vəgha pi tsa kəəsəti məndi va shəɗeshəder tabəl tsa va niy nza ghəshi, ta i getesli dzar mbə shi, ta ɓə tabəl tsa va ti shi. 15 Dza na, mbaʼ fəɗivə getesli akasiya bakə, mbaʼ vasakən mbəzə kwa shamshama kən shi ta ɓə tabəl tsa va li shi. 16 Dza na diɓa, mbaʼ vasəti shi dza məndi ta ghəra sləni tə tabəl tsa va li shi: kwekwer tehəteleʼi tehəteleʼi ni, mbaʼ shiy sa shiy, mbaʼ ghulpəhi, mbaʼ shiy ta shəkə tay tsa dza məndiy vəli kaa Hiyala kwa shi. Shi va gwanashiy, tə tsahi mbəzə shamshama kama kaɓə mbə shi niy nza ghəshi.
kumaa dzəkən Shiy fə gərkuwa
17 Dza Besalel diɓa mbaʼ vasəvə mbəzə kwa shamshama kala kaɓə mbə, mbaʼ pəsliti shiy fə gərkuwahi ti shi. Jakə ghəshi ka shiy kutiŋ lə səɗa shi, mbaʼ divədivi shi, mbaʼ hupehuper ti shi, mbaʼ dəghesler ti shi, mbaʼ ghaslə tsa ti shi nja mbərə ghu. 18 Kwaŋ niy nza divədivi tə na tə jipə va gəta. Dividivi mahəkanə tarkə, mahəkanə tarkə. 19 Ya tə nama dəvə mbə divədivi kwaŋ ni vay, a hupehuper niy nza ti mahəkanə nja ya fə har məndiy amandə pa shi, lə dəghesler mbaʼ shiy nja mbərə ghu ti shi. 20 Tə naa dzati va tə jipə gətay, faɗə niy nza hupehuper nja ya fə har məndiy amandə, lə dəghesler mbaʼ shiy nja mbərə ghu ti shi. 21 Tə pi tsa jikəva divədivi bakə bakə bakə ni va mahəkanə niy dzəti na tə jipə va gətay, a dəghəslə niy nza ti kuraku. 22 Dəgheslər va lə divədivi vay, shiy kutiŋ niy nza ghəshi lə nihuti bəlahi tə shiy fə gərkuwa va. Gwanashi tsa shi vay, tə mbəzə kwa shamshama kama kaɓə mbə shi niy pəslitishi məndi. 23 Dzəghwa na mbaʼ manati gərkuwahi mbərfəŋ tə shiy fə gərkuwahi va, mbaʼ shiy hasli məgapa gərkuwa, mbaʼ kwakwa tsaa kaʼwə pəsər. Tə mbəzə kwa shamshama kala kaɓə mbə niy nza shi va gwanashi. 24 Shiy fə gərkuwahi va lə shi dzar tiy, tə mbəzə shamshama kama kaɓə mbə kiluw mahəkanəmətsəkə cifəti niy vasətishi na.
Gəzə kumaa dzəkən pi tsa ka məndiy ndi shiy zən nja urdi ti
25 Dza na diɓa mbaʼ dəʼuti pi tsaa ndi shiy zən nja urdi tə shighu Akasiya. Yimyim bəlahi ci faɗanashi, bəŋw tsa ci dzati dzati lə bəŋw tsa ci dzar dzar na, vəli dəvə kutiŋ. Bitə tsa ciy dzəta ghumə na bazli kutiŋ. A shiy niy nza dzar tə miy bəlahi ci faɗanashi məkə məkə tə ghən nja təlimim, shiy kutiŋ niy nza ghəshi li. 26 Dza na mbaʼ vasakən mbəzə kwa shamshama kala kaɓə mbə kən pi tsa va mə ghən ci, lə dzar vəgha bəlahi ci gwanashi, mbaʼ kən shi nja təlimimi ni va. Dza na dəzlətsəɓə ghasləti dzar tə miy ci lə mbəzə kwa shamshama. 27 Dza na diɓa mbaʼ vasati jaʼwahi tə mbəzə kwa shamshama tə pi tsa va. Bakə tar nahuti slərpə ci, bakə tar nahuti, njasaa dzəta wəri ci. Ta mbəə i getesli dzar mbə jaʼwahi va ta ɓə pi tsa va ti shi. 28 Getesli bakə ni vay, tə shighu akasiya niy fəɗitishi na, mbaʼ vasakən mbəzə kwa shamshama kən shi. 29 Dza na mbaʼ tati in tsa ɗewɗew tsa ta shəkəə dzəkən ndə ta fəə dzəmbə sləni Kwa sləkəpə, mbaʼ urdi kama kaɓə mbə ta ndi tə pi tsa va.