Səvəri 36

A Kwa sləkəpə ɓanavəshi sənata kuma lə məcaŋa kaa kar Besalel lə Uhuliyavə, mbaʼ nihuti ka sləni ta mbə ghəshiy məni sləni ta məni shi mbə pi tsaa kumə lə Hiyala. Mbəzli vay, war njasaa gəzəkə Kwa sləkəpə dza ghəshiy məni shiy,» kə Muyisə. 2 Dzəghwa Muyisə daʼ harashi kar Besalel mbaʼ Uhuliyavə mbaʼ nihuti ka sləni ɓanavəshi Kwa sləkəpə məcaŋa tərəŋu, mbaʼ ghəshi zləɓavə ghəra sləni va. 3 Dza na mbaʼ ɓanavəshi shi tsəhəti ka Izərayel ta nga gaska Kwa sləkəpə va. Ya tsəgha nzə ki na, war mbə ɓə shi ɗi ghəshi tsəhə niy nza mbəzliy səəkə kaa Muyisə njasa səəmə vici. 4 Dzəghwa ka məcaŋaa ghəra sləni gaska Kwa sləkəpə va gwanashi mbaʼ ghəshi garəti sləni kutiŋ kutiŋ, 5 mbaʼ ghəshi səəkəə gəzanci kaa Muyisə, a kə ghəshi kaa ngəci na: «Ɗaŋshi ɓə mbəzli shiy səəkə ta məni sləni gəzəkə Kwa sləkəpə va,» kə ghəshi. 6 Dza Muyisə mbaʼ gəzanshi kaa mbəzli ta zlapə tə pi tsa nza ghəshi va, nəghətaa ndə ya zal, ya mali, zhiniy ɓə vəliy səəkə ta sləni gaska Kwa sləkəpə va. Dza mbəzli ki, mbaʼ ghəshi garəti ɓə vəli shiy səəkə. 7 Sa niy nza shi ɓəkə məndi va ta sləni məkə, paʼ ka tərə ghəshi.

Njasa lati məndi gaska kən pi tsa nza Kwa sləkəpə ti

8 Dzəghwa ka sləniy guraa mbata sləni ka məni pi tsa dza Kwa sləkəpə vaa nza ti ki: Dza ghəshi mbaʼ ghəshi tsati gwadəhi məŋ lə ghur leŋ ka bərci jakə lə ghur məgapa ghəwə ni, mbaʼ ni ghəm ni, mbaʼ ni ngezhezhi ni. Mbaʼ ghəshi ghaslətishi lə sherubeŋhi. 9 Gwadəhi vay, yim yim niy nza ghəshi. Bitə tsa ci kutiŋiy, basa mbərfəŋ niy nza na, bəŋw tsa ci na, basa kutiŋ. 10 Dza ghəshi mbaʼ ghəshi jakəti gwadəhi va cifə. Zhini tsəgha ghəshi mənti lə ni cifə ni va tərə diɓa. 11 Dza ghəshi mbaʼ ghəshi manati ghur məgapa ghəwə ni dzar tə miy kwa cafa gwadə tsa kwataŋa gwadəhi jakə jakə ni va. Tsəgha ghəshi mənti lə kwa taŋa gwadə tsa kwa baka gwadəhi jakə jakə ni va diɓa. 12 Dzəghwa ghəshi mbaʼ ghəshi cacaslati ghur va Cifəmətsəkə dzar tə miy nahuti bəla kwa taŋa gwadəhi jakə jakə ni va cifə ni, zhini tsəgha dzar tə miy nahuti bəla kwa baka va. Ngula kutiŋ na niy nza na dzar kwa jipə ghur tə gwadəhi va va bakanashi. 13 Dza ghəshi mbaʼ ghəshi vasəti shiy kəlaʼu shiy tə mbəzə kwa shamshama, mbaʼ ghəshi jakəti gwadəhi bakə ni va li shi. Ghalaɓa kiy, pi kutiŋ dza gaska kən pi tsa dza Kwa sləkəpə vaa nziy mbəə nza.

14 Dza ghəshi diɓa mbaʼ ghəshi tsati gwadəhi məŋ lə tan tə shiti kwiy ta zhiniy pəlishi dzəkən pi tsa dza Kwa sləkəpə vaa nza mbə. 15 Bitə tsa gwadə kutiŋiy, basa mbərfəŋ, mbaʼ bazli kutiŋ niy nza na, bəŋw tsa ci na, basa kutiŋ. Gwadəhi məŋ lə tan ni vay, yimyim niy nza ghəshi gwanashi. 16 Dza ghəshi jakə ghəshi jajakəti gwadəhi va. cifə nihuti, kwaŋ nihuti. 17 Dza ghəshi mbaʼ ghəshi manati ghur cifəmətsəkə dzar tə mətsəni tsaa kəray va mbə kwa taŋa gwadəhi jakə jakə ni va, zhini cifəmətsəkə ghəshi caslatishi dzar tə mətsəni tsaa kəray va mbə nihuti va. 18 Dza ghəshi vasə ghəshi vasəvə shiy kəlaʼu shiy cifəmətsəkə tə mbəzə ghəm na ta jakə gwadəhi va, ta mbə gaska kən pi tsa va vaa nza ka shiy kutiŋ. 19 Dzəghwa ghəshi diɓa, mbaʼ ghəshi jakəti hutahi gemimə ləvətim lə shi ghəm ni ta pəlishiy dzəkən gaska gamtaʼwal va diɓa, zhin kaa nihuti hutahi ka bərci kən ni va diɓa.

20 Dza ghəshi mbaʼ ghəshi jajakəti shighu akasiya ta ɓə bərci kaa pi tsa dza Kwa sləkəpə vaa nza mbə, mbaʼ ghəshi fiyshi məgarə məgarə. 21 Shighu jakə jakə ni va kutiŋiy, basa bakə mbaʼ bazli kutiŋ niy nza bitə tsa shi dzar dzar. Bəŋw tsa shi dzəmə dzəmə na, vəli dəvə kutiŋ mbaʼ reta. 22 Shighu məgarə vay, lə nihuti shəghu bakə niy kəəsətishi məndi, mbaʼ tsahuti pərikə, mbaʼ tsahuti pərikə. Tsəgha niy jajakəti ghəshi shighu ɓə bərci va kaa pi tsa dza Kwa sləkəpə vaa nza mbə gwanashi. 23 Shighu jakə jakə ni vay, bakəmətsəkə niy fəfiyshi ghəshi dza kwa naa dzəghwa həci bəla pi tsa va. 24 Mbaʼ ghəshi vasəti shiy faɗəmətsəkə tə tsahi gəna ta sərəshiy dzəti miy shighu. Bakə bakə bakə ta dzati miy shighu bakə ni va kəsəti ni məgarə va shighu bakəmətsəkə ni. Tsəgha tsəgha ti shi gwanashi. 25 Ta fəshi dza kwa kwa baka bəla pi tsa va njasaa dzati muwiy, bakəmətsəkə niy mənti ghəshi shighu jakə jakə ni, 26 mbaʼ ghəshi mənti shiy sərəə dzati miy shighu faɗəmətsəkə tə tsahi gəna. Ya nima shighu jakə jakə ni na, shiy bakə ta sərəə dzati miy shighu. Tsəgha tsəgha ti shi gwanashi. 27 Ta fəshi dza kwa na liy hum bəla pi tsa va, dza kwa mərkwiy, shighu jakə jakə ni kwaŋ niy mənti ghəshi. 28 Mbaʼ ghəshi zhiniy fiy nihuti shighu jakə jakə ni bakə ta nza ka shəlhi gaska kən pi tsa va va dziy liy hum diɓa. 29 Niva shighuy, lə ngula kwa shi niy nza ghəshi takə takə, ma mə ghən na, mbaʼ ghəshi jikəshi kwa tsahi nja jaʼwa. Tsəgha niy jakəti ghəshi shighu va bakanashi, ta nza ghəshi ka shəlhiy jihəti gaska kən pi tsa va. 30 Kwa pi tsa dziy liy hum vay, dəghəsə niy nza shighu jakə jakə ni tsəgha ki, mbaʼ shi məntim tə tsahi gəna ta sərəshiy dzati miy shighu, məŋ lə kwaŋ. Bakə bakə bakə ta shighu jakə jakə ni va.

31 Dza ghəshi mbaʼ ghəshi fəɗivə shighu Akasiya cifə. Mbaʼ ghəshi zlaŋələghəshi dzar mbə shighu jakə jakə ni va dza kwa kwa taŋa bəla gaska kən pi tsa va va. 32 Tar kwa baka bəla gaska va na, zlaŋəlihi cifə, zhini cifə tar na liy hum bəla dza kwa mərkwi. 33 Dza ghəshi mbaʼ ghəshi mənti tsəm ta i dzar mbə jipə shighu jakə jakə ni va, kafə na pəri nahuti bəla gaska va paʼa pəri nahuti bəla. 34 Mbaʼ ghəshi vasakən mbəzə kwa shamshama kən shighu jakə jakə ni va lə kən zlaŋəlihi va. Mən kaa jaʼwahi dza məndiy i zlaŋəlihi va dzar mbə shi tə mbəzə kwa shamshama diɓa.

35 Dzəghwa ka tsa shiy mbaʼ ghəshi tsati gwadə ta kəla pi lə ghur leŋ ka bərci jakə lə ghur məgapa ghəwə ni, mbaʼ ni ghəm ni, mbaʼ ni ngezhezhi ni. Ghaslə ghəshi ghaslətishi lə sherubeŋhi. 36 Dza ghəshi mbaʼ ghəshi fəɗivə shighu Akasiya faɗə ta sərə gwadə tsa vaa dzəti shi, mbaʼ ghəshi vasakən mbəzə kwa shamshama kən shi. Mən kaa shiy kəlaʼu shiy ti shi lə mbəzə kwa shamshama. Dzəghwa ghəshi, mbaʼ ghəshi vasəti shiy faɗə tə tsahi gəna ta fə shiɗəshiɗə shəghu vaa dzəghwashi. 37 Dzəghwa ka tsa shiy, mbaʼ ghəshi tsati gwadə ta kəla pi tsaa dzəmbə gaska va, tə ghur məgapa ghəwə ni, mbaʼ ni ghəm ni, mbaʼ ni ngezhezhi ni, mbaʼ ghur məgapa leŋ ka bərci. 38 Dzəghwa mbaʼ məndi fəɗivə shighu cifə, mən kaa shiy kəlaʼu shiy ti shi, ta kəlaʼu gwadə tsa vaa dzəti shi, mən kaa shiy jakə shighu va, mbaʼ shiy sərəə dzəghwa ghən shi. Vasə məndi vasakən tsahi mbəzəə kən shi va gwanashi, mən kaa shiy ta sərəə dzati Shiɗəshiɗə shighu va tə mbəzə ghəm na.