Njasa ngati məndi pi tsa dza Hyalaa nza ti
(35-40)
kumaa dzəkən vici dəkəva
35
Dzəghwa Muyisə mbaʼ ɓasəti ka Izərayel gwanashi, ma kə kaa ngəshi na: «Avanata kuma ɗi Kwa sləkəpə ghuy məni: 2 Vici kwaŋ pə ghuy dzaa mənti mbə ghəra sləni ghuy, ma kwa mbərfaŋa viciy, Saba na, vici dəkəva. Kaa Kwa sləkəpə pə ghuy dzaa fiy nava vici. Ya wa ntsaa dzaa ghəra sləni fəca vici vay, paslanti tə məndi tsava ndə. 3 Ya kuma nza ghuy lə nziy tsa ghuyiy, nəghətaa ghuy pəhə ya ghu fəca vici saba ma,» kə.Ka Izərayel tsəhə shiy ta nga pi tsa dza Hyalaa nza ti
4 Dza Muyisə ka zhiniy gəzanshi kuma kaa ka Izərayel gwanashi, ma kə na: «Avanata kuma gəzəkə Kwa sləkəpə: 5 “Tsəhəm shiy kwa jipə tsa ghuy kaa Kwa sləkəpə. Ya wa ntsaa tarəkə tsəhə shi va kaa Kwa sləkəpə lə nəfə kutiŋiy, avanashi shi dza naa ɓəə səəkə, ya nima mbə shi ni: Tsahi mbəzə shamshama ni, gəna, mbəzə ghəm na, 6 mbaʼ məgapa ghəwə na, mbaʼ na ghəm na, mbaʼ na ngezhezhi na, mbaʼ məgapa leŋ kuɗəkuɗə na, mbaʼ shiti kwiy, 7 mbaʼ hutahi gemimə ləvətim lə shi ghəm ni , mbaʼ nihuti hutahi ka bərci, mbaʼ shighu fə Akasiya, 8 mbaʼ in tsaa tsə gərkuwa, mbaʼ shiy zən wəzə ta ta in tsaa vərə shi ghəra məndi sləni Hiyala li shi, ya ntsa təravə Hiyala ta sləni nzə, mbaʼ shighu zən nja urdi ta ndishi kaa Hiyala, 9 mbaʼ hərezli unikəsə, mbaʼ nihuti hərezli tə dimə ta nahəshi dzəti shi kwa hati ndə ta Hiyala tsa dikə tsa, mbaʼ dzəti zlipa tə hati ci. 10 Mbəzli ka məcaŋa mbə ghuyiy, nza ghəshi ɓasəshi gwanashi ta məni shi gəzəkə kwa sləkəpə va. 11 Avanashi shi dza ghəshi ta məni: Pətsa dza Hyalaa nziy ti, mbaʼ gaska gamtaʼwal ci lə shiy pəliy dzəkən, mbaʼ shiy kəlaʼu shiy mbəɓa, mbaʼ shighu jikə jikə ni, mbaʼ zlaŋəlihi, mbaʼ məteŋiŋ lə shi dza məndiy fə shiɗəshiɗə shiy dzəghwa shi, 12 mbaʼ sərndəkə lə getesliy ɓə ci, mbaʼ saa kəli, mbaʼ gwadə tsaa təhəvəri pi, 13 mbaʼ tabəl lə getesliy ɓə, mbaʼ shi ti gwanashi lə peŋ tsa vəlanati məndi vəli li kaa Kwa sləkəpə, 14 mbaʼ shiy fə gərkuwahi lə shi dzar ti, mbaʼ gərkuwahi, lə in tsaa tsə gərkuwa, 15 mbaʼ pi tsaa ndi shiy zən nja urdi kaa Kwa sləkəpə lə getesliy ɓə ci, mbaʼ in ta shəkəə dzəmbə ghən ndə ta fəə dzəmbə sləni Hiyala, mbaʼ shiy zən nja urdi ta ndishi, mbaʼ gwadə tsaa kəla pi tsaa dzəmbə pi tsa nza Kwa sləkəpə ti, 16 mbaʼ pi tsaa ndi shiy kaa Kwa sləkəpə lə shi tsati məndi nja zləku tə mbəzə ghəm na ta ndi shiy ti , mbaʼ getesliy ɓə ci, mbaʼ shiy ghəra sləni ti gwanashi, mbaʼ tsaghwa yam lə pi tsaa fə ci, 17 mbaʼ shi tsatsa ni ta ha ngula dzar vəgha gaska va li shi, mbaʼ shəlhi lə shi dza məndiy fə shiɗəshiɗə shiy dzəghwa shi, mbaʼ gwadə tsaa kəla miy pi tsaa dzəghwa ngula, 18 mbaʼ məteŋiŋ ta la pi tsa dza Kwa sləkəpəə nza ti, mbaʼ shighu dza məndiy la dzəghwa hiɗi ta ha ngula va lə ghur shi, 19 mbaʼ kubeŋer sləni mbə makwaghwa ta ghəra sləni mbə gaska Kwa sləkəpə, mbaʼ kubeŋer ndə ta Hiyala kaa Aruŋ, mbaʼ ni dza ndərazhi ciy paa dzəkən ghən ta ghəra sləni ka ta Hiyala li shi,” kə Kwa sləkəpə,» kə Muyisə.
20 Sa kəɗanti Muyisə gəzə kuma ki na, dza ka Izərayel mbaʼ ghəshi ndanishi. 21 Ma liy hum ki na, dzəghwa mbəzliy zləɓavə kuma va mbə nəfə shi gwanashi, lə nəfə tsaa vəli və shi, mbaʼ ghəshi ɓəkə na shi vəli kaa Kwa sləkəpə ta la gaska gamtaʼwaləə kumə li, lə ta məni sləni mbəɓa, mbaʼ ta tsa kubeŋeriy ghəra sləni Hiyala kaa ka ta Hiyala. 22 Dza zhər lə miʼi nza vəli mbə nefer shi, mbaʼ ghəshi ɓəkə shi ghaslə məntim tə mbəzə kwa shamshama ghənghən ghənghən, shiy nja kar shi ghaslə dzar tə kubeŋer, mbaʼ shi tə dəvə, mbaʼ shi mbə sləmə, lə shi kwa wəri. Ya wa ndə na, mbaʼ ɓəkə shiy ɓanavəshi kaa Kwa sləkəpə, mbaʼ mənti njasa ka məndiy məni mbə ɓə shiy kaa Kwa sləkəpə. 23 Mbəzliy niy nza məgapa ghəwə na, ya sa ghəm na, ya sa ngezhezhi na, ya məgapa leŋ kuɗəkuɗə na, ya shiti kwiy, ya hutahi gemimə ləvəti məndi lə shi ghəm ni , ya hutahi ka bərci və shiy, mbaʼ ghəshi ɓəkəshi. 24 Mbəzliy niy fiy ya gəna, ya mbəzə ghəm na vəgha bəla ta ɓəshi kaa Kwa sləkəpiy, mbaʼ ghəshi ɓəkə shi va. Ya wa ntsa nza shighu Akasiya vəy, mbaʼ ɓəkəshi ta ghəra sləni va gwanata. 25 Dzəghwa miʼiy guraa mbashi tsa shiy gwanashi, mbaʼ ghəshi tsati shiy lə dəvə shi tə məgapa ghəwə na, mbaʼ na ghəm na, mbaʼ na ngezhezhi na, mbaʼ leŋ kuɗəkuɗə na, mbaʼ ghəshi ɓəkəshi. 26 Nihuti miʼiy guraa mbay tsa shiy na, mbaʼ ghəshi tsakə shiy tə shiti kwiy. 27 Dza mbəzli dikə dikə ni mbə ka Izərayel mbaʼ ghəshi ɓəkə hərezli unikəsə lə nihuti hərezli tə dimə ta nahəshiy dzəti shi kwa hati lə dzəti zlipa tə hati ndə ta Hiyala tsa dikə tsa. 28 Dza ghəshi diɓa mbaʼ ghəshi ɓəkə shiy zən nja urdi, mbaʼ in tsaa tsə gərkuwa lə in tsaa vərə ntsa təravə Hiyala ta sləni nzə, mbaʼ shiy zən nja urdi ta ndishi kaa Hiyala. 29 Ava tsəgha niy tsəhəkə zhər lə miʼi mbə ka Izərayel shiy niy təɓə ta sləni niy gəzanakə Kwa sləkəpə va kaa Muyisə. Mbəzli vay, ghəshi na ka Izərayeləə niy nza vəli mbə nəfə shi, Lə nəfə kutiŋ niy ɓəkə ghəshi shi va kaa Kwa sləkəpə.
Hiyala təravə kar Besalel lə Uhuliyavə ta ghəranta sləni
30 A kə Muyisə kaa ka Izərayel na: «Avanay, Kwa sləkəpə təravə Besalel zəghu Uri, jijiy Hur mbə takə tsa Zhuwda, 31 Dza na mbaʼ təhay lə safə tsa nzə, ta mbə ghəciy sənata kuma, mbaʼ sənashi shiy mbə ghən ci, mbaʼ məcaŋa və ta sənashi məni ya nima shiy. 32 Aa sənashi zəzə məni shiy, ka sənashi vasə mbəzə kwa shamshama, mbaʼ tsahi gəna, mbaʼ mbəzə ghəm na, 33 Aa mbashi tsasli shiy dzəti hərezli ka dimə, ka nahəshi dzəti shiy. Aa mbashi fəɗi shiy tə shighu. Ɗi naa gəziy, shiy tiɓa kala mbashi ghəciw. 34 Zhini diɓay, mbaʼ Kwa sləkəpə ɓanavə məcaŋa ɓəni shiy kaa mbəzli. Tsəgha ghənzə ɓanavə kaa Uhuliyavə zəghu Ahisamakə, ntsa mbə takə tsa Daŋ kuraku. 35 Gwaʼa gwaʼa ɓanavəshi na məcaŋaa fəɗi hərezli ka dimə, lə məcaŋaa tsasli pa shiy, mbaʼ tsa shiy dzəti shiy lə məgapa ghəwə na, mbaʼ na ghəm na, mbaʼ na ngezhezhi na, mbaʼ məgapa leŋ. Zhini mbaʼ ɓanavəshi məcaŋaa tsa shiy. Ya nama sləni məcaŋa məcaŋa nay, a ghəshiy mbata, a ghəshi mbay ghakəvəri shi kiyas kiyas ni diɓa.