Hyalaa ɓanci nihuti hərezli nza kuma sla kiri tsa Hiyala ti shi kaa Muyisə.
34
Ma kə Kwa sləkəpə kaa Muyisə diɓa na: «Baʼuvə hərezli ɓəleʼi ɓəleʼi bakə nja shi kwa taŋa va pəəslivəri gha, nzee tsaslati kumaa niy nza va tə ni kwa taŋa va ti shi. 2 Gumatəvaŋa ta həzlimə mekishi. Pətə mekishiy, nza gha dzəmə ghən dəlagwa Shinay, nza gha ndəghəra məɓa. 3 Nəghətaa ndə dzəmə kwasəbə gha ma. Nəghətaa məndi dzaa nay tsahuti ndə ya dzəghwa timaɓa mə dəlagwa va gwanata tsa nzə ma. Nəghətaa məndi dzaa ndəghu slay, ya kwiy, ya teŋkesli dzar ta dəlagwa va ma,» kə.4 Dzəghwa Muyisə ki mbaʼ baʼuvə hərezli ɓəleʼi ɓəleʼi bakə nja shi kwa taŋa va. Ma tə həzlimə pəətə mekishi ki na, mbaʼ ɓəvə hərezli ɓəleʼi ɓəleʼi ni va bakə ni, dza na mbaʼ dzay dzəmə dəlagwa Shinay njasaa niy gəzanakə kwa sləkəpə va. 5 Dza Kwa sləkəpə mbaʼ səkwata mbə timbətimbəə dzəvəgha Muyisə. Dza naª mbaʼ gəzəkəvəri slən tsa nzə: «Kwa sləkəpə» kə. 6 Dza na diɓa mbaʼ dzarta kwa kuma Muyisə, ka gəzə zlaŋ zlaŋ: «Yən na Kwa sləkəpə, Yən na Kwa sləkəpə, Hiyala kwa wəzə hur lə kwa zhəhur, ka sati nəfə tsee ɓəlaŋəw, ntsa wəzə tsa nzee tərəŋu, kuma gəzəkə yay, ti kee garəɗa. 7 Wəzə tseyiy, paʼa kən jijihi diwi diwi məŋ ka naa nza. Karee səʼwa kuma jikir na, ka səʼwa zhini ghən, ka səʼwa fəti ndə. Nanzə kiy, ntsa nza fəti və na, ka nighee nja ntsa slar tsaw. Mbaʼ pən ɓasə nguvəə dzəkən ndə tə kuma ci jikir nay, paʼa kən ndərazhi ci, lə jijihiy, ka dzar paʼa tar kwa mahəkana, aw na, kwa faɗa jijihi ka naa nza,» kə.
8 Dzəghwa Muyisə ki, kiyaŋu kiyaŋu tsəfəkuy ta fə shəndəkəə dzəti Kwa sləkəpə. 9 Ma kə na: «A Kwa sləkəpə, njana nzana mbaʼ gha məntəra wəzə hurəy, titihu aa cəʼuŋee, a gha dza kwasəbə ghiy. Ya tsəgha na ghən tsa mbəzli ni caslakiy, Pəlataŋəy kuma ghiy jikir na lə kuma mənti ghiy gəmgəm na. Ɓətəŋəy ka mbəzli gha,» kə.
Kwa sləkəpə zhiniy sla kiri lə ka Izərayel
10 Ma kə Kwa sləkəpə kaa Muyisə diɓa na: «Avanara dzaa sla kiri lə ghuy. Ta məni shi maɗaŋa maɗaŋa ni wəzə ni səəkə ma məndiy nashi tə hiɗi dzee kwa kuma mbəzli gha va gwanashi. Shi səəkə ma məndiy nashi ya mbə nima hulfə mbəzli tə hiɗi. Ka Izərayel kwasəbə gha va gwanashiy, ta nashi shi dzee va ta məni wəzə ni tərəŋu ni lə gha dza ghəshi. 11 Ɗimə fəti wəzə ta kuma gəzəŋuy ya na ndatsə, ta tahanti ka Amur, lə ka Kanan, lə ka Hit, lə ka Periz, lə ka Hivi, mbaʼ ka Zhebuz dzee tə kuma ghuy. 12 Ndəghu tə ghuy ghən tsa ghuy va jakəva ka mbəzli kutiŋ lə mbəzli tə hiɗi dza ghuy va ta dzəmbəshi. Kəlaŋa dza ghəshiy nza tə ghuy. 13 Na ka ghuy məni kumay: Ə pə ghuy dzaa ngazlanti pi tsaa slasla shiy kaa mbəreketi shi va, ka baʼwə hərezli i iy ghəshi va, ka slaslanti shighu ləliy ghəshi va ka məjəʼa Akera, mbəri tsa ka ghəshi vaa ta. 14 Əntaa ghuy tsəfəku kwa kuma nahuti hiyala ma, sa nzanay, war yən kutira na sa ɗee ghuy tsəfəku kwa kuma ci. Ka ɗee ghuy tsəfəku kwa kuma nihuti hiyalahiw. 15 Ndəghu tə ghuy ghən tsa ghuy va jakəva ka mbəzli kutiŋ lə mbəzli tə hiɗi va. Ghala vəghu tsa dza ghəshiy ta mbəreketi shi va, ka sla slanshi shiyiy, ta harŋuy dza ghəshi, ka ghuy nighə na, ghuy zəməhu shi ta ghəshi va mbəreketi shi li shi. 16 Mbaʼ pə ghuy ɓanavəshi miʼi kaa ndərazhi ghuy mbə ghyehi shiy, ta ngaɗambə ndərazhi ghuy dza ghəshi mbə ta mbəreketi shi va.
17 Nəghətaa ghuy vasə hiyalahi tə tsahi mbəzə ma.
18 Fə tə ghuy ghən ta məni makwaghwa peŋ tsa kama is mbə. Mbə vici mbərfəŋ na va titi məndi tə tir Abibəy, war peŋ tsa kama is mbə ka ghuy zəmə njasa gəzaŋuyee va. Sa nzanay, tə tir tsa va səvəri ghuy mbə hiɗi ka Ezhiptə.
19 Kwa taŋa zəghu zal tsa dza ndə ngəriy yakiy, tsee na tsava. Kwa taŋa zəghu zal tsa dza saa dza səɗaa yakə, ya sla na, ya təmbəkə na, ya kwə nay, sliyra tə ghuy. 20 Ma na kwa taŋa zəghu zal dza kwantəmcaa yakiy, mbərəti tə ghuy lə gamə aw na lə bəsə. Kala ɗi mbərə pə ghuy na, mbaʼ ghuy ɓərətanti. Ta na kwa taŋa ndərazhiy zhər ghuyiy, mbərəshi tə ghuy.
Nəghətaa ghuy səəkəə dzəghwa kumee batəbatəŋuy ma.
21 Vici kwaŋ pə ghuy dzaa mənti mbə ghəra sləni. Ma tə kwa mbərfaŋa viciy, nza ghuy dəkəva. Ya geʼi lə vəghu tsaa za shiy dzəmbə hiɗi na, ya geʼi lə vəghu tsaa məni shiy səəkə kwaməti na.
22 Məni tə ghuy makwaghwaa məni kwataŋa shiy gha nakə mbə shi zati ghuy, geʼi lə vəghu tsa dza ghuy sla kwataŋa Alkamari. Ma sa ka viya warətay, nza ghuy məni makwaghwaa məni shiy səəkə kwamti.
23 Njasa səəkə piyay, mahəkanə səɗa kə zhər mbə hulfə ghuy gwanashiy dzaa səəkəə dzəghwa kumee yən Kwa sləkəpə Hiyala ka Izərayel gura dikə. 24 Ta tahanti mbəzli dzee kwa kuma ghuy ta mbə hiɗi ghuy nza bəŋw. Geʼi lə vəghu tsa mahəkanə tsa va mbə piya dza ghuy səəkəə dzəghwa kuma Kwa sləkəpə Hiyala ghuyiy, ndə tiɓa dzaa dzəghə zləghu hiɗi ghuyuw.
25 Ghala vəghu tsa dza ghuy slaslara shiyiy, nəghətaa ghuy ɓəra peŋ tsa nza is mbə kwasəbə shi ma. Sliw tsa hənəy ghuy hetihwer ta makwaghwa Pakiy, əntaa ghuy hi li paʼa tə həzlimə mekishi ma. 26 Ɓəkə tə ghuy shiy ghaa nakə mbə shi zati ghuy dzəmbə ciki tsee, Yən Kwa sləkəpə, Hiyala ghuy. Əntaa ghuy ta ugə mbə ʼwa mbəghəta ma,» kə.
27 Ma kə Kwa sləkəpə kaa Muyisə diɓa na: «Tsasliti kuma na. Sa nzanay, ghənzə na kumaa sla kiri kwa jipə tsee lə gha mbaʼ lə hulfə ka Izərayel,» kə. 28 Vici faɗəmətsəkə mbaʼ vərɗi faɗə mətsəkə Muyisə mənti lə Kwa sləkəpə mə dəlagwa Shinay, kala zəmə ma shiy, kala sa ma shiy. Mbaʼ tsaslati kuma məŋ na va pəhəti Hiyala ta nuw ghəshi tə hərezli ɓəleʼi ɓəleʼi ni va. Tə kuma va garəta Hiyala mbə sla kiri lə ka Izərayel.
Muyisə zhəghəva səəkə mə Dəlagwa
29 Dza Muyisə ka zhəkəghwa səəkə mə dəlagwa Shinay lə hərezli ɓəleʼi ɓəleʼi ni va nza kumaa ndəgha fəti dzəkən sla kiri ta dəvə ci. Niy sənay na mbə mbərə na pi tsa mbə kuma ci sa gəzəhu na kuma lə Kwa sləkəpə kuw. 30 Ma sa nay kar Aruŋ lə ka Izərayel gwanashi pi tsa mbə kuma ciy mbərə na, mbaʼ her shi dzashi va kətivaa dzəvəgha. 31 Dza Muyisə mbaʼ harashi. Dzəghwa kar Aruŋ lə mbəzli dikə dikə ni mbə ka Izərayel mbaʼ ghəshi səəkəshiy dzəvəgha. Dza na ka gəzanshi kuma. 32 Ma liy hum ki na, dza nihuti ka Izərayel gwanashi ni ka dzəvəgha. Dzəghwa na ki, ka zhananshi kuma pəhəti Kwa sləkəpə va gwanata mə dəlagwa shinay mbaʼ ɓanavə.
33 Sa kəranti Muyisə gəzanshi kuma na, dza na mbaʼ pəlakən shiy kən kuma ci. 34 Ya humɓa niy dza naa dzəghwa kuma Kwa sləkəpə ta gəzə kuma liy, ɓəʼ ka naa ɓanti shi mbə kuma ci va paʼa sa ka na səvəriy. Səvəriy ma na ta zhananshi kuma ɗi Kwa sləkəpə kaa ka Izərayel na, 35 war mbə nata kuma ci niy nza ghəshi njasa mbərə na. Ka Muyisə dza ki na, mbaʼ zhanambə shiy mbə kuma ci paʼa va sa naa zhiniy dza ta gəzə kuma lə Kwa sləkəpə.